Ağsu: gəlin, görün, sevinin...

... Yenə Ağsu aşırımlarının dumanlı, çiskinli günləri başlayıb. Bələd olanlar yaxşı bilirlər: bəzən elə olur ki, ən səriştəli sürücü belə çaşıb qalır. Xüsusən günün səhər və axşam vaxtlarında duman daha çox olur. Amma elə ki, hava açılır buradakı gözəlliyə baxmaqdan doymursan ki, doymursan. Mən bilmirəm ağsulu şair dostumuz Sabir Sarvan bu mənzərəyə bir şeir həsr edib, ya yox? Amma mənə elə gəlir ki, yuxarıdan ovuc içi kimi görünən Ağsunun bugünü haqqında poetik misralar tapmaq o qədər də çətin deyil. Bir də ki, Sabir Sarvan indi də yazmayıb, nə vaxt yazacaqdı ki...

Məni qınamayın. Əzizxan Sultanovla rayonu gəzərkən nədənsə ürəyimdən bu hisslər keçdi. Düşündüm ki, az vaxt ərzində öz simasını dəyişən, gözəlləşən bu qədim Azərbaycan şəhəri haqqında danışmaq üçün söz tapmağa nə var ki...

Yaxşısı budur söhbəti saxlayıb, əvvəlcə sizi Əzizxan dayı ilə tanış edim. Çünki bu yazının baş qəhrəmanı odur və onunla birlikdə nə az, nə çox, üç saata yaxın Ağsunun küçələrini, meydanlarını gəzmişik, neçə-neçə adamla həmsöhbət olmuşuq, fikirlərimizi bölüşmüşük.

Təqdim edim, siz də tanıyın. Əzizxan Sultanov Böyük Vətən müharibəsinin veteranıdır. Odlu-alovlu yollardan keçib. Ozünün dediyi kimi, beş illik müharibə illərində bir-birindən igid, qəhrəman dostlar itirib. Söz düşəndə də həmişə deyir ki, onların yarımçıq qalmış ömürlərini yaşayıram. Ömrünün 89-cu ilinə qədəm qoymuş bu nurani insan Ukraynanın alman faşistlərindən azad olunmasında əsl rəşadət göstərib. Yaxasını neçə-neçə orden, medal bəzəyir. Müxtəlif tədbirlərdə görüşmüşük. Həmişə hörmətini saxlayıblar, başa keçiriblər.

Onunla ulu öndər Heydər Əliyevin adını daşıyan parkda gəzirik. - Yəqin ki, əvvəllər də burada olmusan, oğul, - deyir, - heç ağlımıza da gəlməzdi ki, belə bir cənnət yaratmaq olar. Yay aylarında burada iynə atsan, yerə düşməz. Səhərə qədər qələbəlik olur. Fəxr edirik ki, nə yaxşı ki, xalqımızın belə bir xilaskarı var. Bəli, bu həqiqətdir. Azərbaycan dağılırdı. Heydər Əliyev gəldi və bu dövləti məhv olmaqdan qurtardı. Heydər Əliyev muzeyində - əli ilə yaraşıqlı binanı göstərir, - maraqlı eksponatlar var. Gəzib görmüşəm. Dəstə-dəstə adamın gəlib bu nadir materiallarla tanış olmasını görəndə qürur hissi keçirirəm. Sevinirəm ki, uşaq da, böyük də yaxşı bilir ki, onun dünya şöhrətli bir siyasətçisi var. Mən özüm qəsdən var, deyirəm. Çünki Heydər Əliyev əbədiyaşar bir şəxsiyyətdir.

Əzizxan dayı ilə Heydər Əliyev və Səməd Vurğun küçələrinin kəsişdiyi yerə gəlirik. Təkcə bu ilin son altı ayı ərzində 2680 paqonometr səki daşı düzülüb, hər iki küçədə 45 ədəd işıqlanma dirəyi quraşdırılıb, səkilərə 5050 kvadratmetr, avtomobil yolu hissəsinə isə 16 min kvadratmetrdən çox asfalt-beton örtük döşənib.

- Baxdıqca baxmaq istəyirsən, - deyə veteran dillənir, - İndi Ağsunun bütün küçələrində asfalt işləri görülüb. Binalar rənglənib. Həyətlərdə uşaq idman meydançaları salınıb, müxtəlif qurğular quraşdırılıb.

Əzizxan Sultanova rayon icra hakimiyyətinin başçısı Ənvər Seyidəliyevlə xeyirxah bir işlə bağlı olan söhbəti xatırladıram. Doğrudan da, Azərbaycan Respublikası Prezidentinin sərəncamına əsasən Ağsu şəhərinə içməli su kəmərinin çəkilişi başa çatmaq üzrədir. Burada tamamlama işləri görülür. Belə ki, 3 ay ərzində rayonun Quzey kəndi yaxınlığında olan bulaqlardan su götürülərək 20,5 kilometr məsafədən 219 millimetrlik polad borularla kəmər quraşdırılıb. 3 ədəd - hər biri 500 kvadratmetr həcmində su anbarları tikilib. Pirhəsənli və Qaraqaşlı kəndlərinə həmin anbarlardan su kəməri çəkilib, digər köməkçi qurğular quraşdırılıb.

- Ənvər müəllim düz deyir, - Əzizxan dayı bildirir - görürsünüzmü Dövlət başçısının bizə göstərdiyi diqqət, qayğı göz önündədir. "Su həyat deməkdir". Çox qiymətli sözdür. Dünyada su çəkdirməkdən, yol saldırmaqdan müqəddəs heç nə yoxdur. Bəlkə, özülü 29 oktyabr 2010-cu ildə Azərbaycan Respublikasının Prezidenti cənab İlham Əliyev tərəfindən qoyulmuş 300 tamaşaçı yeri olan stadionun tikintisindən danışaq. 4 hektardan çox ərazini tutan stadionda futbol meydançası, tribuna, inzibati bina, kassa, kafe-çayxana, elektron tablo, anbar, 3 giriş qapısı, voleybol və basketbol meydançalarının tikilməsi nəzərdə tutulub. O gün özüm gedib baxdım. Ustalarla görüşüb xeyli söhbət etdim. Tikinti işləri sürətlə davam etdirilir. Yəqin ki, gələn ilin birinci rübündə təhvil verilər. Görün ağsulular gələcəkdə nə qədər maraqlı yarışların şahidi, iştirakçısı olacaqlar. Arzular həqiqətə çevrilir, oğul, həqiqətə...

Şəhərin sağ sahilində yerləşən köhnə mədəniyyət və istirahət parkına gəlirik. Bura sökülərək, demək olar ki, tamamilə yenidən qurulur. Müasir əsaslarla yeni layihəyə əsasən parkda 1400 kvadratmetr sahəsi olan yeni səkilər, gəzinti zolaqları, fəvvarə, yaşıl teatr, uşaq əyləncə mərkəzi, kafe və digər obyektlər inşa ediləcəkdir.

Deyəsən, təəccübləndiniz. Fikirləşdiniz ki, bir rayonda axı nə qədər istirahət mərkəzi olar. Hələ bu harasıdır. Əvvəlki yazılarımızda Ağsu aşırımında salınmış Heydər seyrəngahı haqqında çox danışmışıq. İndi bu park da belə deyək, gələn yay ağsulular üçün daha bir istirahət guşəsi istifadəyə veriləcək.

Deyəsən, ürəyimdən keçənləri Əzizxan dayı hiss edir. "Oğul, deyir, - özün şahidi olursan ki, rayonda nə iş görülürsə, onun sakinləri üçün, onların xoş, mənalı yaşayışı üçün edilir. Gəl elə Heydər Əliyev Fondu hesabına inşa olunan uşaq-gənclər bədii yaradıcılıq mərkəzini götürək. Bilirsən nə qədər adam sevinəcək. Onun da təməlini cənab Prezidentin özü qoyub. İki mərtəbədən ibarət olan mərkəzdə uşaqlar üçün hər cür şərait yaradılacaq. Böyük aktyorumuz Səməndər Rzayevin adını daşıyacaq bu müqəddəs yerə onlar həvəslə gələcəklər.

Əzizxan Sultanov həvəslə danışır. Ağsuluların mehribanlığından, qonaqpərvərliyindən söhbət açır. "Tez-tez gəlin deyir, - baxın, siz də sevinin. Sevinin ki, tək Bakıda yox, əyalətlərdə də böyük, möhtəşəm işlər görülür".

Düz sözə nə deyəsən...

İlqar HƏSƏNOV,

Xalq qəzeti.-2010.-19 dekabr.-S.4.