Mədəniyyətşünaslıq üzrə Elmi-Metodik Mərkəzin fəaliyyəti genişlənir
Son illər ölkəmizdə maddi-mənəvi dəyərlərimizin
qorunmasına, tədqiqinə diqqət xeyli
artırılmışdır. Azərbaycan Respublikası Mədəniyyət
və Turizm Nazirliyinin və onun struktur bölmələrinin həyata
keçirliyi davamlı tədbirlər milli mədəniyyətimizin
inkişafında əhəmiyyətli rol oynayır. Bu gün
Azərbaycan mədəniyyəti dünyaya sürətlə
inteqrasiya olunur. Möhtərəm Prezidentimiz İlham Əliyevin
mədəniyyətin müxtəlif sahələrinin
inkişafı ilə bağlı imzaladığı fərman
və sərəncamlar, bu sahədə qəbul olunan dövlət
proqramları mədəniyyətimizin gələcək
inkişafına güclü stimul verir.
Söz yox ki, mədəniyyətin
elmi nəzəri əsaslarının yaradılması,
metodiki bazanın möhkəmləndirilməsi də bu sahənin
inkişafına güclü təsir edən amillərdəndir.
Bu mənada Mədəniyyət Nazirliyinin Mədəniyyətşünaslıq
üzrə Elmi-Metodiki Mərkəzinin fəaliyyəti
mühüm əhəmiyyət kəsb edir. Mərkəz
yarandığı vaxtdan mədəniyyətşünaslıq
məsələlərinin öyrənilməsi, mədəniyyət
müəssisələrinə metodiki yardımların təşkili
istiqamətində məqsədyönlü iş aparır.
Ötən il isə mərkəzin
fəaliyyətində əhəmiyyətli dövr olmaqla
burada bir sıra mühüm tədbirlərin keçirilməsi
ilə yadda qaldı.
Bütövlükdə
mədəniyyyətimiz üçün uğurlu nailiyyətlər
dövrü olan 2009-cu ildə mərkəzin fəaliyyətinin
əsas istiqaməti milli mənəvi dəyərlərimizin
qorunub saxlanması, gələcək nəsillərə
çatdırılması yollarının
araşdırılması ilə bağlı olmuşdur. Nazirliyin
elə bir tədbiri olmur ki, mərkəzin bu tədbirin təşkilində
müəyyən rolu və köməyi olmasın.
Burada hazırlanan elmi-tədqiqat
işləri mədəniyyətşünaslığın
mühüm problemləri ilə bağlıdır. Mövzular
müxtəlif və rəngarəngdir. Onlardan bir neçəsini
xatırlatmaq istərdim. “XX əsr Azərbaycan bədii mədəniyyətinin
inkişaf xüsusiyyətləri”, “Tarixi abidələrin və
memarlıq nümunələrinin funksiyası”, “Azərbaycan
kinosunda simvolik milli qəhrəman obrazı”, “1960-2000-ci illərdə
Azərbaycan teatrşünaslıq elminin inkişafı
problemləri”, “Azərbaycan mədəni irsinin
inkişafında orta əsrlərdə
yaşayıb-yaratmış sənətkarların rolu”,
“Müstəqillik dövründə mədəni irsin tədqiqi
məsələləri” və s. Tədqiqini həyata
keçirdiyimiz mövzular çoxdur və bu gün də
elmi-tədqiqat işlərini uğurla davam etdiririk.
Metodiki tövsiyələr
hazırlanması istiqamətində mərkəzdə ciddi
iş aparılır. Uşaq müəssisələrində
musiqinin tədrisi metodikası, təsviri sənətdə mənzərə
janrının metodiki məsələləri, xalq
teatrlarında repertuar seçimi, ekspozisiya işində elmi və
estetik tələblər və s. məsələlərlə
bağlı mövzularda tövsiyələr
hazırlanmış və mədəniyyət müəssisələrinə
göndərilmişdir.
Mərkəzin teatr
bölməsinin müdiri Z.Axundova Qafqaz Universiteti dram dərnəyi
üzvlərinin iştirakı ilə görkəmli Azərbaycan
dramaturqu, xalq yazıçısı İlyas Əfəndiyevin
“Xurşidbanu Natəvan” pyesini tamaşaya
hazırlamışdır. Belə qarşılıqlı əməkdaşlıq
istedadların üzə çıxarılmasına, gənclərin
sənətə marağının artırılmasına
müsbət təsir göstərir.
Ölkədə teatr sənətinə
olan marağı daha da artırmaq məqsədilə bir
sıra tədbirlər keçirmişik. Mərkəzin əməkdaşları
ötən ilin iyul ayından başlayaraq xüsusi
“Teatr...Teatr..Teatr!” adlı sorğu keçirmişlər.
Kollektivimiz “Bakı
İslam Mədəniyyətinin Paytaxtı—2009” layihəsi
çərçivəsində keçirilən tədbirlərin
hazırlanmasında yaxından iştirak etmişdir. Bu tədbirlər
planına uyğun olaraq “Tarix-diyarşünaslıq muzeylərində
islami dəyərlərin təbliği” və “Muzeydə
ekspozisiya işi” mövzularında seminar keçirdik. Bu
seminarda Mədəniyyət və Turizm Nazirliyindən, Qafqaz
Müsəlmanları İdarəsindən, Milli Azərbaycan
Tarixi Muzeyindən, Azərbaycan Milli Konservatoriyasından
nümayəndələr iştirak etmişlər.
Bundan başqa, mərkəzin
əməkdaşları “Həvəskar rəssam və xalq tətbiqi
sənəti ustalarının əsərlərində
İslami dəyərlər” mövzusunda respublikamızın
şəhər və rayonlarında zona sərgiləri təşkil
etmiş və yekun olaraq Muzey Mərkəzində bütün
bölgələrin sənət nümunələrini əks
etdirən geniş səpkili sərgi keçirilmişdir.
Azərbaycan Prezidenti cənab
İlham Əliyevin “Azərbaycan Etnoqrafiya Muzeyinin
yaradılması haqqında” sərəncamına uyğun
olaraq yaradılan Etnoqrafiya Muzeyinin mövzu ekspozisiya planı
da bizim əməkdaşlar tərəfindən
hazırlanmışdır.
Bununla yanaşı,
ötən il əməkdaşlarımız incəsənət
məktəbləri üçün bir sıra fənlər
üzrə tədris proqramları tərtib etmişlər.
Bizim mərkəzdə
musiqi fənləri üzrə hazırlanan dərsliklər və
dərs vəsaitləri müzakirə olunur və onlara rəy
verilir. Məsələn, Azər Dadaşovun “Fortepiano əsərləri”,
“Xor sinfi üçün tədris vəsaiti” dərslik və
dərs vəsaiti belə nəşrlərdəndir.
Mədəniyyətimizin
müxtəlif aktual problemlərini əhatə edən
mövzular üzrə seminarlar təşkil edirik ki, burada da
mütəxəssislər öz fikirlərini bildirir,
müzakirələr aparırıq.
Ötən il həmçinin
respublika uşaq musiqi və incəsənət məktəblərinin
“Salnamə”sini hazırlayıb Təhsil Nazirliyinə təqdim
etmişik.
Bu gün Mədəniyyətşünaslıq
üzrə Elmi-Metodik Mərkəzdə milli mədəniyyətimizin
müxtəlif sahələri üzrə aktual mövzularda tədqiqatlar
aparılır, mədəniyyət müəssisələrinin
normal işinin təşkili üçün onlara metodiki
yardımlar göstərilir.
Vilayət İSMAYILOV,
Mədəniyyətşünaslıq üzrə
Elmi-Metodiki Mərkəzin direktoru
Xalq qəzeti.- 2010.- 9 fevral.- S. 7.