Balakəndə “Gənclər Günü” qeyd edilib

Rayondakı “Nərmin” şadlıq sarayında “2 fevral - Gənclər Günü”nə həsr edilmiş “Gənclik bu gündən sabaha körpüdür” adlı tədbir keçirilib. Buraya toplaşanlar əvvəlcə foyedə rayon məktəblərində təhsil alan istedadlı uşaqların əl işlərindən ibarət sərgiyə tamaşa ediblər. Giriş sözü ilə çıxış edən rayon gənclər və idman idarəsinin rəisi Rasim Paçalov balakənli gəncləri bayram münasibətilə təbrik etdi.

O, yola saldığımız 2009-cu ildə rayonun ictimai-siyasi həyatında gənclərin rolu və bu möhtəşəm işlərin həyata keçirilməsində həmişə onların öndə olduğunu xüsusi vurğuladı. Bildirdi ki, Dövlət Proqramının (2004-2008-ci illər) icrasında da gənclərin öz əməyi, öz töhfəsi olub. Daha sonra rayon icra hakimiyyəti başçısının təhsil, səhiyyə və mədəniyyət məsələləri üzrə müavini N.Rüstəmova, rayon təhsil şöbəsinin müdiri S.Kərimov, Uşaq Yaradıcılıq Mərkəzinin direktoru S.Qurbanəliyeva, “N” saylı hərbi hissənin əsgəri Ə.Məmmədov və başqaları çıxış edərək ölkə rəhbərliyinin gənclərə xüsusi diqqət göstərdiyindən, həyatımızın bütün sahələrində onların fəal iştirakından danışdılar, öz təbriklərini gənclərə çatdırdılar.

Tədbirdə il ərzində rayonda keçirilən idman yarışlarında, intellektual oyunlarda, təhsildə, rayonun ictimai-siyasi həyatında fəal iştirak edən və fərqlənən gənclərə Fəxri Fərman və hədiyyələr təqdim olundu.

Tədbirin sonunda gənc musiqiçilərin iştirakı ilə geniş bayram konserti oldu.

İlqar HƏSƏNOV,

“Xalq qəzeti”nin bölgə müxbiri

Xalq qəzeti.- 2010.- 2 fevral.- S. 3.