Saatlı: İkinci Dövlət Proqramının icrası böyük uğurla davam edir

Təbii fəlakətin vurduğu ziyana baxmayaraq, 2010-cu ilin birinci yarısı ümumilikdə uğurlu olmuşdur

Dinamik yüksəliş dayanıqlıdır

Bu ilin yazında baş vermiş təbii fəlakət saatlılılara sözün əsl mənasında dəhşətli günlər yaşatdı - onların bir çoxu ev-eşiyindən oldu, mal-mülklərinə zərər dəydi. Bu barədə yazıda müəyyən statistik göstəricilər qeyd olunacaq. Ancaq adama maraqlı gələn odur ki, "igid odur atdan düşə atlana, igid odur hər əzaba qatlana" məsəlini sanki elə bu camaatın barəsində deyiblər. Doğrudan da bu cür fəlakətlə üzləşəndən sonra sarsılmamaq, iradəni itirməmək, əzmi, vüqarı qoruyub saxlamaq əsl fədakarlıqdır. Rayon icra hakimiyyətinin başçısı Siraqəddin Cabbarov görülmüş işlərdən danışarkən əhalinin yerli orqanlarla birgə, yorulmaq bilmədən fəaliyyət göstərdiyini elə həvəslə vurğulayır ki, bir daha inanırsan: doğrudan da elə bu əlamətlər əliqabarlı, süfrəsi ruzili və qonaqlı Saatlı camaatının xarakterik xüsusiyyətləridir. Zarafat deyil, bu qədər daşqınlara, zərərə, ziyana baxmayaraq, Saatlı rayonu 2010-cu ilin birinci yarısını da ümumilikdə uğurlu göstəricilərlə tamamlamışdır.

Regionların sosial-iqtisadi inkişafı Dövlət Proqramlarının uğurlu icrası Saatlı rayonunun da sosial-iqtisadi həyatında intensiv inkişafa zəmin yaratmışdır. Rayon icra hakimiyyəti mövcud potensialdan, yerli ehtiyatlardan və xammaldan, dövlətin dəstəyindən və daxili imkanlardan səmərəli istifadə etməklə, 2009-2013-cü illərdə iqtisadi sahədə sürətli inkişafı təmin etməklə məhsul istehsalını artırmaq, emal və tədarük müəssisələri yaratmaq, yeni iş yerləri açmaq, insanların məşğulluğunu artırmaq və yoxsulluq səviyyəsini azaltmaq, kommunal xidmətlərlə, o cümlədən elektrik enerjisi, qaz, içməli su ilə təchizatını yaxşılaşdırmaq, sosial layihələri yerinə yetirməklə əhalinin rifah halını yüksəltmək, bu işlərdə sahibkarlara dəstək olmaq və bununla da rayonu iqtisadi cəhətdən hərtərəfli inkişaf etdirmək bir vəzifə kimi qarşıya qoyulmuşdur. 2-ci Dövlət Proqramında nəzərdə tutulan tədbirlər daha geniş və əhatəliyi ilə fərqlənir. Proqramın uğurlu icrası hər bir yaşayış məntəqəsinin daha da müasirləşməsi və inkişafı deməkdir. Dövlət Proqramında öz əksini tapmış 8 bölmə üzrə 100-ə qədər layihə rayonun sosial-iqtisadi həyatının ən vacib sahələrini-sənaye və kənd təsərrüfatı istehsalının genişləndirilməsini, ekologiya və təbii sərvətlərdən istifadə, yol təsərrüfatı və nəqliyyat tədbirləri, elektrik enerjisi, istilik və qaz təchizatı ilə təminat, rabitə, su təchizatı və kanalizasiya xidmətlərinin yaxşılaşdırılması, meliorasiya və irriqasiya tədbirləri, səhiyyə, mədəniyyət, idman və təhsil müəssisələrinin inşası və yenidən qurulması kimi mühüm sosial tədbirləri nəzərdə tutur.

Qeyd etmək lazımdır ki, Dövlət Proqramının icrası ilə bağlı 2010-cu ilin birinci yarısında həyata keçirilən tədbirlər müəyyən nəticələr vermişdir. Ümumi məhsul istehsalının həcmi 47264 min manat olmuşdur. Rabitə üzrə 15,7 faiz, ticarətdə 9,3 faiz, nəqliyyatda 2,0 faiz, sənayedə isə 1,0 faiz artım olmuşdur. Əvvəlki ilə nisbətən bu ilin birinci yarısında pərakəndə əmtəə dövriyyəsinin həcmi 10,7 faiz, əhaliyə göstərilən pullu xidmətlərin həcmi 19,0 faiz artmış, bir işçiyə hesablanmış orta aylıq əmək haqqı 2,8 faiz artaraq 190,4 manat olmuşdur.

Təbii fəlakətin təsiri

Məhsul istehsalçılarına dövlət tərəfindən edilən güzəştlər, verilən maliyyə yardımları, texnika və gübrələrlə təminat sahəsində göstərilən dəstək kənd təsərrüfatının dayanıqlı inkişafına əlavə stimul vermişdir. Bununla belə, yaz aylarında yağan intensiv yağışlar, aramsız leysanlar, sel sularının Kür və Araz çaylarında yaratdığı daşqınlar rayonun sahilboyu yaşayış məntəqələrində əkinlərin, bitkiçiliyin müxtəlif sahələrinin su altında qalmasına, qrunt sularının təsirindən məhv olmasına gətirib çıxarmışdır ki, bu da ilin birinci yarısında kənd təsərrüfatı məhsullarının istehsalına ciddi təsir etmişdir.

Ümumiyyətlə, Kür və Araz çaylarında suyun səviyyəsinin yüksək həddə çatması rayonun sahilboyu yaşayış məntəqələrində fövqəladə vəziyyət yaratmışdır. Yaranmış təhlükədən itkisiz çıxmaq üçün rayon icra hakimiyyəti mövcud texnikaları, ağır maşın və mexanizmləri və bütün canlı qüvvəni səfərbər edərək 2 aya yaxın müddət ərzində təbii fəlakətin ağır fəsadlar törətməməsi üçün gecəli-gündüzlü bəndbərkitmə, sahil mühafizə tədbirləri görmüş, idarə, müəssisə və təşkilatların kollektivləri, Araz çayının sahilində yerləşən kəndlərin əhalisi xilasetmə tədbirlərinə yüksək mütəşəkkilliklə qoşulmuşlar. Lakin Sarısu gölündə mühafizə bəndlərinin dağılması nəticəsində qonşu Sabirabad rayonunun bir neçə kəndi ilə bərabər Saatlı rayonunun da Novruzlu, Dəlilər, Nərimankənd, Musalı kəndləri və Nərimankənd köçkün qəsəbəsi subasmaya məruz qalmışdır. Bu yaşayış məntəqələrində 839 ev, 2389,4 hektar əkin sahəsi, 14607 ədəd meyvə ağacı su altında qalmış, əhalinin əmlakı məhv olmuşdur. Ümumilikdə çayların yaratdığı daşqınlar və qrunt sularının təsiri nəticəsində 5951 hektar əkin sahəsinə və 148393 ədəd meyvə ağacına ziyan dəymişdir. Su basmış kəndlərin əhalisi məktəblərdə, uşaq bağçalarında, qohum evlərində və digər yerlərdə müvəqqəti olaraq yerləşdirilmişdir. Bir sözlə, təbii fəlakət Saatlının iqtisadiyyatına, xüsusən də kənd təsərrüfatına, sosial infrastruktur şəbəkələrinə və əhalinin əmlakına ciddi ziyan vurmuşdur.

Prezident İlham Əliyevin tapşırıq və tövsiyələrinə əsasən, hazırda komissiyanın qəbul etdiyi qərarlara uyğun olaraq kəndlərdən suyun çəkilməsi, əhalinin normal həyat şəraitinə qayıtması istiqamətində əməli tədbirlər görülür, insanların ən adi problemləri və gündəlik qayğıları həll edilir, onlara ərzaq yardımları verilir.

Nazirlər Kabinetinin 9 iyul 2010-cu il tarixli sərəncamına əsasən əhaliyə dəymiş maddi ziyanın həcminin dəqiqləşdirilməsi və qiymətləndirilməsi, birdəfəlik maddi yardımların ödənilməsinin təmin edilməsi, subasmaya məruz qalmış ərazilərin iqtisadi, sosial həyatının, aqrar, kommunal, enerji, rabitə, nəqliyyat və digər infrastrukturlarının bərpası və yenidən qurulması üçün mərkəzi komissiya yaradılmışdır. Yerli icra orqanlarını da cəlb etməklə komissiya hazırlanmış təklifləri Nazirlər Kabinetinə təqdim edəcək və bu işlərdən ötrü sahə komissiyalarının fəaliyyətindən istifadə olunacaqdır. Bu barədə hazırlanmış ümumi təkliflər bir müddət əvvəl Hökumət komissiyasının sədri, Baş nazir Artur Rasizadəyə təqdim edilmişdir. Əhalinin təbii fəlakətlə bir daha üzləşməməsi üçün ciddi mühafizə tədbirləri görülməli, sahil zolağında evlər ləğv edilməli, Kür və Araz çaylarının qovuşduğu daha çökək və təhlükəli ərazi sayılan Novruzlu kəndi bütünlüklə köçürülərək yeni qəsəbə salınmalıdır. Hazırda bu istiqamətdə operativ işlər görülür, Yeni Novruzlu kəndində 36,6 hektar ərazi ayrılıb. Bu qəsəbədə 178 evin evin tikilməsi nəzərdə tutulub. Burada da əsasən Novruzlu, Dəlilər və digər kəndlərin sakinləri məskunlaşacaq. 1,2,3 və 4 otaqdan ibarət mənzillər daşdan tikiləcək və 12 sot həyətyanı sahəsi olacaq. Qəsəbədə həmçinin bütün infrastruktur işlər, o cümlədən məktəb, uşaq bağçası, poçt, rabitə, iaşə və digər məişət evləri tikiləcək, su və kanalizasiya sistemi qurulacaqdır. Artıq bir neçə gündür ki, qəsəbənin tikintisinə başlanılıb, torpaq işləri görülür, bünövrələr qazılır.

Aqrar sahədə işlər uğurla davam etdirilir

Təbii fəlakətin rayonun sahilboyu kəndlərinin iqtisadiyyatına vurduğu ciddi ziyana baxmayaraq, aqrar sahədə görülən işlər ardıcıl olaraq davam etdirilmiş, məhsul istehsalının artırılması üçün bütün imkanlar səfərbər edilmişdir. Xüsusən də 2009-2013-cü illərdə regionların sosial-iqtisadi inkişafı Dövlət Proqramında nəzərdə tutulan məsələlərin öz həllini tapmasına daha böyük diqqət yetirilmişdir.

"Aqrolizinq" ASC-nin Saatlı Aqroservis filialı kənd təsərrüfatı məhsulları istehsalçılarına 3600 hektar sahədə şum və mala işləri, 1118 hektar sahədə kombaynlarla biçin, 3420 hektar dərmanlama işləri və digər lizinq xidmətləri göstərmiş, 6345 ton azot, 320 ton fosfor gübrəsi güzəştli şərtlərlə satılmışdır. 2010-cu ildə pambıq zavodları hüquqi və fiziki şəxslər də daxil olmaqla istehsalçılarla 6350 hektarda pambıq toxumu əkilməsinə dair müqavilə bağlamışdır. Payonda fəaliyyət göstərən pambıq zavodları əhaliyə avans olaraq 36,1 ton çiyid, 447,4 min manat nəqd pul vermişdir. 2009-cu ilin payızında 21023 hektar taxıl əkilmişdir. Bunun 18413 hektarını buğda, 2610 hektarını isə arpa təşkil edir. Yaz əkininin sonuna qədər daşqınlardan və qrunt sularının təsirindən ziyan çəkməmiş 18888 hektar taxıl sahəsinin 16857 hektarını buğda, 2031 hektarını arpa təşkil edir. İyulun 1-dək 10919 hektar sahə biçilmişdir. Biçilən sahələrin hər hektarından 28,8 sentner olmaqla cəmi 31480,3 ton taxıl istehsal edilmişdir ki, bunun 26260,6 tonu buğda, 5219,7 tonu arpadır. Hər hektardan buğdanın məhsuldarlığı 29,5 sentner, apra isə 25,7 sentner olmuşdur. Taxıl biçini demək olar ki, başa çatmışdır.

Heyvandarlıq sahəsində artım müşahidə edilmişdir. 1 iyul 2010-cu il tarixə 3333 ton ət, 17564 ton süd və 6416 min ədəd yumurta istehsal edilmişdir. Rayonda bütün təsərrüfat kateqoriyaları üzrə iri buynuzlu mal-qara 65125 baş, o cümlədən ana inək və camışların sayı 30728 baş, qoyun və keçilərin sayı 93886 baş olmuşdur. Keçən ilin müvafiq dövrü ilə müqayisədə mal-qara 1385 baş, qoyun və keçilərin sayı isə 2840 baş artmışdır.

Kənd təsərrüfatı məhsullarının saxlanması məqsədilə rayonun Gomuşçu kəndində 2000 ton tutumu olan soyuducu anbar kompleksinin tikintisi davam etdirilir. Bundan əlavə, rayon mərkəzində 10 min ton tutumu olan taxıl məhsullarının saxlanılması üçün anbar elevatorun tikilməsi layihəsi reallaşmaq üzrədir. Saatlı rayonunun Əlisoltanlı kəndində sapəyirmə fabrikinin tikintisi davam etdirilir. Burada iş başlanandan indiyədək 15700 min manat dəyərində iş görülmüş və cari ildə fabrikin istifadəyə verilməsi üçün lazımi dəstəyin göstərilməsi barədə rəhbər orqanlara müraciət olunmuşdur. Bu istehsal müssisəsi tam gücü ilə işə başladıqdan sonra 3 min ton məhsul buraxacağı və 300-dən yuxarı iş yerinin olacağı gözlənilir.

Torpaqların su təchizatının yaxşılaşdırılması, kollektor-drenajların çəkilməsi və təmizlənməsi, suvarma-drenaj sistemlərinin bərpası, təmizlənməsi və hidrotexniki qurğuların təmiri üzrə işlər ardıcıl olaraq davam etdirilmişdir. 6 ay ərzində əksər kənd yaşayış məntəqələrində və təsərrüfatların əkin sahələrinin əhatəsində olan mövcud suvarma kanalları və kollektor-drenaj şəbəkələrində 483,4 kilometr olmaqla 1006,6 kubmetr həcmində lildən təmizlənmə işləri görülmüşdür. 2010-cu ilin birinci yarısında Dövlət Proqramında nəzərdə tutulan tədbirlərdən biri də Hacıqasımlı kəndinin qrunt sularından qorunması üçün keçid layihəsidir. Dəyəri 1180 min manat olan bu layihəyə görə 2008-ci ildə 642,3 manat xərclənmiş, cari ildə isə 537,7 min manatlıq işlərin görülməsinə başlanılmışdır.

Abadlığa xüsusi diqqət yetirilir

Cari ilin birinci yarısında abadlıq, quruculuq və yaşıllaşdırma sahəsində də görülən işlər davam etdirilmiş, "Ekologiya ili" çərçivəsində ağacəkmə kampaniyasına əmək kollektivləri cəlb olunmuş, bütün daxili imkanlar səfərbər edilmişdir. Bəylik kəndi istiqamətində Saatlı rayonunun girişindən başlamaqla, magistral yol ətrafı və şəhərdaxili küçələr, prospekt və xiyabanlarda təmizlik və yaşıllıq diqqətdə saxlanılmışdır.

Heydər Əliyev prospektində yerləşən "Şəhidlər Xiyabanı" parkının qarşı tərəfində salınmış yeni parkın səkilərinə 600 poqonometr boridur düzülmüş, ətrafda olan hissəyə 159 kvadratmetr daş hasar çəkilərək suvaq edilmiş, şəhərin daxili küçələri 50174 kvadratmetr çınqıl örtüklə təmir olunmuş və 3150 kvadratmetr asfalt vurulmuşdur.

Milli Təhlükəsizlik Nazirliyinin rayon şöbəsinin inzibati binası, Varxan kəndində Seysmik Stansiya, Yaponiya hökumətinin maliyyə dəstəyi ilə Varxan kəndində yeni həkim məntəqəsi tikilərək istifadəyə verilmişdir.

2010-cu ilin yaz və payız aylarında rayon ərazisində əkiləcək ağacların ərazisi və sayı müəyyənləşdirilmiş və ümumilikdə il ərzində 58,0 hektar sahədə 61000 ədəd şam, görüş, çinar, iydə, ağ görüş, söyüd, tut, əzgil, liğustur, küknar, sarı şəmşəd, zeytun, qızılı şəmşəd və müxtəlif növ meyvə ağaclarının əkilməsi planlaşdırılmışdır.

Cari ilin yaz mövsümündə rayon ərazisində 23,2 hektar sahədə 26850 ədəd müxtəlif növ ağaclar əkilmiş və həmin ağacların yay mövsümündə davamlı su ilə təminatına xüsusi diqqət yetirilmişdir. Bu tədbirlər sırasında Əlisoltanlı kəndi ərazisində magistral yol kənarında 7 hektar ərazi əvvəllər mövcud olmuş qrunt sularından təmizlənmiş, torpaq daşınaraq çökəkliklər doldurulmuş və meliorasiya tədbirləri aparılaraq yeni drenaj və su kanalı sistemi çəkilmiş, mövcud drenajlar lildən təmizlənərək əraziyə şam və əzgil ağacları əkilmişdir. Bundan əlavə payız aylarında 34,8 hektar ərazidə göyüş, çinar, iydə, əzgil, şam, sərv, söyüd və s. müxtəlif növ ağaclar olmaqla 34150 ədəd ağacın əkilməsi nəzərdə tutulmuşdur.

İşıq, mavi yanacaq, telefon...

Rayon mərkəzində "Smart-Kart" tipli sayğacların qurulması başa çatdırıldıqdan sonra bu iş Mollavazlı kəndində də tamamlanmış və Qıraqlı kəndində davam etdirilmişdir. Ümumiyyətlə, 6 ay ərzində 1751 ədəd dayaq basdırılmış, 1752 ədəd "Smart-Kart " tipli sayğac quraşdırılmış və 62 kilometrə yaxın SİP tipli kabel çəkilmişdir. Bundan başqa 49370 metr 10 kv-luq naqil və 1007 ədəd izolyator dəyişdirilərək yeniləri ilə əvəz olunmuşdur. Kənd yaşayış məntəqələrində 14 transformator əsaslı, 8 transformator isə cari təmir olunaraq 1750 kiloqram transformator yağı əlavə olunmuşdur. Ərazilərdən söküntü zamanı çıxarılan dayaqlar, naqillər digər kəndlərdə təmir işlərində istifadə olunmuşdur.

2010-cu ilin 6 ayı ərzində rayon Qaz İstismarı sahəsi tərəfindən 850 abonentin qaz sayğacı "Elster" tipli G-4 markalı qaz sayğacı ilə əvəz edilərək küçə xəttinə çıxarılmış, şəhərin müxtəlif küçələrində 80 metr qaz xətti yenisi ilə əvəz olunmuş, Mollavazlı kəndinin aşağı təzyiqli küçə qaz xətti dəyişdirilmişdir. İstismar sahəsi öz vəsaiti hesabına bir sıra təmir-bərpa işləri görmüşdür.

"Sukanal" idarəsi 6 su nasosunu təmir etmiş, 2 yeni su nasosu quraşdırılmış, diametri 100 millimetr olan su borusunu dəyişdirmişdir.

Dövlət Proqramının icrası ilə əlaqədar 2010-cu ilin birinci yarısında Telekommunikasiya qovşağı yeni istismara verilmiş Hacıqasımlı EATS-dən Hacıqasımlı və Kamallı kənd əhalisinə 80 telefonun çəkilişi üçün xətt şəbəkəsi tikmiş, 6 ay ərzində bu kəndlərdə 34 abunəçiyə telefon çəkilmiş və 44 abunəçinin telefonu bərpa olunmuşdur. 2010-cu ilin 6 ayı ərzində tutumu 32 nömrə olan Qazanbatan EATS-nin xətt şəbəkəsinin tikintisi başa çatdırılmış və 21 abunəçiyə telefon çəkilmişdir. Bundan başqa Xanlarkənd EATS-dən 30, mərkəzi EATS-dən və rekonstruksiya olunmuş kənd EATS-dən 72 telefon çəkilmişdir.

Həmçinin, abunəçilərinə yüksək sürətli internet xidməti göstərmək məqsədilə ADSL avadanlığı quraşdırılaraq istismara verilmişdir. Hazırda ADSL avadanlığı ilə yüksək sürətli internet xidməti olan 46 nəfər abunəçi mövcuddur və bu sahədə işlər davam etdirilir.

Dövlət proqramının icrası ilə əlaqədar olaraq, yeni tikilmiş və rekonstruksiya olunmuş EATS-lərdən 2010-cu ilin 6 ayı ərzində 205 abunəçiyə telefon çəkilişi aparılmışdır.

Əmək qabiliyyətli əhalinin işlə təmin olunması, yeni açılan müəssisələrin qeydiyyatı sahəsində işlər davam etdirilmişdir. 2010-cu ilin birinci yarısında 308 yeni iş yeri açılmışdır.

Dövlət Proqramında təhsil, səhiyyə, mədəniyyət və idman bölmələri üzrə öz əksini tapmış tədbirlər bilavasitə həmin sahələrdə mövcud vəziyyət və sosial sifarişlər nəzərə alınmaqla təsdiq olunmuşdur.

Sağlamlıq da lazımdır, savad da...

Əhalinin müraciətləri nəzərə alınaraq ölkə başçısı İlham Əliyevin 30 mart 2010-cu il tarixli sərəncamı və bilavasitə göstərişi əsasında mərkəzi rayon xəstəxanasının əsaslı təmirinə başlanılmış və indiyədək təmir-tikinti işlərinə 150 min manat vəsait xərclənmişdir. Gələn ilin sonuna qədər işlərin tam başa çatdırılması, xəstəxananın müasir tibb avadanlıqları ilə yumşaq və bərk inventarlarla təchizi nəzərdə tutulmuşdur.

Digər xidmət təşkilatları kimi mərkəzi rayon xəstəxanası, gigiyena və epidemiologiya mərkəzi və Baytarlıq İdarəsi subasmaya məruz qalmış yaşayış məntəqələrində yoluxucu xəstəliklərin baş verməməsi üçün tibb-profilaktik, əks epidemik tədbirlər həyata keçirmiş, epidemioloji vəziyyəti nəzarətdə saxlamış, köçürülən əhalinin məskunlaşdığı yerlərdə operativ tibbi xidməti təşkil edərək onları zəruri dərman preparatları ilə təmin etmişdir.

Ötən il Kamallı kəndində inşasına başlanılmış 180 şagird yerlik yeni məktəb binası bu dərs ilində istifadəyə veriləcəkdir. Gənclərin şahmata olan marağı, onların potensialından lazımınca istifadə olunması nəzərə alınaraq, hazırda əlverişsiz şəraitdə yerləşən şahmat məktəbi üçün də yeni binanın tikilməsi ilə bağlı müraciətlər edilmişdir. Bundan əlavə, Novruzlu kəndinin köçürülməsi ilə əlaqədar yeni salınacaq qəsəbədə əsas məktəb binasının tikilməsi də nəzərdə tutulmuşdur.

Ötən müddətdə şagirdlərin bilik və hazırlıq, eləcə də tərbiyə məsələlərinə diqqət artırılmışdır. İyunun 11-də Təhsil Nazirliyi tərəfindən ümumtəhsil məktəblərinin XI siniflərində mərkəzləşdirilmiş qaydada buraxılış imtahanı keçirilmişdir. 2009-2010-cu tədris ilinin əvvəlində XI siniflərə 932 nəfər şagird cəlb edilmişdir. Bunlardan tədris ilinin sonuna qədər 42 şagird müxtəlif səbəblərdən çıxmış, 890 nəfəri isə buraxılış imtahanına buraxılmışdır. İmtahana buraxılanlardan 846-sı imtahanda iştirak etmiş, 44-ü isə imtahana gəlməmişdir. Səkkiz fənn üzrə mərkəzləşdirilmiş qaydada aparılmış imtahanda 642 şagird bütün fənlərdən müsbət qiymət almışlar. Bu isə imtahanda iştirak edənlərin təqribən 76 faizini təşkil edir.

Rayonun 28 orta ümumtəhsil məktəbindən Qıraqlı və Cəfərxan kənd orta məktəblərinin şagirdləri 100 faiz nəticə əldə edərək fərqlənmişdir.

Subasmaya məruz qalmış Novruzlu kənd orta məktəbinin 29 nəfər XI sinif, 37 nəfər IX sinif, Dəlilər kənd əsas məktəbinin 38 nəfər, Novruzlu kənd əsas məktəbinin 13 nəfər IX sinif şagirdi Təhsil Nazirliyinin müvafiq əmrinə əsasən, imtahanlardan azad edilmiş, onlar əsas və orta təhsil kursu üzrə şəhadətnamə və attestat almışlar.

Son altı ay ərzində Saatlıda görülmüş işlər, həyata keçirilmiş tədbirlər barədə istənilən qədər söz açmaq olar. Çünki burada xeyli iş görülüb, rayonun siması dəyişib, insanların düşüncəsinə qurub-yaratmaq ruhu hakim kəsilib. Bu da, sözsüz ki, rayonun daha gözəl sabahlarından xəbər verir.

Səməd HÜSEYNOĞLU

Xalq qəzeti.- 2010.- 14 avqust.- S. 4.