Azərbaycan maliyyə-iqtisadi böhran ilində də
sürətli inkişaf dinamikasını davam etdirdi
Azərbaycan Prezidenti İlham Əliyevin sədrliyi ilə
keçirilmiş Nazirlər Kabinetinin 2009-cu ilin sosial-iqtisadi
inkişafının yekunlarına həsr olunmuş
iclasında bütün sahələr üzrə görülən
işlər geniş təhlil olunmuş və Azərbaycanın
dünya miqyasında ən sürətlə inkişaf edən
ölkələr sırasında olması xüsusi qeyd
edilmişdir. İqtisadi inkişaf sahəsində görülən
işlər yüksək qiymətləndirilmiş, ölkəmizin
dünya iqtisadiyyatına çox uğurla inteqrasiya etdiyi diqqətə
çatdırılmışdır. Qazanılan bu nailiyyətlər,
əlbəttə ki, iqtisadi strategiyanın düzgün müəyyənləşdirilməsinin
nəticəsidir.
Ötən ilin
yekunlarının təhlili göstərdi ki, Azərbaycan
sürətli inkişaf dinamikasını qoruyub
saxlamışdır. Baxmayaraq ki, 2009-cu ildə maliyyə və
iqtisadi böhran dünyanı ciddi narahat etmiş, bir çox
iri şirkətlər iflasa uğramışdır. 2008-ci ildə
başlanan maliyyə və iqtisadi böhran 2009-cu ildə
dünya iqtisadiyyatını bürüyərək öz
acı fəsadlarını göstərmişdir. Əksər
inkişaf etmiş ölkələrdə ticarət, maliyyə
və investisiya axınlarına ciddi zərbə vurmuş, kəskin
iqtisadi tənəzzül yaratmışdır. Böhran digər
sahələrdə olduğu kimi investisiya qoyuluşları və
kreditlərin cəlb edilməsi imkanlarına, həmçinin
milli valyutaların məzənnələrinə də mənfi
təsir etmişdi. Bunun da nəticəsində yüksək
inflyasiya qeydə alınmışdır. Bir sıra ölkələrdə
iqtisadi vəziyyətin pisləşməsi ümumi daxili məhsulun
həcminin azalmasına gətirib
çıxarmışdır.
Azərbaycanda
aparılan məqsədyönlü dövlət siyasəti nəticəsində
maliyyə və iqtisadi böhran ölkə iqtisadiyyatına
minimum təsir göstərmişdir. Lakin bu, nəzərdə
tutulan sosial proqramların həyata keçirilməsinin
qarşısını ala bilməmişdir. Möhtərəm
Prezidentimizin tapşırıqları və tövsiyələri
əsasında həyata keçirilən
düşünülmüş, qətiyyətli və
çevik siyasət tədbirləri hesabına ölkəmiz
böhranın fəsadlarının qarşısını
almışdır. 2009-cu ildə həyata keçirilməsi
nəzərdə tutulmuş bütün sosial tədbirlər
və proqramlar icra olunmuş, qarşıya qoyulmuş vəzifələr
öz həllini tapmışdır.
Azərbaycan
iqtisadiyyatının sürətli inkişaf dinamikası
böhran ilində də davam etmiş, ümumi daxili məhsul
istehsalının həcmi 9,3 faiz artmışdır. Bu fakt
bir daha təsdiqlədi ki, düşünülmüş
iqtisadi strategiya Azərbaycanı tarixin çətin
sınağından uğurla çıxarmışdır. Təbii
ki, belə ağır sınaqdan alnıaçıq,
üzüağ çıxmağımızın səbəbi
möhtərəm Prezidentimiz İlham Əliyevin rəhbərliyi
ilə ölkədə yaradılmış maliyyə-iqtisadi
potensial, aparılan uğurlu islahatlar və digər sahələrdə
qarşıya qoyulmuş vəzifələrin müvəffəqiyyətli
icrası olmuşdur. Sevindirici haldır ki, ötən il
ölkəmizin valyuta ehtiyatları da artmışdır. Bu
fakt da gələcəyə ümidlə baxmağa, dövlət
başçımıza güvənməyə rəvac
yaradır. Çünki böhran ilində valyuta
ehtiyatlarının artması nadir hadisədir. Hazırda
ölkəmizin valyuta ehtiyatları 20,4 milyon dollar təşkil
edir. Bu da sabaha ümidlə baxmağa zəmin yaradır və
gələcəkdə həyat səviyyəsinin daha da
yüksəlməsi deməkdir. Hər hansı bir dövlətin
valyuta ehtiyatlarının çox olması, həmin ölkənin
makroiqtisadi sabitliyinin qorunması, həmçinin nəzərdə
tutulan bütün sosial proqramların, iri infrastruktur layihələrin
vaxtında icra olunması deməkdir.
Ötən il
regionların sosial-iqtisadi inkişafı Dövlət
Proqramının qarşıya qoyduğu vəzifələrin
uğurla icrası da maliyyə-iqtisadi böhranın
qarşısının alınmasına müsbət təsir
etmişdir. Digər ölkələrdə işsizlik problemi
yarandığı halda, Azərbaycanda 74 min yeni iş yeri
açılmışdır. Artıq Azərbaycan beynəlxalq
aləmdə iri infrastruktur layihələrin reallaşdırılmasında
təcrübəsi olan dövlət kimi tanınıb. Bu da
ölkədə investisiya qoyuluşunu daha da gücləndirib.
Bununla yanaşı, işsizlik probleminin aradan
qaldırılmasına çox güclü təsir edib. Diqqət
yetirin, 5-6 il əvvəl gənclərimizin böyük bir
hissəsi xarici ölkələrdə iş
axtarırdılar. Bir neçə ildir ki, bu vəziyyət
kökündən dəyişib. İndi həmin gənclərin
demək olar ki, hamısı öz doğma el-obalarına
qayıdıb. Özü də işləmək
üçün mərkəzə – Bakıya yox,
yaşadıqları ərazilərə üz tutublar.
Çünki bu gün regionlarda beynəlxalq standartlara cavab
verən, ən müasir avadanlıqlarla təchiz olunmuş, səliqəli
və yüksək məvacib verən sənaye və istehsal
müəssisələri yaradılmışdır. Bu da
insanların yaşayış səviyyəsinin daha da
yaxşılaşdırılmasına əlverişli şərait
yaratmışdır. Böhrana baxmayaraq, 2009-cu ildə ölkəmizdə
adambaşına düşən ümumi daxili məhsul
istehsalı 7,9 faiz artaraq 3917 manata və yaxud 4874 ABŞ
dollarına, orta aylıq əmək haqqı isə 6,8 faiz
artaraq 298 manata çatmışdır. Bir faktı da qeyd edim
ki, ötən müddət ərzində manatın dəyəri
də sabit qalmış, inflyasiya 1,5 faiz təşkil
etmişdir. Sosialyönümlü sahələrdə də irəliləyiş
diqqəti cəlb edir. Məsələn, 2008-ci illə
müqayisədə 2009-cu ildə dövlət büdcəsinin
cari xərclərində sosialyönümlü tədbirlər
üzrə xərclərin tərkib hissəsi olan
sosial-müdafiə və sosial-təminat xərcləri 24,6
faiz, təhsil xərcləri 17,2 faiz, səhiyyə xərcləri
16,2 faiz, mədəniyyət, incəsənət, informasiya, bədən
tərbiyəsi xərcləri 12,9 faiz artmışdır.
Dünya maliyyə
böhranı bank sisteminə də öz mənfi təsirini
göstərdi. Böhran nəticəsində bank sistemi bir
sıra xarici risklərə məruz qaldı. Böhranın mənfi
təzahürləri maliyyə sabitliyinin ciddi pozuntularına gətirib
çıxara bilərdi. Bunun qarşısının
vaxtında alınması üçün br sıra
qabaqlayıcı tədbirlər görüldü. Belə tədbirlərin
biri bankların xarici borclarının məhdudlaşdırılması
oldu. Bir çox ölkələr bunu vaxtında edə bilmədiklərindən
böhranın acı fəsadları ilə üzləşməli
oldular. Azərbaycan isə nadir ölkələrdən biri
oldu ki, maliyyə və iqtisadi böhranın ən
ağır dövründə öz beynəlxalq kredit
reytinqini yaxşılaşdırdı. Böhran ilinin nəticələrinə
görə, bir çox qüdrətli dövlətlər
gerilədi. Azərbaycanda isə vəziyyət
yaxşılaşdı. Bunu faktlara istinadən göstərmək
istərdim. Son üç ildə ölkəmiz
adambaşına düşən milli məhsulun həcminə
görə öz vəziyyətini dünya üzrə 32 pillə
yaxşılaşdırmışdır. Bu, çox sürətli
iqtisadi inkişaf deməkdir. Belə faktlardan çox sadalamaq
olar. Statistik rəqəmlərə nəzər yetirdikdə
bir daha aydın oldu ki, Azərbaycan digər ölkələrlə
müqayisədə xeyli inkişaf edib. Məsələn,
ölkəmiz MDB məkanında ən sürətlə
inkişaf edənlər cərgəsindədir. Bir sıra
ölkələrdə iqtisadi və sənaye
istehsalının tənəzzülü hökm
sürdüyü halda, Azərbaycanda artım qeydə
alınıb. Bunu dünyanın tanınmış
qurumları da təsdiqləyirlər. Fakt üçün qeyd
edim ki, Dünya İqtisadi Forumu dünyanın ən mötəbər
beynəlxalq təşkilatlarından biridir. Bu təşkilat
ötən il Azərbaycanı rəqabət qabiliyyətliliyinə
görə 51-ci yerə layiq gördü. Əlbəttə,
bu, çox yüksək yerdir. Çünki 51-ci yer MDB məkanında
birinci yer deməkdir. Bu, o deməkdir ki, Azərbaycanın
iqtisadiyyatı MDB məkanında ən rəqabət qabiliyyətlidir.
Bəzilərinin fikrincə,
Azərbaycanın iqtisadi qüdrətinin artması neft amilindən
asılıdır. Azərbaycana qoyulan investisiyalar əsasən
enerji sahəsini əhatə edir. Lakin hadisələrin
gedişi göstərdi ki, bu, yanlış fikirdir. Azərbaycanın
iqtisadiyyatının getdikcə qüdrətlənməsində
qeyri-neft sektoru da böyük rol oynayır. Artıq digər
sahələrə də investisiyalar qoyulur. Dövlətimizin
başçısı öz nitqində də bu məsələyə
diqqəti cəlb edərək dedi: “Biz neft-qaz, enerji sahəsində
uğurlu investisiya siyasətimizi aparmaqla bütün başqa
sahələrə də investisiyaların cəlb olunmasına
nail olduq. Bu gün mən bu rəqəmləri səsləndirdim,
keçən il 9 milyard dollardan çox investisiya qoyulmuşdur.
Bu il, hesab edirəm ki, investisiya qoyuluşu davam etdiriləcəkdir.
Bu gün Azərbaycan ilə iş görmək, investisiya
qoymaq, yaxud da ki, podratçı kimi işləmək istəyən
şirkətlərin sayı artır. Bizim tərəfdaşlarımız
dünyanın aparıcı şirkətləridir.
Bütün bu amillər ölkəmizin bundan sonra da
uzunmüddətli, dayanıqlı inkişafını təmin
edəcək, enerji amilindən
asılılığımızı azaldacaqdır. Artıq
biz bunu görürük və ölkəmiz, əlbəttə
ki, bundan sonra da inkişaf edəcək.”
Qlobal maliyyə
böhranı tüğyan etsə də, bütövlükdə
2009-cu ilin nəticələrinə görə, Azərbaycan
adambaşına düşən ümumi daxili məhsulun həcmi
üzrə haqlı olaraq orta gəlirli ölkələr
qrupuna daxil olubdur. Böhran ilinin nəticələrinə nəzər
saldıqda bir çox dövlətlərin gerilədiyinin, Azərbaycanın
isə vəziyyətinin daha da
yaxşılaşdığının şahidi olduq.
Son illər
iqtisadiyyatın sürətli inkişaf tempi davam
etdirilmişdir. Bir faktı qeyd etməyi zəruri hesab edirəm.
Son 3 ildə Azərbaycan adambaşına düşən milli
məhsulun həcminə görə öz vəziyyətini
dünya üzrə 32 pillə yaxşılaşdırmışdır.
Bu, ölkəmizin sürətli iqtisadi inkişafını təsdiqləyən
tutarlı faktdır.
2010-cu ildə daha
mühüm işlərin həyata keçirilməsi
qarşıya prioritet vəzifə kimi qoyulub. Artıq Azərbaycan
iqtisadiyyatı öz keçid dövrünü başa vurdu.
Bir qədər əvvəl dövlətimizin
başçısı da keçid dövrünün başa
çatdığını diqqətə
çatdırdı. Azərbaycan tam şəkildə bazar
iqtisadiyyatına keçib. Bu, bizi sevindirməlidir.
Çünki ölkə iqtisadiyyatı sürətli
inkişaf yolunu davam etdirəcək. Hər şeydən əvvəl
ona görə ki, bizim iqtisadiyyatımız liberal, müstəqil,
dayanıqlı, öz resurslarına, potensialına güvənən,
dünya birliyinə sürətlə inteqrasiya edən
iqtisadiyyatdır. Qarşıda daha bir neçə infrastruktur
layihələrin reallaşdırılması durur.
Regionların iqtisadi
inkişafına dair ikinci Dövlət Proqramının
icrasına başlanılması, qeyri-neft sektorunun
inkişafı dünya standartlarına
uyğunlaşdırılmış yeni müəssisələrin
yaradılmasına təkan verəcək. Bu da əhalinin məşğulluğunun
artırılmasına və yoxsulluq səviyyəsinin
azaldılmasına öz müsbət təsirini göstərəcək.
Bütün bunlar deməyə əsas verir ki, qədəm
qoyduğumuz yeni ildə hər hansı böhran
inkişafımızın sürət tempini aşağı
sala bilməyəcək. Bu il də xalqın rifah halı,
ölkə iqtisadiyyatının inkişafı möhtərəm
Prezidentimizin müəyyənləşdirdiyi strateji xəttə
uyğun olaraq yaxşılaşdırılacaq, dünya
iqtisadiyyatına daha dərindən inteqrasiya edəcəyik.
İsgəndərov Nizami.
Xalq qəzeti.- 2010.- 12 fevral.- S. 6.