Yeddi günlük yubiley festivalı başa çatdı

 

Bakı Musiqi Akademiyasının professoru, xalq artisti, "Şöhrət" ordenli bəstəkar Tofiq Bakıxanovun anadan olmasının 80 illiyi münasibətilə dekabrın 22-dən 28-dək ölkə paytaxtında keçirilən musiqi festivalı uğurla başa çatmışdır. Yubiley tədbirlərini Azərbaycan Respublikasının Prezidenti İlham Əliyevin dekabrın 24-də imzaladığı sərəncam daha da şöhrətləndirmişdir. Həmin sərəncamla bəstəkar "Azərbaycan Respublikası Prezidentinin fəxri diplomu" ilə təltif edilmişdir.

 

Mədəniyyət və Turizm Nazirliyinin, Bəstəkarlar İttifaqının və Bakı Musiqi Akademiyasının birgə təşkil etdiyi yubiley tədbirlərinə dekabrın 22-də Bəstəkarlar İttifaqında təşkil edilən konfransla start verilmişdir. İttifaqın sədri, xalq artisti, professor Firəngiz Əlizadənin sədrliyi ilə keçirilən tədbirdə professorlar Gülnaz Abdullazadə, Ülviyyə İmanova, İmruz Əfəndiyeva, Zemfira Qafarova, Telman Hacıyev, filologiya elmləri namizədi Gülzar İbrahimqızı, tanınmış sənətşünaslar Nərminə Bayraməlibəyli, Nərgiz Əliyarova, Ariz Abduləliyev və digər natiqlər Tofiq Bakıxanov yaradıcılığının ən müxtəlif sahələri barədə əhatəli elmi fikirlər söyləmişlər. Qeyd edilmişdir ki, Tofiq Bakıxanov opera janrı istisna olmaqla musiqinin bütün janrlarında uğurla əsərlər yaratmış sənətkardır.

Sonrakı günlər Bəstəkarlar İttifaqının binasında yubilyarın kamera-instrumental əsərlərindən ibarət konsert, Dövlət Filarmoniyasında Üzeyirbəy Hacıbəyli adına Dövlət simfonik orkestrinin ifasında (drijor, respublikanın xalq artisti, professor Rauf Abdullayevdir) simfonik əsərlərdən ibarət böyük konsert, Akademik Opera və Balet Teatrında biraktlı baletlərin tamaşası, yenə də Dövlət Filarmoniyasında Dövlət Xalq Çalğı Alətləri Orkestrinin ifasında (drijor, xalq artisti, professor Ağaverdi Paşayevdir) yeni əsərlərdən ibarət konsert təşkil olunmuşdur. Dekabrın 27-də Muğam Mərkəzində Qara Qarayev adına Dövlət Kamera Orkestrinin ifasında (bədii rəhbər, respublikanın xalq artisti Teymur Göyçayevdir) kamera əsərlərindən ibarət iki şöbəli konsert, ertəsi günü - ayın 28-də isə bəstəkarın son 60 ildə hər gün gəldiyi Bakı Musiqi Akademiyasında "Mahnı axşamı" adlı geniş, rəngarəng konsert təşkil olunmuşdur. Bu konsertdə tamaşaçılar Dövlət Televiziyasının Baba Salahov adına Xalq çalğı alətləri ansamblının ifasında (bədii rəhbər xalq artisti Ağasəlim Abdullayevdir) bəstəkarın son 50-60 ildə qələmə aldığı onlarla mahnını eşitmişlər. Ümumiyyətlə, bu tədbirlərdə 50-dən çox solist və 5 kollektiv iştirak etmişdir. Eyni zamanda, tədbirlərdə mədəniyyət və turizm nazirinin, diplomatik korpus təmsilçilərinin, yaradıcılıq birliklərinin, çoxsaylı ali məktəblərin, kütləvi informasiya kollektivləri rəhbərlərinin təbrikləri oxunmuşdur.

Görkəmli sənət adamlarından Bəstəkarlar İttifaqının katibi Ramiz Zöhrabov, tibb elmləri doktoru Məmməd Hüseyn Herisçi, Avropa Təbiyyat Elmləri Akademiyasının akademiki Hacı Fərhad Mirzə, əməkdar incəsənət xadimi Zakir Mirzəyev, beynəlxalq mükafatlar laureatı Həsən Cəbrayılov və digər natiqlər yubilyarın yaradıcılığının müxtəlif sahələrinə aid maraqlı və dəyərli fikirlər söyləmişlər. Aleksandriya Van Drüsseldorf (ABŞ), Kəmalə Mirbabayeva, Teymur Mustafayev, Nuriyyə Hüseynova, Rafiq Seyidzadə, Lalə Məmmədova, Rəhim Şəhriyari (İran), Ruzə İbişova, Almaz Orucova, Ramil Qasımov, Leyla Dadaşova və digər solistlər bəstəkarın əsərlərini ustalıqla ifa etmişlər. Konsertlərdə Abasqulu Ağa Bakıxanov, Süleyman Rüstəm, Mikayıl Müşfiq, Dilbər Axundzadə, Tofiq Mütəllibov, Şahin Fazil, Ramiq Muxtar və digər şairlərin sözlərinə yazılmış mahnılar oxunmuşdur. Yubiley bülleteninin, dəvətnamə, afişa və proqramların bədii tərtibatını tanınmış fotomütəxəssisi, beynəlxalq musabiqələr qalibi Ələkbər Ağasiyev vermişdir.

 

 

İttifaq MİRZƏBƏYLİ

 

Xalq qəzeti.- 2010.- 31 dekabr.- S. 11.