Qax: yeni uğurların təməli qoyulmuşdur

Artıq 2009-cu ili çoxdan yola salmışıq. Yeni — 2010-cu ilin isə ay yarıma yaxın hissəsi arxada qalmışdır. Bu günlər hər bir kollektiv, rayon rəhbərliyi yola saldığı ildə gördüyü işlərə nəzər salır, növbəti ildə əldə edilən uğurları davam etdirmək, buraxılmış nöqsanları aradan qaldırmaq üçün həyata keçirilməsi vacib tədbirləri planlaşdırır.

2009-cu il bütövlükdə respublikamızda tikinti-quruculuq dövrü kimi yaddaşlara həkk olunmuşdur. Ulu Öndərimiz Heydər Əliyevin siyasi kursunu uğurla davam etdirən Prezident İlham Əliyevin rəhbərliyi ilə həyata keçirilən genişmiqyaslı tədbirlər nəticəsində dinamik inkişaf yoluna qədəm qoymuş Azərbaycanın bütün bölgələrində dünyanın aparıcı dövlətlərinin belə əziyyət çəkdyi iqtisadi böhranın tüğyan etdiyi 2009-cu ildə böyük quruculuq işləri davam etdirilmişdir. Əldə edilmiş göstəricilər dövlətimizin gündən - günə artan qüdrətindən xəbər verir.

Respublikamızın digər bölgələrində olduğu kimi Qaxda da tikinti-quruculuq, abadlıq işləri genişlənməkdədir. Hazırda Qax tikinti-quruculuq işlərinin səviyyəsinə, səliqə-səhmanına, həyata keçirilən sosialyönümlü tədbirlərin miqyasına görə özünün inkişaf mərhələsini yaşayır. Bütün bunlar və rayonun sosial-iqtisadi inkişafının perspektivləri ilə bağlı digər məsələlərlə əlaqədar fevralın 12-də rayon ictimaiyyəti nümayəndələrinin iştirakı ilə keçirilən hesabat yığıncağında ətraflı danışıldı.

Rayon icra hakimiyyətinin başçısı Telman Quliyev 2009-cu ildə Qaxın sosial-iqtisadi və təsərrüfat sahələrində görülən işlərə dair hesabat məruzəsində ötən il görülən işlərdən daha çox buraxılmış nöqsanların aradan qaldırılması və əldə edilmiş uğurların möhkəmləndirilməsi üçün həyata keçirilən tədbirlərdən söz açdı. Qeyd etdi ki, 2009-cu ildə rayonda tikinti-quruculuq işlərinə ayrılmış vəsaitin kəsirlə xərcləndiyini nəzərə alaraq RİH 2010-cu ildə tikinti-quruculuq işlərininin genişləndirilməsi üçün müvafiq hazırlıq işləri görmüş, möhkəm zəmin yaradılmışdır. Cari ildə tikintisi yarımçıq qalmış obyektlərdə inşaat işlərinin sürəti artırılmaqla bərabər yeni sosial və inzibati xarakterli obyektlərin təməli qoyulmaqdadır. Belə ki 2010-cu ilin ilk günlərində Rayon Mərkəzi Xəstəxanasında təmir, yenidənqurma işləri yekunlaşdırılaraq istifadəyə verilmiş, şəhərdə qəza vəziyyətində olan 5 mənzil kommunal yaşayış binası, Əlibəyli küçəsində sel sularından ziyan çəkmiş iki yaşayış evi sökülərək onların yerində yeni binaların təməli qoyulmuşdur. Həmçinin cari ilin ilk günlərində YAP QAX Rayon Təşkilatının və Uşaq Yaradıcılıq Mərkəzinin də yeni binalarının təməli qoyulmuşdur. Cari ildə şəhərin 20 Yanvar və Heydər Əliyev küçələrində daxili imkanlar hesabına tikinti-təmir, abadlıq işləri yekunlaşdırılmışdır. Qaxbaş kəndində 9 mərtəbəli yaşayış binasının 9-cu mərtəbəsində quraşdırma işləri aparılır, İlisu-Sarıbaş yolunda Hamamçay üzərindəki körpünün, Qax şəhərində idman kompleksinin tikintisində də inşaat işləri sürətlənmişdir. Şəhərin girəcəyindəki yeni salınmış park artq istifadəyə verilmişdir. 2010-cu ildə Alatəmir kəndindəki “Qax suları” mineral su zavodu, Güllük kəndində 400 nəfəlik şadlıq evi, Qax şəhərində yeni avtovağzal da istifadəyə veriləcəkdir.

Rayon icra hakimiyyətinin planlarında ötən il rayonda sənaye məhsulları istehsalındakı geriliyi aradan qaldırmaq üçün bir sıra tədbirlər nəzərdə tutulmuşdur. Bu baxımdan rayonda süd məhsulları emalı müəssisəsinin inşasına tezliklə başlanacaqdır.

2010- cu ildə yuxarıda göstərilənlərlə bərabər onlarla digər sosial, inzibati və sənaye müəssisələrinin tikintisi də nəzərdə tutulmuşdur. Rayon icra hakimiyyətinin başçısının hesabat məruzəsindən aydın oldu ki, rayonda həyata keçirilən hazırlıq işləri onu göstərir ki, 2010-cu il burada tikinti-quruculuq, abadlıq işləri üçün daha uğurlu il olacaqdır.

2010-cu ildə rayonda kənd təsərrüfatı məhsullarının istehsalının, heyvandarlıq məhsullarının artırılması üçün də möhkəm baza yaradılmışdır.

Qax rayonunun təhsil işçiləri öz zəngin ənənələrinə sadiq qalaraq rayonda təhsilin səviyyəsinin artırılması üçün əzmlə çalışır, öz metodik və elmi hazırlıqlarının artırılmasının qayğısına qalırlar. Ötən il 3 yeni orta məktəb binası tikilərək istifadəyə verilmiş, bir sıra məktəblər əsaslı və cari təmir olunmuşdur. Ali məktəblərə ötən il qəbul mövsümündə rayonun ümumtəhsil məktəblərinin məzunları topladıqları bala görə rayonlar arasıda 1-ci yeri tutmuşdur.

Səhiyyənin maddi-texniki bazası da xeyli möhkəmləndirilmişdir. Belə ki, bu yaxınlarda Rayon Mərkəzi Xəstəxanası əsaslı təmir olunduqdan sonra istifadəyə verilmişdir. Xəstəxanada Avropa standartlarına uyğun yenidənqurma işləri aparılmış, bütün kabinet və laboratoriyalar müasir müayinə və müalicə cihazları ilə təmin olunmuşdur.

Nazirlər Kabinetinin 2009-cu ilin doqquz ayının sosial-iqtisadi inkişafının yekunlarına həsr olunmuş geniş iclasında Respublika Prezidenti İlham Əliyevin 2010-cu ili “Ekologiya ili” elan etməsindən sonra rayonda şənbə və bazar günləri keçirilən ümumrayon iməciliklərində küçə və meydanlara, yol kənarlarına, meşə kənarlarındakı boş ərazilərə on minlərlə ağac əkilmişdir. Həmçinin şəhər və kəndlərdə abadlıq işləri aparılmış, antisanitariya vəziyyətində olan bataqlıqlar yeni kanallar çəkilərək qurudulmuşdur. Meşələrin qanunsuz qırılmasının qarşısı tamamilə alınmışdır.

Qax Rayon İcra Hakimiyyətinin hesabat yığıncağında həmçinin qeyd edildi ki, adamlara qayğı, onların probemlərinin həlli istiqamətindəki tədbirlər Rayon İcra Hakimiyyətinin fəaliyyətinin əsasını təşkil edir. Bu məqsədlə rayon icra hakimiyyətinin başçısı Telman Quliyevin yaşayış yerlərində sakinlərlə keçirdiyi görüşlər artıq ənənə şəklini almışdır. Bu görüşlərdə qaldırılan problemlərə, şikayətlərə, təşəbbüslərə diqqət və qayğı ilə yanaşılır, sosial ədalət prinsipləri gözlənilir. Bir qayda olaraq bu görüşlərin gedişində qaldırılan məsələlər orada iştirak edən idarə-müəssisə rəhbərlərinin iştirakı ilə araşdırılır. Həlli üçün möhkəm tapşırıq verilir. Məhz bu görüşlərdə qaldırılan məsələlərlə bağlı rayonun Dəymədağlı, Qorağan, Cəlayer, Baydarlı kəndlərində sıradan çıxmış suvarma kanalları bərpa edilmiş, Turaclı, Ləkit, Marsan, Güllük, Əmircan kəndlərində qəza vəziyyətində olan elektrik xəttləri təmir olunmuş, Turaclı kəndində idman meydançası təşkil edilmiş, Əlibəyli kənd mədəniyyət evi təmir olunmuş, Alatəmir kəndində yeni məhəlləyə içməli su xətti çəkilmiş, aqrar islahatlar zamanı yol verilmiş bir sıra nöqsanlar aradan qaldırılmışdır.

Hesabat yığıncağında ötən dövr ərzində buraxılmış bir sıra nöqsanlar təhlil olunaraq onların aradan qaldırılması üçün konkret təkliflər verildi.

Yığıncaqda iştirak edən Azərbaycan Respublikası Prezidenti Administrasiyasının məsul işçisi Məhərrəm Quliyev və Milli Məclisin deputatı Azər Kərimli çıxış etdilər. Tədbir iştirakçıları 2010-cu ildə yığıncaqda deyilmiş tənqidi qeydlərin aradan qaldırılması üçün qətnamə qəbul etdilər. Yığıncağın iştirakçıları tərəfindən Azərbaycan Respublikasının Prezidenti İlham Əliyevə müraciət qəbul olundu.

İ. MUSAOĞLU,

“Xalq qəzeti”nin bölgə müxbiri

Xalq qəzeti.- 2010.- 16 fevral.- S. 6.