Opera və Balet Teatrı yeni musiqi alətləri ilə təchiz edilmişdir

Azərbaycan Dövlət Opera və Balet Teatrının mətbuat xidmətindən aldığımız məlumata görə, bu günlərdə Mədəniyyət və Turizm Nazirliyi tərəfindən teatrın simfonik orkestrinin musiqiçiləri üçün Avropanın ən məşhur musiqi firmalarının istehsalı olan musiqi alətləri – valtorna, trombon, klarnet, bas-klarnet, fleyta, qoboy və sair alınmışdır.

Almaniyanın “Mönnig” və “Shreiber” və Fransanın “Selmer” firmalarından xüsusi sifarişlə əldə edilən bu qiymətli alətlər yüksək səslənmə qabiliyyətinə malikdir. Orkestrin musiqiçiləri alətləri böyük sevinc və minnətdarlıq hissi ilə qəbul etmişlər.

Teatrın simfonik orkestri tamaşalarda yüksək profesionallıqla çıxış etdiyi kimi, ölkəmizin musiqi mədəniyyətini xaricdə də çox böyük uğurla təmsil edir. Buna görə də orkestrin yeni alətlərlə təchiz edilməsi şübhəsiz, ən peşəkar musiqiçilərin çalışdığı bu kollektivin daha yüksək səviyyədə çıxış etməsinə səbəb olacaqdır.

A.ÜLVİ

Xalq qəzeti.- 2010.-17 fevral.- S. 8.