Bugünkü gənclər sabahın
qurucularıdır
Gəncliyimizin
mətanətli, qüdrətli, məqsədyönlü xarakteri onların Vətən məhəbbətində,
əməyə vicdanlı münasibətində və
xalqın düşmənlərinə qarşı
barışmazlığında təcəssümünü
tapır.
Heydər ƏLİYEV,
Ümummilli lider
Müstəqil Azərbaycan dövlətinin
gələcəkdə daha
da inkişaf etdirilməsi, beynəlxalq
aləmdə böyük
nüfuz sahibi olmasında gənclərin
üzərinə böyük
məsuliyyət düşür.
Çünki gənclərimizin
qarşısında xalqımıza,
dövlətimizə, ölkəmizə
sədaqətlə xidmət
etmək, həyatda fəal olmaq və Azərbaycanın dövlət müstəqilliyini
qoruyub saxlamaq vəzifəsi durur.
Ümummilli lider Heydər
Əliyev gəncliyə böyük ümid bəsləyir,
müstəqilliyimizin qorunub saxlanılmasında və əbədi
olmasında gənc nəslin çiyinlərinə daha
ağır yükün düşdüyünü bildirirdi. Azərbaycanın
gələcəyinin yetişən gənc nəsildən
asılı olduğunu xüsusi vurğulayan ulu öndər
deyirdi: “Mənim üçün ən əziz nemət Azərbaycan
uşaqlarıdır, Azərbaycanın gəncləridir.
Çünki Azəbaycan Prezidenti kimi mən bugün
haqqında yox, Azərbaycanın böyük gələcəyi
haqqında düşünürəm. Azərbaycanın gələcəyi
də Azərbaycanın gənclərindən və
uşaqlarından asılıdır”.
Son illərin kəşməkəşli
hadisələrinin, demək olar ki, bütün yükü gənclərin
üzərinə düşüb. Gənclik böyük
qüvvədir. Bugünkü gənclər sabahın
qurucularıdır. Ən başlıcası isə nəzərə
almalıyıq ki, gündən-günə mətinləşən,
qüdrətlənən milli ordumuzun əsasını gənclər
təşkil edir. İgid və mərd gənclərimizdən
formalaşmış Azərbaycanın Milli Ordusu bu gün
düşmənlərimizə layiqli müqavimət göstərməyə,
işğal altında olan torpaqlarımızı azad etməyə
qadirdir. Məhz bu baxımdan gəncliyə, yeniləşən
gənc nəslə diqqət və qayğı göstərilməsi
daim dövlətin prioritet hesab etdiyi sahələrdən olub.
Böyük tarixi şəxsiyyət
Heydər Əliyev 1969-1982-ci illərdə ölkəyə rəhbərlik
etdiyi vaxtlarda gənclərə həmişə xüsusi diqqət
və qayğı göstərmiş, onların fiziki və mənəvi
cəhətdən sağlam, hərtərəfli biliyə,
geniş dünyagörüşə malik və savadlı
olmaları üçün hər cür şərait
yaratmışdır. Azərbaycanlı gənclərin
keçmiş SSRİ-nin qabaqcıl ali məktəblərində
təhsil almaları və yenidən doğma Vətənə
qayıdıb bilik və bacarığını öz
el-obasına, Azərbaycana sərf etmələri əsas vəzifələrdən
biri idi. Təbii ki, bütün bunlar ulu öndər tərəfindən
böyük ustalıqla həyata keçirilirdi. Ölkənin
müxtəlif yerlərində çalışan gənc
mütəxəssislər respublikanı bacarıqla təmsil
edirdilər. Bu siyasətin əsas məqsədlərindən
biri də bacarıqlı, savadlı gəncləri
bütün ölkə ərazisinə səpələyərək
SSRİ-də Azərbaycan diasporunu yaratmaq idi. Gənclərimizin
harada yaşaması və işləmələrindən
asılı olmayaraq, əhalinin aşağı və orta
deyil, yüksək təbəqəsində mövqe
tutmaları üçün bütün imkanlardan istifadə
olunurdu. Belə gənclərimiz Azərbaycanın milli sərvəti
hesab olunurdu. Ölkənin başqa şəhərlərinə
təhsil almağa göndərilən gənclər özləri
ilə Azərbaycana yeni nəfəs, yeni düşüncə,
yeni bilik gətirirdilər. Onların başqa şəhərlərdə,
uzaq vilayətlərdə oxumaları, həmin regionun
mühiti, mədəniyyəti, adət-ənənələri
ilə yaxından tanış olmaları gənclərin hərtərəfli
inkişafına kömək edirdi. Bütün bunlara görə
gənclərimiz ümummilli lider Heydər Əliyevə
borcludur.
Qeyd etmək
lazımdır ki, 70-80-ci illərdə ölkənin
qabaqcıl məktəblərində təhsil almış azərbaycanlı
gənclər sonradan Azərbaycanın dövlət müstəqilliyi
bərpa edildikdə müxtəlif sahələrdə fəal
iştirak etməyə başladılar. Onlar diplomat, hərbçi,
təyyarəçi, mühəndis və başqa peşə
sahibləri kimi müstəqil Azərbaycan dövlətinə
və xalqına xidmət etdilər. Təəssüf edirik
ki, müstəqilliyimizin ilk illərində hakimiyyətdə
olan naşı, dövlət idarəçiliyində təcrübəsi
və qabiliyyəti olmayanların qətiyyətsizliyi ölkəni
uçuruma doğru aparırdı. Hakimiyyəti öz əllərində
uzun müddət qoruyub saxlamağa cəhd göstərən
belələri gənclərə yalan vədlər verərək
onları qarşıdurmaya cəlb etmiş, nəticədə
qardaşı qardaşla üz-üzə qoymuşlar. Sərhədlərimizi
qoruyan gənclərimiz ayrı-ayrı şəxsləri
qorumağa təhrik edilmiş, bunun da nəticəsində
ölkədə fərarilərin sayı sürətlə
artmışdır. AXC-Müsavat hakimiyyəti dövründə
demokratiya adı ilə gənclərimizin beynini zəhərləyən
bəzi dövlət məmurları özlərinə müdafiə
dəstələri düzəldərək, gənclərimizi
uçuruma doğru aparmışlar. Hətta bəzi “liderlər”
hakimiyyəti ələ almaq üçün gənclərimizi
Vətənə xəyanət etməyə də
alışdırırdılar. Nə qədər
acınacaqlı olsa da, ürəkağrısı ilə qeyd
edim ki, belə “liderlərin” yalan vədlərinə aldanaraq
ermənilərlə danışıqlara gedən Ruslan Bəşirli
ömrünün gənclik illərini həbsxana divarları
arasında keçirir. Halbuki, o da digər gənclər kimi
bu gün Vətən, xalq üçün nəsə
faydalı bir iş görə bilərdi. Gəncləri Vətənə
xəyanətə təhrik edənlər isə yenə də
asudə gəzir, xarici ölkələrdən
aldıqları qrantlar hesabına bahalı maşınlarda gəzir,
hər cür şəraiti olan mənzillərdə
yaşayırlar. Ümumiyyətlə, ulu öndərin Azərbaycan
xalqı, o cümlədən gəncliyi üçün
yaratdığı firavanlıqdan, asudəlikdən 1988-1993-cü
illərdə əsər-əlamət qalmamışdı.
Yalnız 1993-cü ildə ümummilli lider Heydər Əliyev
yenidən hakimiyyətə gəldikdən sonra Azərbaycanın
müstəqilliyini qorumağa və möhkəmləndirməyə
qadir olan gənc nəslin formalaşdırılması istiqamətində
ciddi tədbirlər həyata keçirildi. Bu sahənin
inkişafı üçün bir sıra fərmanlar və sərəncamlar
imzalandı, qərarlar qəbul edildi. 1994-cü il iyulun 26-da
Prezident Heydər Əliyevin fərmanı ilə respublikada gənclər
siyasətini həyata keçirmək üçün Gənclər
və İdman Nazirliyi yaradıldı. Bir qədər sonra isə
“Gənclər siyasəti haqqında” Qanun qəbul edildi. Ulu
öndərin Azərbaycan gəncliyinə böyük əhəmiyyət
verdiyini, qayğı və diqqətlə
yanaşmasının ən bariz nümunəsi 1996-cı il
fevralın 2-də Bakıda Azərbaycan gənclərinin
birinci forumunun keçirilməsi oldu. Tədbirdə ölkəmizin
rayon və şəhərlərinin gənclərinin müxtəlif
təbəqələrini təmsil edən 2 mindən çox
nümayəndə, ulu öndər Heydər Əliyev
hökumət və Milli Məclisin üzvləri iştirak
edirdilər. Forumda gənclərin problemləri diqqətlə
dinlənildi, bu problemlərin aradan qaldırılması
üçün konkret təkliflər irəli
sürüldü. Forumun böyük əhəmiyyət kəsb
etdiyini nəzərə alan Prezident Heydər Əliyev bu əhəmiyyətli
tədbirin keçirildiyi günü — 2 fevralın Gənclər
Günü kimi qeyd edilməsi üçün 1997-ci ildə
sərəncam imzaladı.
Gənclərimizin hərtərəfli
inkişafı, beynəlxalq aləmə inteqrasiyası vacib məsələlərdən
biri kimi ümummilli lider Heydər Əliyevi daim
düşündürürdü. Azərbaycanlı gənclərin
nüfuzlu beynəlxalq qurumlarda təmsil olunması ilə
ölkəmiz haqqında əsl həqiqətlərin dünya
ictimaiyyətinə çatdırılmasında böyük
rol oynayacağını çox yaxşı bilən ulu
öndərin gərgin səyi nəticəsində Azərbaycan
Avropa Şurasına daxil olmazdan əvvəl Azərbaycan gəncliyi
Avropa Şurasının Gənclər və İdman
Departamentinin tam hüquqlu üzvü olmuşdu. Bu da Azərbaycanı
dünyada tanıtmaqda gənclərimizin aparılan demokratik
islahatlarda, regional layihələrdə fəal iştirak etmələrində
böyük rol oynamışdır.
Ümummilli lider Heydər
Əliyevin Azərbaycan gəncliyinin inkişafı və beynəlxalq
aləmə inteqrasiyası bunlarla bitmir. Bu gün Azərbaycan
gəncliyinin dünya miqyasında böyük uğurlar
qazanmasında tarixi şəxsiyyətin əməyi hər
addımda duyulur. Ulu öndərin siyasi kursunu layiqincə davam
etdirən möhtərəm Prezidentimiz İlham Əliyevin
düşünülmüş daxili və xarici siyasəti
sayəsində Azərbaycan gənclərinin həyatında əsaslı
dönüş yarandı. İlk növbədə, gənclərin
sağlam və fiziki cəhətdən qüvvətli
yetişmələri məsələsi gündəmə gəldi.
Dövlət başçımızın yüksək
qayğısı nəticəsində Azərbaycan
idmançılarının xoş sədaları Avropa,
dünya və Olimpiya turnirlərindən eşidildi. Azərbaycan
Prezidenti gənc idmançıları ruhlandırmaq
üçün onların iştirak etdikləri beynəlxalq
yarışları çox vaxt tribunalardan izləyir. Bu mənəvi
dayaq idmançıları daha əzmkarlığa sövq
edir. Məhz bunun nəticəsidir ki, son illər gənclərimiz
mötəbər yarışlardan doğma Vətənə
medallarla dönürlər. Vətənə döndükdən
sonra isə dövlət başçısı onları qəbul
edir, yüksək mükafatlarla təltifləndirir.
Gənclərin
işsizlik problemi də ciddi narahatçılıq doğuran
məsələlərdən biri idi. Artıq bu problem də
aradan qaldırılmaq üzrədir. Son altı ildə Azərbaycanda
840 mindən çox yeni iş yerinin açılması gənclərin
məşğulluq probleminin aradan qaldırılmasında
böyük rol oynamışdır. Dövlət
başçımızın gəncliyə yüksək diqqət
və qayğısının nəticəsidir ki, bu gün Azərbaycan
gəncləri beynəlxalq aləmdə yüksək fəallıq
nümayiş etdirirlər. Gənc azərbaycanlıların
Rusiyada və digər ölkələrdə bir çox
klublar təşkil etməsi dediklərimi təsdiqləyən
faktlardır. Belə klublarda gənclərin təşkil
etdikləri tədbirlər Azərbaycan reallıqlarını
dünya ictimaiyyətinə olduğu kimi çatdırır.
Məsələn, Rusiyanın Azərbaycanlı Gənclər
Təşkilatı (RAGT) Rusiyanın müxtəlif guşələrində
yaşayan, işləyən, təhsil alan, tarixi Vətəni
ilə sıx əlaqə saxlamağa çalışan gənc
azərbaycanlıları bir yerə topladı. Bu gənclər
təşkilatının təşəbbüsü ilə
Rusiyanın gənclər təşkilatlarının nümayəndələri
Azərbaycana gəlir, burada yaşıdları ilə
görüşür, təcrübə mübadiləsi
aparır, mövcud problemləri müzakirə edir, yeni dostlar
tapır və Azərbaycanın zəngin mədəniyyəti
ilə tanış olurlar.
Bu günlərdə
Uqandanın paytaxtı Kampala şəhərində
keçirilən İslam Konfransı Təşkilatına
üzv dövlətlərin Parlament İttifaqının VI
sessiyasında Azərbaycan üçün çox
mühüm hadisə baş vermişdir. Bu xoş hadisənin
baş verməsində gənclərimizin böyük rolu
olmuşdur. Belə ki, əlli bir ölkənin parlament heyətləri
başçılarının iştirak etdiyi tədbirdə
İslam Konfransı Gənclər Forumunun təşəbbüsü
ilə “İKGF ilə İKT arasında əməkdaşlıq
haqqında” qətnamə qəbul edilmişdir. İslam
Konfransı Gənclər Forumunun mədəniyyətlərarası
dialoq üzrə baş əlaqələndiricisi Leyla xanım
Əliyevanın təşəbbüsü ilə həyata
keçirilən “Xocalıya ədalət” beynəlxalq
kampaniyası çərçivəsində irəli
sürülən qətnamədə Xocalı faciəsinə
“Erməni silahlı qüvvələri tərəfindən dinc
əhalinin kütləvi qətliamı” və
“İnsanlığa qarşı cinayət” kimi qiymət
verilmişdir. Bu, gənclərimizin beynəlxalq aləmdə
yüksək fəallığından xəbər verir.
Gənclik çox
böyük qüvvədir. Dövlətimizin
başçısının bu qüvvəni düzgün
yola istiqamətləndirməsi, gəncliyə xüsusi diqqət
və qayğı göstərməsi ölkəmizin sürətli
inkişafına böyük təsir göstərir.
Unutmamalıyıq ki, Azərbaycan gəncliyi Azərbaycanın
gələcəyidir.
Əliqismət BƏDƏLOV
Xalq qəzeti.- 2010.- 4 fevral.- S. 3.