Neftçala: uğurlar artdıqca həyat gözəlləşir

Respublikamızın hər yerində olduğu kimi, Neftçala rayonunda da 2009-cu il tarixə sosial-iqtisadi inkişafla səciyyələnən il kimi daxil olub. Rayonda aparılan davamlı abadlıq-quruculuq işləri, əhalinin həyat səviyyəsinin daha da yaxşılaşmasına yönəldilən tədbirlər müsbət nəticələr verib və gələcək uğurların etibarlı təməlinə çevrilib. İllik hesabat yığıncağında bu barədə ətraflı danışılıb, eyni zamanda cari ildə qarşıda duran vəzifələrə diqqət cəlb edilib.

Rayon icra hakimiyyətinin başçısı Taleh Qaraşov hesabat məruzəsinin əvvəlində ölkə üzrə əsas makroiqtisadi göstəricilərin dinamikasını konkret faktlarla nəzərə çatdıraraq xüsusi vurğuladı ki, ümumi inkişaf tendensiyası regionların da tərəqqisinə çox güclü təkan vermişdir. Sonra o, Neftçalanın timsalında bu dinamikanı əsaslandırdı.

Məruzədə misal gətirilən çoxsaylı rəqəmlər özlüyündə quru statistikanı ehtiva eləsə də, inkişaf, tərəqqi, artım göstəriciləri və real müqayisə vasitəsi olması baxımından diqqətəlayiq idi. Fikir verin: ötən il Neftçalada 105,3 milyon manatlıq ümumi məhsul istehsal edilib ki, bu da əvvəlki ildəkindən çoxdur. İstehsalda özəl bölmənin payı 95,6 faizə çatıb. İl ərzində rayonda 11 yeni istehsalat sahəsi yaradılıb, 247 fiziki şəxs fəaliyyətə başlayıb. Yeni müəssisələrin hesabına 30, fiziki şəxslər üzrə 247, mövcud idarə və təşkilatlarda isə 85 yeni və daimi iş yeri açılıb. Kənd təsərrüfatında mövsümi işlərə 904 nəfər cəlb edilib.

Adambaşına düşən pul gəlirləri 1,4 faiz yüksələrək 353 manat olub. Rayon üzrə hər işçinin orta aylıq əməkhaqqı 180 manat təşkil edir ki, bu da 2008-ci ildəkindən 2,9 faiz çoxdur. Əhaliyə faktiki qiymətlərlə 507,5 min manatlıq rabitə xidməti göstərilib. Rayonda telekommunikasiya üzrə elektronlaşmanın səviyyəsi 100 faiz təşkil edir. Əvvəlki ilə nisbətən nəqliyyat sahəsində yük və sərnişin daşımaları müvafiq olaraq 7,3 və 6,9 faiz çoxalıb. Bu sahədə görülən işlərin üçdə-iki hissəsi qeyri-dövlət nəqliyyat bölməsi tərəfindən həyata keçirilib.

Rayonda vətəndaşların işsizlik müavinəti alması, peşə hazırlığı kurslarına göndərilməsi və haqqı ödənilən ictimai işlərə cəlb edilməsi sahəsində də irəliləyiş olub. Rayon üzrə 143 kimsəsiz ahıl və əlil vətəndaşa məişət xidməti göstərilib, 1320 ailəyə ünvanlı dövlət sosial yardımı təyin edilib. Sahibkarlığın inkişafına dəstək olaraq rayonda fəaliyyət göstərən üç bank filialı və bir kredit təşkilatı tərəfindən vətəndaşlara ümumilikdə 2 milyon 58,2 min manat kredit verilib. Göründüyü kimi,rəqəmlər, necə deyərlər, üzə gülür, rayonda həyat səviyyəsinin faktiki vəziyyəti barədə aydın təsəvvür yaradır.

Neftçalanın üç nərəbalıqartırma zavodu tərəfindən 6,7 milyon balıq körpəsi yetişdirilərək Kür çayı vasitəsi ilə dənizə axıdılıb. Bu, proqnoz tapşırığın 42,9 faizi həddindədir. Geriliyin səbəbi törədici balıqlarla təchizatın azlığı ilə izah olunur.

Rayonun işıq təminatında problem yoxdur. Məcburi açılmalar istisna olmaqla, təchizat fasiləsizdir. Paylayıcı Elektrik Şəbəkəsi tərəfindən satılan elektrik enerjisinin haqqı 84 faizdən çox ödənilib. Əvvəlki ilə nisbətən ümumi ödəmə 18,4 faiz, əhali üzrə isə 24,6 faiz artıb. Buna izahat işlərinin səmərəli aparılması sayəsində nail olunub. Abonentlərin 98,5 faizi sayğaclaşdırılıb. Rayonun qaz təchizatı da xeyli yaxşılaşıb. Əhali abonenti yüz faiz sayğaclaşdırılıb. Amma bu sahədə ödəmənin vəziyyəti ürəkaçan deyil.

Məruzəçi dedi ki, hesabat dövründə rayonun aqrar sahəsi inkişaf etmişdir. Belə ki, kənd təsərrüfatının ümumi məhsulu əvvəlki ildəkindən 15,2 faiz çox olub. İl ərzində diri çəkidə 3954 ton ət, 20 min ton süd, 180 ton yun, 3 milyon 176 min ədəd yumurta istehsal olunub. Taxıl əkini sahələri xeyli genişləndirilərək 42 min hektarı keçib, sahələrdən 104081 ton (əvvəlki ildəkindən 16123 ton artıq) məhsul toplanıb.

Bitkiçilik sahəsində yüksək məhsul götürülməsi meliorativ tədbirlərdən çox asılıdır. Hesabat ilində Neftçalada 237 kilometr suvarma kanalı, 81 kilometr kollektor-dren sistemi lildən təmizlənib, suvarma kanallarında 83 ədəd, kollektor-drenlərdə 104 ədəd hidrotexniki qurğu və nasos təmir edilib. Təsərrüfatlar bol suvarma suyu ilə təmin edilib.

Rayonda heyvandarlığın da inkişafına nail olunub. İribuynuzlu mal-qaranın sayı 39665 başa, qoyun və keçilərin sayı 115170 başa, quşların sayı isə 292050 başa çatdırılıb. Əhali özünü ət və süd məhsulları ilə tam təmin edir. Fermer və sahibkarların texnika ilə, mineral gübrələrlə təchizatını yaxşılaşdırmaq məqsədilə “Aqrolizinq” ASC-nin Neftçala “Aqroservis” filialının fəaliyəti genişləndirilib: artıq burada müxtəlif növ texnikanın sayı 74-ə çatdırılıb, fermerlərin mineral gübrələrlə təminatında problem olmayıb.

Sonra icra hakimiyyətinin başçısı T.Qaraşov tikinti-təmir, yol istismarı, xidmət sahələrinin fəaliyyətindən danışdı. O qeyd etdi ki, hesabat dövründə bütün maliyyə mənbələri hesabına 1 milyon 396 min manatlıq əsas fondlar istifadəyə verilib, rayon iqtisadiyyatının inkişafına xeyli vəsait yönəldilib. Əhalinin şəxsi vəsaiti hesabına ümumi sahəsi 7500 kvadratmetr olan fərdi yaşayış evləri tikilib. Neftçala Şəhər İstehsalat Təmir İstismar Sahəsi əhaliyə 80 min manatlıq xidmət göstərib, sahənin balansında olan yaşayış binalarının dam örtüyü, su və kanalizasiya xətləri təmir edilib.

Su-kanal, istilik təsərrüfatı idarələri, təmir-tikinti, “Kəndtikinti” müəssisələri, kommunal istehsalat sahələri tərəfindən də rayonda xeyli iş görülüb. İnşasına ötən il başlanmış “Dizayn qlas” MMC-də, “Azərpamservis” MMC-də quraşdırma işləri artıq başa çatıb. Bankə qəsəbəsində suötürücü qurğunun tikintisi davam etdirilir. Neftçala şəhərində Qarabağ əlilləri və şəhid ailələri üçün 16 mənzilli yaşayış binası inşa olunur. Şəhərin küçələrinə və “Pir” ziyarətgahına on minlərlə kvadratmetr asfalt döşənib, hasarlar təmir edilib. Sahibkarlar tərəfindən onlarca yeni ticarət obyekti tikilərək istifadəyə verilib.

Yaşıllaşdırma ilə əlaqədar rayon ərazisində beş mindən artıq ağac və dörd min gül kolu əkilib, parkların işıqlandırma sistemləri yenidən qurulub. Əkilmiş ağacların idarə, müəssisə və təşkilatlar tərəfindən qorunmasına və onlara qulluq edilməsinə ciddi fikir verilir.

İcra hakimiyyətinin başçısı dedi ki, cari ilin “Ekologiya ili” elan olunması ilə bağlı Prezidentin göstərişinə əsasən sanballı işlər görülməsi məqsədilə rayonda xüsusi komissiya yaradılıb, parklarda, yolboyu ərazilərdə, idarə və müəssisələrdə müntəzəm yaşıllaşdırma işlərinin aparılmasına başlanılıb. Sonra məruzəçi təhsil, səhiyyə, mədəniyyət, gənclərlə iş və idman sahələrində görülmüş işləri dəyərləndirdi. Təhsil sahəsinin daha böyük uğurlar qazandığına diqqəti cəlb elədi.

Sosial sahələrdə maddi-texniki bazanın möhkəmləndirilməsi, əsaslı təmir işlərinin görülməsi və xidmətin səviyyəsinin yüksəldilməsi məqsədilə addımlar atıldığını vurğuladı. Neftçalada yerli icra orqanları ilə iş, qanunçuluğun qorunması, asayişin mühafizəsi, vətəndaş müraciətləri ilə bağlı fəaliyyət günün tələbləri səviyyəsindədir. Hesabatda bu məsələlər də geniş əksini tapmışdı.

T.Qaraşov uğurları göstərməklə bərabər, dövlət idarəçiliyində müasir və mütərəqqi iş metodlarından daha səmərəli istifadə edilməsi zərurətini nəzərə çatdırdı, bu il qarşıya qoyulan vəzifələrdən ətraflı bəhs etdi. Yığıncaqda çıxış edən digər natiqlər də əldə olunmuş nailiyyətlərlə yanaşı, həlli vacib məsələlərə toxundular, maraqlı təkliflər verdilər və 2010-cu ilin də Neftçala üçün inkişaf, tərəqqi ili olacağına möhkəm inamlarını ifadə etdilər.

Əli NƏCƏFXANLI

Xalq qəzeti.- 2010.- 17 fevral.- S. 5.