Zamanın hökmü ilə təsdiqlənmiş varislik

Xalq 1993-cü ildə Heydər Əliyevin yenidən alternativsiz rəhbər olaraq ali hakimiyyətə qayıdışını tələb edəndə nə qədər ağılla, təkidli hərəkət etmişdisə, üçüncü minilliyin üçüncü və səkkizinci illərində İlham Əliyevin şəxsində öz Prezidentini - yeni liderini seçəndə də o səviyyədə mübarizlik göstərdi. İlk mərhələdə Azərbaycan xalqı dövlətçiliyin xilaskarının missiyasından lazımınca bəhrələnərək öz varlığını, Vətənin müstəqilliyini qorudu və milli dövlətini qurdu. İkinci mərhələdə isə Azərbaycan cəmiyyəti böyük zəhmətlər, ağrı-acılar bahasına yaradılmış ideoloji ənənə və dövlətçilik təcrübəsini dağılmağa, müstəqilliyi naməlum talenin oyunları ilə üz-üzə qalmağa qoymadı. Bu, müasir Azərbaycanda siyasi varislik ənənəsinin nə qədər ehtiyac duyulan, həyati məsələ olduğunun mükəmməl sübutu oldu.

İlham Əliyev siyasi meydanda çoxdan olsa da, onun liderlik bacarığı tam aydınlığı ilə Avropa Şurasının Parlament Assambleyasında Azərbaycan nümayəndə heyətinin rəhbəri qismində vətənpərvər fəaliyyəti ilə nəzərə çarpıb. Sonradan isə cəmiyyət onu Baş nazir kimi qəbul etdi. Unutmamalıyıq ki, Avropa Şurası ölkəmiz üçün beynəlxalq aləmə açılan pəncərədir. Bununla yanaşı, o vaxt Azərbaycana qarşı geniş təbliğat kampaniyası aparan erməni diasporunun bəzi iri xarici dövlətlərdə güclü təsirləri görünürdü. Belə bir zamanda ölkəmizi Avropada təmsil edəcək heyətə elə bir geniş və müasir dünyagörüşlü şəxs lazım idi ki, dünyada gedən siyasi proseslərindən düzgün baş çıxara bilsin. Əslində, bu qədəmi sayalı başlanğıc Heydər Əliyev siyasi, ictimai, əxlaqi məfkurəsi üzərində formalaşmış, Avropa və Şərq dəyərlərinin sintezindən yaranan, monolit kökü olan özünəməxsus siyasi mədəniyyətin gəlişi idi. Siyasi düşərgəyə, cəmiyyətimizin idarəçiliyinə yeni ictimai ruhun gəlişi çağdaş ideyaların axını demək idi. Bütün bunların bəhrəsi isə təkcə əldə olunmuş inkişaf tempini qoruyub saxlamaq deyil, həm də qazanılacaq yeni uğurlar, yeni təcrübə oldu.

Prezident İlham Əliyevin keçdiyi mənəvi, mədəni, intellektual, siyasi məktəb bütöv bir tarixdir. Həmin tarixi dönəmin taleyüklü imtahanları isə Vətənin müstəqilliyinin ilk illərinə düşüb. Ölkənin ən çətin, ziddiyətli anlarının qarışıq mənzərəsini ifadə edən 1993-cü ildə dövlətçiliyin itirilməsi təhlükəsi az qala reallığa çevriləndə Tanrı dönüb Azərbaycana baxmağa macal tapmışdı. Xalqın müdrik Heydər Əliyev qüdrətinə tapınması taleyin tanıtdığı yeganə düzgün ünvan idi. Müharibə alovunu söndürmək - hər ocağa, ailəyə, gündəlik həyatımıza yeriyən qan izini kəsmək lazım idi. Və bununla bahəm, ideoloji zəminli həllini gözləyən işlər çox idi. Öndə Qərblə, Avropa ölkələri ilə səmimi münasibətlər qurmaq, dünyada Azərbaycan haqqında sülhsevər bir imic yaratmaq vəzifəsi dururdu. Siyasi dövlət sisteminin əsasları qoyulmalıydı.

Gələcəyin lideri İlham Əliyev o taleyüklü günlərdə müxtəlif dövlətlərin siyasilərinin çeşidli mülahizələrilə müşayiət olunan proseslərdə, tez-tez dəyişən olayların çevrəsində dünya şöhrətli atasının - ümummilli lider Heydər Əliyevin bütün fərdi və ideoloji qənaətlərini onunla birgə yaşayırdı. Öndər Heydər Əliyev ölkəsinin müstəqilliyinin on ili ərzində milli, dünyəvi quruluş formasiyasını seçən Azərbaycanın bugününün və sabahının üç ana prinsipini, ideya istiqamətini müəyyənləşdirmişdi: Azərbaycançılıq, Millilik, Demokratizm! Xalqın Lideri düz iki müddətlik Prezidentliyi dövründə dövlətçiliyə yaradıcı münasibətini bu prinsiplər üzərində qərarlaşdıraraq bütöv bir nəslin tərbiyəsini və gərəkli təcrübə toplamasını reallaşdırdı. Böyük irs və zəngin ənənəli siyasi məktəb yaratdı.

Azərbaycançılıq prinsipi milli dövlətçilik ideologiyasının mərkəzi qollarındandır. Özünütanımada ilkin məqsədlərdən biri kimi ana dilinin hüquqlarının qorunması, inkişaf etdirilməsi, gələcək nəsillərə sağlam formada ötürülməsi azərbaycançılığın özəyində dayanan amillərdən hesab olunur. Öndər Heydər Əliyev "Xalqın, millətin, insanın öz ana dilindən əziz heç bir şeyi ola bilməz" kəlamını söylərkən millətə öz mənəvi xəzinəsi ilə fəxr etməyi öyrədir, doğma dilin əsrlərin burulğanında itirilməməsinə, gözəlliyini saxlamasına görə gənc nəsildə əcdadlarımıza qarşı minnətdarlıq hissi aşılayırdı. Bu gün dil siyasətinin yeridilməsi prosesinə Prezident İlham Əliyev milli-mənəvi, ideoloji məsələ kimi baxır. İndi biz mövcud siyasətin müqabilində dilimizin elmi-tarixi cəhətdən perspektivini aydın təsəvvür edə bilirik.

Azərbaycançılıq ideologiyası üçün müstəqilliyin tarixi-mənəvi tələblərindən biri də dünyanın müxtəlif yerlərində yaşayan və fəaliyyət göstərən azərbaycanlıların əsasən bu ideya ətrafında birləşməsidir. Bu istiqamət bütün dünyada yaşayan azərbaycanlıların milli-mənəvi, tarixi maraqlarını ifadə edən məsələ kimi müasir dövlətçilikdə önəmli halal yerini almışdır.Vaxtilə Prezident Heydər Əliyev birmənalı şəkildə Azərbaycan insanına tövsiyyə edirdi: "Hər bir azərbaycanlı milli mənsubiyyətinə görə qürur hissi keçirməlidir və biz azərbaycançılığı - Azərbaycanın dilini, mədəniyyətini, milli-mənəvi dəyərlərini yaşatmalıyıq" - deyərkən o, bu zaman bütöv xalqın - azərbaycanlı superetnosun harada və hansı vəziyyətdə olmasını, şəraiti fərqləndirmədən ümumilikdə onlarda milli duyğuların canlanması işinə bir iradəlilik, sürət impulsu verirdi.

Ölkə rəhbəri İlham Əliyev indiki və gələcək dövr üçün dövlətin və vətəndaşların vəzifələrindən danışarkən soydaşlarımızın doğma Vətənləri ilə hər cür faydalı əlaqələrdə hüquqi, mədəni, mənəvi əsasların möhkəmləndirilməsini zəruri istiqamət kimi vurğulayır. Prezident dövlətimizin inkişafı müqabilində maddi-mənəvi imkanlardan istifadə edərək dünya azərbaycanlılarının normal səviyyədə bəhrələnməsinə imkan yaratmağı, onların milli və vətəndaş hüquqlarının qorunması yolunda səyləri gücləndirməyi çağdaş dövr üçün vacib amillərdən sayır. Sözsüz ki, bu zaman Prezident İlham Əliyev ölkəsinin beynəlxalq konvensiyalarla təsbitini tapmış insan hüquqlarının qorunmasını təmin etmək üçün müəyyən təsirli vasitələrə malik olduğunu bəyan edir. O, bu mülahizələrində, mövqeyində ulu öndər Heydər Əliyevin müəyyənləşdirdiyi strateji kursa, ideyalara bütün azərbaycanlıların daim sədaqətli qalacağına arxalanır.

Millilik Prezident İlham Əliyevin siyasi düşüncəsinin, təfəkkürünün əsas mənbəyidir. Onun öz xalqının ruhuna uyğun, eləcə də Avropa və Qərb təmayüllü siyasəti Azərbaycanın əzəli milli maraqlarından mayalanır. Bu keyfiyyət bütövlükdə ümumtürk ruhunun tərbiyəsindən gələn bir xarakterdir. Türk ruhumuzun siyasi, milli, əxlaqi, mədəni dəyərləri çoxəsrlik tarixi sınaqlardan alnıaçıq çıxıb. Əsrlərin ziddiyətli olaylarından, maneələrdən salamat qurtulmuş milli, dini dözümlülük, tolerantlıq indi də dövlətimizin və onun rəhbərinin, bütün sağlam qüvvələrin təqdir etdiyi xüsusiyyətlərdir. Prezident İlham Əliyevin bu kontekstdə millətin dininə münasibəti belədir: "Biz çox təəssüf edirik ki, dünyanın bəzi dairələrində islamı terrorla eyniləşdirmək istəyirlər. Biz bu cəhdləri pisləyirik. Müsəlman ölkələri tarixdə bir neçə dəfə terrorun qurbanına çevrilmişlər. O cümlədən, Azərbaycan dəfələrlə erməni terror təşkilatlarının törətdikləri terror aktlarına məruz qalmışdır. Bu cəhdlər uğursuzluğa məhkumdur. İslam sülh, qardaşlıq, dözümlülük, tolerantlıq dinidir".

Prezident İlham Əliyevin müasir azərbaycanlı təfəkküründə Vətən və Xalq təəssübkeşliyi, Şərqin müsbət ənənələri, türk mənəvi-əxlaqi dəyərləri, Qərb və Avropa modellərinə münasib intellekt möhkəm birləşmiş özüldür. O, milli- mənəvi, ideoloji dəyərlərimizin hamısında, mədəni, elmi, etno-kulturoloji, eləcə də yaradıcılıq sahələrində irəliləyişi, mənəviyyat məsələlərinə dövlət himayəsini iqtisadi-sosial tərəqqi ilə ayrılmaz şəkildə bağlayır. Bu, dünyanın ümumi həyatının rəhnidir və hər bir millətin gələcəyində, dövlətin qabaqcıl ölkələrlə eyni hüquqi səviyyədə yaşayıb inkişaf etməyində həlledici amildir.

Azərbaycan rəhbəri İlham Əliyev idarəçiliyin elə demokratik və optimal yolunu seçmişdir ki, hər bir zəkalı ölkə vətəndaşının dövlətçiliyin inkişafında yeri vardır. Dövlət quruculuğunda bu yer hər kəsin məhz vətənpərvərliyinə, biliyinə, sağlam düşüncəsinə, qabiliyyətinə görə müəyyənləşmişdir. Hələ prezidentlikdən əvvəl İlham Əliyevin gənclik maraqlarıyla Azərbaycanda idmanın intibahını qısa zamanda gerçəkləşdirməsi, mühüm məsələ kimi millətin fiziki və əqli sağlamlığına qayğı ilə yanaşması da sırf milli xarakterlidir. Təbii ki, fiziki hazırlıq həm müharibə vəziyyətində olan ölkənin vəziyyəti üçün vacibdir, həm də cəmiyyətin mənəvi-ruhi sağlamlığını, yeni nəsillər arasında narkotikanın yayılmasına qarşı mənəvi mübarizəni şərtləndirir. Ölkəmizdə müasir idman siyasəti fiziki hazırlıq çərçivəsini genişləndirərək mənəvi tərbiyənin güclənməsi anlamına keçmişdir və ictimai, ideoloji əhəmiyyətini ilbəil artırır.

Olimpiya hərəkatının geniş xarakter alması, mövcud idman bazalarının bərpa olunaraq müasir standartlara uyğun səviyyədə yenidən qurulması, regionlarda yeni idman komplekslərinin tikilməsi dünya idman təşkilatlarının diqqətini Azərbaycana cəlb edə bilmişdir. Beynəlxalq yarışlarda Azərbaycan idmançılarına peşəkar münasibət formalaşmışdır. Ölkəmizin idman sistemində ab-havanın yeniləşməsi idmançılarımızın mötəbər beynəlxalq yarışlarda ürəkaçan nailiyyətlər qazanmasını reallaşdırmışdır. Bütün idman uğurları təsadüflərin deyil, məntiqi, ardıcıl dövlət proqramının ifadəsidir.

Bütün mənalarda, millətimizin tarixi nailiyyəti olan 15 oktyabr 2003-cü il seçimi ulu öndər Heydər Əliyev ideyalarına sədaqətinin təcəssümü oldu. İndi isə biz əminliklə deyə bilərik ki, ölkədə sosial, siyasi, ictimai ehtirasların təbii şəkildə soyumasının davamınca sonrakı 7 ildə dirçəliş epoxasını yaşayırıq. Millət üçün zərurisi odur ki, Prezident İlham Əliyev insanlarımızın ürəyində Heydər - Xalq biriliyinin qarşılığında özünün milli, Vətənçi, demokratik, humanist, prinsipial obrazını artıq dönə-dönə təsdiqləmişdir.

Müasir Azərbaycan dövləti Heydər Əliyevin rəhbərliyi ilə müstəqil həyatının çətin, ziddiyyətli yaşantılarını artıq çoxdan geridə qoymuşdur.

Demokratik quruluşun mahiyyətini göstərən amillərin gerçəkləşməsi sayəsində dövlətimiz bu gün dünya birliyində layiqli yer tutur. Bayrağımız demək olar ki, bütün beynəlxalq təşkilatlarda ucaldılmışdır. Millətimizin daxili potensialı, ictimai düşüncəsi ona imkan verir ki, Azərbaycan demokratizmi heç də digər ölkələrin demokratizmindən geri qalmasın. Prezident İlham Əliyev bu gün eyni demokratizmi davam etdirərkən, bəlkə də, bir qədər də artırarkən sağlam, eyni zamanda, intellektual düşüncənin, qabiliyyətin, milli təəssübkeşliyin yolunu fəal surətdə açıq elan etmişdir. O, müxalifətlə münasibətdə nümayiş etdirdiyi demokratik, milli, mədəni, əxlaqi səviyyə ilə Azərbaycanın maraqlarını hər şeydən üstün tutduğunu dəfələrlə açıqlamış, avantürist meyllərə əsaslanan müxalif qüvvələri millətin sabahı naminə fəaliyyət göstərməyə, iqtidarla dialoqa dəvət etmişdir.

İlham Əliyev siyasətinin gücü ondadır ki, daxili dəstəkdən məhrum olan qüvvələrin iradları üçün siyasətində əl yeri belə saxlamır. Beləliklə, qeyri-obyektiv müxalif dəstənin öz-özünə siyasi meydandan çıxması, iflasa uğraması təbii bir prosesə çevrilir. Axı millət özü də yaxşı dərk edir ki, hakimiyyətə can atmaq məqsədi ilə hər-hansı qüvvənin, nəyin bahasına olursa-olsun, ölkədə sabitliyi pozmaq cəhdləri ümumilkdə cəmiyyətin həyat ritminin pozulmasına gətirib çıxara bilər.

İlham Əliyevin siyasi portretini onun söhbət açacağımız fərdi obrazının əlamətdar ştirixləri tamamlayır. Özəllik ondadır ki, həmin cizgilərin genetik qaynaqları Azərbaycan xalqının özünüdərkində əvəzsiz rolu olmuş bir dahinin ömürlüyündən irəli gələrək formalaşmışdır. Azərbaycanın daim fəxr edəcəyi Heydər Əliyev obrazı və onun yaşam mühiti mədəni, əxlaqi, ictimai, tarixi təcrübəsilə böyük mənşədir. Belə demək mümkündür ki, bu əlamətlər təkamülə meylliliyi ilə dövlət idarəçilik sisteminin daxili və beynəlxalq münasibətlərinə də əlavə keyfiyyətlər gətirir:

Ləyaqətlilik - xalqına da, beynəlxalq aləmə də, dosta da, düşmənə də münasibətdə, onun siyasətini sevənlə də, qarşı olaraq mübarizə aparanla da davranışda bu xüsusiyyət, həm də əlavə bir təmkinlə müşahidə olunur. Bu daxili şəstin daşıyıcısı kimi, əsas etibarilə, geniş planda prezident seçkiləri öncəsi xalq kütlələri ilə təmaslarda, müxtəlif məsələlərə münasibətlərdə qabarıq sezilməyə başlamışdır. Bu, siyasi vəziyyətə, yerli problemlərə, hətta sabitliyi gözü götürməyənlərə münasibətlərdə bir əxlaq nümunəsidir. Halbuki İlham Əliyev xalqın Heydər Əliyevə məhəbbətindən istifadə edərək seçkidə üstünlüklərinə arın-arxayın da yanaşa bilərdi. Amma Prezidentliyə namizəd xalqın öz liderinə - Heydər Əliyevə bəslədiyi məhəbbətə şəxsi ləyaqəti və sevgisi ilə cavab verdi.

Humanistlik - bu, insanlığa məhəbbətdən irəli gələn bir keyfiyyətdir. Prezident İlham Əliyev bilir ki, insanları sevmək, onlara xeyirxahlıq, mənəvi-ruhi, hüquqi, sosial baxımdan problemlərinin həllində doğmalıq göstərmək, dayaq durmaq- layiqli rəhbər olmaqdır. Belə yanaşmanı ondan umanların hamısı, suçu əvəzində münasib cəzaya layiq olanlar da, cəmiyyət də, hətta müxalifət də görür. O, bağışlamağı bacarır, özü də ağır günah işlətmişləri belə - müəyyən dərəcəli ciddi səhvlərə yol vermiş vətəndaşlara həyat haqqında yenidən düşünməyə, özünütərbiyəyə şans verir.

Vətənpərvərlik - hələ millət vəkili olaraq Avropa Şurasında nümayəndə heyətinin rəhbəri kimi fəaliyyəti onun haqqında bu imici yaratmışdı. İlham Əliyev dünyanı bir həqiqətə inandırmağa çalışır ki, Ermənistan terrorçu dövlətdir, zəbt etdiyi Azərbaycanın ayrılmaz hissəsi olan Dağlıq Qarabağ ərazisindən narkotik maddələrin tranziti və biznesi məqsədilə istifadə edir. Bu isə təkcə Azərbaycan, Cənubi Qafqaz üçün deyil, bütün dünya üçün təhlükə mənbəyidir. İlham Əliyev neçə illərdir ki, Avropa Şurası kimi mötəbər qurumun üzvü olan ölkələrin hamısına üz tutaraq bu suallara cavab istəyir: "Ermənistan Avropa Şurasının üzvü ola-ola, beynəlxalq hüququn normalarına məhəl qoymaya bilərmi? Ermənistan Avropa Şurasının üzvü ola-ola digər AŞ üzvünün ərazilərini on ildən artıq bir müddətdə işğal altında saxlaya bilərmi? Ermənistan 20 ildən artıq müddətdə digər AŞ üzvünün qaçqın və köçkünə çevrilmiş bir milyondan artıq vətəndaşının insan haqlarını açıq-aydın poza bilərmi?" Amma Avropa Şurası hələ də suallar ətrafında düşünməyində davam edir.

Qayğıkeşlik - on il deputat seçildiyi ərazi onun himayədarlığını kifayət qədər hiss etmişdir. İlham Əliyev, bəlkə də, onları nəinki mənəvi - sosial sıxıntılarla üz-üzə qoymamış, daim seçiciləri ilə müntəzəm görüşlər keçirərək ümumi əhval-ruhiyyəsinin yüksəkliyinə nail olmağa çalışmışdır. Çadır düşərgələrində yaşayan qaçqınların və məcburi köçkünlərin məişət, sığınacaq güzəranı da İlham Əliyevi daim qayğılandıran məsələlərdəndir. Bu insanların yaşam tərzinin yüngülləşdirilməsi, normal səviyyədə istiliyi, işığı olan ev-eşiklə təminatı onun can yanğısı ilə əhatələnmişdir. Prezident ölkədə baş verən təbii fəlakətlər zamanı zərərçəkmiş insanların iztirablarını aradan qaldırmağı, onlara maddi - mənəvi cəhətdən dayaq durmağı, acılarını, çətinliklərini şəxsən həll etməyi özünə mənəvi borc bilir.

Səmimilik - İlham Əliyev rəsmi və ictmaiyyətlə görüşlərində siyasətçiləri, müxtəlif zümrədən olan insanları nəzakətlə, hörmətlə dinləməyi, məsələyə aydın münasibət bildirməyi ilə tərəf müqabillərini özü haqqında sayğılı düşünməyə vadar edir. O, dialoq zamanı həmsöhbətini özünün təbii səmimiyyətinə və obyektivliyinə inandırır. Mətbuat nümayəndələri ilə təmasda da sadə və konkretdir. Müxtəlif yönlü, hətta qərəzli suallara cavablarında, eləcə də mövqeyinin düzgünlüyünü sübuta yetirərkən dəlilləri həmişə qaneedicidir.

Müasir dövrdə İlham Əliyev liderlik yolunda cəmiyyəti də özü ilə birlikdə ucaltmağa qadir olan yeganə dövlət adamıdır. İnsanların yaxşı məlumatı var ki, o, atasının liderliyi illərində hansı vəzifə daşımasına baxmayaraq, dövlət müstəqilliyimizin qorunmasında, möhkəmlənməsində və ölkəmizin dünya birliyinə daxil olmasında, Avropanın bir üzvü kimi tanınmasında gəncliyin lideri qismində kifayət qədər bilik, bacarıq, qüvvə sərf etmiş, mübarizlik göstərmişdir. Ölkənin böyük neft strategiyasının milli maraqlar daxilində həyata keçirilməsində İlham Əliyevin əməyini, mühüm xidmətlərini heç bir siyasət adamı dana bilməz.

Prezident İlham Əliyevin geniş düşüncəsində Azərbaycanın indiki inkişaf mərhələsini dönməz prosesə çevirmək və islahatları modernləşmə ilə tamamlamaq xətti hakimdir. Cəmiyyətin sağlam qüvvələrinin qəbul etdiyi siyasi kursun davamı da elə bunda - ənənələrin etibarlı səviyyədə qorunmasının özünün bir ənənəyə çevrilməsi ideyasındadır. Bir qədər əvvəlin müstəqillik tarixinə nəzər salsaq, Azərbaycanın bugünü üçün çox mühüm təcrübələrin necə ağır zəhmət bahasına qazanıldığını dərk edər, başlıcası isə, İlham Əliyevin böyük siyasətdə necə yetişməsi prosesinin şahidi olarıq.

Ulu öndər Heydər Əliyevin səyləri ilə xalqın çoxillik arzu və ideallarının gerçəkliyə qovuşması siyasi sabitlik və iqtisadi dirçəlişlə müşayiət olunarkən, sivil dünya normalarının da ölkəyə gəlişi artıq təmin edilmişdi. İlham Əliyev məhz belə yeni tarixi şəraitdə atası Heydər Əliyevin mübarizə dünyasının təcrübəsilə öz bioqrafiyasını daha da zənginləşdirdi. Ümummilli liderimiz 2003-cü ilin prezident seçkiləri öncəsi onun sağlıq durumundan narahatlıq keçirən xalqına gələcəklə bağlı tövsiyələrini verdi: "Üzümü sizə, həmvətənlərimə tutaraq qarşıdan gələn prezident seçkilərində Prezidentliyə namizəd, mənim siyasi varisim, Yeni Azərbaycan Partiyası sədrinin birinci müavini İlham Əliyevi dəstəkləməyə çağırıram. O, yüksək intellektli, praqmatik düşüncəli, müasir dünya siyasətini və iqtisadiyyatını dərindən bilən, enerjili və təşəbbüskar bir şəxsiyyətdir. Sizi əmin edirəm ki, həm İlham Əliyev, həm də Yeni Azərbaycan Partiyası bundan sonra da xalqımızın ən layiqli övladlarını öz ətrafında sıx birləşdirərək Azərbaycan dövlətinin inkişafı və xalqımızın firavanlığı yolunda çox işlər görəcəklər. İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm". Ulu öndər İlham Əliyevi yeni lider simasında nişan verərkən sonuncu müdrik seçimini, məsləhətini edirdi. Xalq isə öz növbəsində bu seçimi qəbul etməklə, liderinə sədaqətini 2003 və 2008-ci illərdə layiqincə nümayiş etdirdi.

İlham Əliyevin böyük siyasətdə son 7 ildəki bəlli uğurları sübuta yetirdi ki, daxili, iqtisadi, xarici siyasətimizin-diplomatiya məktəbimizin potensialı çox güclüdür. Qloballaşan dünyada ancaq konkret düşüncəli, yüksək mədəniyyətli, zəkalı, sərbəst mükalimələr yürüdən siyasətçilər nüfuz və hörmət qazana bilərlər. Bu mənada, İlham Əliyev Vətəninin milli mənafeyini istənilən səviyyələrdə, aparıcı beynəlxalq əhəmiyyətli dillərdə çatdırmağa və müdafiə etməyə kifayət qədər qadir siyasətçidir. Ümummilli lider Heydər Əliyevin Azərbaycanda qurduğu demokratik və şəffaf seçki sistemi xalqın seçim azadlığı, iradə sərbəstliyi üçün normal şərait yaratmışdır. Bu xüsusda, İlham Əliyevin seçki marafonunda 2 dəfə ali kürsüyə yetişməsi onun millətə, Vətənə təmənnasız xidmətinin yekunu, eləcə də beynəlxalq arenada nüfuzunun sanbalıdır. O, bu mövqeyə Heydər Əliyevin oğlu olmasaydı belə, yenə də ucalacaqdı. Çünki İlham Əliyevin böyük siyasətə gəlişi həm də müstəqilliyin diqtə etdiyi ideallara xalqın sədaqətinin sonucu idi.

Cəmiyyətdə çoxluq İlham Əliyevi seçməklə, birmənalı olaraq mövcud siyasi kursun ən münasib, ümidverici inkişaf yolu olduğu qənaətini təsdiq etdi. Müstəqilliyin ötən on ili ərzində bu tipli dövlətçilik istiqaməti sosial-iqtisadi, xarici siyasət sahəsində ölkənin inkişafına gətirdiyi uğurların hesabına qətiləşmişdi. Siyasi varis isə özü həmin quruculuğun təşəkkül və təkamül proseslərinin mərkəzində fəal sima kimi iştirak etmişdir. Onun milli maraqlarımızın beynəlxalq iqtisadi məkanda, xarici əməkdaşlıq məsələlərində, qlobal layihələr həyata keçirilərkən qorunması işində səyləri hamımıza məlumdur. Ona görə də Azərbaycan seçicisi kimə dəstək verdiyini, kimi özünə rəhbər seçdiyini yaxşı anlayır.

İlham Əliyev bizim liderimizdir. Müstəqilliyimizin ilk illərinin xaotik cağlarında, islahatlar dövründə yetişmiş, öz milli-mənəvi, elmi səviyyəsini, qabiliyyətini göstərməyə o vaxtlar imkan tapmayan, intellektual - ziyalı elektoratın, sadə insanların, erməni təcavüzündən əziyyət cəkmiş minlərlə vətəndaşın - ümumiyyətlə, dünya azərbaycanlılarının düşüncəsində onun liderliyi şəksiz qəbul olunur. Ümumən, hazırda püxtələşən gəncliyin də, gənclik dövrünü arxada qoyaraq kamilləşən nəslin də düşüncəsi budur ki, şübhəsiz, İlham Əliyev Azərbaycanı yüksəltməklə bütün azərbaycanlıların Prezidenti olmuşdur. Ölkəsinin inkişafının şahidi olan hər bir vətəndaş, xalqın sosial rifahına doğru istiqamətlənmiş siyasətin bəhrələrini gündəlik həyatında getdikcə daha çox görür.

Prezidentin 2003-cü ildəki andiçmə mərasimindəki nitqindən bu tezisi Azərbayçanın sonrası üçün əsas amal hesab etmək olar: "Mən bu gün yüksək kürsüdən əziz Prezidentimiz cənab Heydər Əliyevə üzümü tutub deyirəm: Əziz Prezident, əsərin olan müasir Azərbaycanı gücləndirəcəyik, zənginləşdirəcəyik, hərtərəfli inkişaf etdirəcəyik, Sizin yolunuzla yeni qələbələrə doğru gedəcəyik". Bu amal, sədaqət, bu vəd təkcə İlham Əliyevin deyil, onu Prezident secən və axıradək müdafiə edəcək, işində yardımçı olaçaq insanların fikrini ifadə edir. Yeni liderin Vətənə, xalqa və dövlətə sədaqət andı, eyni zamanda, bizim də andımızdır: Vətənə, millətə və Azərbaycanın Prezidentinə!

Nizami CƏFƏROV,

Milli Məclisin üzvü,

Azərbaycanda Atatürk Mərkəzinin rəhbəri,

AMEA-nın müxbir üzvü

Xalq qazeti.-2010.-26 dekabr.-S.4.