Prezident İlham ƏLİYEV: Azərbaycan həm güclü iqtisadi potensiala, həm də hərbi potensiala malikdir

2010-cu ilin yarım ili arxada qaldı. Ekspertlərin fikrincə, bu ilin birinci yarımilliyində iqtisadiyyatın, habelə digər aparıcı sahələrin nəticələri qənaətbəxş olmuşdur. Söz yox ki, son iki il yaddaşlara qlobal maliyyə və iqtisadi böhran dövrü kimi həkk olunmuşdur. Dünya iqtisadiyyatını sınağa çəkən böhran ölkəmizdən də yan keçməmişdir. Lakin ümummilli lider Heydər Əliyevin siyasi irsinə əsaslanan və Prezident İlham Əliyev tərəfindən davamlı olaraq həyata keçirilən sosial-iqtisadi inkişaf kursu böhranın acı fəsadlarının qarşısını almış, məqsədyönlü islahatların həyata keçirilməsi təmin olunmuş, xalqın rifah halı daha da yaxşılaşdırılmışdır.

Azərbaycanın iqtisadi inkişaf tempinin ildən-ilə artması ölkəmizə olan marağı daha da artırmışdır. Qeyd etdiyimiz kimi, qlobal maliyyə və iqtisadi böhran müxtəlif dövlətlərin vəziyyətini gərginləşdirsə də, Azərbaycanda 2009-cu ilin müvafiq dövrü ilə müqayisədə 2010-cu ilin altı ayında dövlət büdcəsindən sosial təminat, sosial müdafiə, kənd təsərrüfatı, müdafiə, mədəniyyət, iqtisadi fəaliyyət, səhiyyə və digər sahələrə daha çox vəsait yönəldilmişdir. Demək, ölkəmizdə iqtisadiyyatın inkişafı yüksələn xətt üzrə inkişaf etmiş, dövlət başçımızın ardıcıllıq və peşəkarlıqla həyata keçirdiyi islahatlar ölkəmizin iqtisadi qüdrətini daha da artırmışdır.

Bu ilin iyun ayında Milli Məclisdə "2010-cu il dövlət büdcəsi haqqında" Azərbaycan Respublikasının Qanununa dəyişikliklər edilən zaman bir daha məlum oldu ki, ölkəmizdə iqtisadiyyatın inkişaf tempi nəinki qorunub saxlanılmış, əksinə, artım qeydə alınmışdır. Həmişə olduğu kimi, bu dəfə də artım əhalinin sosial-müdafiəsinin gücləndirilməsinə, aztəminatlı ailələrin yaşayış səviyyəsinin yüksəldilməsinə, hərbi xərclərin artırılmasına, elm, təhsil, mədəniyyət və səhiyyənin inkişafına, keyfiyyətcə daha da yaxşılaşdırılmasına yönəldilmişdir.

Prezident İlham Əliyev də dövlət büdcəsinə edilmiş dəyişiklikdən danışarkən bu il artımın olduğunu diqqətə çatdıraraq demişdir: "Bildiyimiz kimi, bu yaxınlarda büdcəyə dəyişiklik edilmişdir və bütövlükdə, bizim dövlət büdcəmiz hazırda 15 milyard dollar səviyyəsindədir. O cümlədən, 500 milyon dollar vəsait hərbi məsələlərin həllinə əlavə olaraq ayrılmışdır. Bu, bizim məqsədyönlü siyasətimizin bir hissəsidir. Çünki biz müharibə şəraitində yaşayırıq. Belə olan halda, biz diqqətimizi, ilk növbədə, ölkəmizin hərbi potensialının gücləndirilməsinə verməliyik və bunu edirik. Bu gün Azərbaycanın bütün hərbi xərcləri 2 milyard 150 milyon dollardır ki, bu da Ermənistanın bütün dövlət büdcəsindən çoxdur. Biz vaxtı ilə bir neçə il bundan əvvəl qoyulmuş məqsədə çatdıq. Bu, bizə imkan verir ki, ordumuzu daha da müasirləşdirək, ən müasir silah-sursat, texnikanı Azərbaycana gətirək. Eyni zamanda, ölkə daxilində güclü müdafiə sənayesini yaradaq. Biz qısa müddət ərzində buna nail ola bilmişik".

Azərbaycanın iqtisadi qüdrəti artdıqca müdafiə potensialının gücləndirilməsinə xüsusi diqqət yetirilir. Çünki hazırkı şəraitdə bu, çox vacibdir. Bizim hərbi qüdrətimiz Ermənistan -Azərbaycan, Dağlıq Qarabağ münaqişəsinin nizamlanması üçün aparılan danışıqlarda həlledici rol oynaya bilər. Ona görə hərbi sahənin inkişaf etdirilməsi prioritet məsələlərdəndir. Ermənistan tərəfi digər ölkələrin gücünə ümid bağlasa da, Azərbaycanda artıq qüdrətli Milli Ordu formalaşıb. Bu gün Ermənistanın ictimai-siyasi xadimləri öz ölkələrini Rusiyanın quberniyası adlandırırlar. Bu da səbəbsiz deyildir. Çünki Ermənistanın bütün sərhədləri Rusiyanın ordusu hesabına qorunur. Azərbaycanın isə getdikcə artan iqtisadi qüdrəti sayəsində Müdafiə Sənayesi Nazirliyinin strukturu formalaşdırıldı. Prezident İlham Əliyevin sərəncamı ilə yaradılan nazirliyin tabeliyində olan müəssisələrdə qısa müddət ərzində hərbi sahədə istifadə edilən müxtəlif adda məhsullar istehsal olundu. Hazırda Müdafiə Sənayesi Nazirliyi dünyanın 60-dan çox ölkəsi ilə əməkdaşlıq edir. Məhz bunun nəticəsidir ki, nazirliyin müəssisələrində müasir tələblərə cavab verən müdafiə təyinatlı məmulatların seriyalı istehsalı həyata keçirilir. Bu məmulatların çeşidlərinin sayı artıq 413-ə çatdırılıb. Bir faktı da diqqətə çatdıraq ki, 2006-cı illə müqayisədə 2009-cu ildə istehsal həcmi 2,8 dəfə, müdafiə təyinatlı məmulatların istehsalı isə 46 dəfə artırılmışdır. Dövlət başçımızın uzaqgörənliyi, ölkənin hərbi potensialının daha da gücləndirilməsi məqsədi ilə yaradılmış Müdafiə Sənayesi Nazirliyi ölkəmizin Silahlı Qüvvələrini silah-sursat, hərbi texnika və digər vasitələrlə təmin etməklə yanaşı, xarici bazarlara da məhsul ixrac etməyə qadirdir. Bu il 413 adda müdafiə təyinatlı məmulatların və onların ehtiyat hissələrinin istehsalı nəzərdə tutulub. Bu isə ötən il istehsal olunan məmulatların sayından 1,2 dəfə çoxdur. Göründüyü kimi, ölkəmizin hərbi potensialı getdikcə gücləndirilir və bu, prioritet sahə kimi daim dövlət başçımızın diqqət mərkəzindədir.

Azərbaycan Prezidenti, Silahlı Qüvvələrin Ali Baş Komandanı İlham Əliyev Bakıda Dövlət Sərhəd Xidmətinin Akademiyasının açılışı zamanı sərhədçilər qarşısında çıxış edərkən hərbi gücün artırılmasının vacibliyini xüsusi olaraq diqqətə çatdırdı və dedi: "Biz ölkədə gedən işləri yüksək səviyyədə qururuq. Azərbaycan gündən-günə güclənir, möhkəmlənir. Maliyyə imkanlarımız, hərbi xərclərimiz artır və hərbi xərclərimiz dövlət büdcəsində ən birinci yerdədir. Bu, belə də olmalıdır, çünki biz müharibə şəraitində yaşayırıq. Müharibə hələ bitməyib. Müharibənin birinci mərhələsi başa çatıbdır, atəşkəs rejimi bağlanıbdır. Ancaq hər an hazır olmalıyıq və hazırıq ki, öz torpaqlarımızı işğalçılardan azad edək. Bir daha demək istəyirəm ki, bunu etmək üçün ilk növbədə hərbi güc lazımdır. Biz bu hərbi gücü yaradırıq, böyük dərəcədə yaratmışıq və bu proses uğurla davam etdirilir. Azərbaycanın hərbi potensialının gücləndirilməsi üçün biz bütün maliyyə resurslarını cəmləşdirmişik ki, torpaqlarımızı işğalçılardan azad edək. Bu gün Azərbaycan Ordusu, Azərbaycanın hərbi potensialı buna imkan verir".

Azərbaycan dünyada sülhsevər dövlət kimi tanındığından hələlik münaqişənin tənzimlənməsində və işğal altında olan torpaqlarımızın azad olunmasında sülh variantına, danışıqlar prosesinə daha çox üstünlük verilir. Danışıqlar prosesində Azərbaycan tərəfi həmişə konstruktiv mövqe nümayiş etdirir. Ermənistan tərəfi isə heç bir tutarlı arqument irəli sürmədən danışıqlardan yayınır, işğalçılıq missiyasından əl çəkə bilmir. Bu isə münaqişənin nizamlanmasında vasitəçilik missiyasını üzərinə götürən ATƏT-in Minsk qrupunun həmsədrlərinin, habelə nüfuzlu beynəlxalq qurumların nümayəndələrinin diqqətindən yayınmır. Artıq dünya birliyi də Azərbaycanın mövqeyini müdafiə edir. Ermənistanın tanınmış ictimai-siyasi xadimləri də bu fəallığı gizlətmir və bundan ciddi narahat olduqlarını bildirirlər. Məsələn, Ermənistan milli təhlükəsizlik naizirinin sabiq müavini Qurgen Yegizaryan kütləvi informasiya vasitələrinə verdiyi müsahibəsində deyib ki, Dağlıq Qarabağ münaqişəsinin nizamlanmasında Azərbaycanın mövqeyi xeyli güclənib. O, bunu danışıqlar prosesinin son nəticələri ilə əlaqələndirib. Q. Yegizaryan deyib ki, bütün sahələr üzrə Azərbaycanın mövqeləri Ermənistanın mövqelərindən qat-qat üstündür. O, hətta beynəlxalq təşkilatların da artıq Azərbaycanın tərəfində olduqlarını da diqqətə çatdırıb və deyib ki, münaqişənin nizamlanmasında beynəlxalq təşkilatların rəsmi Bakının tələblərini müdafiə etməsi Ermənistan diplomatiyasının iflasından xəbər verir.

Son vaxtlar Ermənistanda ictimai-siyasi gərginlik artmaqdadır. Orduda pərakəndəlik, qaçaqaç düşüb. Dövlət başçımızın Bakıda Dövlət Sərhəd Xidmətinin Akademiyasının açılışındakı nitqi zamanı dediyi qətiyyətli sözlər Ermənistan hakimiyyətinin nümayəndələri ilə yanaşı, hərbçiləri də çaş-baş salıb. İş o yerə çatıb ki, Ermənistanın müdafiə naziri Seyran Ohanyanın hərbi xidmətdə olan qohumu əsgər yoldaşları ilə birlikdə öz hərbi hissələrini tərk edərək Azərbaycan tərəfinə təslim olublar. Möhtərəm Prezidentimiz bəyan etdi ki, danışıqlar pozularsa, o zaman yeni vəziyyət yaranacaq və münaqişənin hərbi yolla həlli məsələsi gündəliyə salınacaqdır. Artıq Ermənistan tərəfinə çox yaxşı məlumdur ki, münaqişənin hərbi yolla nizamlanması məsələsi onları məhvə aparacaq. Çünki Azərbaycan çox güclü, nizami orduya malikdir. Azərbaycan Silahlı Qüvvələrinin yaradılmasının 90 illiyi ilə əlaqədar Bakıda keçirilən hərbi parad təkcə Ermənistanın yox, bütün dünyanın diqqət mərkəzində idi. Bir daha bəlli oldu ki, Azərbaycan qüdrətli orduya malikdir və işğal altında olan ərazilərimizi hər an azad etməyə qadirdir.

Bu gün dövlətimizin sərhədləri yüksək səviyyədə qorunur. Bu, həm də daxildə bütün işləri, nəzərdə tutulmuş məqsədyönlü proqramları müvəffəqiyyətlə həyata keçirməyə imkan yaradır. Bunun nəticəsidir ki, Azərbaycan həm güclü iqtisadi potensiala, həm də hərbi potensiala malikdir. Möhtərəm Prezidentimizin həyata keçirdiyi uğurlu strategiya nəticəsində digər zəruri sahələrdə olduğu kimi, dövlət sərhədinin mühafizəsində də ciddi tədbirlər həyata keçirilmiş, bu sahədə ən müasir texniki vasitələrin tətbiqi sürətlənmişdir. Ölkəmizin iqtisadi qüdrəti artdıqca Milli Ordunun daha da gücləndirilməsi, hərbçilərin şəraitinin yaxşılaşdırılması, peşə bacarığının, döyüş qabiliyyətinin artırılması, ən müasir texnika, avadanlıq və vasitələrlə təminatında qətiyyətli addımlar atılır. Bu gün Azərbaycan regionda həm iqtisadi, həm də hərbi potensiala malik lider dövlətdir.

Əliqismət BƏDƏLOV

Xalq qəzeti.- 2010.- 21 avqust.- S. 1.