Qızıl Aypara Cəmiyyətinin yaranmasının 90 illik yubileyi Suraxanı rayonunda qeyd edildi

Suraxanı rayonundakı Heydər Əliyev Mərkəzində Azərbaycan Qızıl Aypara Cəmiyyətinin yaranmasının 90 illik yubileyi münasibəti ilə tədbir keçirilmişdir. Tədbir iştirakçıları ilk öncə ümummilli lider Heydər Əliyev parkında dahi öndərin abidəsinin önünə tər güllər qoymuş, sonra tədbir iştirakçıları Heydər Əliyev Mərkəzi ilə tanış olmuşlar.

Qızıl Aypara Cəmiyyətinin Suraxanı rayon bolməsinin sədri Turan Əsgərova tədbirdə çıxış edərək rayon bölməsinin gördüyü işlər haqqında geniş məlumat vermişdir. Azərbaycan Qızıl Aypara Cəmiyyətinin prezidenti, Milli Məclisin deputatı Novruz Aslanov ötən illər ərzində, xüsusilə ölkəmiz müstəqillik əldə etdikdən sonra Azərbaycan Qızıl Aypara Cəmiyyətinin fəaliyyəti, gördüyü işlər haqqında danışmışdır. Cəmiyyətin prezidenti bildirmişdir ki, Azərbaycan Qızıl Aypara Cəmiyyətinin fəaliyyətinə, eyni zamanda kütləvi tədbirlərin keçirilməsində yaxından iştirak edərək əməli kömək göstərdiyinə görə Suraxanı Rayon İcra Hakimiyyətinin başçısı İlqar Abbasov Azərbaycan Qızıl Aypara Cəmiyyətinin Rəyasət Heyətinin qərarı ilə Fəxri Fərmanla təltif olunmuşdur.

Tədbirdə çıxış edən rayon icra hakimiyyətinin başçısı İ.Abbasov Azərbaycan Qızıl Aypara Cəmiyyətinin yaranmasının 90 illik yubileyi münasibəti ilə tədbir iştirakçılarını təbrik etmişdir. Cəmiyyətdə çalışan bütün insanlara vacib fəaliyyətlərində uğurlar arzulayan natiq göstərmişdir ki, müstəqil Azərbaycan Respublikasının ictimai həyatında qeyri-hökumət təşkilatlarının rolu günü-gündən artır.Vətəndaş cəmiyyəti quruculuğuna öz köməyini göstərən belə vacib ictimai qurumlardan biri də Qızıl Aypara Cəmiyyətidir. Cəmiyyət 1994-cü il noyabrın 26-da Azərbaycan xalqının ümummilli lideri Heydər Əliyevin diqqət və qayğısı sayəsində, Milli Məclisinin qərarı ilə, Beynəlxalq Qızıl Xaç və Qızıl Aypara Hərəkatının tərkib hissəsi olaraq, respublikada bu sahədə fəaliyyət göstərən yeganə rəsmi humanitar təşkilat kimi təsdiq edilmişdir.Ötən dövr ərzində cəmiyyətin öz fəaliyyətini daha da təkmilləşdirməsi, lazımlı bir qurum olduğunu sübut etməsi hər birimizi sevindirir.

Natiq xüsusi vurğulamışdı ki, Qızıl Aypara Cəmiyyəti yarandığı gündən insani mövqedən çıxış etmiş, insanları daim humanizmə, xeyirxahlığa çağırmış, onlarda mərhəmət hissləri oyatmağa çalışmışdır. Bu təşkilatın fəaliyyətinin əsas qayəsini insanpərvərlik və xeyirxahlıq kimi nəcib keyfiyyətlər təşkil edir. Qızıl Aypara Cəmiyyəti Azərbaycan vətəndaşlarının üzləşdiyi müxtəlif məsələlərin həll edilməsində və aradan qaldırılmasında bir sıra xidmətlər göstərmiş və göstərməkdədir.

Bu cəmiyyət insanlara maddi və mənəvi dəstək verməklə, müharibədən, təbii fəlakətdən zərər çəkənlərə, əhalinin sosial cəhətdən zəif müdafiə olunan təbəqələrinə yardım edir. Qızıl Aypara Cəmiyyəti insanlara həyata inam hissi aşılayır. Cəmiyyət həmçinin bir sıra yoluxucu xəstəliklərin qarşısının alınmasında xüsusi xidmətlər göstərir.

Cəmiyyətin Suraxanı rayon bölməsinin sədri T.Əsgərova tədbiri yekunlaşdıraraq bildirmişdir ki, Azərbaycan Qızıl Aypara Cəmiyyətinin bölməsi rayonda məskunlaşmış qaçqın və məcburi köçkünlərin, sosial problemləri olan rayon sakinlərinin rifah halının yaxşılaşdırılması sahəsində bundan sonra da böyük həvəslə və əzmkarlıqla fəaliyyət göstərəcəkdir.

Vaqif BAYRAMOV

Xalq qəzeti.- 17 fevral.- S. 5.