Yeni Azərbaycan Partiyası qaliblər, qələbələr partiyasıdır

Müsahibimiz YAP icra katibinin müavini, Milli Məclisin deputatı Mübariz Qurbanlıdır

- Mübariz müəllim, bir neçə aydan sonra xalqımızı çox ciddi bir siyasi kampaniya yenidən sınağa çəkəcək. Mən bu ilin noyabrında keçiriləcək növbəti parlament seçkilərini nəzərdə tuturam. Bilmək istərdim ki, Yeni Azərbaycan Partiyası bu ciddi siyasi kampaniyaya necə hazırlaşır?

- Məlum olduğu kimi, bu il noyabr ayının 7-də respublikamızda növbəti dəfə Milli Məclisə seçkilər keçiriləcək. Təbii ki, hər bir seçki mühüm hazırlıq tələb edir və siyasi təşkilatlar, ayrı-ayrı deputatlığa namizədlər bu hazırlıqla əlaqədar öz fəaliyyətlərini artırırlar. Yeni Azərbaycan Partiyası böyük seçki təcrübəsinə malikdir. 1993-cü ildən bu yana Yeni Azərbaycan Partiyası prezident, parlament və bələdiyyə seçkilərində dəfələrlə iştirak edib. Qeyd edim ki, seçki kampaniyasına qoşulduğu dövrdən Yeni Azərbaycan Partiyası, demək olar ki, seçkiləri həmişə qələbə ilə başa vurubdur.

Partiyanın əldə etdiyi bu uğurların başlıca səbəbi təşkilatın siyasi kursunun, həyata keçirilən xəttinin xalq tərəfindən müdafiə olunmasıdır. Siyasətdə uğur qazanmaq üçün ilk növbədə seçicilərin, vətəndaşların, əhalinin böyük dəstəyinə nail olmaq lazımdır. Yeni Azərbaycan Partiyasının əldə etdiyi uğurların da rəhni məhz onun xalq tərəfindən müdafiəsi ilə bağlıdır. Partiyamızın böyük uğurlarının, əhalinin əksəriyyətinin bizi müdafiə etməsinin səbəbi nədir?

Birinci səbəbi bu partiyanın söykəndiyi prinsiplərin ulu öndər Heydər Əliyev tərəfindən müəyyən edilməsi və həmin prinsiplərin bütövlükdə Azərbaycanın milli maraqlarına, ayrılıqda isə hər bir vətəndaşın marağına uyğun olmasıdır. İkincisi, Yeni Azərbaycan Partiyasının sədri, Prezidentimiz İlham Əliyevin həyata keçirdiyi uğurlu daxili və xarici siyasətin hər bir insan, dövlət və millət üçün verdiyi xeyirdir. Üçüncüsü, partiyanın bütövlükdə Azərbaycan cəmiyyətinin aparıcı hissəsini öz ətrafında birləşdirməyə qadir olmasıdır.

Bu gün Yeni Azərbaycan Partiyasının 510 min nəfərə yaxın üzvü var. Yalnız partiyamızın ilk təşkilatlarının sayı 8 mindən yuxarıdır. Partiyada Azərbaycan cəmiyyətinin bütün təbəqələrini əhatə edən ən qabaqcıl insanlar birləşiblər. Bu partiya ulu öndər Heydər Əliyevin müəyyənləşdirdiyi dövlətçilik prinsiplərinə söykənən partiyadır. Bu gün də Yeni Azərbaycan Partiyası həm coğrafi baxımdan Azərbaycanı əhatə etməsinə, həm də tərkibində ölkəmizin ən sayılan, seçilən insanlarını birləşdirdiyinə görə öncül bir partiyadır. Təbii ki, hər seçkidə qazanılan qələbədə başlıca rol seçicinin siyasi təşkilata, namizədə münasibəti məsələsidir.

Öncədən qeyd etdiyim kimi, partiyamızın qazandığı uğurlar, namizədlərimizin qarşıdan gələn seçkilərdə seçicilər tərəfindən müdafiə olunmasını söyləməyə əsas verir. İkinci şərt, seçki kampaniyasının təşkilidir. Yeni Azərbaycan Partiyası qarşıdan gələn parlament seçkilərinə ciddi şəkildə hazırlaşıbdır. Onu da qeyd edim ki, bizim seçki kampaniyasının keçirilməsi ilə bağlı əldə etdiyimiz təcrübəni biz hər dəfə yeniləşdirdik və keçmiş təcrübə ilə yeni əxz etdiyimiz bu və ya digər metodları birləşdirib tətbiq edirik. Dünyanın ayrı-ayrı ölkələrində zaman-zaman müxtəlif xarakterli seçkilər keçirilir. Yeni Azərbaycan Partiyası müasir informasiya və texnologiyaların imkanlarından istifadə edərək həmin seçkilər haqqında geniş məlumatlar toplayır.

Bizim bununla bağlı xüsusi məlumat bankımız yaradılıbdır. Biz burada ayrı-ayrı ölkələrdə keçirilən seçkilər və bu zaman tətbiq olunan yeni texnologiyaları araşdırır, sistemləşdirir, həmin texnologiyaların növbəti seçkilərdə tətbiqi ilə bağlı müvafiq qərar qəbul edirik. Seçkiyə hazırlıqla əlaqədar Yeni Azərbaycan Partiyasında partiya üzvü olan və seçki texnologiyasını geniş şəkildə mənimsəmiş olan mütəxəssislərdən ibarət qrup çalışır. Həmin qrupun üzvləri vaxtaşırı olaraq seçki kampaniyasının təşkili, gedişi və keçirilməsi ilə bağlı təkliflər və tövsiyələr hazırlayır, bu təkliflər ümumiləşdirilərək, bizim seçki proqramının tərtibində, eyni zamanda seçki kampaniyasında istifadə edilir.

İcra katibliyi bu işləri demək olar ki, tam öz nəzarətində saxlayır, partiyanın idarə heyətinin qəbul etdiyi qərarlar əsasında müxtəlif xarakterli tədbirlər həyata keçirir və addımlar atır. Təbii ki, partiyamızın sədri, Prezident İlham Əliyevin vaxtaşırı verdiyi tövsiyə və tapşırıqlar partiyanın həyata keçirdiyi siyasətdə önəmli rol oynayır. Bizim bu gün başlıca məqsədlərimizdən biri seçkidə qələbəmizdirsə, digər vəzifəmiz bu gün həyata keçirilən siyasətin əhali arasında hərtərəfli şəkildə təbliğ etdirilməsi, bu zaman medianın imkanlarından istifadədir.

Biz seçki proqramı hazırlamışıq. Bizim seçki proqramımız seçki kampaniyası dövründə seçicilərin diqqətinə çatdırılacaqdır. Baxmayaraq ki, bizdə seçkilər majoritar sistemdə keçirilir, amma bütün hallarda dairələr üzrə namizədləri partiya irəli sürür. Ona görə də partiyanın seçki proqramı ilə bərabər, həmin seçki proqramına istinad edən ayrı-ayrı namizədlərimizin fərdi proqramları da olacaqdır. Növbəti mərhələdə bu məsələlər yekunlaşacaqdır. Partiyanın seçki proqramının əsas nüvəsi, prinsipləri və istiqamətləri tamamilə hazır vəziyyətdədir.

Seçkiyə hazırlıq müəyyən mərhələdən keçir. Birinci, bu, təşkilati xarakterli işdir. Biz bunu demək olar ki, yekunlaşdırmışıq. Partiyamızın rayon və şəhər təşkilatlarında seçkiyə hazırlıqla əlaqədar çoxsaylı tədbirlər keçirilib. Bu yaxınlarda partiyanın rayon, şəhər təşkilatlarının ümumrespublika toplantısını keçirdik və müəyyən tapşırıqlar verdik. Bundan əvvəl biz partiyanın ilk təşkilat sədrlərinin ayrı-ayrı rayonlarda toplantılarını keçirmişik. Altı-yeddi ay əvvəl isə rayon, şəhər təşkilatlarında görüşlər keçirərək bu təşkilatlarda bütövlükdə seçki kampaniyasına hazırlığın vəziyyəti və bununla bağlı qarşıda duran vəzifələri müzakirə etmişik. Yeni Azərbaycan Partiyası xalqdan, bütövlükdə seçicilərdən gələn tələbləri, təklifləri, tövsiyələri, bu və ya digər tapşırıqları ümumiləşdirən və buna uyğun seçki proqramı müəyyənləşdirən partiyadır. Bütövlükdə Yeni Azərbaycan Partiyası ümumxalq partiyasıdır.

Bizim seçki kampaniyasına hazırlığımızın növbəti mərhələsi namizədlərin müəyyənləşdirilərək irəli sürülməsidir. Təbii ki, bu proses yekunlaşmaq üzrədir. Namizədlərin müəyyənləşdirilməsi üçün də partiyamızın rayon, şəhər təşkilatlarında müxtəlif xarakterli söhbətlər, müzakirələr aparılıbdır. Faktiki olaraq namizədlər aşağıdan -partiyanın rayon, şəhər təşkilatlarından irəli sürülür və bunlar mərkəzdə-idarə heyətində müzakirəyə çıxarılır, icra katibliyində baxılır və ümumiləşdirildikdən sonra partiyanın ayrı-ayrı dairələr üzrə namizədləri dəqiqləşdirilərək irəli sürülür. Partiyanın namizədlərinin, bütövlükdə hansı şəxsin hansı bölgədən, hansı dairədən irəli sürüləcəyi tam hazırdır.

Biz Azərbaycan Respublikası Milli Məclisinin qəbul etdiyi Seçki Məcəlləsinə uyğun olaraq, eyni zamanda Mərkəzi Seçki Komissiyasının tələblərinə müvafiq şəkildə vaxtı çatdıqda namizədləri dairələrə təqdim edəcəyik və partiyanın seçki kampaniyasına rəsmən qatılmasını elan edəcəyik. Növbəti mərhələ isə namizədlər üçün imzaların toplanmasıdır. Daha sonra isə seçkinin ən mühüm mərhələlərindən biri - təşviqat kampaniyası dövrü gəlir ki, biz bununla bağlı lazım olan hazırlıq işlərimizi başa çatdırmışıq. Sonra bizim namizədlərimizin həm fərdi qaydada, həm rayon, şəhər təşkilatlarının köməyi ilə bütövlükdə təşviqatı həyata keçiriləcək. Yekun mərhələ isə namizədlərin qeydə alınmasından sonra səsvermə günü ilə əlaqədar aparılan hazırlıq işləridir. Hər dairəyə, hər məntəqəyə müşahidəçilər müəyyən etmişik. Artıq onların da siyahıları hazırdır.

Yekun olaraq demək istərdim ki, Yeni Azərbaycan Partiyası seçkiyə hazır partiyadır, bu qüdrətli və güclü bir partiyadır. Partiyamızın namizədləri bütövlükdə cəmiyyətin qəbul etdiyi və müdafiə etdiyi şəxslərdir. Bu mövqedən çıxış edərək biz gələcəkdə seçkilərdə Prezidentimiz İlham Əliyevin həyata keçirdiyi siyasətə əhalinin dəstək verəcəyini tam bildiyimizdən qəti şəkildə deyə bilərik ki, bu seçkilərdə də Yeni Azərbaycan Partiyası böyük uğur qazanacaq və parlamentdə birinci olaraq öz yerini tuta biləcəkdir.

- Bəzi müxalifət qəzetləri yazırlar ki, Yeni Azərbaycan Partiyası bu vaxta qədər hələ də öz namizədlərini müəyyənləşdirə bilməyib. Bu məsələyə də aydınlıq gətirmənizi xahiş edirik.

- Bəzi kütləvi informasiya vasitələri bəzən söz və mətbuat azadlığından istifadə edərək xəyali uydurmalarla çaşqınlıq yaratmaq istəyirlər. Bəzən adama elə gəlir ki, müxalifətin nəzarətində olan mətbu orqanlar axşam gördükləri yuxularını səhər dərc edirlər. Sözsüz ki, onların yazdıqlarının hamısı cəfəngiyyatdır, heç bir əsası yoxdur. Onlar Yeni Azərbaycan Partiyasının gücünün, qüdrətinin qarşısında acizliklərini nümayiş etdirirlər və partiyanın siyahısı ilə bağlı guya bəzi məlumatları əldə etdiklərini bildirirlər. Partiyamızın irəli sürəcəyi namizədlər gizli deyildir və zamanında açıqlanacaqdır. Bütün dünyada da seçki kampaniyasının mərhələləri var. Bu mərhələlər yetərincə başa çatmadıqda digər mərhələ barəsində kimsə söz demir.Hansı dairədən kimin namizədliyini müəyyənləşdirmişiksə, bu, vaxtında açıqlanacaq. Bütövlükdə müxalifət mətbuatının yazdıqlarını absurd, cəfəngiyyat və boş söz adlandırıram. O cür qəzetlərin də yazdığı materiallara vaxt ayırmağı, onlara şərh verməyi və xüsusiləşdirməyi də məqsədəuyğun saymıram.Müxalifətdə ümumiyyətlə, məntiq deyilən bir şey yoxdur. Onlar məntiqdən anlayışı olmayan bir qrupdur. Kabinetlərdə oturub ağıllarına gələni düşünür, fərziyyələrlə danışırlar. Biz belələrinə əhəmiyyət vermirik. Nə yazırlar, nə danışırlar, özləri bilər. Əsas xalqın istəyi və arzusudur. Xalq isə kimin kim olduğunu, müxalifətdə olanların yazdıqlarının nə məqsəd daşıdığını çox yaxşı bilir.

- Siz dediniz ki, Yeni Azərbaycan Partiyası 1993-cü ildə keçirilən prezident seçkilərindən başlayaraq bu vaxta qədər bütün seçkilərdə böyük üstünlüklə qələbə qazanıb.... Bu seçkilərdən nə gözləyirsiniz?

- Ümumiyyətlə, Yeni Azərbaycan Partiyası haqqında mən belə deyərdim: YAP qələbələr partiyasıdır, YAP qaliblər partiyasıdır. Bizim partiyanın qələbələr, qaliblər partiyası olması uzunmüddətlidir. Yeni Azərbaycan Partiyasının banisi ulu öndər Heydər Əliyevin müəyyən etdiyi prinsiplər bu gün Prezidentimiz İlham Əliyev tərəfindən uğurla davam etdirilir və bu uzunmüddətli bir strategiyadır. Uzunmüddətli strategiyanın daşıyıcısı olan qələbələr və qaliblər partiyası növbəti dəfə də qələbə çalacaq.

- Növbəti parlament seçkilərində YAP-a qarşı güclü rəqib görürsünüzmü?

- Siyasi müstəvidə bizimlə mübarizə aparan istənilən siyasi təşkilata rəqib kimi baxırıq. Kimisə nə kiçiltmək, nə də böyütmək fikrində deyilik. Hər bir siyasi mübarizəyə qatılan partiya digər partiya üçün rəqibdir. Amma bizimlə siyasi meydanda mükaliməni normal, sivil qaydada apara bilsələr, biz buna çox sevinərik. Təəssüf ki, müxalifətdə olanlar dedi-qodudan, şayiədən uzağa gedə bilmirlər, himayələrində olan kütləvi informasya vasitələrində olmazın yalanlarını yazırlar. Onlar bu gün dövlətçilik və milli baxımdan əldə etdiyimiz uğurları görmək istəmirlər, Azərbaycanın uğurlarına sevinmirlər. Bütün bunlar təəssüf doğurur.

- Mübariz müəllim, müxalifət nümayəndələri belə bir şayiə də yayıblar ki, guya YAP-ın bu vaxta qədər namizədlərinin adlarının açıqlamamasının bir səbəbi də müxalifətin hələ hansı dairədən kimin namizədliyini irəli sürəcəyini bəyan etməməsidir.

- Yeni Azərbaycan Partiyasının arxasında dayandığı hər bir namizəd müxalifətin özündən deyən və özünü güclü sayan hər bir funksionerindən qat-qat güclüdür. Bizim namizədlərimiz fərddir, lakin o namizədlərin arxasında böyük bir partiya dayanır. Yeni Azərbaycan Partiyasının hər bir namizədi istənilən müxalifət partiyasının hər bir namizədindən güclüdür. Bizim namizədlərimiz bunu dəfələrlə sübut ediblər.Bizim partiya gerçək siyasəti həyata keçirən partiyadır. Prezidentimiz İlham Əliyevin də siyasəti gerçək, praqmatik, xalqa söykənən, xalqa inam və xalqın inandığı bir siyasətdir.

- Seçki ərəfəsində Seçki Məcəlləsinə edilmiş bir sıra əlavə və dəyişikliklər də bəzi siyasi qurumlar üçün bəhanə olub. Ümumiyyətlə, siz bu əlavə və dəyişiklikləri necə qiymətləndirirsiniz?

- Azərbaycan Respublikasının Seçki Məcəlləsi mükəmməl bir sənəddir. Bu sənəd üzərində çox böyük işlər aparılıbdır. Qeyd edim ki, Seçki Məcəlləsi beynəlxalq ekspertlərin iştirakı ilə işlənib hazırlanıb və bütövlükdə cəmiyyətin konsensusunun məhsuludur. Konsensusdan kənarda qalan azlıq cəmiyyət deyil. Bu, cəmiyyətdən kənarda qalıb məsciddən qovulmuşlar səviyyəsində olan qrupdur. Həmin qrupun iddiası bizim üçün önəmli deyil. Bizim üçün xalqın istəyi, Vətənin, dövlətin maraqları önəmlidir.

Ona görə də hazırkı Seçki Məcəlləsi ilə bağlı müxalifətin iddiaları əsassızdır. Əslində, müxalifətin hamısı bu düşüncədə deyil. Müxalifətin müxtəlif qanadları var. Təbii ki, mən radikal yönümlü müxalifətdən söhbət açıram. Konstruktiv müxalifət realist düşüncə ilə dövlət və milli maraqları nəzərə alaraq hər bir məsələdə konstruktivlik nümayiş etdirdiyi halda, radikal müxalifət öncə söylədiyim həmin xəstə təxəyyülün məhsulunu ortaya qoymağa cəhd etməkdədir. Seçki Məcəlləsinə yeri gəldikcə müəyyən dəyişikliklər edilir. Yeni Azərbaycan Partiyasının təşəbbüsü ilə Milli Məclisdə müzakirələr aparılıb və Seçki Məcəlləsinə dəyişikliklər edilib. Bu da əsasən seçki müddəti ilə bağlı məsələdir.

Əvvəlki qanunvericilikdə seçki müddəti həddindən artıq çox idi. Bu, o qədər də məntiqli deyildi. Biz zamanında seçki müddətinin çox olduğunu diqqətə çatdırmışdıq. Seçki keçirilən zaman biz bunun həqiqətən də uzunmüddətli olduğunu gördük. Hər şey praktikadan doğur. Praktikada özünü doğrultmayan bu və ya digər iş varsa, o düzəldilməlidir. Hər şey operativ olmalıdır və seçicini yoran müddət olmamalıdır. Hər bir məsələ dövlətin maraqlarına uyğun həll olunmalıdır. Seçki Məcəlləsinə dəyişiklikdən əvvəlki dövrdə Azərbaycanda seçki müddəti 4 ay idi. Ola bilər ki, bir ildə seçki keçirək və həmin il zərurət üzündən referendum da keçirməli olaq. Belə çıxır ki, Azərbaycan xalqı 12 ayın 8-ni seçkiyə sərf etməlidir?

Dünya təcrübəsini də nəzərə alaraq belə qərara gəldik ki, bu müddət azaldılmalıdır. Bizim təklifimizlə Milli Məclis bunu geniş müzakirə etdi və radikal yönümlü bəzi deputatların iddialarına baxmayaraq Milli Məclisdə bu məsələ öz əksini tapdı. Hesab edirəm ki, müddətlər operativ müddətdir və bu müddətdə seçki kampaniyasını uğurla başa vurmaq olar. Bütövlükdə seçkidə müddətin qısa olmasını və digər məsələləri bəhanə edərək, bəzi müxalifət partiyaları gələcəkdə məğlubiyyətlərini sığortalamaq üçün bir tezisi indidən öz kitabçalarına yazıblar.

Müxalifət məğlubiyyətə uğrayacağını bəri başdan hesablayıb. Ona görə də onların bütövlükdə namizəd irəli sürmək problemi var. Bu problemlər özünü açıq şəkildə büruzə verir. Bu problemlərin nəticəsidir ki, müxalifət gah birləşmək, gah ayrılmaq, gah blok yaratmaq haqqında fikirlər söyləyir. Bu, gözə kül üfürmək və ictimaiyyətin diqqətini həmin müxalifət daxilində olan böhran vəziyyətindən yayındırmaqdır. Müxalifət mənəvi-siyasi və psixoloji böhran içərisindədir. Onun da səbəbi müxalifətdə olanların dedi-qodunu önə keçirməsi, gerçək düşüncədən geridə qalmasıdır.

Əliqismət BƏDƏLOV

Xalq qəzeti.- 2010.- 20 avqust.- S. 2.