Qori
seminariyasının Azərbaycan şöbəsinin
yaradıcısı
(əvvəli
qəzetimizin 20 iyun və 11 iyul tarixli saylarında)
3. Cəllad kötüyünə də düzlüklə
...
Bir yandan, içəri təzə
dustaqlar gətirilir, digər yandan da, iki bir-üç bir
ad-familiya ilə çağırıb, harasa
aparırdılar. Yəqin ki, güllələməyə.
İçəri girən bolşevik əsgərinin
yanında bir erməni də olurdu. Erməninin göstərdiyi
adamı Liberman dərhal çölə çıxarıb
güllələnməyə göndərirdi. Mən Firidun bəy
Köçərlini yaxşı tanıyırdım, həm
də çox istəyirdim. Ona dedim:
- Ağa, burada vəziyyət
çox qəlizdir. Ermənilər bizim say-seçmə
adamlarımızı bolşeviklərin əli ilə güllələdirlər.
Ona görə Sizdən acizənə xahiş edirəm,
adınızı gizlədin, yəni deməyin ki, Siz Firidun bəy
Köçərlisiniz.
Firidun bəy təəccüblə,
bir az da qəzəblə mənə baxdı:
- Necə yəni adımı gizli
saxlayım?
- Deyin ki, adım Məmməddir,
ya da Həsəndir. Köçərli famili çox məşhurdur,
ermənilər də tanınmış
adamlarımızın qanına yerikləyib.
Firidun bəy çox sərt
görkəm aldı, qəzəblə dedi:
- Çox ayıb olsun sənə,
gör nə təklif edirsən. Bəyəm insan da yalan
danışarmı?!
Qocaman müəllim Mir Cavadın xatirəsindən:
- Həbs olunanlar arasında o zaman Azərbaycan Mərkəzi
Komitəsinin üzvü Eyyub Xanbudaqovun yaxın qohumu Abbas
Rzaquluoğlu da vardı. Abbas yemək gətirən
bir qadına məktub verir ki, onu Eyyub Xanbudaqova
çatdırsın. Abbas məktubunda
yazır ki, əslində, qatı daşnak olan Liberman
hazırda XI Ordunun xüsusi şöbə rəisi kimi məsul
vəzifə daşıyır. Liberman
yüzlərlə adamı günahlı-günahsız qiyamçı
adı ilə həbs etmişdir. O, gecələr Gəncə
quberniyasının fövqəladə komissarı Həmid
Sultanovdan gizlin xüsusi bir yerdə dustaqlar arasından Azərbaycanın
adlı-sanlı oğullarını seçib güllələyir.
Günahsız tutulanlar arasında Qazax
Seminariyasının müdiri Firidun bəy Köçərli
də var.
Eyyub Xanbudaqov aldığı xəbəri
doktor Nərimanova çatdırır. Azərbaycan
SSR Xalq Komissarları Sovetinin sədri Nəriman Nərimanov təcili
teleqram vurur ki, Firidun bəy Köçərlini həbsdən
azad etsinlər. El yatandan bir az əvvəl
nəzarətçi bağlı qapı arxasından
qışqıra-qışqıra soruşdu:
-Ey, dustaqlar, burda Qazax Seminariyasının müdiri
Firidun bəy Köçərlinski varmı?
Heç kəs dinmədi. Cümşüd qaranlıqda əlilə Firidun bəyi
axtardı. Onun əli mürgüləyən
Firidun bəyin dizinə toxunan kimi diksindi.
-Hə, kimsən? - deyə hövlnak
soruşdu.
-Firidun bəy, nəzarətçi Sizi qapıya
çağırır.
O, dərhal yerindən durdu. Karvansara
tağlarından tuta-tuta qapıya yaxınlaşdı.
Üzünü bağlı qapıya tutub:
-Kimdi, məni soruşan? - dedi.
-Köçərlinski sənsən?
-Bəli.
-Qazax Seminariyasının müdiri?
-Bəli.
Nəzarətçi daha heç nə deməyib
getdi. Firidun bəy gah divarlardan, gah da
tağlardan tuta-tuta yenə geri qayıtdı. Gələ-gələ
"Cümşüd, oğlum, hardasan?"- deyib
əlilə onu axtardı. Cümşüd
ayağa durub onun əlindən tutdu, öz yerində
oturmağa kömək elədi.
-Nə yaxşı yatmışdım, bu nadürüst
hardan gəldi, - deyib nəzarətçinin dalınca deyindi.
-Firidun bəy, yəqin Sizi azad edəcəklər, ona
görə də soruşurlar.
-Yox, oğlum, inanmıram, görünür, növbə
mənimdir, - deyib ciblərini axtardı. Jiletinin sağ cibindən
bir gümüş manatlıq çıxarıb:
-Cümşüd, oğlum, al, - dedi, - sənə
lazım olar, birdən buraxsalar evə gedəndə xərclərsən.
Heyranlıqla altdan yuxarı baxan
Cümşüdə elə gəldi ki, Firidun bəyin son dəqiqələridir.
Ona vəsiyyət edir. O, nə qədər
boyun qaçırdısa Firidun bəy qaranlıqda onun əlini
tapıb gümüş manatlığı ovcuna basdı. Gəncin
təəccüb və şübhələrini dəf etmək
üçün:
- Mən sənin atan rəhmətliyin yaxın dostu idim,
sənə bu gümüş manatlıqdan milyonunu da versəm,
atan Ağaəli bəyin yenə
yaxşılığının əvəzini çıxa
bilmərəm. İnşallah, mənim yazdığım
kitab bir gün, bir fazil şəxsin əlinə keçər,
ol qeyrətli millət oğlu onu çap edər, o vaxt sən
oxuyub, görərsən ki, atan haqqında yazmışam:
"Ağaəlibəy cənablarının bizə artıq
hüsni-xidmətləri olubdur ki, Şamaxı şüərasının
seyr-sülukuna dair bəzi mühüm məlumatı ol cənabın
həmiyyəti ilə kəsb etmişik. Buna
binaən münasib məqam bilib burada ol cənaba izhari - məmnuniyyət
qılmağı gözəl vəzifələrimizdən ədd
edirik".
Sabir də, Tərrah da, Səhhət də
məktublarında dönə-dönə yazardılar ki, Naseh
dostumuz o qədər gözəl xasiyyətli,
xoşqılıq və yaxşı məramlı zatdır
ki, öz həmşəhərlilərinin, onu
tanıyanların cümləsinin dərin hörmət və
məhəbbətini qazanmışdır.
Firidun bəy məhbəsdə olduğunu
unutmuşdu, ürəyini boşaldırdı. Elə bil tələbələri
qarşısında idi, bu neçə gündə dərs
deməməyinin əvəzini çıxırdı. Şirvan şairləri fəslini tədris edirdi.
- Yadımdadır, deyə yanıqlı-yanıqlı
sözünə davam etdi. - Atan mənə millətimizin məşhur
şairi Hacı Seyid Əzim Şirvaninin ölümünə
inşa etdiyi qəzəlini göndərmişdi:
Qan ağla, gözüm, sərvəri dövran getdi,
Sərdəftəri-əhli-fəzlü
ürfan getdi.
Ayineyi-ovqat ol zati-şərif,
Səngi-əcəl ilə sındı əlan
getdi.
Heyrətdəyəm, ey xak, necə
sığdırdın
Ağuşuna, ta o bəhri-Ümman getdi.
Naseh dedi tarixi-vəfatın qəm ilə,
Səd heyf ola Seyyidi-Şirvan getdi.
İndi özün düşün. Gördünmü atan mənə necə təmənnasız
yaxşılıqlar edib. Dərvişin
payı bir yaşıl yarpaq olan kimi, mən də sənə
vur-tut bir gümüş manatlıq verirəm. Eh, bir də
ki, mənim nəyimə gərəkdi, - deyib kədərlə
köks ötürdü. Susdu. Handan-hana:
-Mənimki buraya qədər idi. Yuxuda hər
şey insana əyan olur. İndicə
mürgüləyəndə gördüm ki, məni
buraxıblar. Evə payi-piyada gedirəm.
Qarşımdan gələn qoca, cavan
hamısı təəccüblə üzümə baxıb
deyirlər ki, ey qoca, hələ Qazaxa çox var, piyada gedə
bilməzsən, özünə bir minik tap. Gəncədən
Qazaxa kimi yol boyunca bitən ağ rəngli
qızıl gülləri göstərib deyirəm ki, bu
güllərin ətri mənzil kəsən olacaq. Bu yol məni yormaz. Harda olsam, gərək
səhər dərsə çatam. Uşaqlar məhəttəl
qalmasınlar, məni gözləyirlər... Elə
bu vaxt sənin əlin dizimə toxundu, oyandım. Gör necə də tərləmişəm, qan-tər
içindəyəm.
- Kraxmallı yaxalığını açıb əlini
köynəyin altında gəzdirdi:
- Sən özünü qoru, oğul.
- Cümşüdə təsəlli verdi
və yenidən yuxusuna qayıtdı:
- Oğul, yuxudakı getmək, getməməkdi, ağ rəng qırmızıdı. Azad edilmək, buraxılmamaqdı. Hə, gecə
keçir, hamı yatıb, gəl bir az da
biz mürgüləyək...
Ay fırlanıb karvansaranın dəmir barmaqlı
yanları uçmuş gözlüyünün bərabərində
dayandı. O, hər gecə süd işıqlı iyun
ayını gözlərdi. İlin iki fəslində ona
baxmaqdan, tamaşa etməkdən xüsusi zövq alardı:
bir qışın oğlan çağında, bir də yayın
ortalarında. Hər gecə dəmir
barmaqlıqlar arasında gəlib dayanan ayı görəndə
ruhu səmalara uçar, ana ağuşuna atılan körpə
kimi sonsuz sevinc hissi keçirər, ən bəxtiyar dəqiqələrini
yaşardı. Onu görəndə, sanki,
geniş dünyaya çıxır, karvansara məhbusluğundakı
üfunəti, darısqallığı, nəzarətçi
hədə-qorxusunu, zil qaranlığı belə unudardı.
Yalçın qayalar üstündə qərar
tutan Şuşanı, Gəncə darvazasından bir azca
aralı ata-baba yurdunu, uşaqlıqda sümükatma
oynadığını, ilk gəncliyində tay-tuşları
ilə şeirləşdiyini xatırladı. Ərimgəldidən
lap yaxın görünən az qala "əl
uzatsan çatar" olan Aya, saysız-hesabsız ulduzlara
baxmaqdan doymadığını yada salıb kövrələrdi.
Cümşüd sol böyrü üstə
yatmışdı. Onun məsum gənc
üzündə ayın parlaq şüaları
oynaşırdı. İçəri isti olduğundan
üzündə, boynunda yuvarlanan tər damcıları
aydın görünürdü. Firidun bəy
dəsmalını çıxardıb ehtiyatla
Cümşüdün üzündəki tər
damcılarını hopdurdu. Quru yerdə
uzanan Cümşüd elə şirin-şirin yatırdı
ki, Firidun bəy ona həsəd apardı.
Dönə-dönə gözünü
yumdusa da yata bilmədi. Oturmaqdan kürəyi
qovuşurdu. Uzanmaq istədi. Yer yox idi. Birisi başını
ona tərəf söykəmişdi, digəri
ayağını uzatmışdı. Həsrətlə,
həsədlə uzaqlaşmaqda olan Aya baxmaqdan başqa
çarəsi qalmadı. İndi
dünyada ən çox istədiyi adamla xəyalən
danışırdı.
Firidun bəy: - Evi axtardılarmı, yazı-pozum, bir də
kitablarım amanat, Badisəba.
Badisəba: - Arxayın ol, nə hazır
kitabının, nə də yarımçıq əlyazmalarının
bircə vərəqi də tərpənməyib. Özüm sahmana salmışam.
Firidun bəy: - Məktublar necə, onlara cavab gəldimi?
Şamaxıdan Mir Cəfər Seyidzadə
Sabirin tərcümeyi-halını göndərməli idi.
Badisəba: - Xeyli məktub almışam. Şaiq
Əfəndidən, Üzeyir bəydən, Əhməd
Cavaddan, Təbrizdən, bir də Qum şəhərindən sənə
məktub var. Bağlama da var, deyəsən, əlyazmasıdı.
Açmamışam, özün gəlib
açıb oxuyarsan. Şəkidən Rəşidbəy
Əfəndizadə də məktub yazıb, onu oxudum. Tutulmağından xəbəri yoxdu.
Firidun bəy: - Abbas ağa Nazirin şeirlərini topla,
qayıdanda XX əsr şairlərini işləyəcəyəm.
Cavid Əfəndiyə mənim adımdan məktub
yaz, əsərlərini istə. Hadi necə,
ondan bir xəbər varmı?
Badisəba: - Deyirlər Gəncədə xəstə
yatırmış. Bir gün xəstə
yoldaşlarından birisi qəzetdə onun nekroloquna rast gəlir,
özünə göstərir, halı çox pərişan
olan Hadi o vaxtdan yoxa çıxıb. İmkanın
varsa soruş gör, hardadı. Sən allah,
görüşsən onu da gətir, yazıqdı, Allah bilir,
əyin-başı nə gündədir. Mirzə Abbas Səhhəti
keçən il ailəsilə birlikdə
udan Gəncədən qorxuram.
Firidun bəy: - Seminariyada işlər necədi? Uşaqları dağılmağa qoyma. Yemək-içməklərini çatdıra
bilirsinizmi? Məşədi İbrahimin
oğlu Müseyibdən muğayat ol. Kişinin
bizim üstümüzə haqqı-sayı çoxdu. Bir oğul olduğuna, əfsus ki, ərköyünlüyü
var. Dərsini buraxmağa qoyma, hafizəli uşaqdı. Bircə dərsə davamiyyətindən nigaranam.
Rəhmətlik Məşədi İbrahim son nəfəsinə
qədər "Müseyib amanatı, Firidun bəy", -
deyib getdi.
Badisəba: - Sən bircə gəl çıx, hər
şey yaxşıdı. Sənin əvəzində
uçitel Əhmədağa işləyir. "Qocalmışam, əldən
düşmüşəm, işləyə bilmərəm,
bacarmıram" -deyə-deyə çox gözəl də
işləyir. Deyir ki, Firidun bəy gələn kimi
salam-əleykdən qabaq deyəcəm, təhvil al,
seminariyanı, sonra xoş gəlmisən... Niyə
elə gülürsən, səni heç belə
qaşqabaqlı gülən görməmişəm, o nədi,
a Firidun bəy, o necə gülüşdü. Başdan
ayağa kədər...
Firidun bəy: - Sən seminariyadan danış, Badisəba.
Uşaqlar qəzeti yenə
çıxarırmı? Adını dəyişdilərmi,
yoxsa yenə "Tələbə əfkarı" qaldı?
Badisəba: - Elə bir söz oldu, dəyişmək
haqda. İbrahim Əfəndi Qayıbzadə, Mirzə Vəlizadə,
tələbə Aslan Əfəndiyev və bir qrup uşaq bir
tərəfə oldu, ədəbiyyat müəllimi Yusif
Qasımov, tələbə Səməd Vəkilov,
Möhsün Poladov, Mirqasım - Şıxlı
balasını deyirəm, o biri tərəfə. Sənin çox sevdiyin o balaca Səməd heç
yaxın qoymadı. Dedi ki, Firidun bəyin
yadigarıdı, olmaz. Qayıdar gələr,
özü bilər, istər dəyişər, istər saxlar.
Hələlik qalsın. Elə
də qalıb.
Firidun bəy: - Onda gözün olsun, sən Allah,
anasız uşaqdı. Həm riyaziyyatda, həm
də ədəbiyyatda böyük qabiliyyəti var. Nazirin
şeirlərini ona tapşır, qoy toplasın, o, elə
şeyə qoçaqdı. Bir də
deyirdi ki, evimizdə babam Mehdixan Kühənsalın
dağarçığa yazılmış şeirləri var.
Usub ağa vermir. Aşa nənəmə
demişəm, alıb verəcək. Yadına sal, qoy
alıb gətirsin...
Badisəba: - Sən Allah, belə şeylərin dərdini
az çək, özündən
danış. Günlərini necə
keçirirsən? İki dəfə gəldim
buraxmadılar. Boy, ay Firidun bəy, gör heç
yadıma gəlirmi, səni gördüm, özümü
itirdim, Allah sənə də insaf versin, ağzımı
söhbətə tutmusan. Nərimanovdan teleqram
almışam. Yazır ki, birini də Həmid
Sultanovun üstünə vurmuşam. Səhər
səni azad edəcəklər. Sağ olsun, yenə
keçmiş tələbən səni unutmayıb,
qayğına qalıb. Bıy Allah, hara qoydum teleqramı,
Ağstafadayam, qatarı gözləyirəm,
indicə gələr, yola düşərəm. Səhər Allah qoysa, birgə qayıdacağıq.
Firidun bəy: - Tələsmə, nə yaman
yorğunsan, gözlərin nə
qıpqırmızıdı. Get yat, dincəl, sabah
olmasın, o biri gün olsun...
Badisəba: - Yox, yox, nə danışırsan. Bir yaxalığına bax, gör bir nə gündədi,
elə bil qazan qarasıdı. Sən
heç elə köynək geyinməzdin, nə oldu?
Firidun bəy: - Badisəba, sən mən deyənə
bax, tələsmə. Teleqram gəlibsə, lap
yaxşı buraxarlar. Səhər gedib
Camogildə köynəyimi dəyişərəm. İstəsən lap qırmızı rənglisini
geyinərəm. Hə, yadından
çıxmışdı. Camonun
bacısı oğlu Cümşüd də burdadı, bax, bu
yatan odu. Ağaəlibəyin oğlunu
deyirəm. Yaxşı, biz
Cümşüdlə birgə getdik. Baqi allah
amanında olasan... Yox, yox, gələrik...
Badisəba: - Firidun, ay Fi..ri..dd..un, Firidun bəy...
Firidun bəyin bədəni səsdən
üşəndi. Badisəbanın qiyyə
səsi beynini ox kimi dəlib keçdi. Ay dar dəmir
gözlüyün bərabərindən
uzaqlaşmışdı. Karvansaranı qatı
qaranlıq bürümüşdü. Çöldə,
divarın dəliklərində səs-səsə verib kəsik-kəsik
cırıldayan qarafatmaların səsinin ahəngi də ona qəmli
gəldi. Firidun bəy gözünü
yumdu. Badisəbanın od olub beynini,
sinəsini yandıran səsi onu hələ də tərk etməmişdi.
Başını divara söykəyib
ağır-ağır nəfəs aldı. Əlilə alnını, sinəsini övkələdi.
Uşaq kimi öz-özünə "istəmirəm,
xatırlamayacağam, istəmirəm", - deyə astadan
pıçıldadı. Gözüyumulu halda divara söykəli
qaldı...
... Qoridə qış olanda belə
aylı gecələrdə Badisəba ilə gəzməyə
çıxardı. Xırçıldayan
təzə-tər qarın üstündə gəzə-gəzə
Badisəbanın "dərsini" soruşardı, yeni
tapşırıqlar verərdi. Badisəba suallara
düzgün cavab verməyəndə zarafatla deyirdi: - Əzizim,
bu günahını mən bağışlasam da, o müqəddəs
ay bağışlamaz, bir fikir ver, gör necə də
pakdır. O, hər şeyi görür, eşidir. Ora bax, sən suallara düzgün cavab verməyəndə
onun üzündə nazik bir pərdə görünür.
Sənin əvəzinə o, xəcalət
çəkir.
- Demək, siz ikiniz bir oldunuz, mən tək qaldım? - deyən Badisəba əllərini yuxarı
qaldırır, üzünü göyün dərinliklərinə
tutub, aya müraciətlə deyərdi:
Xuda, sən saxla gəl fərdi,
çətindir yalqızın dərdi,
Pərişanlıq tapar mərdi havadar
olmayan yerdə.
Gəl, ey könlü olan rövşən, qəbul et bu sözü məndən,
Neçə məqdur olur məskən
gülə dar olmayan yerdə.
Könül dünyada yar istər, olubdur, biqərar istər,
Vidadi xəstə var istər, haçan
yar olmayan yerdə.
Badisəba xanım heç bir gimnaziyada,
seminariyada oxumamışdı. Firidun bəyin
özü onun təhsili ilə məşğul olurdu. Hər
gün evdə bir neçə saat dərs keçməklə
ona ali təhsil həcmində bilik, savad
öyrətmişdi. Vəfalı həyat
yoldaşı həm də əlyazmalarının surətini
köçürməklə Firidun bəyin ən yaxın
köməkçisi olmuşdu.
Şəmistan NƏZİRLİ,
tədqiqatçı
jurnalist
Xalq qəzeti.- 2010.- 8
avqust.- S. 6.