Binəqədidə Çernobıl əlillərinə maddi yardım edilmişdir

Dünən Binəqədi Rayon İcra Hakimiyyəti aparatında Çernobıl qəzasının 24-cü ildönümü ilə əlaqədar tədbir keçirilmişdir. Rayon icra hakimiyyətinin başçısı Alı Qocayev bildirmişdir ki, 1986-cı il aprelin 26-da Çernobıl AES-in 4-cü blokunda baş verən qəza bəşəriyyət üçün böyük təhlükə idi. Elə buna görə də o dövrdə Sov.İKP MK Siyasi Bürosunda keçirilən iclasda dahi şəxsiyyət Heydər Əliyev faciə barədə dərhal rəsmi və dolğun məlumat verilməsini tələb etmiş, qəzanın aradan qaldırılması məqsədilə görülən işlərin aşkarlıq şəraitində aparılmasının vacibliyini vurğulamışdır. Ulu öndərimiz göstərmişdir ki, yalnız bu yolla və beynəlxalq yardım vasitəsilə qəzanın zərərini azaltmaq və nəticələrini aradan qaldırmaq mümkündür. Dahi Heydər Əliyev o vaxtkı SSRİ rəhbərliyində olan şəxslər arasında yeganə insan idi ki, fəlakətin miqyasını dəqiq, düzgün dərk etmiş, onunla mübarizə üçün nə etmək lazım olduğunu konkret bildirmişdir.

Natiq çıxışında göstərmişdir ki, Çernobıl qəzasının nəticələrinin aradan qaldırılması məqsədilə yaradılan fövqəladə komissiyanın sədri Heydər Əliyev bu dövrdə də nə qədər uzaqgörən, müdrik, səriştəli olduğunu nümayiş etdirmişdir. Fəlakət bölgəsində xilasetmə işləri başlayan andan dahi öndərimiz bu mürəkkəb problemin həllində əsl fədakarlıq, yüksək rəhbərlik qabiliyyəti göstərmişdir.

Ulu öndərimiz Heydər Əliyev Azərbaycanda hakimiyyətə qayıdandan sonra onun tapşırığı ilə çernobılçılara diqqət artırıldı. Milli Məclisdə müvafiq qanun qəbul edildi və həmin qanun ölkə Prezidenti tərəfindən 1993-cü il dekabrın 6-da imzalandı.

Başçı çıxışında daha sonra bildirmişdir ki, həmin vaxtdan ötən dövrdə respublikamızda çırnobılçılara dövlət səviyyəsində qayğı göstərilir. Onların sosial problemlərinin həllində ardıcıl tədbirlər reallaşdırılır.

Tədbirdə Azərbaycan “Çernobıl” Əlillər İttifaqının Binəqədi rayon şöbəsinin sədri Məhərrəm Ağayev çıxışında çernobılçılara göstərilən dövlət qayğısından, əlillərin himayə edilməsindən, cəmiyyətin isti münasibəti ilə əhatə olunmalarından, maddi problemlərinin həllinə həssaslıqla yanaşılmasından ətraflı danışmışdır.

Tədbirin sonunda M.Ağayevə rayon icra hakimiyyətinin fəxri fərmanı təqdim olunmuş, eyni zamanda bir qrup çernobılçıya maddi yardım edilmişdir.

Vaqif BAYRAMOV

Xalq qəzeti.- 2010.- 27 aprel.- S. 7.