Sabirabadlılar
qışa hazırlıqdan narahat olmaya bilərlər
Ekoloqlar və
iqlimşünaslar belə mülahizə yürüdürlər
ki, bu ilin qışı çox sərt keçəcək. Artıq
Avropa ölkələri bu proqnozların nəticələrini
öz üzərlərində hiss etməkdədirlər. Qoca
qitənin bir çox ölkələri noyabrın
axırlarından etibarən sərt və şaxtalı
qışla mübarizə aparmaqdadır. Elə bu günlərin
özündə də həmin ölkələri qar-boran,
daşqın və digər təbii fəlakətlər
ağuşuna alıb silkələməkdədir.
Ancaq Qərblə Şərqin
qovuşuğunda yerləşən, iqlim şəraiti həmişə
mülayim olan Azərbaycan, yerli sinoptiklərin qənaətlərinə
görə, bu qış soyuqdan çox da əziyyət
çəkməyəcək. Qış mövsümü
nisbətən yumşaq keçəcək. Bu, əlbəttə,
sinoptiklərin məlumatıdır. Təbiət isə hər
cür belə proqnozdan yüksəkdədir və isti havalara
öyrəşmiş Azərbaycan insanı üçün
istənilən sürprizi hazırlaya bilər. Ona görə
də, sadəcə olaraq, proqnozları nəzərə almaq,
eyni zamanda, arxayınlaşmadan qışa
yaxşı-yaxşı hazırlaşmaq lazımdır.
Bu ilin aprel-may aylarında Kürün daşması və ətraf əraziləri basması nəticəsində böyük təbii fəlakətlə qarışlaşmış aran zonası üçün bu məsələ xüsusilə aktualdır. Ona görə də qışa hazırlığın səviyyəsi ilə yaxından tanış olmaq üçün, ilk növbədə bölgənin iri rayonlardan olan Sabirabada baş çəkdik. Daşqınların nəticələrini sürətlə aradan qaldırmış, əhalinin rahatlığını təmin etmiş rayonda məsul şəxslərlə söhbətlərdən məlum oldu ki, burada qışa səylə hazırlaşırlar. İcra hakimiyyətinin yüksək səviyyəli məmurları bildirdilər ki, qışa hazırlıqla bağlı, demək olar ki, bütün tədbirlər görülüb, əlaqədar təşkilatlara müvafiq tapşırıqlar verilib.
Əlbəttə, qış gələndə ilk növbədə qaz və işıq məsələsi yada düşür. Qaz yanmırsa, işıq yoxdursa, daha qışa hazırlıqdan necə danışmaq olar?!
Qənimət Səmədov, Sabirabad Qaz İstismar Sahəsinin rəisi:
- Əvvəlcə təbii qazdan istifadə edən abonentlər haqqında məlumat verərək bildirmək istəyirəm ki, rayonda abonentlərin ümumi sayı 5038 nəfərdir. Onlardan 4429-u şəhərdə, 609-u isə kəndlərdə yaşayır. Abonentlərdən 52-si təşkilatlardır. Sabirabad Qaz İstismar Sahəsi qış mövsümündə əhalini qazla fasiləsiz və problemsiz təmin etmək üçün bütün il ərzində bir sıra işlər görüb. Şəhərdəki evlərdə 3967 sayğac həyətlərdən kənara çıxarılıb və G-4T markalı Almaniya sayğacları ilə əvəzlənib. Sabirabad şəhərində uzun illərdən bəri istismar olunan 31 ədəd qaztənzimləyici şkaf dəyişdirilərək yenisilə əvəzlənib, 41 ədəd yeni siyirtmə quraşdırılıb. Şəhərdəki Suqovuşan qazpaylayıcı stansiyasından Heydər Əliyev prospekti istiqamətində 3 kilometr uzunluğunda 315 millimetrlik polietilen daşıyıcı kəmər çəkilərək istifadəyə verilib. Şərifzadə küçəsi istiqamətində Heydər Əliyev prospekti ilə 5300 poqonometr 219 millimetrlik orta təzyiqli qaz xətti çəkilərək halqavari qaz sistemi bərpa edilmişdir. Şəhərin Füzuli küçəsindən 800 poqonometr 219 millimetrlik orta təzyiqli qaz xətti çəkilməklə Füzuli, Q.Namazəliyev, Xanlar Səfərəliyev, Vidadi küçələrinə normal qaz verilib. Bu qayda ilə Ayna Sultanova, Hüseyn Cavid, Babək, Şəhriyar, Xətai, R.Şirinov, küçələrinə də qaz verilməsi təmin edilib. Vüqar Əhmədov küçəsiylə 18 küçəyə çıxış verilməklə polietilen boru çəkilib və əhaliyə qaz verilib. Son vaxtlar rayonun Kürkəndi ərazisi tamamilə qazlaşdırılıb. Yaxın günlərdə sayğaclar quraşdırıldıqdan sonra əhalinin qazla təminatına başlanacaq. Hazırda rayonun Qalaqayın kəndinin qazlaşdırılması üçün tədbirlər görülür.
Fateh Namazov, Sabirabad Yüksək Gərginlikli Elektrik Şəbəkəsi Rayonunun rəisi:
- Qışa hazırlıq məsələləri bir-iki ay ərzində həll olunan iş deyil. Ona görə də şəbəkə rayonu təxminən 8 aydır ki, bu məsələlərlə məşğul olur, rayon əhalisinin fasiləsiz enerji ilə təmin olunması üçün bütün imkanlarını səfərbər edir. Artıq yaxşı nəticələr də əldə olunub və bu, deməyə əsas verir ki, bu qış nə qədər sərt keçsə də, sabirabadlıların elektrik enerjisi ilə bağlı heç bir problemi olmayacaq.
Yeri gəlmişkən, qeyd etmək istəyirəm ki, 110-35-10 kilovoltluq Sabirabad, eyni tutumlu Cavad, Xəlfəli yarımstansiyalarında əsaslı təmir-bərpa işləri görülüb, trasformatorların və hava xətlərinin yağ açarları təmir olunub. Eləcə də 110 kilovoltluq Xəlfəli, İkinci İmişli və Axtaçı hava xətləri əsaslı təmir olunub, yararsız naqil və izolyatorlar dəyişdirilib, digər vacib işlər həyata keçirilib. 35 kilovoltluq hava xətlərində də müvafiq təmir-bərpa işləri görülüb. Rayon ərazisində 922 ədəd "Smartkart" tipli elektrik sayğacı quraşdırılıb. Kovlar, Ulacalı, Mürsəlli, Nərimankənd, Türkədi, Cavad, Əlicanlı, Qasımbəyli, Novruzlu, Yuxarı Axtaçı, Məmişlər, Kürkəndi və digər kəndlərdə istismara yararız dayaqlar (129 ədəd) və naqillər (1940 kiloqram) yenisi ilə əvəz olunmuşdur. Şəhər və kəndlərdə ilin əvvəllərindən bəri 47-dən çox zədələnmiş transformator əsaslı təmir olunub və ya yenisi ilə əvəzlənib, fəaliyyətdə olan tarsformatorlar cari təmir olunaraq istifadəyə yararlı vəziyyətə gətirilib.
Bayram Bağırov,
Sabirbad neft bazasının direktoru:
- Qışa
hazırlıq işlərinə
iyun ayından başlamışıq. Bir çox
neft məhsulu çənləri təmir
edilib və həmin çənlərdəki
neftin miqdarını məsafədən idarə
etmək üçün
səviyyəölçənlər quraşdırılaraq istifadəyə
verilib. Bu, həm də işçilərin əmək
şəraitinin yaxşılaşdırılması
deməkdir. Neftbazada istifadə
olunan odsöndürənlərin
tərkibi yeniləşdirilib,
yeni yanğından mühafizə vasitələri
alınıb. Enerji təchizatının
yaxşılaşdırılması üçün 150 kva gücündə 3 fazalı
dəyişən cərəyan
generatoru quraşdırılıb.
Neftbazada
istifadədə olan
160 kva gücündə
cərəyan tarsformatoru,
elektrik avadanlıqları,
kabel xətləri və isitmə sistemi təmir edilərək qaydaya salınıb. Bütün bu
işlər qış
mövsümündə rayonda
idarə, müəssisə
və əhalinin neft məhsulları ilə lazımınca təminatını həyata
keçirmək məqsədilə
görülüb. Sabirabad neft
bazası, eyni zamanda, Saatlı, İmişli, Beyləqan və Füzuli rayonlarına da xidmət edir. Qışa hazırlıqla bağlı
bu rayonlardakı idarə və müəssisələrin, eləcə
də təhsil və səhiyyə ocaqlarının, qaçqın
və məcburi köçkünlərin yanacaqla
vaxtında təmin olunması üçün
kifayət qədər
yanacaq ehtiyatı yaradılıb. Bu da haqlı olaraq
bu cür düşünməyə əsas
verir ki, neftbaza qış mövsümü ərzində
xidmət göstərdiyi
sahələri yanacaqla
lazımınca təmin
edəcək.
Əliqulu Babaşov,
Respublika Nəqliyyat Nazirliyi "Azəryolservis"
Açıq Səhmdar
Cəmiyyəti Sabirabad
35 saylı Yol İstismar İdarəsinin
rəisi:
- Xidmət
göstərdiyimiz sahədə
qışa hazırlıq
işlərini Nəqliyyat
Nazirliyinin "Nəqliyyat-yol
kompleksində 2010-2011-ci illərin
qış mövsümünə
hazırlıq işləri
görülməsinin təmin
edilməsi haqqında"
17 sentyabr 2010-cu il tarixli əmri və "Azəryolservis"ASC-nin
"Nəqliyyat vasitələri
və maşın-mexanizmlərin
2010-2011-ci illərin payız-qış
mövsümünə hazırlığı
barədə" 1 noyabr
2010-cu il tarixli sərəncamı əsasında
həyata keçiririk.
Məlumat üçün
deyim ki, 35 saylı Yol İstismar İdarəsi Sabirabad rayonunun inzibati ərazisindən keçən 35 kilometrlik respublika əhəmiyyətli
və 270 kilometrlik yerli əhəmiyyətli avtomobil yolunun orta və cari
təmiri işləri
ilə məşğul
olur. Yuxarıda qeyd edilən əmr və sərəncamların tələblərinə
uyğun edilərək
idarədə tədbirlər
planı hazırlanıb
və plana uyğun olaraq maşın-mexanizmlər, ekskovatorlar , traktorlar və avtoqreyderlər təmir olunaraq işlək vəziyyətə gətirilib.
Eyni zamanda, nəzərdə tutulan miqdarda yanacaq-sürtkü
materialları, qum və texniki duz ehtiyatı
toplanıb. Sürücü və mexanizatorların
qrafiki tərtib olunub, onlara qarlı havalarda işləmək üçün
müvafiq təlimat və isti geyim
verilib.
Qışa hazırlıq məsələləri
rayonun təhsil, səhiyyə, mədəniyyət
müəssisələrində də diqqət mərkəzindədəir.
Elman Bunyadov,
Sabirabad Rayon Təhsil
Şöbəsinin müdiri:
- 2010-2011-ci illərin
payız-qış mövsümünün
müvəffəqiyyətlə başa çatdırılması
üçün təhsil
ocaqlarının əsaslı
və cari təmirinə xüsusi diqqət yetirilib. 2010-cu ilin yerli
büdcəsində əsaslı
təmir üçün
170 min manat vəsait nəzərdə tutulub.
Həmin
vəsait hesabına rayonun Həşimxanlı,
Poladtoğay kənd orta, Qaratəpə kənd əsas, Ağammədli kənd ibtidai məktəbləri,
şəhər 2 saylı
uşaq bağçası
əsas təmir edilərək istifadəyə
verilib. Qaratoğay və Nəsimi
kənd orta məktəbləri isə
Təhsil Nazirliyinin vəsaiti hesabına əsaslı təmir edilib. Bunlardan əlavə, təbii
fəlakət nəticəsində
su altında qalmış Mürsəlli
kənd orta məktəbi Fövqəladə
Hallar Nazirliyi tərəfindən əsaslı
təmir edilib və lazımi avadanlıqlarla təmin olunub. Ulacalı, Balahəşimxanlı, Qasımbəyli
kənd orta və Əjdərbəyli
kənd əsas məktəbləri hazırda
əsaslı təmir
edilməkdədir. Yuxarı Axtaçı
kəndində isə
yeni məktəb binasının tikilməsi
nəzərdə tutulub.
Bundan əlavə, yerli büdcədən ayrılmış
vəsait hesabına rayonun, demək olar ki, bütün
orta məktəblərinə
və məktəbəqədər
tədris müəssisələrinə
yeni parta, lövhə, stul, çarpayı və s. alınıb. Təhsil Nazirliyi tərəfindən
təbii fəlakətdən
ziyan çəkmiş
təhsil müəssisələrinə
386 ədəd parta,
20 ədəd yazı
lövhəsi, 50 stol,
140 stul göndərilib.
Qış mövsümünə hazırlıqla
əlaqədar ən vacib məsələlərdən
biri də binaların qızdırılmasıdır. Bu məqsədlə indiyədək
250 ədəd mazut
soba və 110 ədəd
odun sobası alınaraq məktəblərə
paylanıb. Maye və
odun yanacağı problemini şəhər və kənd icra nümayəndəlikləri
həll edir. Artıq Meşə Mühafizəsi
və Bərpası İdarəsindən 500 kubmetr
həcmində odun limiti ayrılıb. Təhsil müəssisələrinin fasiləsiz
enerji ilə təchizatı da vacib məsələlərdəndir.
Buna görə də nasaz naqillər
yeniləri ilə əvəzlənib, Qasımbəyli,
Yolçubəyli, Qaraqaşlı,
Güdəcühür və
Əsgərbəyli kənd
məktəblərinin elektrik
transformatorları təmir
edilib. Sabirabad şəhərindəki 6 məktəbdə isə Təhsil Nazirliyinin vəsaiti hesabına istilik sistemləri və qazanxanalar əsaslı təmir edilib.
Əlifağa Nadirov, Sabirabad Rayon Mərkəzi
Xəstəxanasının baş həkimi:
- Rayonumuzun səhiyyə müəssisələrində qışa hazırlıq işləri əsasən başa çatdırılıb, ancaq bəzi xırda işlərin icrası davam etdirilir. Elektrik xətləri və elektriklə işləyən qurğular yoxlamadan keçirilib, təmirə ehtiyacı olanlar təzələnərək işlək vəziyyətə gətirilib. İstilik boruları təmizlənərək saz vəziyyətə gətirilib. Eyni işlər Ağciyər Xəstəlikləri Xəstəxanasında, poliklinika şöbəsinin uşaq məsləhətxanasında da həyata keçirilib. Qışda otaqların müvafiq qaydada qızdırılması üçün lazımi tədbirlər görülüb. Kənd sahə xəstəxanalarında da müvafiq işlər yerinə yetirilib, hazırda odun tədarükü ilə məşğul olunur. Bunu tam məsuliyyət hissi ilə deyə bilərəm ki, ölkə Prezidenti möhtərəm İlham Əliyevin bu yaxınlarda rayonumuza gəlməsi və bir sıra obyektlərin açılışında iştirak etməsi, sabirabadlılarla səmimi görüşü biz səhiyyə işçilərini də ruhlandırmış, bütün işləri, o cümlədən qışa hazırlıq məsələsini vaxtında və keyfiyyətlə həll etməyə sövq etmişdir.
Əhməd Ramazanov, Rayon Mədəniyyət və Turizm şöbəsinin müdiri:
- Rayon Mədəniyyət və Turizm Şöbəsi də qışa hazırlıq məsələsi ilə ciddi şəkildə məşğul olub. Dörd kənd mədəniyyət evi və eyni sayda kitabxanada, Tarix-Diyarşünaslıq Muzeyində, Uşaq Musiqi Məktəbində büdcə vəsaiti hesabına əsaslı təmir işləri görülüb, 19 kənd mədəniyyət evinin, 56 kənd kitabxanasının yerləşdiyi binaların dam örtüklərində, qapı və pəncərələrində, döşəmə və tavan hissələrində müxtəlif cari tədbirlər həyata keçirilib. Uşaq Musiqi Məktəbində təbii qaz və elektrik enerjisi ilə işləyən istilik sistemi qurulub, Heydər Əliyev Muzeyinin daxili istilik sistemi hazır vəziyyətə gətirilib. Bütün bunlardan əlavə olaraq kənd mədəniyyət evləri və kitabxanalara sobalar və digər ləvazimatlar verilib. Lakin müəssisələrin qış mövsümündə isidilməsi ilə bağlı müəyyən problemlər qalmaqdadır. Ona görə də Sabirabad Rayon Mədəniyyət və Turizm Şöbəsi hava imkan vermişkən yarımçıq işləri tamamlamaq üçün bütün imkanlarını səfərbər edib.
Beləliklə, sabirabadlılar qış mövsümünə hazırlıq işlərini qar yağıb qapını kəsənə qədər tamamlamaq əzmi ilə çalışırlar. İndiyədək görülmüş işlər deməyə əsas verir ki, qalan işlər də vədəsində yerinə yetiriləcək və rayonun bütün idarə və müəssisələri qışı problemsiz başa vuracaq.
Səməd
HÜSEYNOĞLU,
Xalq qəzeti.-2010.-16
dekabr.-S.5.