Prezident İlham ƏLİYEV: Bizim üçün işğal edilmiş

torpaqların azad olunmasından vacib məsələ yoxdur

Ermənistan-Azərbaycan, Dağlıq Qarabağ münaqişəsinin nizamlanması istiqamətində beynəlxalq təşkilatların qəbul etdikləri qərarlar, imzalanmış birgə bəyanatlar və aparılan danışıqlar bir daha təsdiqləyir ki, Azərbaycan tərəfinin problemin həllindəki mövqeyi artıq bütün dünyada dəstəklənir. Ermənistanın qeyri-konstruktiv mövqeyi və danışıqları süni şəkitdə uzatmaq siyasəti bu ölkənin işğalçılıq missiyasından hələ də əl çəkmək istəmədiyini göstərir. Bu da Ermənistanı bütün regional layihələrdən təcrid edir. Əgər Ermənistan təcavüzkarlığını davam etdirərsə, daha ağır iqtisadi və sosial vəziyyətlə qarşılaşacaq.

Azərbaycanın iqtisadi potensialının getdikcə gücləndirilməsi, sosial məsələlərin həlli, iri infrastruktur layihələrin həyata vəsiqə alması, əhalinin həyat səviyyəsinin ildən-ilə yüksəldilməsi bugünün reallığıdır. Düzgün müəyyənləşdirilmiş iqtisadi strategiya ölkəmizin dünya birliyindəki əlaqələrini daha da genişləndirib. Avropa ilə Asiyanın qovuşuğunda strateji baxımdan əlverişli, mühüm geostrateji mövqeyə malik olan Azərbaycan dünya birliyinə sürətlə inteqrasiya olunur. İctimai-siyasi və mədəni-mənəvi həyatın bütün sahələrində özünəməxsus xüsusiyyətləri yaşatmaqla yanaşı, dünya təcrübəsinə yiyələnən ölkəmiz milli maraqlarını qorumaq, beynəlxalq aləmdə mövqelərini daha da möhkəmləndirmək üçün dövlətlərarası əlaqələrini mütəmadi olaraq genişləndirir. Hazırda dünyanın fövqəldövlətləri və nüfuzlu şirkətləri iri infrastruktur layihələrin reallaşdırılmasında Azərbaycanla birgə fəaliyyət göstərməyə maraqlıdırlar.

Son illərdə dünyanı ağuşuna almış qlobal maliyyə və iqtisadi böhranın Azərbaycanda ciddi fəsadlar törətməməsi, ölkə iqtisadiyyatının inkişaf tempinə bir o qədər də təsir edə bilməməsi müstəqil dövlətimizə olan maraqları daha da artırdı. Azərbaycanın öz təbii sərvətlərini Avropa və dünya bazarlarına digər dövlətlərin vasitəçiliyi olmadan çıxarması da iqtisadiyyatımızın qüdrətlənməsində mühüm rol oynamışdır. Bütün bu uğurlar Azərbaycanın daxili imkanları, Prezident İlham Əliyevin düzgün müəyyənləşdirdiyi iqtisadi və siyasi strategiyanın hesabına qazanılmışdır. Digər tərəfdən Azərbaycanda xalqla iqtidar arasında sıx birlik mövcuddur. Xalq böyük etimad göstərdiyi Prezidentə inanır və güvənir. Tanınmış beynəlxalq təşkilatların apardıqları rəy sorğularının nəticələrində də bildirilir ki, xalqın iqtidara olan inamına görə Azərbaycan MDB ölkələri arasında birincidir.

Azərbaycanda uzun illərdir ki, siyasi sabitlik hökm sürür. Bu da ölkəmizə sərmayə qoyan şirkətlərin sayını getdikcə artırır. Hazırda dünya miqyasında ən sürətli iqtisadi inkişafa malik dövlətlərdən biri Azərbaycandır. Torpaqlarımızın 20 faizinin Ermənistan silahlı qüvvələrinin işğalında olmasına baxmayaraq, Azərbaycanın rolu olmadan regionda hər hansı bir layihənin reallaşdırılması qeyri-mümkündür.

Regionların sosial-iqtisadi inkişafı Dövlət Proqramının qarşıya qoyduğu vəzifələrin uğurlu icrası ölkəmizin iqtisadi qüdrətini daha da artırdı və əhalini ən çox narahat edən işsizlik probleminin aradan qaldırılmasında böyük rol oynadı. Son 7 il ərzində ölkəmizdə 900 min yeni iş yerinin açılması da bunu təsdiqləyir. Minlərlə yeni müəssisələr, fabriklər, zavodlar, sosial obyektlər, iki mindən artıq məktəb, yüzlərlə xəstəxana regionların sosial-iqtisadi inkişafı Dövlət Proqramının qarşıya qoyduğu vəzifələrin uğurlu icrasının məntiqi nəticəsidir.

Sərhəd bölgələrində yerləşən ərazilərdə beynəlxalq standartlara uyğun təhsil, səhiyyə müəssisələrinin, istirahət parklarının, idman və sağlamlıq komplekslərinin tikilib istifadəyə verilməsi orada yaşayanların gələcəyə inamını daha da artırıb. Düşmənlə üz-üzə olan rayonlarda belə müəssisələrin yaradılması böyük məna daşıyır və işğal olunmuş rayonların sakinlərində öz doğma ocaqlarına qayıdacaqlarına inam yaradıb. Bir vaxtlar ermənilər tərəfindən dağıdılmış binalar bərpa olunmuş, abadlıq işləri aparılmış, müasir tələblərə cavab verən obyektlər açılmışdır. Belə tədbirlərin ermənilərlə üz-üzə dayanmış Füzuli və Ağdam rayonlarında həyata keçirilməsi ölkəmizin getdikcə qüdrətləndiyindən xəbər verir. Azərbaycan Prezidenti İlham Əliyev Füzuli rayonunda yeni müəssisələrin açılışı zamanı demişdir: "Bizim üçün işğal edilmiş torpaqların azad olunmasından vacib məsələ yoxdur. Demək olar ki, ciddi məsələlərin arasında buna bənzər və ikinci belə məsələ yoxdur. Çünki biz bütün başqa sahələrdə istədiyimizə nail oluruq. İnsanların yaşayış səviyyəsi yüksəlir, sosial müdafiə güclənir, iqtisadiyyat artır".

Məcburi köçkünlərin öz doğma ocaqlarına mütləq qayıdacaqlarını qətiyyətlə bildirən dövlətimizin başçısı həmin ərazilərdə yeni həyat yaradılacağını da vurğulayıb. Buna Azərbaycanın həm iqtisadi, həm də hərbi qüvvəsi imkan verir. Prezident İlham Əliyev bu məsələ ilə əlaqədar deyib: "Azərbaycanın imkanları ilə Ermənistanın imkanlarını müqayisə etmək mümkün deyildir. Əgər müharibə dövründə, xüsusilə Ermənistana o vaxt göstərilmiş xarici dəstək nəticəsində demək olar ki, qüvvələr nisbəti bərabər idisə, artıq biz çoxdan bu qüvvələr nisbətini öz xeyrimizə dəyişdirə bilmişik. Getdikcə Azərbaycan həm iqtisadi, həm siyasi cəhətdən, ordu quruculuğu baxımından daha da güclənəcək və biz istədiyimizə nail olacağıq".

Azərbaycan Prezidenti bildirib ki, biz heç vaxt indiki vəziyyətlə barışmayacağıq, ərazi bütövlüyümüzü istənilən yolla bərpa edəcəyik, öz ərazilərimizi işğalçılardan təmizləyəcəyik və orada yeni həyat yaradacağıq: "O gün gələcək və biz hamımız - bütün Azərbaycan xalqı, hər bir vətəndaş öz zəhməti ilə o günü yaxınlaşdırır və yaxınlaşdırmalıdır".

Ermənistan silahlı qüvvələrinin işğal etdikləri Azərbaycan ərazilərində tarixi mədəni abidələri məhv etmələri, qəbirstanlıqları dağıtmaları, yaşayış evlərini, həyət-bacaları viran qoymaları, bir sözlə insanlığa sığmayan vəhşiliklər törətməsi barədə beynəlxalq ictimaiyyətin məlumatlandırılması ermənilərin necə qəddar olmaları barədə tam təssürat yaradır. Bu istiqamətdə Azərbaycan tərəfinin apardığı siyasət öz müsbət nəticələrini göstərmişdir. Hələ 2005-ci ildə Azərbaycan rəhbərliyinin təşəbbüsü ilə ATƏT-in faktaraşdırıcı missiyası işğal edilmiş ərazilərdə olarkən orada ermənilərin törətdikləri vəhşiliklərin şahidi olmuş və bunu öz hesabatında əks etdirmişdir. Onların hazırladıqları fotoşəkillər, videomateriallar dünyanın hər yerinə yayılmış və erməni vəhşilikləri barədə beynəlxalq ictimaiyyətdə dolğun rəy formalaşdırmışdır. Dövlət başçımızın diplomatik fəaliyyəti nəticəsində bu yaxınlarda ATƏT-in qiymətləndirmə missiyası işğal edilmiş bölgələrdə, o cümlədən Ağdamda olmuş, ermənilərin törətdikləri ağlasığmaz vəhşiliklər onlarda tam təəssürat yaratmışdır. Beynəlxalq təşkilatın nümayəndələrinə bəlli olmuşdur ki, ermənilər qəddar, zalım olmaqla yanaşı, həm də talançı, oğru və qarətçidirlər. Bu faktlar ATƏT-in qiymətləndirmə missiyasının hesabatında da öz əksini tapacaq.

Göründüyü kimi, artıq dünyanın tanınmış nüfuzlu təşkilatlarının demək olar ki, hamısı ermənilərin işğal etdikləri ərazilərdə törətdikləri vəhşiliklərin şahidi olublar. Tarixən köçəri tayfa kimi yaşayan, digər dövlətlərin torpaqlarını işğal etməklə Ermənistan dövlətini yaratmış təcavüzkar millət indi də Azərbaycan yaşayış məntəqələrinin adlarını dəyişərək erməni adları qoymaqla bu ərazilərin tarixən onlara məxsus olması barədə rəy formalaşdırmaq istəyirlər. Ağdam və Zəngilan rayonlarının adını dəyişdirib erməni adı ilə adlandırmaları da bu məqsədi güdürdü. Lakin tarixi saxtalaşdırmaq cəhdləri bu dəfə də iflasa uğradı. Çünki Azərbaycanın ərazi bütövlüyü dünyanın bütün dövlətləri tərəfindən tanınır və dəstəklənir. Azərbaycan müstəqillik qazandığı ilk vaxtlarda Birləşmiş Millətlər Təşkilatına üzv olandan ölkəmizin ərazi bütövlüyü tanınmışdır.

Ümumilli lider Heydər Əliyevin və möhtərəm Prezidentimiz İlham Əliyevin yeritdikləri uğurlu daxili və xarici siyasətindən sonra Azərbaycanın beynəlxalq aləmdəki nüfuzunu getdikcə artmış, ərazi bütövlüyümüz bütün dövlətlər tərəfindən tanınmışdır. İndi dünyada elə bir dövlət yoxdur ki, ölkəmizin ərazi bütövlüyünü tanımasın. Dünyanın aparıcı beynəlxalq təşkilatlarının sənədlərində də bu məsələ öz əksini tapıb. BMT, İslam Konfransı Təşkilatı, Avropra Şurası, ATƏT, Avropa Parlamenti və digər təşkilatlar Azərbaycanın ərazi bütövlüyünə hörmətlə yanaşır. Bu zaman beynəlxalq hüququn norma və prinsiplərinə istinad edilir. Beynəlxalq hüquq hər bir məsələnin ədalətli və qanun çərçivəsində həll olunması üçün başlıca şərtdir. Çünki dünya birliyi beynəlxalq hüququn əsasında yaradılır. Ermənistan tərəfi isə beynəlxalq hüququn norma və prinsiplərini kobud şəkildə pozaraq öz işğalçılıq missiyasını hələ də davam etdirir. Ancaq onların bu hegemonluğu uzun müddət davam edə bilməz. Çünki Azərbaycanın öz ərazilərini qorumaq və işğaldan azad etmək üçün güclü, qüdrətli ordusu var. Gündən-günə mətnləşən Milli Ordumuz düşmənə ağır zərbə endirməyə qadirdir. Lakin Azərbaycan dünyada sülhsevər dövlət kimi tanındığından münaqişənin dinc yolla aradan qaldırılmasına üstünlük verir. Əgər sülh potensialı tükənərsə, digər vasitələrdən istifadə etmək məcburiyyətində qalacağıq. Hər bir ölkənin öz sərhədlərini, ərazi bütövlüyünü qoruması beynəlxalq hüququn norma və prinsiplərində də öz əksini tapıb.

İşğal altında olan rayonların ərazilərində yeni müəssisələrin yaradılması, orada insanların daimi məskunlaşmaları üçün hər cür infrastruktura malik qəsəbələrin salınması, məşğulluq mərkəzlərinin yaradılması erməniləri ciddi təşvişə salıb. Bu tədbirlərin həyata keçirilməsi həm də Azərbaycanın iqtisadi gücünü, qüdrətini nümayiş etdirir. Artıq Ermənistan tərəfi dərk etməyə başlayıb ki, Azərbaycan öz torpaqlarının işğal altında qalması ilə barışmır və ərazi bütövlüyünün təmin olunması üçün ciddi tədbirlərə əl atıb. Dövlətimizin başçısı da ictimaiyyətlə görüşü zamanı bu məsələni xüsusi vurğulayaraq demişdir: "Mən heç şübhə etmirəm ki, biz ərazi bütövlüyümüzü bərpa edəcəyik, vətəndaşlarımızı doğma dədə-baba torpaqlarına qaytaracağıq. O torpaqlarda yeni həyat başlanacaq, şəhərlər bərpa olunacaqdır. O bölgələr, bu gün işğal altında qalan torpaqlar, bax ölkəmizin başqa bölgələri kimi çiçəklənəcəkdir. Mən buna əminəm, buna şübhə etmirəm və hamımız işimizlə o günü yaxınlaşdırmalıyıq".

Əliqismət BƏDƏLOV,

Xalq qəzeti.-2010.-18 dekabr.-S.1.