Yasamal rayonu üçün dinamik inkişaf ili

Rayon İcra Hakimiyyətində keçirilən yığıncaqda ötən ilin sosial-iqtisadi inkişafının yekunları və qarşıda duran vəzifələr müzakirə olunmuşdur. Yığıncaqda geniş məruzə ilə çıxış edən rayon icra hakimiyyətinin başçısı İbrahim Mehdiyev 2009-cu ilin respublikamız üçün kifayət qədər uğurlu və nailiyyətlərlə zəngin olduğunu diqqətə çatdırdı. Ümumi daxili məhsulu 9,3 faiz artan Azərbaycan ötən ili ən sürətlə inkişaf edən ölkələr sırasında başa vurmuşdur. Qazanılan bu böyük qələbə son illər ərzində möhtərəm Prezidentimizin düşünülmüş siyasəti və iqtisadiyyatımızın inkişafı istiqamətində atılan praktiki addımlar nəticəsində mümkün olmuşdur.

İ. Mehdiyev qeyd etdi ki, Azərbaycan Prezidenti cənab İlham Əliyevin 14 mart 2009-cu il tarixli fərmanı ilə təsdiq etdiyi “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın qarşıya qoyduğu vəzifələrin icrası istiqamətində ölkəmizin iqtisadiyyatında müşahidə olunan davamlı inkişaf tempi Bakının mərkəzi rayonlarından olan Yasamalda da qeydə alınmışdır. Ötən ilin yekunları Yasamal rayonu üçün qənaətbəxş hesab edilmişdir. Belə ki, hesabat dövründə rayonda 75749,3 min manatlıq sənaye məhsulu istehsal edilmişdir. Əhaliyə göstərilən pullu xidmət 447857,5 min manat və ya 121,9 faiz təşkil etmişdir. Rayon üzrə orta aylıq əmək haqqı 366,6 manat və ya əvvəlki illə müqayisədə 118,5 faiz olmuşdur. Əsas kapitala yönəldilən investisiyaların həcmi 438503,6 min manat, bundan tikinti-quraşdırma işlərinə 329186,8 min manat, öz gücləri ilə yerinə yetirilən podrat işlərin həcmi 315323 min manat, nəqliyyat sektorunda xidmətlərin həcmi 1741180,4 min manat, rabitə xidmətlərinin həcmi isə 192692,5 min manat təşkil etmişdir.

Yeni iş yerlərinin açılmasının daim diqqət mərkəzində saxlanıldığını vurğulayan İ. Mehdiyev bildirdi ki, hesabat dövründə 2199 yeni iş yeri açılmışdır. Bunlardan 157-si mövcud müəssisələrdə, 194-ü yeni yaradılmış müəssisələrdə, 1848-i isə fiziki şəxs olmuşdur. Ümumilikdə son 6 ildə rayonda 18 min 701 yeni iş yeri açılmışdır. Başçı qeyd etdi ki, rayonda abadlıq və yaşıllaşdırma işləri zəruri məsələ kimi daim diqqət mərkəzində saxlanılır. Rayon sakinlərinin sosial-məişət problemlərinin həlli, onların asudə vaxtlarının və mənalı istirahətlərinin təşkili ilə əlaqədar bir sıra əhəmiyyətli tədbirlər həyata keçirilmişdir. Bu məqsədlə park və bağlar yenidən qurulmuş, 18 yaşayış binasının həyətində müasir standartlara cavab verən süni ot örtüklü mini futbol meydançası tikilib sakinlərin istifadəsinə verilmişdir.

Rayonun görünüşünə mənfi təsir edən qanunsuz tikililərin sökülməsi, onların yerində əhali üçün vacib olan obyektlərin tikilməsi qərara alınmışdır. Bu məqsədlə ötən dövr ərzində 84 ədəd müxtəlif təyinatlı qanunsuz tikili sökülmüş, 30-dan çox ünvanda və rayon ərazisində yerləşən metro stansiyalarının çıxışlarında qanunsuz küçə ticarəti ləğv edilmişdir. Əvəzində rayon əhalisinə bazar qiymətindən ucuz kənd təsərrüfatı məhsullarının satışı təşkil olunmuşdur.

Vətəndaşların müraciətlərinə baxılması, onların qəbul edilməsi, qarşılaşdıqları problemlərin aradan qaldırılması prioritet məsələlərdən biri olmuşdur. Möhtərəm Prezidentimizin bu sahədəki tələblərini və tövsiyələrini əldə rəhbər tutan rayon icra hakimiyyətində hər bir sakinin müraciətinə diqqətlə yanaşılmış və problemlərin aradan qaldırılması üçün konkret tədbirlər görülmüşdür. Əhalinin müraciətlərinə daha həssaslıqla yanaşmaq üçün Prezident Administrasiyasının tövsiyəsinə uyğun olaraq əvvəlcədən hazırlanmış xüsusi qrafik əsasında rayonun ayrı-ayrı mənzil istismar sahələri üzrə yaşayış məhəllələrində vətəndaşların səyyar qəbulları keçirilmişdir. 2009-cu il ərzində 35 səyyar qəbul keçirilmişdir. Qəbullarda 4700 nəfər iştirak etmiş və onları narahat edən 299-dan çox sosial məişət problemləri qaldırılmışdır. Vətəndaşlar tərəfindən edilən müraciətlərin əksəriyyəti yaşayış binalarının ümumi giriş sahələrinin və dam örtüklərinin təmiri, yolların, səkilərin, həyətlərin asfaltlanması və abadlaşdırılması, kommunal xidmət sahələri, mənzil məsələləri, vətəndaşların hüquqlarının müdafiəsi, ictimai asayişin qorunması, narkotik vasitələrin yayılmasına və narkomanlığa qarşı mübarizə tədbirlərinin görülməsi barədə olmuşdur. Əhalini narahat edən bu problemlərin aradan qaldırılması istiqamətində operativ tədbirlər həyata keçirilmiş, rayonun daxili imkanları hesabına həmin məsələlər müsbət həll edilmişdir.

Sakinlərlə aparılan söhbətlər, onların qarşılaşdıqları problemlərin operativ həlli əhalinin rayonun ictimai-siyasi həyatında fəallığını xeyli artırmışdır. İ. Mehdiyev yığıncaq iştirakçılarının diqqətinə çatdırdı ki, ötən il keçirilən ümumxalq səsverməsində (referendumda) və bələdiyyə seçkilərində bu, özünü daha açıq şəkildə büruzə verdi. Qeyd olundu ki, 2009-cu il mart ayının 18-də “Azərbaycan Respublikasının Konstitusyasına bəzi əlavələr və dəyişikliklər edilməsi haqqında ümumxalq səsverməsi (referendum), aprel ayının 13-dən 22-dək əhalinin siyahıya alınması və 23 dekabrda bələdiyyələrə seçkilərin keçirilməsi hesabat dövrünün ən mühüm ictimai-siyasi hadisələrindən olmuşdur. Əhali bu əlamətdar tədbirlərdə böyük fəallıq göstərmiş və qarşıya qoyulan vəzifələrin layiqincə həyata keçirilməsinə nail olunmuşdur.

Natiq dedi ki, 2010-cu ilin “Ekologiya ili” elan edilməsi ilə əlaqədar olaraq Bakı və Abşeronun ekoloji vəziyyətinin yaxşılaşdırılması məqsədilə 3 milyon ağacın əkilməsi təşəbbüsünə qoşulan yasamallılar 10 min ədəddən çox ağacın əkilməsini qərara almışlar. Verilən vədin layiqincə yerinə yetirilməsi üçün hər həftənin şənbə günü ağac əkini ilə bağlı iməciliklər keçirilir.

Rayon sakinlərinə verilmiş təbii qazın və elektrik enerjisinin dəyərinin toplanılmasında müsbət dinamikaya nail olunduğunu diqqətə çatdıran İ. Mehdiyev bildirdi ki, dövlət başçısının 29 dekabr 2009-cu il tarixli fərmanı ilə əhalinin təbii qazdan istifadəsi üçün 1 oktyabr 2009-cu ilə qədər olan borclarının silinməsi Yasamal rayonunda da böyük rəğbətlə qarşılandı. Möhtərəm Prezidentimizin insanlara göstərdiyi bu yüksək diqqət və qayğı xalqın ona olan inamını daha da artırdı.

Rayon ərazisində Həsən bəy Zərdabi və Müzəffər Həsənov küçələrinin kəsişməsində ümumi ərazisi 1500 kvadrat metr olan sahədə “20 Yanvar” şəhidlərinin xatirəsinə ucaldılmış abidə-kompleksin açılışında möhtərəm Prezidentimiz cənab İlham Əliyev və Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın iştirak etmələri rayon icra hakimiyyətinin gördüyü işə verilən yüksək qiymətdir.

Çıxış edənlər ötən ilin yekunlarının rayonun inkişafından xəbər verdiyini dedilər.

Prezident Administrasiyasının regional idarəetmə və yerli özünüidarəetmə orqanları ilə iş şöbəsinin baş məsləhətçisi Tağı Tağıyev yığıncaqda iştirak etmiş və rayon sakinlərinə gələcək işlərində uğurlar arzulamışdır.

Əliqismət BƏDƏLOV

Xalq qəzeti.- 2010.- 14 fevral.- S. 5.