Saatlı: 2010-cu ilin uğurları

Saatlı rayonu Azərbaycanın bütün güşəsi kimi, mənim üçün doğmadır, əzizdir. Mən Saatlı rayonunda dəfələrlə olmuşam... Saatlılara mənim həmişə hörmətim olubdur.

Heydər ƏLİYEV Ümummilli lider

... Saatlı rayonunun inkişafı üçün tədbirlər görülür. Rayonda işlər yaxşı gedir. Mən də Saatlıda gedən işləri həmişə diqqət mərkəzində saxlamışam.

İlham ƏLİYEV Azərbaycan Respublikasının Prezidenti

Başa çatmaqda olan ilin baharında - aprel-may aylarında Azərbaycan, sözün həqiqi mənasında, təbii fəlakətlə üzbəüz qaldı. Güclü leysan və qışboyu dağlara yağmış qalın qar örtüyünün əriməsi nəticəsində Kür və Araz çayları öz məcrasından çıxaraq ətraf rayonların kəndlərini, qəsəbələrini su altında qoydu. Sabirabad, Saatlı, Kürdəmir, İmişli, Zərdab, Salyan, Neftçala və Hacıqabul rayonlarında çoxlu sayda evlər, ictimai binalar, təhsil və səhiyyə ocaqları dağıldı, qəzalı vəziyyətə düşdü, minlərlə ailə evsiz-eşiksiz qaldı, fərdi və ictimai təsərrüfatlara külli miqdarda ziyan dəydi.

Şübhəsiz, daşqınların törətdiyi fəlakətin miqyası daha böyük və faciəli ola bilərdi. Əgər dövlət səviyyəsində operativ şəkildə lazımi tədbirlər görülməsəydi. Çaylarda suyun səviyyəsi təhlükəli həddə çatarkən və bəzi yerlərdə ilkin daşqınlar başlarkən - mayın 7-də Prezident İlham Əliyevin sədrliyi ilə fövqəladə müşavirə keçirildi və dövlətimizin başçısı fəlakətin qarşısının alınması, nəticələrinin aradan qaldırılması ilə bağlı müvafiq qurumların rəhbərləri qarşısında konkret vəzifələr qoydu. Minlərlə texnika və canlı qüvvə təbii fəlakət zonasında xilasetmə və bərpa işlərinə cəlb olundu. Təbii fəlakətin insan itkisi olmadan başa çatması və bu bəlanın miqyasının genişlənməsinin qarşısının alınması dövlət strukturularının həyata keçirdiyi tədbirlər və yerli icra orqanlarının rəhbərliyi altında əhalinin elliklə səfərbər edilməsi nəticəsində mümkün oldu. Dağılan bəndlər dərhal bərpa edildi, əhali fəlakət zonasından təhlükəsiz yerlərə köçürüldü və beləliklə, insan tələfatının qarşısı alındı.

Mayın 11-də Prezident İlham Əliyev təbii fəlakət zonasına getdi, sakinlərlə görüşdü, onların problemləri ilə maraqlandı və dəyən ziyanın aradan qaldırılması istiqamətində əlavə göstərişlərini verdi. Bundan sonra, bütün işlər planlı şəkildə və operativ surətdə icra olundu. Daşqınlar nəticəsində dağılan evlərin yeniləri ilə əvəz olunması və ziyan dəymiş evlərin isə bərpası istiqamətində uğurlu işlər aparıldı. Respublikanın rəhbəri qarşıya konkret vəzifə qoymuşdu: daşqın zonasında işlər tezliklə başa çatdırılmalı, evlərini itirən insanlar qışadək yeni mənzillərlə təmin olunmalıdır. Ümumilikdə, 7 rayonda 70 min hektardan çox ərazi su altında qalmış, 1617 ev qəzalı vəziyyətə düşmüşdü. Dövlət başçısının tapşırığı əsasında bütün evsizlərə ev tikildi, bir çoxunda təmir və bərpa işləri aparıldı. Bütövlükdə fəlakət zonasında yaşayan 7424 ailəyə 6 milyon 545 min manatdan çox maddi yardım göstərildi. Təbii fəlakət bölgələrində 27 məktəb, 6 məktəbəqədər təhsil müəssisəsi, 12 səhiyyə ocağı və digər obyektlər bərpa olunaraq yenidən əhalinin istifadəsinə verildi.

Qeyd etdiyimiz kimi, builki daşqınlardan ziyan görən rayonlardan biri də Saatlıdır. Bəs saatlılar belə bir çətin ili necə başa vururlar? Rayon icra hakimiyyətinin başçısı Siraqəddin Cabbarov bu barədə dedi:

- Son illər regionların sosial-iqtisadi inkişafı dövlət proqramlarının uğurlu icrası Saatlı rayonunun da sosial-iqtisadi həyatında sürətli inkişafa zəmin yaratmışdır. Rayon icra hakimiyyəti mövcud potensialdan, yerli ehtiyatlardan və xammaldan, dövlətin dəstəyindən və daxili imkanlardan səmərəli istifadə etməklə 2009-2013-cü illərdə iqtisadi sahədə sürətli inkişafı təmin etməklə məhsul istehsalını artırmaq, emal və tədarük müəssisələri yaratmaq, yeni iş yerləri açmaq, əhalinin məşğulluğunu artırmaq və yoxsulluq səviyyəsini azaltmaq, kommunal xidmətlərlə, o cümlədən elektrik enerjisi, qaz, içməli su ilə təchizatını yaxşılaşdırmaq, sosial layihələri yerinə yetirməklə əhalinin rifah halını yüksəltmək, bu işlərdə sahibkarlara dəstək olmaq və bununla da rayonu iqtisadi cəhətdən hərtərəfli inkişaf etdirmək vəzifələrini qarşıya qoymuşdur.

Ümumiyyətlə, cari ilin yaz aylarında Kür və Araz çaylarında suyun səviyyəsinin yüksək həddə çatması rayonun sahilboyu yaşayış məntəqələrində fövqəladə vəziyyət yaratmışdı. Bu təhlükədən böyük itki vermədən çıxmaq üçün rayon icra hakimiyyəti mövcud texnikanı, ağır maşın və mexanizmləri, bütün canlı qüvvəni səfərbər edərək gecəli-gündüzlü bənd bərkitmə, sahil mühafizə tədbirləri görmüş, idarə, müəssisə və təşkilatların əmək kollektivləri, rayonun bütün yaşayış məntəqələrinin əhalisi xilasetmə tədbirlərinə yüksək mütəşəkkilliklə qoşulmuşlar. Lakin Sarısu gölündə mühafizə bəndlərinin dağılması nəticəsində rayonun sahil boyunda yerləşən 5 yaşayış məntəqəsi - 152 ev, 656 nəfər əhalisi olan Novruzlu kəndi, 357 ev və 1961 nəfər əhalisi olan Dəllər kəndi, 226 ev və 1468 nəfər əhalisi olan Nərimankənd kəndi, 192 ev və 968 nəfər əhalisi olan Musalı kəndi, 101 ev və 436 nəfər əhalisi olan Nərimankənd köçkün qəsəbəsi, ümumilikdə 5479 nəfər əhali olmaqla 1028 ev subasmaya məruz qalmışdır.

Baş vermiş təbii fəlakət nəticəsində subasmaya və qrunt sularının təsirinə məruz qalmış 5951,08 hektar əkin sahəsi, 148393 ədəd ağac, əhalinin fərdi təsərrüfatlarındakı əmlak, məişət əşyaları və ev avadanlıqları, həmin ərazidə fermerlərə, hüquqi və fiziki şəxslərə məxsus heyvandarlıq, quşçuluq və balıqçılıq təsərrüfatları ciddi maddi ziyanla üzləşmişdir.

Təbii fəlakətin törətdiyi fəsadların nəticələrinin qısa müddətdə aradan qaldırılması istiqamətində Azərbaycan Respublikasının Prezidenti cənab İlham Əliyevin tapşırıq və göstərişlərinə uyğun olaraq təxirəsalınmaz tədbirlərə başlanılmış, bununla bağlı dövlət başçısının xüsusi sərəncamı ilə yaradılmış Hökumət Komissiyası kompleks tədbirlər müəyyənləşdirmişdir. Azərbaycan Respublikası Nazirlər Kabinetinin 9 iyul 2010-cu il tarixli sərəncamına əsasən əhaliyə dəymiş maddi ziyanın həcminin dəqiqləşdirilməsi və qiymətləndirilməsi, birdəfəlik kompensasiyaların ödənilməsinin təmin edilməsi, subasmaya məruz qalmış ərazilərin iqtisadi, sosial həyatının, aqrar, kommunal, enerji, rabitə, nəqliyyat və digər infrastrukturun bərpası və yenidən qurulması üzrə tədbirlərin həyata keçirilməsinə başlanılmışdır.

Nazirlər Kabinetinin sözügedən sərəncamı ilə aidiyyəti mərkəzi icra orqanlarının və digər əlaqədar təşkilatların, o cümlədən, yerli icra orqanlarının nümayəndələrinin daxil olduğu sahə komissiyaları yaradılaraq həmin komissiyaya dəymiş ziyanın müəyyən edilərək hesablanması və az vaxt ərzində Hökumət Komissiyasına təqdim edilməsi üçün müvafiq tapşırıqlar verilmişdir. Ötən müddət ərzində komissiyalar yerlərdə ətraflı araşdırma aparmış, əhalinin təsərrüfatlarına, sosial obyektlərə, dövlət və bələdiyyə mülkiyyətində olan əmlaklara dəymiş ziyanı müəyyən edərək aidiyyəti üzrə təqdim etmişdir.

Göstərilənlər əsasında ilkin mərhələdə rayon ərazisində subasma və qrunt sularının təsiri nəticəsində uçmuş, qəzalı vəziyyətə düşmüş, təmirinə, bərpa-gücləndirilməsinə zəruri ehtiyac yaranmış evlər qeydiyyata götürülmüş, eyni zamanda, yeni salınan qəsəbəyə köçürələcək 916 ailə müəyyənləşdirilmiş və bu günə kimi onlardan 742 ailəyə, ümumilikdə 756200 manat məbləğdə kompensasiya ödənilmişdir. Ödənilmiş kompensasiyalardan 521700 manatı 372 ailənin evinin bərpa-gücləndirmə tədbirlərinə, 77400 manatı qəzalı və uçmuş evlərin 91 ailəsinə, 74300 manatı yeni qəsəbədə yaşayacaq 178 ailəyə (nəzərdə tutulan vəsaitin ilkin olaraq 50 faizi məbləğində), 82800 manatı isə Nərimankənd daş evlər şəhərciyində yaşayan 101 məcburi köçkün ailəsinə evlərinin təmiri məqsədilə ödənilmişdir. Bundan əlavə, komissiyanın rəyi əsasında təmirə ehtiyacı olan daha 174 evin sahibinə kompensasiya ödənilməsi nəzərdə tutulmuşdur.

Qeyd etmək lazımdır ki, cari ilin avqust ayından etibarən su altında qalan və bərpası mümkün olmayan evlərin tikintisinə başlanılmışdır. Ümumilikdə, rayon üzrə ilkin mərhələdə 269 evin tikintisi nəzərdə tutulur. Bu məqsədlə rayonun Yeni Novruzlu kəndində 35,22 hektar torpaq sahəsində 178 evdən ibarət yeni qəsəbə salınmışdır. Yeni qəsəbədə tikilən 178 evdən 152-si Novruzlu kəndinin, 21-i Dəllər, 3-ü Nərimankənd, 2-si isə Musalı kənd sakinləri üçün nəzərdə tutulmuşdur. İnşa edilən 178 evdən 104 ev 2 otaqlı, 71 ev 3 otaqlı, 3 ev isə 4 otaqlıdır. Eləcə də, rayonun Dəllər, Nərimankənd, Musalı və digər 4 yaşayış məntəqəsində uçmuş və ya qəzalı vəziyyətdə olan əlavə 91 evin əvəzinə hər bir vətəndaşın həyətində olmaqla yeni fərdi yaşayış evlərinin tikintisinə başlanılmışdır.

Yeni Novruzlu kəndində salınan qəsəbədə 132 şagird yerlik 1 məktəb binası, 50 yerlik uşaq bağçası və körpələr evi, tibb məntəqəsi, klub, kitabxana, poçt şöbəsi və EATS üçün ayrıca bina, icra nümayəndəsi üçün inzibati idarə binası, sahə müvəkkili binası tikilmişdir. Qəsəbədə müasir infrastruktur şəbəkəsini təmin etmək, sakinlər üçün normal kommunal-məişət şəraiti yaratmaq məqsədilə 2 ədəd hər biri 250 kubluq su hovuzu tikilməklə qəsəbədəki evlərin həyətinə su xətləri çəkilmiş, yağış sularının kənara axıdılması üçün kanallar inşa edilmişdir. Elektrik enerjisi ilə fasiləsiz təminat üçün müasir sistem qurulmuş, yaşayış məntəqəsinə gedən yolun və daxili küçələrin, ətraf ərazinin asfaltlaşdırılması və abadlıq işləri görülmüşdür.

Təbii fəlakət rayonun sahilboyu kəndlərinin iqtisadiyyatına, əhalinin əkininə, fərdi təsərrüfatına, heyvandarlıq və quşçuluq sahəsinə ciddi ziyan vurmuşdur. Bütün bunlarla yanaşı, aqrar sahədə görülən işlər ardıcıl olaraq davam etdirilmiş və istehsalçılara kömək məqsədilə bütün imkanlar səfərbər edilmişdir. Xüsusən də, 2009-2013-cü illər üçün regionların sosial-iqtisadi inkişafı Dövlət Proqramında nəzərdə tutulan məsələlərin öz həllini tapmasına daha böyük diqqət yetirilmişdir.

2010-cu ilin məhsulu üçün 2009-cu ilin payızında 21023 hektar taxıl əkilmişdir. Bundan 18413 hektarını buğda, 2610 hektarını isə arpa təşkil edirdi. Kür və Araz çaylarının, Sarısu gölünün daşması nəticəsində 2135 hektar taxıl sahəsi su altında qalmışdır. Yaz əkininin sonuna qədər salamat qalmış 18888 hektar taxıl sahəsindən 16857 hektarını buğda, 2031 hektarını arpa təşkil edir. 01 oktyabr 2010-cu il tarixə cəmi 55453 ton taxıl istehsal edilmişdir ki, bunun 50233 tonunu buğda, 5220 tonunu isə arpa təşkil edir. 01 oktyabr 2010-cu tarixə 5815 ton ət, 27282 ton süd və 6809 min ədəd yumurta istehsal edilmişdir. Heyvandarlıq sahəsində artım müşahidə edilmişdir. Belə ki, hazırda rayon üzrə bütün təsərrüfat kateqoriyaları üzrə qaramalın sayı 64924 baş, o cümlədən ana inək və camışların sayı 30668 baş, qoyun və keçilərin sayı 92115 baş olmuşdur. Keçən ilin müvafiq dövrü ilə müqayisədə qaramal 1061 baş, qoyun və keçilərin sayı isə 802 baş artmışdır. Kənd təsərrüfatı məhsullarının saxlanması məqsədi ilə rayonun Gomuşçu kəndində 2000 ton tutumu olan soyuducu anbar kompleksinin tikintisi davam etdirilir.

Müvafiq dövr ərzində abadlıq, quruculuq və yaşıllaşdırma sahəsində görülən işlər davam etdirilmiş, "Ekologiya ili" çərçivəsində ağacəkmə kampaniyasına əmək kollektivləri cəlb olunmuş, bütün daxili imkanlar səfərbər edilmişdir. Bəylik kəndi istiqamətində Saatlı rayonunun girişindən başlamaqla Varxan kəndinədək 25 km-lik məsafədə magistral yol ətrafı və şəhər daxili küçələr, prospekt və xiyabanlarda təmizlik və yaşıllıq diqqətdə saxlanılmışdır.

Şəhərin Heydər Əliyev prospektində yerləşən "Şəhidlər Xiyabanı" parkının qarşı tərəfində olan parkda səkilərin kənarına 600 metr uzunluğunda borular düzülmüş, 1 ədəd 2,5 x 3,5 metr ölçüdə "söhbətgah" düzəldilmiş və yaşıllıqların suvarılması üçün 200 metr uzunluğunda daxili su xətti çəkilmişdir. Prospektdə 620 kvadratmetr daş hasar çəkilmiş, 720 kvadratmetr divar suvanmış, Nəsimi küçəsində 280 kvadratmetr daş hasar çəkilmiş və suvadılmışdır. Bundan əlavə, Heydər Əliyev prospektində, Nəsimi, H.B.Zərdabi, C.Cabbarlı, Gənclər küçələrində divarların 11500 kvadratmetr hissəsi rənglənmişdir. Heydər Əliyev prospektində səkilərə 1480 və Nizami küçəsində isə 500 kvadratmetr bəzək piltəsi döşənmişdir.

Heydər Əliyev prospektinə (8-ci döngə), O.Rzayev, M.P.Vaqif, M.Əzizbəyov, Cavanşir, Nəsimi, A.Abuzərov, M.Əzizov, 20 Yanvar, Q.Qarayev, M.F.Axundov, Şəhriyar, H.Aslanov, M.Sübhi, Babək, Ş.Yusif, M.Ə.Sabir, M.Ə.Rəsulzadə, M.Müşfiq, 28 May və Ə.Hüseynov küçələrinə 54368 kvadaratmetr çınqıl örtük verilmiş və şəhərin küçələrinə 25433 kvadratmetr asfalt vurulmuşdur.. Rayonun yerli avtomobil yollarında 46400 kvadratmetr ərazidə 162 min manatlıq cari təmir işləri aparılmışdır. Hazırda bu işlər davam etdirilir. Sevindirici haldır ki, Saatlı şəhərindən başlamaqla Sarıcalar kəndinə qədər el arasında "Qazanbatan" yolu adlanan 10 km-lik məsafəyə keyfiyyətli asfalt örtüyü vurulur. Qeyd etdiyim kimi mühüm strateji əhəmiyyəti olan Saatlı-Musalı-Məzrəli avtomobil yolunun yenidən qurulması da reallaşmışdır.

Saatlı şəhərində Milli Təhlükəsizlik Nazirliyi rayon şöbəsinin yeni inzibati binası, Varxan kəndində seysmik stansiya tikilmiş, rayon icra hakimiyyətinin inzibati idarə binasının əsaslı təmirinə başlanılmışdır.

Cari ilin yaz və payız mövsümündə rayon ərazisində 42,7 hektar sahədə 42 min ədəddən çox müxtəlif növ ağaclar əkilmiş və həmin ağacların yay mövsümündə davamlı su ilə təminatına xüsusi diqqət ayrılmışdır. Bu tədbirlər sırasında Əlisoltanlı kəndi ərazisində magistral yol kənarında 7,0 hektar ərazi əvvəllər mövcud olmuş qrunt sularından təmizlənmiş, əraziyə torpaq daşınaraq çökəkliklər doldurulmuş, meliorasiya tədbirləri aparılaraq yeni drenaj və su kanalı sistemi çəkilmiş, mövcud drenajlar lildən təmizlənərək əraziyə şam və əzgil ağacları əkilmişdir.

Dövlət Proqramına uyğun olaraq rayonun elektrik şəbəkələrinin və yarımstansiyalarının yenidən qurulması istiqamətində 2009-cu ildə işlərə başlanılmışdır. Saatlı şəhər, Mollavazlı, Qıraqlı kəndlərində bu işlər başa çatdırılaraq, hazırda Mustafabəyli kəndində quraşdırma işləri davam etdirilir. İlin sonuna kimi əlavə olaraq Bəylik kəndində bu işlərə başlanılması nəzərdə tutulub. Ümumiyyətlə, 2010-cu ilin doqquz ayı ərzində 1289,4 min manat dəyərində işlər görülmüşdür. Bu işlər sırasında 10 və 0,4 kv-luq 2830 ədəd dayaq dəyişdirilmiş, 2003 ədəd "Smart-kart" sayğacları quraşdırılmış və 95,7 km SİP tipli kabel çəkilmişdir.

Əhalinin mavi yanacaqla təminatı sahəsində də bir sıra işlər görülmüşdür. Belə ki, Saatlı şəhərinin M.Əliyev, A.Abuzərov və M.Əzizbəyov küçələrində 11105 metr uzunluğunda polietilen boru çəkilmiş və bu işlər hazırda davam etdirilir. İlin sonuna kimi H.B.Zərdabi, Nizami və M.F.Axundov küçələrindəki 3600 metr uzunluğunda boru daha böyük diametrli boru ilə əvəzlənəcəkdir. Eyni zamanda, 1993-cu ildən qaz verilişi dayandırılmış Əlisoltanlı, Bəylər, Potubəyli, Qıraqlı, Mustafabəyli və Bəylik kəndlərinin qazlaşdırılması tədbirlərinə də başlanılması nəzərdə tutulub. Bundan əlavə, Saatlı şəhərində 1250 abonentin mənzilinə yeni qaz sayğacı quraşdırılmışdır. Hazırda bu işlər davam etdirilir.

Saatlı şəhər əhalisini, Nərimankənd və Əlisoltanlı məcburi köçkün qəsəbəsinin sakinlərini içməli su ilə təmin etmək üçün müntəzəm olaraq nasaz olan və ya sıradan çıxmış su nasosları təmir edilmiş, Sabir kanalı üzərində əlavə 1 ədəd su nasosu quraşdırılmış, yararsız hala düşən su boru xətləri təmir edilmiş və ya yeni xətlərlə əvəzlənmiş, nasosların işlədilməsi üçün 100 metr kabel dəyişdirilərək transformatorlarda olan nasazlıqlar aradan qaldırılmışdır.

Əmək qabiliyyətli əhalinin işlə təmin olunması, yeni açılan müəssisələrin qeydiyyatı sahəsində işlər davam etdirilmişdir. 2010-cu ilin doqquz ayında 465 yeni iş yeri açılmışdır.

Dövlət Proqramında təhsil, səhiyyə, mədəniyyət və idman bölmələri üzrə öz əksini tapmış tədbirlər bilavasitə həmin sahələrdə mövcud vəziyyət və sosial sifarişlər nəzərə alınmaqla təsdiq olunmuşdur. Biz çalışmışıq ki, əsasən yeni obyektlərin tikintisi, mövcud müəssisələrin əsaslı təmiri və müasir avadanlıqlarla təchizi məsələləri öz həllini tapmaqla qeyd olunan bu vacib sosial sahələrdə iş günün tələbləri səviyyəsində qurulsun. Əhalinin müraciətləri nəzərə alınaraq Prezident İlham Əliyevin 30 mart 2010-cu il tarixli sərəncamı əsasında Mərkəzi Rayon Xəstəxanasının əsaslı təmiri sahəsində işlərə başlanılmış və indiyədək təmir-tikinti işlərinə 450 min manat vəsait xərclənmişdir. 2011-ci ildə təmir-tikinti işlərinin tam başa çatdırılması, xəstəxananın müasir tibb avadanlıqları, yumşaq və bərk inventarlarla təchizi nəzərdə tutulmuşdur. Bundan əlavə, rayonun Varxankənd kəndində Yaponiya səfirliyinin vəsaiti hesabına 8 otaqdan ibarət, 10-12 nəfər həkim və orta tibb işçisinin çalışdığı həkim məntəqəsi tikilərək aprel ayında istifadəyə verilmişdir. Məntəqənin tikintisinə 60 min, avadanlığına isə 38 min ABŞ dolları dəyərində vəsait xərclənmişdir.

ABŞ-ın "Kaunterpart" qeyri-hökumət təşkilatının dəstəyi ilə rayonun Dədə Qorqud kəndində fəaliyyət göstərən həkim məntəqəsi əsaslı təmir edilərək istifadəyə vermişdir. Əsaslı təmir işlərinə 9600 ABŞ dolları məbləğində vəsait xərclənmişdir.

Digər xidmət təşkilatları kimi Mərkəzi Rayon Xəstəxanası, Gigiyena və Epidemiologiya Mərkəzi və Baytarlıq idarəsi subasmaya məruz qalmış yaşayış məntəqələrində yoluxucu xəstəliklərin baş verməməsi üçün tibbi-profilaktik, əks epidemik tədbirlər həyata keçirmiş, epidemioloji vəziyyəti nəzarətdə saxlamış, köçürülən əhalinin məskunlaşdığı yerlərdə operativ tibbi xidməti təşkil edərək əhalini lazımı dərman preparatları ilə təmin etmişdir.

Ötən dövr ərzində rayonda təhsil müəssisələrinin əsaslı təmiri, əlavə sinif otaqlarının və yeni məktəb binalarının tikintisi, müasir avadanlıqlarla təchizi sahəsində geniş həcmli işlər görülmüşdür. Belə ki, Təhsil Nazirliyinin tikinti təşkilatları tərəfindən rayonun Kamallı kəndində inşa olunan 180 şagird yerlik əsas məktəb binası tikilib istifadəyə verilmişdir. Bundan əlavə, Saatlı şəhər 4 saylı, Gomuşçu, Dədə Qorqud, Məzrəli, Nərimankənd, Mustafabəyli, Məmmədabad, Azadkənd və Nəsimikənd orta, şəhər 2 saylı, Mollavazlı, Potubəyli, Qıraqlı, Dəllər, Qara Nuru, Əliabad və Günəşli məktəbləri əsaslı və cari təmir olunmuşdur. Sarısu gölünün daşması nəticəsində ziyan çəkmiş Nərimankənd və Dəllər kəndlərinin məktəbləri əsaslı təmir edilmişdir.

2009-2010-cu dərs ilində yüksək hazırlıqlı və dərin bilikli şagirdlərin yetişdirilməsi məsələlərinə diqqət daha da artırılmışdır. Rayonun müxtəlif məktəblərinin şagirdləri bu il olimpiyadaların respublika turunda iştirak etmiş və yaxşı nəticələr göstərmişlər. Cari tədris ilində attestat almış 642 nəfər məzundan 325 nəfəri ali məktəblərə sənəd vermişlər. Onlardan 93 nəfəri müxtəlif ali məktəblərə qəbul olunmuşdur.

Səyyar qəbullarda qaldırılan problemlərdən Mərkəzi Rayon Xəstəxanasının əsaslı təmiri, Varxankənddə həkim məntəqəsinin tikilməsi, Saatlı-Sarıcalar, Saatlı-Musalı-Məzrəli avtomobil yollarının yenidən qurulması, kənd yaşayış məntəqələrində "Smart-Kart" tipli sayğacların quraşdırılması, şəhər və kənd yaşayış məntəqələrinə yeni transformatorların, Kamallı kəndində yeni məktəbin tikilməsi, kollektor-drenaj şəbəkələrində təmir-tikinti və təmizləmə işlərinin görülməsi, bir sıra kəndlərdə müasir tipli elektron ATS-lərin qurulması, kənd təsərrüfatı məhsulları istehsalçılarının texnika, mineral gübrələrlə təminatı, suvarma suyuna olan ehtiyacın ödənilməsi, şəhərdaxili küçələrin asfaltlaşdırılması kimi sosial sifarişləri əhatə edən məsələlər artıq öz həllini tapmışdır.

Rayon icra hakimiyyətinin başçısı S.Cabbarov söhbət əsnasında xüsusi olaraq vurğuladı ki, saatlılılar qədirbilən camaatdır. Onlar ümummilli lider Heydər Əliyevin Saatlıya göstərdiyi qayğını heç vaxt unutmur, ulu öndərin bu rayona 1974-cü, 1976-cı, 1980-ci və 1998-ci illərdəki səfərlərini xoş xatirə kimi yadda saxlayırlar. Ulu öndərin Saatlıya hər gəlişi rayonda əsl toy-bayrama çevrilərdi. O, zəhmətkeşlərlə görüşür, problemləri ilə maraqlanır və dərhal onların aradan qaldırılması üçün tədbirlər görərdi. Sevindirici haldır ki, ümummilli liderin kursunu uğurla davam etdirən möhtərəm Prezidentimiz İlham Əliyev də saatlılılara eyni qayğını göstərir. Dövlət başçısı son 2 ildə iki dəfə - 2008-ci ilin sentyabrında və 2010-cu ilin noyabrında Saatlıda olmuş, rayonun problemləri ilə maraqlanmış və onların aradan qaldırılması üçün lazımi köməkliyi göstərmişdir. Elə bu yaxınlarda - 21 oktyabr 2010-cu ildə Ağcabədi, İmişli, Saatlı və Qusar rayonlarının sosial-iqtisadi inkişafının sürətləndirilməsinə dair əlavə tədbirlər haqqında Azərbaycan Respublikasının Prezidenti tərəfindən imzalanmış sərəncam dövlət başçısının bölgələrin əhalisinə növbəti bir töhfədir. Bu sərəncama əsasən Saatlı-Musalı-Məzrəli avtomobil yolunun yenidən qurulması üçün Azərbaycan Respublikası Prezidentinin ehtiyat fondundan ilkin olaraq 1,5 milyon manat məbləğində vəsait ayrılmışdır. 20 min nəfərdən artıq əhalinin yaşadığı 8 yaşayış məntəqəsini birləşdirən bu yolun yenidən qurulması daha bir arzumuzun ölkə başçısının diqqəti sayəsində reallığa çevrilməsidir. Bu tarixi sərəncam bütün Saatlı ictimaiyyəti tərəfindən böyük sevinclə qarşılanmış, əhalinin müxtəlif təbəqələri cənab İlham Əliyevə müraciətlər edərək dərin minnətdarlıq hisslərini bildirmişlər. Mən bir daha rayon əhalisi adından xalqımızın böyük oğlu, Azərbaycan Respublikasının Prezidenti möhtərəm İlham Əliyevə bu münasibətlə insanlarımızın ən ülvi və xoş sözlərini çatdırır, dövlət başçısını əmin edirəm ki, rayona göstərdiyi yüksək diqqəti öz əməli işimizlə doğruldacağıq.

Səməd HÜSEYNOĞLU,

Xalq qəzeti.-2010.-21 dekabr.-S.5.