Qəbələdə
II Beynəlxalq Musiqi Festivalı uğurla başa
çatmışdır
Azərbaycan və dünya musiqisinin Qəbələ
salnaməsi və ya yeni tarixin yeni musiqisi
Musiqinin sərhədi yoxdur, ona görə ki, o, ruhun məhsuludur.
Allahın yaratdığı bəşər övladı isə
ruh daşıyıcısıdır. Bu səbəbdən də
insan səslə sözün vəhdətində min illərdir
yol gəlir. Bu yolun yolçuları isə eyni mərama, məqsədə
xidmət etdiklərindəndir ki, onların sevə-sevə
yaratdıqları bütün zamanlarda dilindən, dinindən,
irqindən asılı olmayaraq bütün insanların ruhuna
hakim kəsilir.
Bu yol Ü.Hacıbəylinin, F.Əmirovun, Q.Qarayevin, F.Şopenin, Baxın, Motsartın və daha neçə-neçə düha sahibinin yoludur. Artıq ikinci dəfədir ki, bu yolun yolçuları Azərbaycanda, gözəl və füsunkar Qəbələdə "üz-üzə" gəlir, görüşüb, öz yaratdıqlarını bir tamaşaçı kimi yenidən dinləyirlər. Təkcə onlarmı...
Son 12 gündə dünyanın aparıcı kütləvi informasiya vasitələri yenidən Azərbaycandan, xalqımızın qonaqpərvərliyindən, Heydər Əliyev Fondunun dəstəyi ilə bəşəri musiqinin yaşaması, təbliği və gələcək nəsillərə çatdırılması naminə təşkil edilmiş Qəbələ II Beynəlxalq musiqi festivalından yazdılar və hələ bundan sonra da çox yazacaqlar.
Heydər Əliyev Fondunun dəstəyi ilə iyulun 25-də Qəbələ şəhərində başlayan ikinci beynəlxalq festivalda klassik musiqi həvəskarları ABŞ, Rusiya, İngiltərə, Fransa və İtaliyadan gəlmiş istedadlı musiqiçiləri, o cümlədən Yuri Başmet, Boris Berezovski kimi korifeyləri, festivalın fəxri qonağı olan Böyük Britaniyanın London Kral Filarmonik Orkestrinin ifasında ölməz əsərləri dinləmək imkanı qazandılar.
Musiqi bayramı Azərbaycan bəstəkarlarının əsərlərinin səsləndirilməsi ilə başlanmışdır. Üzeyir Hacıbəyli adına Azərbaycan Dövlət simfonik orkestrinin ifasında tamaşaçılara bəstəkar Oqtay Zülfüqarovun "Bayram uvertürası", Fikrət Əmirovun "Fortepiano və orkestr üçün konsert"i, Qara Qarayevin "İldırımlı yollarla" baletindən parçalar, Vasif Adıgözəlovun "Fortepiano və orkestr üçün konsert"i təqdim olunmuşdur. Bakı Musiqi Akademiyasının rektoru, festivalın bədii rəhbəri professor Fərhad Bədəlbəyli və M.Maqomayev adına Azərbaycan Dövlət Filarmoniyasının direktoru Murad Adıgözəlzadə konsertin solistləri olmuşlar. Musiqi əsərlərinə Yalçın Adıgözəlov və Azad Əliyev dirijorluq etmişlər. Festivalın ikinci günündə də Azərbaycan Dövlət simfonik orkestri maraqlı konsert proqramı ilə çıxış etmişdir. Sənətçilər klassik musiqi həvəskarlarına Azərbaycan və Avropa bəstəkarlarının əsərlərini təqdim etmişlər.
Əməkdar incəsənət xadimləri Fəxrəddin Kərimov və Azad Əliyevin dirijorluq etdikləri konsertdə bəstəkar Edvard Qriqin "Fortepiano və orkestr üçün konsert", Rauf Əliyevin "Şuşanın dağları başı dumanlı", Fərhad Bədəlbəylinin "Şuşa", Sergey Raxmaninovun "Fortepiano və orkestr üçün konsert", Füzuli Hüseynovun "Kapriççio", Cüzeppe Verdinin "Bolero", Manuel de Falyanın "İspan bağlarında gecələr" əsərləri, Corc Bizenin "Karmen" operasından "Qaraçı" mahnısı səsləndirilmişdir.
Konsertin solistləri Murad Hüseynov, Fəridə Məmmədova, Səidə Tağızadə, Gülnaz İsmayılova, Səbinə Əsədova, Cavid Səmədov və Yeganə Axundova gözəl ifaları ilə tamaşaçıların alqışlarını qazanmışlar.
Proqrama uyğun olaraq iyulun 27-də dünyaşöhrətli Kuba cazmenlərinin konserti də yaddaqalan olmuşdur. Fransada qastrol səfərini başa vuraraq Azərbaycana gələn Kubanın məşhur "Maraco" caz qrupunun 12 nəfərlik heyəti və Bakı Caz Mərkəzinin 5 solisti maraqlı konsert proqramı ilə çıxış etmişlər. Kubalı caz vokalçısı, beynəlxalq müsabiqələr laureatı Maraco və onun rəhbərlik etdiyi eyniadlı qrupun, habelə Bakı Caz Mərkəzinin üzvləri - Azərbaycanın caz ustaları Elçin Şirinov və Ülviyyə Rəhimova, onları konsert boyu müşayiət edən istedadlı saksafonçu Elçin Hüseynli, "Bakustik caz" qrupunun üzvlərindən baş gitaraçı Ruslan Hüseynov, zərb alətçisi Vaqif Əliyevin canlı ifaları tamaşaçılar tərəfindən böyük maraqla qarşılanmışdır.
Festival iyulun 28-də kamera musiqisi
konserti ilə davam etmişdir. Klassik musiqi ifaçısı, əməkdar
artist Validə Rəsulovanın, solistlər Fəridə Məmmədova,
Səidə Tağızadə və Aleksey Meltixin təmsil
etdikləri orkestr Azərbaycan, Avropa və Rusiya bəstəkarlarının
əsərlərini ifa etmişlər.
Beynəlxalq festival çərçivəsində
iyulun 29-da vokal musiqisindən ibarət konsertin təşkili də
böyük maraq doğurmuşdur. Konsertdə Azərbaycanın
tanınmış vokalçıları - əməkdar artist
Gülnaz İsmayılova, beynəlxalq müsabiqələr
laureatları Fəridə Məmmədova, Cavid Səmədov
və Səbinə Əsədova Avropa və rus bəstəkarlarından
Çaykovski, Raxmaninov, Motsart, Verdinin ölməz əsərlərini
səsləndirmişlər. İstedadlı
vokalçıları fortepianoda Bakı Musiqi
Akademiyasının dosenti, beynəlxalq müsabiqələr
laureatı Kəmalə Nemanova müşayiət etmişdir.
Nəhayət, iyulun 30-da Qəbələ
İkinci Beynəlxalq musiqi festivalının təntənəli
rəsmi açılışı olmuşdur.
Prezident İlham Əliyev, Azərbaycanın birinci
xanımı, Heydər Əliyev Fondunun prezidenti, YUNESKO-nun və
İSESKO-nun xoşməramlı səfiri, Milli Məclisin
deputatı Mehriban Əliyeva və ölkəmizdə səfərdə
olan YUNESKO-nun baş direktoru xanım İrina Bokova mərasimdə
iştirak etmişlər.
Heydər Əliyev Fondunun prezidenti Mehriban
xanım Əliyeva festivalın açılışında
çıxış etmişdir.
Ölkəmizin dilbər güşələrindən
birində - Qəbələdə qonaqları salamlayan Mehriban
xanım Əliyeva bildirmişdir ki, bu gözəl şəhər
dünyanın ən qədim sivilizasiyalarından birinin -
Qafqaz Albaniyasının paytaxtı olmuş və hər bir
dövr, hər bir mədəniyyət burada öz izini
qoymuşdur. "Buraya qədəm qoyan hər bir insan əsrlərin
nəfəsini hiss edir. Hazırda dünya xəritəsində
Qafqaz Albaniyası olmasa da, Qəbələ mədəniyyətin
paytaxtı kimi çıxış edir", - deyən Azərbaycanın
birinci xanımı bildirmişdir ki, bu günlərdə
hamımızı bir amil - musiqi birləşdirir.
Mehriban xanım Əliyeva YUNESKO-nun baş
direktoru xanım İrina Bokovaya Azərbaycana gəldiyinə və
bu festivalda iştirakına görə təşəkkür
etmişdir. O, Azərbaycan-YUNESKO əməkdaşlığının
əhəmiyyətini vurğulayaraq bu əlaqələrin
çoxşaxəli olduğunu demişdir. Prezident İlham Əliyevə
gərgin iş qrafikinə baxmayaraq festivalın rəsmi
açılışına qatıldığına görə
minnətdarlıq edən Azərbaycanın birinci xanımı
musiqiçiləri də salamlamış və bu musiqi
bayramının ilk növbədə onların sayəsində
baş tutduğunu diqqətə
çatdırmışdır.
Mərasimdə çıxış edən
YUNESKO-nun baş direktoru xanım İrina Bokova festivala
uğurlar arzulamışdır. Azərbaycana
səfərindən məmnun olduğunu deyən İrina
Bokova bu beynəlxalq festival üçün Qəbələnin
möhtəşəm səhnə olduğunu
vurğulamışdır. "Bu festival
Azərbaycanın zəngin musiqi irsi ilə
tanışlığa şərait yaradır", - deyən
xanım Bokova YUNESKO prinsiplərini hər zaman yüksək
tutduqlarına görə Azərbaycan Prezidentinə və
Mehriban xanım Əliyevaya təşəkkür etmişdir.
Qəbələ Beynəlxalq musiqi
festivalının əhəmiyyətindən danışan
YUNESKO-nun baş direktoru demişdir ki, bu bayram Azərbaycan
musiqisinin ruhunu əks etdirir və gələcəkdə qəlblərin
və düşüncələrin bir araya gəlməsi
üçün bu cür tədbirlər mühüm əhəmiyyət
daşıyır. "Azərbaycan
müxtəlif mədəniyyətlərin qovuşduğu məkandır
və bu festival da həmin mədəniyyətləri ən
yüksək səviyyədə təqdim edəcəkdir",
- deyən İrina Bokova Mehriban xanım Əliyevanın mədəniyyətlərarası
dialoqun möhkəmləndirilməsindəki xidmətlərini
yüksək qiymətləndirmişdir.
İrina Bokova YUNESKO-nun "Qızıl
Motsart" medalını Mehriban xanım Əliyevaya təqdim
etmişdir.
Azərbaycan mədəniyyətinə həsr
olunan videoçarx nümayiş etdirilmişdir.
Sonra konsert proqramı olmuşdur.
London Kral Filarmonik Orkestrinin ifasında Azərbaycan
və Avropa bəstəkarlarının əsərləri səslənmişdir.
Konsetdə Dmitri Yablonski, Yuri Başmet, Emilio Ponsı, Xloe
Hanslip, Fərhad Bədəlbəyli çıxış
etmişlər.
Gecənin sonunda Qəbələnin yay səmasını
möhtəşəm atəşfəşanlıq əlvan rənglərə
boyamışdır.
İyulun 31-də festival öz işini
Fransanın məşhur Paris İzai Kvartetinin kamera musiqisi
konsertinın çıxışı ilə daha da zənginləşdirmişdir.
Solistləri dünyaşöhrətli dirijor və
violonçel ifaçısı Dmitri Yablonski və
tanınmış pianoçu, Bakı Musiqi
Akademiyasının rektoru, xalq artisti Fərhad Bədəlbəyli
olan konsertdə klassik musiqi ifaçıları məşhur
bəstəkar Frans Şubert və İoqannes Bramsın
ölməz əsərlərini səsləndirmişlər.
Böyük Britaniyanın
dünyaşöhrətli London Kral Filarmonik Orkesrtinin avqustun
1-də nümayiş etdirdiyi geniş konsert proqramı da
musiqisevərlərə xüsusi zövq bəxş
etmişdir.
Orkestrin solistlərini amerikalı pianoçu, BMT
yanında Beynəlxalq İncəsənət Akademiyasının
fəxri akademiki, ABŞ-dakı Culian Musiqi Akademiyasının
professoru Oksana Yablonskaya və Azərbaycanın
tanınmış dirijoru xalq artisti, "Şöhrət"
ordenli professor Rauf Abdullayev müşayiət etmişlər.
Klassik musiqi ifaçıları məşhur bəstəkarlar
Pyotr Çaykovskinin "Françeska da Rimini", Fikrət Əmirovun
"Kürd ovşarı", Lüdviq Bethovenin "Fortepiano
və orkestr üçün 5 saylı konsert" və
"Emperor" əsərlərini səsləndirmişlər.
Çıxışlar maraqla
qarşılanmışdır.
Avqustun 2-3-də Böyük Britaniyanın
dünyaşöhrətli London Kral Filarmonik Orkestrinin növbəti
konsert proqramları maraqla qarşılanmışdır.
Konsertin birinci günündə orkestri
skripkaçı, ingilis Xloe Hanslip və İstanbulda
yaşayan azərbaycanlı dirijor Ramiz Məlikaslanov
müşayiət etmişlər. Klassik musiqi
ifaçıları məşhur bəstəkar Feliks
Mendelsonun "Skripka orkestri üçün konsert", Pyotr
Çaykovskinin "Kapriççio", Nikolay
Rimski-Korsakovun "Şahrəzad" əsərlərini səsləndirmişlər.
Növbəti gün isə dünyaşöhrətli
amerikalı violonçel ifaçısı Dmitri Yablonskinin və
Bakı Musiqi Akademiyasının rektoru, xalq artisti,
tanınmış pianoçu Fərhad Bədəlbəylinin
solist kimi çıxış etdikləri konserti ingiltərəli
dirijor Daniel Boyko idarə etmişdir. Konsertdə klassik musiqi
ifaçıları məşhur bəstəkar Şarl Kaml
Sens-Sansın "Violonçel üçün konsert" və
"Fortepiano və orkestr üçün konsert", Corc
Bizenin "Simfoniya do-major" əsərlərini səsləndirmişlər.
Festival çərçivəsində Kral Filarmonik
Orkestrinin musiqiçiləri və festivalı
işıqlandıran yerli və xarici media nümayəndələri
qədim və əsrarəngiz təbiəti ilə fərqlənən
Qəbələ ilə yanaşı, ölkəmizin digər
gözəl diyarı - Şəki ilə də
Festival axşamı isə bir
çoxlarının səbirsizliklə gözlədikləri
konsertlə yadda qalmışdır. Həmin
axşam da Qəbələdə Şopenin qəlbləri riqqətə
gətirən musiqisi dinlənilmişdir. Onun
çoxsaylı sonata, ballada, polonez, mazurka, etüd və
nöktürnləri məzmun etibarilə xalqının həyatının
müxtəlif cəhətlərinə, təbiət mənzərələrinə,
Polşanın qədim tarixi qəhrəmanlıq səhifələrinə
həsr olunmuşdur.
Daha sonra isə Qara Qarayev, Rauf Hacıyev,
Fikrət Əmirov, Firəngiz Əlizadə, Sevda
İbrahimova, Arif Məlikovun əsərləri ifa
edilmişdir. Ancaq həmin gecə dinləyiciləri
ən çox düşündürən isə Mehriban Əhmədova
və Vaqif Mustafazadənin "Düşüncə"si
olmuşdur. Murad Adıgözəlzadə xalq artisti, professor Fərhad Bədəlbəylinin "Dəniz"
əsərini ifa etdikdən sonra isə dəfələrlə
səhnəyə dəvət olunmuşdur.
Heydər Əliyev Fondunun dəstəyi ilə
keçirilən Qəbələ II Beynəlxalq Musiqi
Festivalı avqustun 5-də başa çatmışdır.
Festivalın sonuncu günü Böyük
Britaniyanın dünyaşöhrətli London Kral Filarmonik
Orkestrinin növbəti konserti olmuşdur. Orkestrin
solistlərini məşhur amerikalı pianoçu və
dirijor Dmitri Yablonski və məşhur rusiyalı pianoçu
Boris Berezovski müşayiət etmişlər. Konsertdə bəstəkar Sergey Raxmaninovun
"Fortepiano və orkestr üçün konsert" və
"2 saylı simfoniya" əsərləri səsləndirilmişdir.
Sonda Milli Məclisin deputatı Fəttah Heydərov,
Bakı Musiqi Akademiyasının rektoru professor Fərhad Bədəlbəyli
çıxış edərək II Qəbələ
Festivalının uğurla keçdiyini bildirmiş, bu musiqi
bayramının yüksək səviyyədə təşkilinə
görə dövlətimizin başçısı İlham Əliyevə,
Heydər Əliyev Fondunun prezidenti Mehriban xanım Əliyevaya,
həmçinin festivalda iştirak edən musiqiçilərə
minnətdarlıqlarını ifadə etmişlər.
Festival möhtəşəm atəşfəşanlıqla
başa çatmışdır.
Festivalda yerli və xarici KİV-lərə müsahibələr
vermiş II Beynəlxalq musiqi festivalının bədii rəhbərlərindən
biri olan Dmitri Yablonski, dünyaşöhrətli amerikalı
pianoçu, BMT yanında Beynəlxalq İncəsənət
Akademiyasının fəxri akademiki, ABŞ-dakı Culian Musiqi
Akademiyasının professoru Oksana Yablonskaya, Amerika Birləşmiş
Ştatlarından gəlmiş və festivalın bir çox
konsertlərini uğurla idarə etmiş məşhur dirijor
Daniel Boyko, Böyük Britaniyanın məşhur London Kral
Filarmonik Orkestrinin üzvü Rocer Argenti, Paris İzai
kvartetinin üzvü Yovan Markoviç və başqaları bu
əzəmətli musiqi bayramından, bütövlükdə
Azərbaycana səfərindən aldıqları təəssüratları
bölüşmüş və bundan sonra da məmnuniyyətlə
bu festivala qatılacaqlarını vurğulamışlar.
Xalq qəzeti.- 2010.- 7
avqust.- S. 5.