Ankara hər zaman türk birliyinə sədaqət göstərməlidir

Son zamanlar mətbuatda özünə geniş yer alan Türkiyə - Ermənistan sərhədlərinin açılacağı barədə xəbər hər iki ölkənin vətəndaşlarını çox narahat etdi. Ancaq mənə elə gəlir ki, bu məqam daha çox yaradıcı ziyalılarımız üçün üzücü oldu. Mən "yaradıcı ziyalılarımız" ifadəsini təsadüfən işlətmirəm. Çünki dəqiq bilirəm ki, Türkiyədəki həmkarlarımız da elə mənim kimi düşünürlər. Onlar da uzun onillərdən bəri türk dünyasının birliyinə çalışmış, müştərək ədəbiyyatımızı, mədəniyyətimizi, mənəvi dəyərlərimizi qoruyub saxlamağa və inkişaf etdirməyə xidmət etmişlər. Son iyirmi ildə siyasətçilərimiz də bu sahədə çox böyük uğurlara imza atmışlar. İndi isə... hər iki ölkənin əhalisini çox ciddi şəkildə narahat edən bir xəbər eşidirik.

Hələ 15 il əvvəl ümummilli liderimiz Heydər Əliyevdən eşitmişdim ki, Azərbaycanın dövlət müstəqilliyini gözü götürməyən xarici qüvvələr var. Həmin qüvvələr ölkəmizə gah gizli şəkildə, gah da açıq-açığına pislik eləməyə çalışırlar. Ulu öndərimiz xatırladırdı ki, müstəqil Azərbaycan dövləti inkişaf etdikcə, respublikamız beynəlxalq aləmdə özünə layiqli yer tutduqca, xüsusən, türk dünyasındakı mövqelərimiz möhkəmləndikcə bədxahlarımız daha çox narahat olur və bu prosesi əngəlləmək üçün yeni yollar axtarırlar. Budur, artıq həmin variant hamının gözləri qarşısındadır. Azərbaycanın ən yaxın dostunun, ən etibarlı müttəfiqinin əliylə respublikamıza zərbə vurulur. Daha doğrusu, bu zərbəni vurmağa cəhd edilir.

Bu prosesdə həm Azərbaycanın, həm də Türkiyənin uduzacağı şəksizdir. Belə ki, sərhədlər açılacağı təqdirdə Ermənistan iqtisadi böhrandan xilas olacaq və Dağlıq Qarabağ münaqişəsinin həll edilməsi üçün aparılan danışıqlarda daha da "yuxarıdan gedəcəkdir". Yəni İrəvanın destruktivlik üçün imkanları artacaq. Bu, məlum məsələdir və sərhədlərin açılacağı təqdirdə bu addımın Azərbaycana edəcəyi təsirin mahiyyəti bundan ibarətdir. Bəs Türkiyə nəyi və necə uduzacaq?

Son 20 ildə dünyada gedən ictimai-siyasi proseslərdən maksimum dərəcədə bəhrələnən Ankara türk dünyasında öz liderlik mövqeyini möhkəmləndirmiş, Rusiya və İranla münasibətlərini normallaşdırmış, Avropa Birliyinə üzv olmaq üçün şanslarını artırmış və ən nəhayət, ərəb ölkələri arasında böyük nüfuz qazanmışdır. Yəni çoxsaylı siyasi-diplomatik gedişlər nəticəsində onlarla maneə geridə qalmışdır. İndi, Türkiyəyə ərazi iddialarını həyasızlıqla davam etdirən və uydurma soyqırımı məsələsini dünya ölkələrinin parlamentlərinə çıxaran Ermənistanın məhz Ankaranın əli ilə xilas edilməsi... Mən bilən, Türkiyə bu məsələdə çox böyük nüfuz itkisi ilə üzləşəcək. Cənab Baş nazir Rəcəb Tayyib Ərdoğanın Davosdakı mövqeyindən sonra Türkiyənin İslam aləmindəki mövqeyi birə on qat möhkəmlənmişdisə, indi qatil ermənilərə nicat verilməsiylə inam, etimad itiriləcəkdir. Xüsusən, türkdilli ölkələrdə bu məsələ birmənalı şəkildə qəbul edilməyəcək. Biri Türkiyəni kiminsə qabağından qaçmaqda, digəri qorxaqlıqda, başqa biri isə ümumtürk mənafeyinə xəyanətdə ittiham edəcək.

Ancaq hələ hər şey itirilməyib. Hələ məsələləri öz düzgün məcrasına yönəltmək mümkündür.

Mən inanıram ki, qardaş Türkiyənin dövlət başçıları bu məsələdə Azərbaycanın mənafelərini ayaq altına atmayacaqlar. Belə düşünməyə haqqım da var. Çünki hələ 60-cı illərdən etibarən bir yaradıcı adam kimi Türkiyədə on dəfələrlə olmuşam və oradakı Azərbaycan sevgisinin, bizə olan hörmət və ehtiramın canlı şahidiyəm. SSRİ-nin bütün mütəfiq respublikalarında, keçmiş sosialist ölkələrinin hamısında, Avropanın və dünyanın bir çox ölkələrində mənim çoxsaylı görüşlərim olub, əsərlərimin ifası təşkil edilib. Ancaq tam səmimiyyətlə deyə bilərəm ki, heç zaman, heç yerdə Türkiyədəki kimi qarşılanmamışam. Bu isə Anadolu türklərinin Azərbaycan türklərinə olan qardaşlıq münasibətinin nəticəsi idi. Ona görə də mən bu sərhədlərin açılacağı barədə xəbərlərə inanmamaqda tamamilə haqlıyam. İnanmıram ki, Türkiyə kimi sivil və dünyəvi dövlət bizə qarşı belə bir addım atmış ola. Yox, qardaş, inanmıram..

Tofiq BAKIXANOV,

Respublikanın xalq artisti,

Bakı Musiqi Akademiyasının professoru,

"Şöhrət" ordenli bəstəkar

Xalq qəzeti.- 2010.- 26 avqust.- S. 4.