Əhməd
DAVUDOĞLU: Ermənistanla sərhədlərimizin müvəqqəti
olsa belə, açılması mümkünsüzdür
Azərbaycan ictimaiyyəti
Türkiyənin qəti və prinsipial mövqeyini dəyişməməsini Ermənistan-Azərbaycan,
Dağlıq Qarabağ münaqişəsinin
həllinə mühüm töhfə kimi dəyərləndirir
Zaman-zaman şahidi olmuşuq ki, Türkiyə - Azərbaycan
dostluğuna, birliyinə xələl gətirmək
üçün bəzi dövlətlər, həmçinin
beynəlxalq təşkilatlar min hiylə və oyundan
çıxıblar. Son illər bu dostluğa zərbə
vurmaq üçün daha çox erməni kartından istifadə
edirlər. Lakin bu
"siyasi oyunlar" yenə də heç bir fayda vermir. ABŞ Konqresinin Xarici Əlaqələr Komitəsində qondarma
"erməni soyqırımı"
ilə bağlı qərar qəbul ediləndə ilk etiraz səsini qaldıran məhz Azərbaycan oldu. Tarixi faktlarla diqqətə çatdırıldı ki,
ermənilər həmişə
türklərə qarşı
terror aktları və
dəhşətli soyqırımı
törətmişlər. Yaxın vaxtlarda
Quba rayonunda aşkarlanmış kütləvi
qəbiristanlıq da ermənilərin türklərə
qarşı törətdikləri
vandal aktlarının bariz
nümunəsi idi.
Bütün dünyaya
bir daha bəyan oldu ki, ermənilərin türklərə qarşı
soyqırımı iddiaları
yalan və cəfəngiyatdan ibarətdir.
Əslində, onlar özləri
terrorçu və zalımdırlar.
Azərbaycanın,
Türkiyənin və
ümumilikdə türkdilli
dövlətlərin ictimai-siyasi
xadimlərinin, ziyalıların,
siyasi partiya nümayəndələrinin kəskin
etiraz səsləri tarixin saxtalaşdırılmasının
- qondarma "erməni
soyqırımı"nın
tanınmasının qarşısında
səddə çevrildi.
ABŞ Konqresi Xarici Əlaqələr Komitəsinin qərarını
səsverməyə çıxarmadı
və beləliklə,
ermənilərin arzuları
ürəklərində qaldı.
2009-cu ildə də buna oxşar hadisə baş verəndə Azərbaycan
xalqı, xüsusi olaraq dövlətimizin başçısı müdriklik
nümayiş etdirdi.
Yenə də Türkiyə - Azərbaycan dostluq və qardaşlığı,
birliyi şər qüvvələrə qalib
gəldi. Həmin vaxt
Türkiyəyə Ermənistan
ilə sərhədlərin
açılması, diplomatik
əlaqələrin bərpası
üçün güclü
təzyiqlər göstərilirdi.
Hətta
bu məsələnin
reallaşdırılması üçün Rusiya və ABŞ-ın vasitəçiliyi ilə
Sürixdə protokol da imzalandı. Lakin Türkiyə yenə də əyilmədi, sınmadı. Azərbaycanla dostluq və əməkdaşlıqda sadiqliyini
açıq şəkildə
nümayiş etdirdi.
Türkiyənin Baş
naziri Rəcəb Tayyib Ərdoğan, Prezident Abdullah Gül və xarici işlər naziri Əhməd Davudoğlu bildirdilər ki, Ermənistan işğal etdiyi Azərbaycan torpaqlarını azad etməyənədək, Dağlıq
Qarabağ problemi Azərbaycanın ərazi
bütövlüyü çərçivəsində
həll olunmayana qədər Türkiyə
- Ermənistan sərhədləri
açılmayacaq və
iki ölkə arasında hər hansı bir əməkdaşlıq olmayacaq.
Axı bu sərhədlər
1993-cü ildə Ermənistanın
Azərbaycan torpaqlarını
işğal etməsindən
sonra bağlanmışdı.
Hazırda münaqişənin həllində heç bir müsbət irəliləyiş qeydə
alınmayıb. Sərhədlərin açılması isə
onsuz da qeyri-konstruktiv mövqedən
çıxış edən
Ermənistanın əlini-qolunu
açacaq və beləliklə, münaqişənin
yoluna qoyulmasını
daha da çətinləşdirəcəkdir.
Bu isə Azərbaycanın
milli maraqlarının
zərbə altında
qalması deməkdir.
Türkiyə rəsmiləri həmişə
qətiyyətlə bildiriblər
ki, "Azərbaycan bizim strateji ortağımızdır və
qardaş ölkənin
milli maraqlarına zidd olacaq hər
hansı bir addım atılmayacaq".
Bütün bu açıqlamalar
fonunda rəsmi Ankaranın qətiyyət
nümayiş etdirməsi
fitnəkar erməniləri
və onların tərəfdarlarını növbəti
dəfə məyus etdi. Ermənistan rəhbərliyi Türkiyəyə
hər hansı bir təzyiqin səmərəsiz qaldığını
açıq şəkildə
gördü və sərhədlərin açılmasını,
diplomatik əlaqələrin
qurulmasını nəzərdə
tutan Sürix protokollarının müzakirəsinin
dondurulması haqqında
qərar qəbul etdi.
Son vaxtlar
Türkiyənin Ermənistan
ilə sərhədlərinin
açılması məsələsi
yenidən gündəmə
gəlmişdi. Türkiyə - Azərbaycan qardaşlığından
narahat olan qüvvələr bu dəfə daha bir "oyuna" əl atdılar. Bu il sentyabrın
11-17-də NATO-nun təlimləri Ermənistanda keçiriləcək
və bu müddətdə Türkiyə
- Ermənistan sərhədləri
müvəqqəti olaraq
açılacaqdı, lazım
olan avadanlıqlar bu ərazidən keçiriləcəkdi. Türkiyə NATO dövləti olduğundan
bu tapşırığı
icra etməli idi. Lakin Türkiyə rəsmiləri
Azərbaycanın maraqlarına
zidd addım atmamağı vəd edib. Hər hansı bir səbəb Türkiyə
rəhbərliyinin öz
vədlərini pozmasına
presedent ola
bilməzdi. Böyük bir ölkənin
dövlət rəsmilərinin
öz mövqelərini
tez-tez dəyişməsi
yolverilməzdir. Azərbaycan xalqı
israr edirdi ki, Türkiyə işğalçı Ermənistanla
sərhədlərini açmamalıdır.
Çünki Ermənistan bundan
istifadə edib batmaqda olan iqtisadiyyatını
dirçəltmək, yenidən
həm Türkiyəyə,
həm də Azərbaycana qarşı iddialarla çıxış
etmək imkanı qazanardı. Üstəlik, Ermənistan prezidenti Serj Sarkisyan "Yevronyus" televiziya kanalına müsahibə verərkən demişdi ki, Türkiyə Ermənistan ilə sərhədləri açarkən
heç bir şərt irəli sürməyəcək. Onun sözlərindən
belə çıxırdı
ki, Ermənistan Türkiyənin heç bir şərtini qəbul etməyəcək
və bu şərtləri eşitmək
belə istəmir.
Guya, Türkiyə sərhədləri
açmaq və Ermənistana yardım göstərməyə borcludur.
Axı Ermənistan yardımlar və ianələr hesabına dolanan ölkədir. Türkiyə bu dəfə də təzyiqlər qarşısında əyilmədi.
Hətta
NATO dövləti olmasına
baxmayaraq müvəqqəti
olsa belə razılıq vermədi.
Bu məsələdə qətiyyətli mövqe nümayiş etdirdi.
Türkiyənin xarici işlər
naziri Əhməd Davudoğlunun dünən
yayılan bəyanatında
Türkiyənin mövqeyi
hamıya bəlli oldu. Ə. Davudoğlu
Konya şəhərində jurnalistlərin suallarına
cavab verərkən deyib ki, NATO-nun Ermənistanda keçiriləcək
hərbi təlimləri
humanitar xarakter daşıyır və təbii fəlakətlərlə
bağlıdır. Türkiyə də NATO-nun üzvü kimi bu təlimlərdə
iştirak edəcəkdir.
Lakin sərhədlərimizin müvəqqəti
olaraq açılması
gündəlikdə deyildir.
Türkiyənin xarici işlər
naziri əlavə olaraq bildirib ki, hərbi təlimlər zamanı sərhədlərin açılacağı
barədə mətbuatda
gedən xəbərlər
həqiqətə uyğun
deyildir.
Göründüyü kimi, bədxahlar
bu dəfə də Türkiyə-Azərbaycan
dostluğunu, qardaşlığını
sarsıda bilmədilər.
Türkiyə - Ermənistan
sərhədlərinin açılması
məsələsini yenidən
gündəmə gətirən
qüvvələr Türkiyə
Prezidenti Abdullah Gülün
yaxın günlərdə
Azərbaycana rəsmi
səfəri zamanı
ölkəmizin Prezidenti
İlham Əliyev ilə "Azərbaycan Respublikası və Türkiyə Respublikası
arasında strateji tərəfdaşlıq və
qarşılıqlı yardım
haqqında müqavilə"
imzalamasından ciddi narahatlıq keçirirlər.
Ona görə də təhlükəli bir
"oyuna" başlamaq
istəyirdilər. Türkiyənin xarici işlər naziri Ə. Davudoğlunun bu günlərdə ANS televiziya kanalına verdiyi müsahibəsi həmin "siyasi oyunun" oyunçularına
tutarlı cavab oldu. Ə. Davudoğlu
müsahibəsində deyib:
"Türkiyə Azərbaycanın
müdafiəsini öz
müdafiəsi kimi bilir. Azərbaycan getdikcə inkişaf
edir. Ermənistan isə kasıblayır,
insanlar oranı tərk edir. Qarabağ məsələsində
bir azərbaycanlı nə qədər üzülərsə, bir
türkün də ürəyi o qədər
yanar... Bir yerdə Azərbaycan
bayrağını yüksəldiyini
görsək, beynəlxalq
forumda Azərbaycanın
sədrliyini görsək,
bu, bizim üçün ən böyük qürurdur."
Türkiyə ilə Azərbaycan
arasındakı əlaqələr
gündən-günə daha
da möhkəmlənir.
Hətta
dünyanın fövqəldövlətləri
də hər hansı vasitələrlə
qardaş ölkəyə
təsir göstərsələr
belə, bu, Türkiyə - Azərbaycan
birliyini sarsıda bilməz. Dövlətimizin başçısı da dəfələrlə bəyan edib ki, "Türkiyə ilə Azərbaycan arasındakı əlaqələr
xüsusi xarakter daşıyır. Bu, iki
dost, qardaş xalq arasında olan münasibətlərdir. Əsrlər boyu xalqlarımız bir yerdə yaşamışlar, yaratmışlar,
həmişə bir-birinə
dəstək, dayaq olmuşlar. Azərbaycan dövlət müstəqilliyini
bərpa etdikdən sonra bizi müstəqil
ölkə kimi tanıyan Türkiyə olmuşdur. O gündən
bu günə qədər Türkiyə
ilə Azərbaycan arasındakı əlaqələr
çox sürətlə
inkişaf etmiş, demək olar ki, bütün sahələri əhatə
etmiş və bu gün də
strateji müttəfiqlik
səviyyəsinə qalxmışdır.
Əliqismət BƏDƏLOV
Xalq qəzeti.- 2010.- 28 avqust.- S. 3.