“Erməni vandalizmi” kitabı təqdim edildi

Dünən Heydər Əliyev adına Beynəlxalq Azərbaycan Forumunun Azərbaycan Respublikasındakı nümayəndəliyinin təşkilatçılığı ilə şair-publisist Mirkazım Seyidovun üç dildə: Azərbaycan, rus və ingilis dillərində çapdan çıxmış “Erməni vandalizmi” kitabının təqdimat mərasimi keçirildi. Bir sıra ziyalıların, millət vəkillərinin iştirakı ilə Rəşid Behbudov adına Mahnı Teatrında keçirilən mərasimdə əvvəlcə tədbir iştirakçıları foyedə ermənilərin xalqımıza qarşı törətdikləri vandalizm aktlarına həsr olunmuş fotostendlə tanış oldular.

Tədbirin rəsmi açılışından sonra Rusiyanın Novosibirsk şəhərində Xocalı faciəsinə həsr edilmiş mətbuat konfransının qısa videoyazısı nümayiş etdirildi. Tədbiri giriş sözü ilə açan M. Seyidov bu kitabı ürək ağrısı ərsəyə gətirdiyini söylədi. O bildirdi ki, ermənilərin tarixin müxtəlif dövrlərində azərbaycanlılara qarşı törətdiyi terror və soyqırım aktlarının əks olunduğu kitab 3000 tirajla çap edilib. “Hesab edirəm ki, bu tip nəşrlərin, kitabların xaricdə geniş yayılması dünyada qondarma erməni soyqırımına və təbliğatına tutarlı cavabdır. Xaricdə fəaliyyət göstərən güclü diasporumuz bundan sonra da dövlətimizlə birgə sıx fəaliyət göstərməli, xaricdə ölkəmiz barədə düzgün və ədalətli ictimai rəy yaradılmasına öz töhfələrini verməlidir.”

Daha sonra çıxış edən natiqlər belə bir kitabın məhz ölkədən kənarda – Rusiyada nəşr edilməsi və yayımlanmasının əhəmiyyətinə toxundular. Pedoqoji elmlər doktoru, professor Nurəddin Kazımov kitabın rus və ingilis dillərində nəşr edilməsini vacib addım kimi dəyərləndirdi. O bildirdi ki, Qarabağ müharibəsinin həqiqətləri, ermənilərin azərbaycanlılara qarşı müxtəlif illərdə törətdiyi terror aktları barədə ölkə daxilində kifayət qədər kitablar və nəşrlər işıq üzü görüb. Onun sözlərinə görə sözügedən kitabla və əcnəbi dillərdə nəşr edilən vasitələrlə beynəlxalq ictimaiyyəti məlumatlandırmaq daha vacib fəaliyyətdir: “Arzu edərdim ki, bu kitab daha böyük tirajla çap edilib, ABŞ, Fransa kimi ölkələrdə də yayılsın”.

Millət vəkili Fazil Mustafayev kitabı uydurma erməni soyqırımına qarşı təbliğat vasitəsi kimi yüksək dəyərləndirdiyini və bu tip fəaliyyətlərin ümumi işə böyük fayda verdiyini vurğuladı.

Moskvada yaşayan soydaşımız, hüquqşünas, Rusiyada işıq üzü görən “Azərbaycan və qanunvericilik” qəzetinin baş redaktoru İntiqam Zeynalov M.Seyidovun Rusiyada ictimai fəaliyyətini təqdir etdi. O bildirdi ki, müəllifin kitabları Rusiyada daim maraqla qarşılanır.

Suraxanı rayon məhkəməsinin sədri Araz Kazımov və eləcə də digər çıxış edən ziyalılar belə nəşrlərin ermənilərin türk xalqlarına qarşı törətdikləri soyqırımın dünya ictimaiyyəti tərəfindən tanınmasında əhəmiyyətli vasitə olduğunu qeyd etdilər və müəllifə sonrakı fəaliyyətində yaradıcılıq uğurları arzuladılar. Sonda tədbir iştirakçılarına M. Seyidovun “Erməni vandalizmi” kitabı hədiyyə edildi. Forumun Xocalı soyqırımına siyasi və hüquqi qiymət verilməsi ilə əlaqədar ABŞ Prezidenti Barak Obamaya, Rusiya Federasiyasının Prezidenti D. Medvedevə və bir sıra beynəlxalq təşkilatlara ünvanladığı müraciətin surətləri, Xocalı faciəsinə həsr edilmiş təqvimlər paylandı.

Əfsanə BAYRAMQIZI

Xalq qəzeti.- 2010.- 25 aprel.- S. 6.