Azərbaycanı qələbədən-qələbəyə qovuşduran lider

Mən bu yazını ABŞ Konqresi Silahlı Qüvvələri Komitəsinin sədri Kurt Ueldonun aşağıdakı sözləri ilə başlamaq istəyirəm. O, Azərbaycan Prezidenti cənab İlham Əliyevə xitabən deyirdi: "Siz təkcə Azərbaycanda deyil, bütün regionda əsl liderlik nümayiş etdirir, ölkənizi irəli aparırsınız. Dünyada çox az sayda lider tapılar ki, dünyanın hansı səmtə doğru irəlilədiyini, onun gələcək perspektivlərini əvvəlcədən görə bilsin. Eyni zamanda, dünyada Sizin kimi çox az lider tapılar ki, xarici dilləri mükəmməl bilsin və prezidentliyinin qısa müddəti ərzində bu dərəcədə liderlik nümayiş etdirsin. Regionda Sizin nümayiş etdirdiyiniz liderliyə, həqiqətən, valeh olmuşuq".

Bu gün cənab Prezident İlham Əliyev siyasi çevikliyinə, cəsarətinə, uzaqgörənliyinə görə çoxlarını heyran etmişdir. Bu böyük siyasət xadimi hələ ulu öndərin hakimiyyəti dövründə özünün yüksək siyasi qabiliyyəti ilə seçilirdi. Ulu öndər deyirdi: "İlham Əliyev həm biliyinə, həm ağlına, həm təcrübəsinə, həm də insani keyfiyyətlərinə görə Azərbaycanın siyasi səhnəsində öz yerini tutub". Doğrudan da, cənab İlham Əliyev ona həvalə edilən bütün sahələrdə yeniliklər yaratdı, ona bəslənilən inamı doğrulda bildi. Hələ o vaxtlar cənab Prezident İlham Əliyev deyirdi: "Mən vəd verməyi xoşlamıram. Ancaq inana bilərsiniz ki, yaxın gələcəkdə Azərbaycanın o qədər güclü iqtisadi potensialı olacaqdır ki, bunu ölkəmizin hər bir vətəndaşı hiss edəcəkdir. Buna heç bir şübhəniz olmasın". O vaxtdan çox da uzun bir dövr keçməyib. Amma cənab İlham Əliyevin bu uzaqgörən fikirləri artıq reallığa çevrilib. Azərbaycan regionda, doğrudan da, güclü iqtisadiyyata malik lider dövlətə çevrildi.

Hakimiyyətə gəldiyi ilk vaxtdan etibarən cənab İlham Əliyev ulu öndərin siyasi kursuna sadiq olacağını, dahi siyasət xadimi Heydər Əliyevin başladığı islahatları davamlı olaraq həyata keçirəcəyini inamla bildirmişdi. Ümumiyyətlə, İlham Əliyevin böyük siyasətə gəlişi də onun Heydər Əliyev ideyalarına və əməllərinə dərin sədaqətinin, Azərbaycanın müstəqilliyinin möhkəmlənməsinə göstərdiyi xidmətlərin təbii yekunu idi.

Cənab İlham Əliyev 2003-cü ildən başlayaraq bütün sahələrdə islahatların davam etdirilməsinə geniş imkanlar yaratdı. Azərbaycan ilbəil inkişaf etdi, insanların sosial vəziyyəti əsaslı şəkildə yaxşılaşdı. Azərbaycanda həyat davamlı inkişafın axarına düşdü. İqtisadiyyatda sürətli tərəqqi həyatımızın bütün sahələrinə öz müsbət təsirini göstərir.

Bu gün həyatımızın hansı sahəsini götürürsən götür, orada son illər əsaslı yeniliklər müşahidə edəcəksən. Bütün bu nailiyyətlərin əsasında çevik, düşünülmüş siyasət, millətin, xalqın inkişafına yüksək qayğı dayanır.

İndi dünyanın mötəbər beynəlxalq maliyyə qurumları Azərbaycanda gedən islahatları çox yüksək qiymətləndirirlər. Dünya İqtisadi Forumunun hesabatında rəqabət qabiliyyətliliyinə, informasiya kommunikasiya texnologiyalarının inkişafına görə Azərbaycan MDB məkanında lider dövlətdir. Baxmayaraq ki, dünyada maliyyə və iqtisadi böhran hələ başa çatmayıb, Azərbaycan beynəlxalq reytinq agentlikləri tərəfindən çox yüksək qiymət alıb. Bu, çox mühüm nailiyyət kimi qiymətləndirilir. Respublikamız iqtisadi böhrandan ən az itkilərlə çıxmışdır. Bu da düşünülmüş siyasətin, siyasi iradənin, ölkədəki sabitliyin, investisiya qoyuluşuna cəlbediciliyin, ölkədə biznes üçün yaranan çox əlverişli mühitin nəticəsində mümkün olmuşdur.

Azərbaycan xalqının böyük xoşbəxtliyidir ki, onun Prezidenti bugünkü sürətlə dəyişən, dinamik dünyanın nəbzini əlində saxlaya bilir, müasir, çevik və cəsarətli dövlət xadimi kimi beynəlxalq münasibətlərdə sürətlə baş verən dəyişikliklərdən öz Vətəninin və xalqının xeyrinə məharətlə istifadə etməyi bacarır.

Cənab Prezident beynəlxalq aləmdə baş verən siyasi və iqtisadi proseslərə yaxşı bələddir, dünyada gedəcək prosesləri qabaqcadan görür və ölkəmizi bu dəyişikliklərə hazırlaya bilir. Azərbaycanı ilbəil yeni qələbələrə qovuşdurur. Ulu öndərin siyasi kursu bunu tələb edir və bu gün Heydər Əliyev siyasəti, həqiqətən, inamla zəfər çalır.

Azərbaycanın son illər dünyanın nüfuzlu beynəlxalq təşkilatları ilə səmərəli əməkdaşlıq etməsi, söz yox ki, cənab İlham Əliyevin çox uğurlu xarici siyasətinin nəticəsidir. Bu gün Azərbaycan Avropa İttifaqı, BMT, Avropa Şurası ilə çox sıx əməkdaşlıq edir. İslam Konfransı Təşkilatı, türkdilli xalqların Türksoy təşkilatı ilə də yaxın əlaqələr qurulmuşdur. MDB ölkələri ilə də əlaqələr geniş miqyas almışdır.

YUNESKO ilə əməkdaşlıq daha səmərəli xarakter almışdır. Bu sahədə Heydər Əliyev Fondunun prezidenti, Milli Məclisin deputatı, YUNESKO və İSESKO-nun xoşməramlı səfiri Mehriban xanım Əliyevanın məxsusi xidmətləri vardır. Mədəniyyətimizin, milli-mənəvi dəyərlərimizin dünyada tanınmasında və təbliğində Mehriban xanımın həyata keçirdiyi tədbirlər öz real bəhrəsini vermişdir.

Bəli, Azərbaycanda bütün sahələrdə uğurlu inkişaf davam edir. Ölkədə müxtəlif siyasi və iqtisadi islahatlar həyata keçirilir. Ölkəmizin müasirləşmə prosesi çox uğurla gedir. Azərbaycanda beynəlxalq əhəmiyyətli layihələr reallaşdırılır.

Cənab Prezidentin siyasi və iqtisadi islahatların reallaşması ilə bağlı belə bir fikrini diqqətə çatdırmaq istəyirəm: "Fikrimcə, siyasi və iqtisadi islahatlar bir-biri ilə yanaşı həyata keçirilməlidir. Bir islahat digərini dəstəkləməlidir. Bu, bizə uzun müddət üçün güclü və çiçəklənən ölkəni qurmaq imkanı yaradacaqdır. Hesab edirəm ki, bunun üçün yaxşı imkanlarımız vardır. Əsas sosial və iqtisadi problemlərimiz arxada qalıb".

Doğrudan da, ölkəmizdə sosial problemlər artıq həllini tapmışdır. Əhalinin mənzil-məişət şəraiti yaxşılaşmış, əməkhaqları, pensiyalar, sosial müavinətlər artırılmış, ölkənin yol, nəqliyyat strukturu yeniləşmiş, regionlarda sosial problemlər həll olunmuşdur. Belə bir fakta diqqət yetirək. Altı il əvvəl yoxsulluğun səviyyəsi 49 faiz idisə, hazırda bu rəqəm 11 faiz təşkil edir. Yeni iş yerlərinin yaradılması, əhalinin məşğulluğunun artırılması istiqamətində cənab Prezidentin həyata keçirdiyi tədbirlər də öz nəticəsini vermişdir. Dövlət başçımızın hakimiyyətdə olduğu dövrdə Azərbaycanda 900 mindən çox yeni iş yeri yaradılmışdır. Bu istiqamətdə işlər davam etdirilməkdədir. Cənab Prezident demişdir: "Ölkəmiz üçün mühüm sosial problem olan işsizlik artıq mövcud deyildir. Hazırda əks proses gedir. Azərbaycanda işçi qüvvəsinin miqrasiyası prosesi müşahidə olunur və biz bu prosesi beynəlxalq standartlara uyğun şəkildə tənzimləməyə çalışırıq".

Azərbaycan təkcə iqtisadiyyatda deyil, mədəniyyət, təhsil, səhiyyənin inkişafı sahəsində də böyük uğurlar qazanmışdır. Ölkəmizin böyük tarixi, ənənələri və mədəniyyəti vardır. Bütün bunlar ulu öndər Heydər Əliyev və onun ləyaqətli davamçısı İlham Əliyev tərəfindən yüksək qayğı və məhəbbətlə qorunmuş və inkişaf etdirilmişdir.

Milli-mənəvi dəyərlərimizə son illər xüsusi diqqətlə yanaşılır. Ölkədə həyata keçirilən mədəniyyət siyasəti mədəniyyətimizin və incəsənətimizin inkişafına əsaslı stimul yaratmışdır. Mədəniyyətimiz dünyaya inteqrasiya yolunu seçmişdir. Bu fakt çox əhəmiyyətlidir. 2009-cu il Bakının İslam Mədəniyyətinin paytaxtı elan olunması böyük beynəlxalq səviyyəli hadisə idi. Bu bir daha onu göstərdi ki, Azərbaycan dünyəvi dövlətdir. Burada yüksək səviyyədə dini dözümlülük vardır. Biz çoxmillətli ölkəyik. Azərbaycanda müxtəlif millətlər bir ailə kimi yaşayırlar. Bunlar ölkəmizdə aparılan siyasətin nəticəsidir. Bu sahədə Azərbaycanın heç vaxt problemi olmayıb. Azərbaycanda vəziyyət həqiqətən sabitdir. İnsanlar burada bütün azadlıqlardan bəhrələnirlər.

Təhsil sahəsində çalışdığıma görə burada qazanılan uğurlar mənə daha yaxşı tanışdır. Azərbaycan təhsilinin bugünkü nailiyyətləri ulu öndərin adı ilə bağlıdır. İstər sovetlər dönəmində, istərsə də müstəqillik illərində Heydər Əliyevin böyük himayədarlığı ilə milli təhsilimiz formalaşmış, Azərbaycanda bu sahə xüsusi diqqət mərkəzində olmuşdur. Heydər Əliyevin ikinci dəfə Azərbaycanda hakimiyyətə gəlişindən sonra müstəqil Azərbaycanın yeni təhsil siyasəti həyata keçirilməyə başladı. 1999-cu ildə ulu öndərin imzaladığı sərəncamla təsdiq olunan "Təhsil İslahat Proqramı" milli təhsilimizin inkişafında yeni mərhələnin əsasını qoydu.

Proqramın reallaşmasında Heydər Əliyev siyasi kursunun davamçısı cənab Prezident İlham Əliyevin xüsusi xidmətləri oldu. Belə ki, hakimiyyətə gəldiyi ilk vaxtlardan təhsil islahatlarını diqqət mərkəzində saxlayan cənab İlham Əliyev bir sıra sərəncamları ilə bu sahədə yeni nailiyyətlərə imza atdı. İlk növbədə təhsilə informasiya texnologiyalarının gətirilməsi kimi çox əhəmiyyətli bir dövlət proqramı qəbul olundu. Bu proqram orta ümumtəhsil məktəblərinə aid olsa da, təhsildə informasiya texnologiyalarının tətbiqi baxımından olduqca faydalı bir başlanğıc oldu. Həmin proqramda qarşıya qoyulan vəzifələr uğurla yerinə yetirildi. İndi orta ümumtəhsil müəssisələrimizdə hər 20 şagirdə bir kompyuter nisbəti artıq reallığa çevrilmişdir. Bu sahədə qəbul olunan ikinci Dövlət Proqramı isə daha geniş spektrli idi. Hazırda bu proqramın reallaşması istiqamətində işlər uğurla davam etdirilir.

Cənab İlham Əliyev hakimiyyətdə olduğu dövrdə təhsilin müxtəlif problemlərinin həllinə yönəldilmiş 16-dan çox Dövlət Proqramı qəbul olunmuşdur. Onların arasında texniki peşə təhsilinin, ali təhsilin inkişafı məsələləri də vardır.

Azərbaycan gənclərinin xaricdə təhsil almaları ilə bağlı qəbul edilən Dövlət Proqramı çərçivəsində son illər əhəmiyyətli nəticələr qazanılmışdır. Bu gün gənclərimizin dünyanın ən nüfuzlu universitetlərində təhsil almaları məhz cənab Prezidentin müasir tələbata cavab verən yüksək ixtisaslı kadr hazırlığına göstərdiyi qayğının nəticəsidir.

Ümumiyyətlə, son illər ölkəmizdə ali təhsil sahəsində keçirilən islahat daha sürətli xarakter almışdır. Məlumdur ki, Azərbaycan ali təhsilinin Avropaya inteqrasiyası istiqamətində çox uğurlu iş aparılır. Təhsilin Baloniya sisteminə keçirilməsi bu yöndə atılan çox uğurlu addımdır. Ali məktəblərimizin böyük bir qismi bu sistem əsasında işləyir və onun üstünlükləri müsbət nəticəsini verməkdədir.

Pedaqoji kadr hazırlığına dövlətimizin göstərdiyi qayğı bu sahədə kadr hazırlayan təhsil müəssisələrinin üzərinə çox mühüm məsuliyyət qoyur. Ulu öndər Heydər Əliyevin xeyir-duası ilə yaradılan Azərbaycan Müəllimlər İnstitutu və onun filialları son illər kadr hazırlığı sahəsində əhəmiyyətli rol oynamışlar. Müəllimlər İnstitutunun rektoru, millət vəkili, professor Aqiyə xanım Naxçıvanlının təşkilatçılıq bacarığı, prinsipiallığı Müəllimlər İnstitutunun və onun filiallarının işinə öz müsbət təsirini göstərmişdir. Bu gün bu institutun hazırladığı kadrlar ölkədə təhsil islahatının reallaşması istiqamətində çox önəmli iş aparırlar.

Əlbəttə, hazırladığımız kadrlar bu gün yeni, yaraşıqlı, müasir tipli məktəblərdə dərs deyirlər. Məlumdur ki, son illər ölkədə yeni məktəblərin tikintisi geniş vüsət almışdır. Bu sahədə qəbul olunan dövlət proqramları və hörmətli Prezidentimizin məktəb tikintisinə xüsusi qayğısı nəticəsində Azərbaycanın bütün rayonlarında yeni məktəblər tikilir. Bu sahədə Heydər Əliyev Fondunun prezidenti, Milli Məclisin deputatı Mehriban xanım Əliyevanın xidmətlərini xüsusi olaraq qeyd etmək istərdim. Fondun "Yeniləşən Azərbaycana yeni məktəb" layihəsi əsasında bu gün əksər bölgələrimizdə, böyük şəhərlərimizdə müasir tipli yeni məktəblər tikilir, onlar müasir avadanlıqlarla, informasiya texnologiyaları ilə təmin olunurlar.

Bu gün təhsilin məzmunu əsaslı şəkildə yeniləşmişdir. Yeni nəsil təhsil proqramları, dərsliklər, dərs vəsaitləri yaradılmışdır. Müəllimlər üçün metodiki vəsaitlər hazırlanır. Təhsildə həyata keçirilən kurikulum islahatı da öz müsbət nəticəsini verməkdədir.

Cənab İlham Əliyevin hakimiyyəti dövründə təkcə mədəniyyətdə, təhsildə deyil, səhiyyə sahəsində də əsaslı inkişafa nail olunmuşdur. Bu gün Azərbaycanın müxtəlif bölgələrində inşa edilən regional tibb mərkəzləri əhalinin sağlamlığının keşiyində dayanır. Azərbaycana ən müasir tibbi avadanlıqlar gətirilir. Bununla yanaşı, Heydər Əliyev Fondu da bu istiqamətdə uğurlu layihələr reallaşdırır.

Azərbaycan yeni inkişaf mərhələsinə qədəm qoymuşdur. Bu inkişaf hər şeydən əvvəl Heydər Əliyev siyasi kursunun bu gün inamlı şəkildə davam etdirilməsi ilə bağlıdır. Azərbaycan xalqı gələcəyə böyük inamla irəliləyir. Və yaxşı bilir ki, onun etibar etdiyi hakimiyyət işıqlı gələcəyimizi təmin edəcək.

Raya NƏCƏFOVA,

Azərbaycan Müəllimlər

İnstitutunun Sumqayıt

filialının direktoru,

kimya elmləri doktoru

Xalq qəzeti.-2010.-19 dekabr.-S.3.