Ermənilərin azərbaycanlılara
qarşı törətdikləri soyqırımla əlaqədar
Türkiyədə fotosərgi nümayiş etdirilmişdir
Azərbaycanın dünya miqyasında da geniş
tanınması, xüsusən də Dağlıq Qarabağ
münaqişəsinin yaranma səbəbləri, ermənilərin
azərbaycanlılara və türklərə qarşı
törətdikləri terror aktları, soyqırımları
barədə məlumatların dünya ictimaiyyətinə
daha əhatəli çatdırılması ilə
bağlı müxtəlif tədbirlər həyata
keçirilir. Ötən il Türkiyənin ən
böyük turizm bölgələrindən biri olan Alanyada
Dağlıq Qarabağla bağlı broşürlərin
çap olunması və orada əcnəbilərə
paylanması böyük rezonans doğurmuşdur. Parlament
Jurnalistləri Birliyi tərəfindən həyata keçirilən
bu aksiya Alanya Qəzetçilər Cəmiyyətinin (AQC) dəstəyi
ilə baş tutmuşdu.
Bu ilin əvvəllərində
Alanya Qəzetçilər Cəmiyyətinin üzvlərindən
ibarət nümayəndə heyəti Bakıya gəlmişdi.
Onlar Bakıda, eləcə də Qubada oldular, ermənilərin
azərbaycanlılara və digər millətlərə
qarşı törətdikləri vəhşiliklərin dəhşətli
nəticələrinə şahidlik etdilər. Bu səfər
zamanı Xocalı soyqırımı və digər faciələrimizlə
əlaqədar Alanyada, Ankarada və Türkiyənin digər
şəhərlərində fotosərgilərin keçirilməsi
barədə razılıq əldə olundu. AzərTAc-da
keçirilən görüşdə bu təşəbbüs
yüksək qiymətləndirildi və tədbirin 31 Mart — Azərbaycanlıların
soyqırımı ərəfəsində keçirilməsi
qərara alındı. Martın 30-da Alanyada, 31-də isə
Türkiyənin paytaxtı Ankarada “Ermənilərin Azərbaycanda
törətdikləri soyqırımları fotolarda” adlı
fotosərgi təşkil olundu.
Azərbaycan Dövlət
Teleqraf Agentliyinin (AzərTAc) təşəbbüsü və
dəstəyi, habelə Parlament Jurnalistləri Birliyinin (PJB)
iştirakı ilə Türkiyə Qəzetçilər
Federasiyası (TQF) və Alanya Qəzetçilər Cəmiyyətinin
(AQC) köməyi ilə keçirilən fotosərgidə ermənilərin
1918-ci ildə Azərbaycanın müxtəlif regionlarında
törətdikləri kütləvi qırğınları,
1990-cı il 20 Yanvar qətliamını, XX əsrin ən dəhşətli
faciələrindən biri olan Xocalı
soyqırımını, habelə 1988-1994-cü illərdə
erməni silahlı birləşmələrinin işğal
etdikləri Azərbaycan torpaqlarında törətdikləri
digər dəhşətləri, eləcə də tarixi-mədəni
abidələrin faciəvi aqibətini əks etdirən fotolar
nümayiş etdirilmişdir. Bu tədbirdə Alanya Qəzetçilər
Cəmiyyətinin sədri Məhmət Əli Dim, AzərTAc-ın
əməkdaşı Xətai Əzizov və PZB-nın sədri
Elşad Eyvazlı çıxış edərək, sərginin
əhəmiyyətindən danışmış, ermənilərin
zaman-zaman türklərə və azərbaycanlılara
qarşı irəli sürdükləri əsassız ərazi
iddiaları, erməni vəhşilikləri barədə ətraflı
məlumat vermişlər.
Bu ilin əvvəllərində
Azərbaycana səfəri çərçivəsində
Qubadakı kütləvi məzarlığı ziyarət
etdiyini vurğulayan Məhmət Əli Dim ermənilərin
1918-ci ildə Azərbaycanda törətdikləri qətliamlardan
dəhşətə gəldiklərini bildirmişdir. O
demişdir ki, sərgini təşkil etməkdə əsas məqsəd
bir daha dünya ictimaiyyətinin diqqətini bu cür faciələrə
yönəltməkdir. Bu şəkillərə baxdıqdan
sonra hamıya aydın olur və faktlar bir daha sübut edir ki, əsl
soyqırımını məhz ermənilər törətmişlər.
Ötən il
broşürləri yayan zaman iki erməni Alanyanın mərkəzi
küçələrinin birində tədbirə mane olmaq istəmişdi.
O zaman bir amerikalı onlara sərt şəkildə
demişdir ki, siz həqiqətən də qəddarsınız.
Bunu faktlar da təsdiqləyir. Tədbirin
açılışına mane olmaq istəyən ermənilər
bir-iki gün qabaq sərgi barədə küçələrdə
asılmış elanları cırıb atmağa cəhd
göstərmişdilər. Lakin onların bu planı da
baş tutmamışdı, əksinə sərgi daha geniş
təşkil olundu və çox böyük rezonans
yaratdı. Tədbirdə iştirak edən AzərTAc-ın əməkdaşı
X. Əzizov bildirdi ki, sərginin açılışında
Alanyanın bələdiyyə sədri Hülusi Doğan da
çıxış etmişdir və o, sərginin təşkilinin
qardaş Azərbaycan ilə Türkiyə arasında dostluq və
qardaşlıq əlaqələrinin bariz nümunəsi
olduğunu diqqətə çatdırmışdır. Sədr
bu cür sərgilərin təşkilinin vacibliyini qeyd
etmiş, rəhbərlik etdiyi qurumun belə tədbirlərə
hər cür dəstək verməyə hazır olduğunu
bildirmişdir.
Sərgini ziyarət edənlər
arasında Avropa Şurası Parlament Assambleyasının sədri
Mövlud Çavuşoğlunun atası Osman
Çavuşoğlu, Azərbaycanın erməni
daşnaklarından azad olunmasında əvəzsiz xidmətləri
olmuş Ənvər Paşanın nəvəsi Osman Mayatəpə,
Alanyanın rəsmiləri, siyasi partiyaların və ictimaiyyətin
nümayəndələri, alman, ingilis, polyak turistləri də
olmuşlar. Bu tədbir bir həftə davam etmişdir.
Martın 31-də isə
Türkiyə Jurnalistlər Federasiyasının, AzərTAc-ın
və PJB-nin təşkilatçılığı ilə
Ankarada “Azərbaycanda erməni zülmü fotoşəkillərdə”
adlı sərgi açılmışdır.
Ermənilərin Azərbaycanda
dinc əhaliyə qarşı törətdikləri qətliamları
əks etdirən sərginin açılışında
Baş nazir Rəcəb Tayyib Ərdoğanın məktubu
oxundu. Bundan başqa, sərgidə Türkiyənin hakim Ədalət
və İnkişaf Partiyasının, MHP, CHP və digər
partiyalarının liderlərinin müraciətləri də
səsləndirilmişdir. Onlar da bu cür sərgilərin təşkilinin
ermənilərin iç üzünün
açılmasında mühüm rol oynadığını
bildirmişlər. Bütün bunlar sərginin yüksək səviyyədə
təşkilindən və keçirilməsindən xəbər
verir. Sərginin açılışında Türkiyə
Nazirlər Kabineti Mətbuat və Nəşriyyat İdarəsinin
baş direktor əvəzi Salih Mələk
çıxış etmişdir. O da bu sərginin
bütün dünyada saxta “soyqırımı” təbliğatı
aparan ermənilərə daha bir layiqli cavab olduğunu
bildirmişdir.
Türkiyə Jurnalistlər
Federasiyasının sədri Atilla Sertel də öz ürək
sözlərini demiş və belə bir tədbirin
böyük əhəmiyyət kəsb etdiyini
vurğulamışdır.
Sərgi aprel ayında da
davam etdirilmişdir.
Ankarada olarkən Avropa
Şurası Parlament Assambleyasının sədri Mövlud
Çavuşoğlu sərginin iştirakçısı olan
azərbaycanlı nümayəndələrlə
görüşmüşdür. Bu görüşdə Azərbaycan–Türkiyə
əlaqələri, 31 Mart – Azərbaycanlıların
Soyqırımı Günü ilə əlaqədar Türkiyədə
təşkil olunmuş fotosərgilərin əhəmiyyəti,
Azərbaycan – AŞPA münasibətlərinin genişləndirilməsində
mətbuatın rolu və digər məsələlər ətrafında
fikir mübadiləsi aparılmışdır. AŞPA-nın
sədri Ankarada və Alanyada təşkil olunmuş sərgilərin
əhəmiyyətindən danışmış, bu cür tədbirlərin
zəruriliyini vurğulamışdır.
Onu da deyim ki, bu tədbirin
davamı olaraq aprelin 22-də İzmirdə də fotosərgi
açılmışdır. İzmir Jurnalistlər Cəmiyyəti,
AzərTAc və PJB-nin birgə təşkil etdikləri “Azərbaycanda
erməni zülmü fotolarda” mövzusunda sərginin
açılışında İzmirdə səfərdə
olan Azərbaycan Respublikası Prezidenti yanında Qeyri-Hökumət
Təşkilatlarına Dövlət Dəstəyi
Şurasının sədri, Milli Məclisin deputatı Azay
Quliyev və İzmir şəhər bələdiyyəsinin sədri
Əziz Kocaoğlu çıxış edərək iki
qardaş ölkədə qondarma “erməni
soyqırımı” təbliğatına qarşı
aparılan işlərdən bəhs etmişlər.
X. Əzizov söhbət
zamanı sərgilərin təşkilində, broşürlərin
çap edilərək yayımlanmasında göstərdikləri
dəstəyə və yüksək səviyyəli təşkilatı
işlərə görə AzərTAc-ın baş direktoru
Aslan Aslanova, bu işdə öz köməkliyini əsirgəməyən
Milli Məclisin deputatları Çingiz Əsədullayevə,
Novruz Aslana, Nazim Məmmədova, Hacı Fərrux Zeynalova, Əhəd
Əhmədova və Alanyadakı iş adamı Xudaverdi Məmmədova
minnətdarlığını bildirdi.
Əliqismət BƏDƏLOV
Xalq qəzeti.- 2010.- 29 aprel.- S. 7.