Prezident İlham ƏLİYEV: Dünya miqyasında iqtisadi inkişaf templərinə görə Azərbaycan birinci yerdədir

Azərbaycan Prezidenti İlham Əliyev dövlətimizə rəhbərlik etdiyi ilk gündən regionların inkişafına xüsusi diqqət və qayğı göstərmiş, bir sıra mühüm sənədlər imzalamışdır. Bunun nəticəsində ölkənin davamlı iqtisadi inkişafı təmin edilmiş, bölgələr arasında regional tarazlıq bərpa olunmuş, yerlərdə sosial-mədəni infrastruktur obyektləri yenidən qurulmuş, əmək tutumlu və rəqabət qabiliyyətli yeni istehsal, habelə xidmət müəssisələri istifadəyə verilmiş, yeni iş yerlərinin açılması və əhalinin həyat səviyyəsinin yüksəldilməsi istiqamətində mühüm uğurlar qazanılmışdır. Bunun dövlət başçımız İlham Əliyevin Gəncə şəhərinə, Ağdaş, Göyçay rayonlarına səfərlərində də bir daha şahidi olduq.

Prezident İlham Əliyev Gəncəyə səfəri çərçivəsində “Ramada Plaza” mehmanxanasının açılış mərasimində iştirak etmişdir. Burada dövlətimizin başçısına məlumat verilmişdir ki, son illər istifadəyə verilən müasir mehmanxana kompleksləri böyük əhəmiyyət kəsb edir. Bu cür komplekslərin sayının çoxalması Azərbaycanın iqtisadi potensialını nümayiş etdirməklə yanaşı, həm də ölkəyə gələn turistlərin sayının artmasına zəmin yaradır. Gəncədə inşa edilən “Ramada Plaza” mehmanxanası da bu qəbildən olan mühüm layihələrdəndir.

Mehmanxananın qədim İpək Yolunun əsas hissələrindən olan Bakı-Tbilisi şosesinin üstündə yerləşməsi onun əhəmiyyətini daha da artırır. Mehmanxana kompleksi həm də şəhərin ümumi ansamblına əlavə gözəllik verir.Təməli 2005-ci ilin mayında qoyulmuş beşulduzlu mehmanxanada qonaqların rahat istirahəti üçün hər cür şərait yaradılmışdır. Burada 100 nəfərlik fitnes klub, masaj otaqları, türk hamamı, sauna, üzgüçülük hovuzu, tennis, bilyard otaqları, futbol meydançası vardır...

Azərbaycan Respublikasının Prezidenti İlham Əliyev fevralın 11-də Gəncədə “Ramada Plaza” mehmanxanasının açılışından sonra şəhər ictimaiyyətinin nümayəndələri ilə görüşü zamanı demişdir:” Gəncədə inkişaf sürətlə gedir. Bütün işlər yüksək səviyyədə aparılır. Həm xidmət sahəsində, həm sənaye potensialının inkişafında praktiki işlər aparılır, şəhər gözəlləşir, abadlaşır. Əminəm ki, 2010-cu ildə qarşıda duran bütün vəzifələr icra olunacaq və Gəncənin sürətli inkişafı gələcəkdə də təmin ediləcəkdir. Əlbəttə ki, biz şəhərin sənaye potensialının inkişafına böyük diqqət göstəririk və göstərəcəyik. Şəhərdə yeni böyük sənaye müəssisələri yaradılmalıdır, ilk növbədə alüminium zavodu, ondan sonra böyük metallurgiya kompleksi. Bir müddət bundan əvvəl bu iki böyük sənaye müəssisəsinin təməl daşı qoyulmuşdur. Ancaq müəyyən maliyyə çətinliklərinə görə onların tikintisi bir az yubanmışdır. Hesab edirəm ki, 2010-cu ildə işlər daha sürətlə getməlidir.

Şəhərin infrastrukturunun inkişafı üçün bütün lazımi tədbirlər görülür. Bu il Bakı-Gəncə magistral avtomobil yolu istifadəyə veriləcəkdir. Bu da çox böyük bir hadisədir. Əlbəttə ki, Gəncədə belə gözəl, müasir mehmanxanaların tikilməsi onu göstərir ki, investorlar da şəhərin gələcəyinə inamla yanaşırlar. Əgər belə olmasaydı, investorlar heç vaxt böyük vəsait qoymazdılar. Şəhərin gələcəyinə, Azərbaycanın gələcəyinə investorlarda çox böyük inam vardır. Əlbəttə ki, bu inamın da böyük əsası vardır. Çünki ölkəmiz inkişaf edir. Hətta bütün dünya üçün ən çətin olan 2009-cu ildə də Azərbaycan iqtisadiyyatı uğurla inkişaf etmişdir. Dünya miqyasında iqtisadi inkişaf templərinə görə Azərbaycan birinci yerdədir. Çox sevindirici hal ondan ibarətdir ki, bu ilin birinci ayının yekunlarına görə də Azərbaycan iqtisadiyyatı 9 faizdən çox artıbdır. Bu, onu göstərir ki, uğurlarımız əsaslıdır. Bunun möhkəm əsası vardır və dünyada bir neçə ölkəyə böyük problemlər gətirən böhran Azərbaycan iqtisadiyyatına ciddi təsir etməyib”.

Prezident İlham Əliyev çıxışında vurğulamışdır ki, biz özümüzü düşünülmüş siyasətlə, iqtisadi islahatlarla böhrandan qoruya bildik. Ölkəmizin hərtərəfli inkişafının nəticəsində bu gün Azərbaycan iqtisadiyyatı artıq çoxşaxəli iqtisadiyyatdır. Regionların inkişafı davam edir. Yeni müəssisələrin istifadəyə verilməsi ilə bağlı tədbirlər keçiriləcəkdir.

Gəncə ictimaiyyəti adından çıxış edən Telman Məlikov dövlətimizin başçısına təşəkkür edərək demişdir ki, ulu öndər Heydər Əliyev Gəncə şəhərinə, gəncəlilərə hər zaman böyük qayğı və diqqət göstərmişdir. Cənab Prezident, bu gün bu siyasət Sizin tərəfinizdən yüksək səviyyədə həyata keçirilir. Son altı ildə Gəncə şəhərinə 10 səfəriniz buna bariz nümunədir. Bu on səfər böyük bir tarixdir. Sizin hər dəfə şəhərə gəlişiniz bütün gəncəlilər üçün bir bayramdır. Sizin səfərləriniz böyük dəyərlərə malikdir. Sizin səfəriniz, Sizin gəlişiniz bizi çox sevindirir və hədsiz qürur duyuruq. Sizin xüsusi diqqətiniz, qayğınız nəticəsində şəhərimiz öz tarixi simasını saxlamaqla gündən-günə müasirləşir, gözəlləşir və sürətlə inkişaf edir. Qeyd etmək istəyirəm ki, bu inkişaf geniş spektrə malik olmaqla məhz dialektik inkişafdır. Bütün bu işlərə görə, cənab Prezident, Siz tarixə qurucu, yaradıcı, yaradan bir Prezident kimi daxil olacaqsınız.

Azərbaycan Prezidenti İlham Əliyev Ağdaşda regional elektrik yarımstansiyasının təməlqoyma mərasimində də iştirak etmişdir. “Azərenerji” ASC-nin prezidenti Etibar Pirverdiyev məlumat vermişdir ki, Asiya İnkişaf Bankının maliyyə dəstəyi ilə Mingəçevir-Abşeron enerji təminatının yenidən qurulması layihəsi çərçivəsində Ağdaş rayonunun Kükəl kəndi ərazisində 220/110 kv-luq 2x125 MVA gücündə regional elektrik yarımstansiyasının tikintisi nəzərdə tutulmuşdur. Yarımstansiyanın tikintisi üçün 15 hektar torpaq sahəsi ayrılmışdır. Tikinti-quraşdırma işlərinin 15 ay ərzində başa çatması nəzərdə tutulmuşdur. Layihə çərçivəsində 125 MVA-lıq iki transformator yarımstansiyası qurulacaq, Mingəçevir-Abşeron xətti üzrə 251 kilometr uzunluğunda elektrik xətti dəyişdiriləcəkdir. Tikinti işlərinə yanvarın əvvəlində başlanılmışdır. Ərazi abadlaşdırılmış, ətrafı hasarlanmış, 3 minə yaxın ağac əkilmiş, işıqlandırma xətti çəkilmiş, obyektə gedən yola asfalt döşənmişdir.

Prezident İlham Əliyev Göyçay rayonuna səfəri zamanı yeni istifadəyə verilən Heydər Əliyev mərkəzi ilə tranış olmuşdur. Yeri gəlmişkən, xatırladaq ki, son illər respublikamızda aparılan uğurlu sosial-iqtisadi islahatlar nəticəsində Göyçay rayonunun da siması tamamilə dəyişmişdir. Respublikamızın inkişafında mühüm rol oynayan Göyçay Azərbaycanın sosial-iqtisadi tərəqqisinə layiqli töhfələr verir. Təsadüfi deyildir ki, 2009-cu ildə burada 138,7 milyon manatlıq ümumi məhsul istehsal edilmişdir. Bu, əvvəlki illə müqayisədə 11,8 faiz çoxdur. Ötən il rayonda mövcud olan güclü sənaye potensialından daha səmərəli istifadə edilmiş, əhalinin güzəranı yaxşılaşdırılmışdır. Son beş ildə Göyçayda 6 min 745 yeni iş yeri açılmışdır. Rayonda aparılan genişmiqyaslı yenidənqurma və abadlıq işlərində Heydər Əliyev Fondu yaxından iştirak etmişdir.

Göyçayda aqrar sektorun inkişafına da xüsusi diqqət yetirilir. Keçən il 49 min 877 ton meyvə tədarük edilmişdir. Rayonun enerji təminatının etibarlılığını artırmaq məqsədi ilə xüsusi tədbirlər görülmüşdür. Şəhər əhalisinin təbii qazla təminatının yaxşılaşdırılması üçün yeni qaz xətti çəkilmişdir.

Cari ildə “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nda Göyçay rayonu üzrə nəzərdə tutulmuş tədbirlərin icrası davam etdiriləcəkdir. “Ekologiya ili” çərçivəsində hər yerdə yaşıllaşdırma kampaniyası həyata keçirilir. Göyçayda cari ildə 50 min ağacın əkilməsi nəzərdə tutulmuşdur.

Prezident İlham Əliyevin Göyçay şəhərinə səfəri zamanı açılış mərasimində iştirak etdiyi Heydər Əliyev mərkəzi ilə tanış olmuş və burada dövlət başçısına bildirilmişdir ki, klassik memarlıq üslubunda tikilən və ümumi sahəsi şəlalə kompleksi ilə birlikdə 1,5 hektar olan bu mərkəzin inşasına 2009-cu ildə başlanılmışdır. Birinci mərtəbədə ümummilli liderin həyat və fəaliyyətini, ulu öndərin 1978-ci ildə Göyçaya səfəri zamanı rayon ictimaiyyəti ilə keçirdiyi görüşləri əks etdirən fotoguşə yaradılmışdır. Burada quraşdırılmış monitorlar vasitəsilə ümummilli liderin siyasi fəaliyyətindən bəhs edən videogörüntülər nümayiş olunur. Mərkəzdə xalqımızın xilaskar oğlunun dünyanın bir sıra ölkələrində ucaldılan abidələrini əks etdirən fotoguşə də yaradılmışdır. Burada 3 virtual sinif, 24 nəfərlik konfrans zalı, kompyuterlərlə təchiz olunan xarici dil dərnəyi, elektron idarəetmə mərkəzi və ən müasir xidməti otaqlar fəaliyyət göstərir.

Binanın ikinci mərtəbəsində şagirdlərin Azərbaycanın ədəbiyyatını və zəngin tarixini dərindən mənimsəmələrinə kömək məqsədi ilə xüsusi dərnəklər təşkil edilmişdir. Burada elektron idarəetmə otağı, kitabxana, multimedia otağı, elektron kitabxana vardır. Mərkəzdə rəsm və şahmat dərnəkləri də fəaliyyət göstərəcəkdir. 310 yerlik böyük iclas zalı respublika və rayon əhəmiyyətli mötəbər tədbirlərin keçirilməsi üçün nəzərdə tutulmuşdur. Zalda quraşdırılmış ən müasir avadanlıq vasitəsilə sinxron tərcümə və izahlı beynəlxalq konfransların keçirilməsi mümkündür.

Prezident İlham Əliyev Göyçayda olarkən rayon ictimaiyyətinin nümayəndələri ilə görüşmüş, Azərbaycanın dünəni, bu günü və gələcəyi barədə fikirlərini sakinlərlə bölüşmüşdür. Dövlət başçısı Sovet İttifaqının dağılması ərəfəsində ölkəyə rəhbərlik etmiş insanların öz vəzifə borclarını yerinə yetirə bilməmələrini vurğulamışdır: “Azərbaycan çox ağır vəziyyətlə üzləşmişdi. Demək olar ki, bütün iqtisadiyyat dağılmışdı, sənaye potensialı məhv edilmişdi, ölkədə hərc-mərclik, xaos, anarxiya, vətəndaş müharibəsi. Bütün o hadisələri biz yaxşı xatırlayırıq. Yenə də Azərbaycan xalqı öz rəhbərinə üz tutdu, Heydər Əliyevi hakimiyyətə dəvət etdi və 1993-cü ildən 2003-cü ilə qədər Azərbaycan bütün çətin sınaqlardan uğurla çıxa bilmişdir. Həm vətəndaş müharibəsi dayandı, həm iqtisadi tənəzzülün qarşısı alındı, həm də inkişaf yoluna qədəm qoyduq. On il ərzində demək olar ki, ölkəmiz öz siyasi və iqtisadi potensialının gücləndirilməsi nəticəsində dünya miqyasında çox böyük hörmətə malik olan bir ölkəyə çevrildi.

2003-cü ildən bu günə qədər Heydər Əliyev siyasəti davam etdirilir. Bu, bizim uğurlarımızın əsas şərtidir, əsas amilidir. Son 6 il ərzində Azərbaycan böyük və uğurlu yol keçmişdir. Ancaq bu yol, əlbəttə ki, bu vaxta qədər qoyulmuş möhkəm təməl əsasında öz yerini tapmışdır. Bu gün Azərbaycan dünya miqyasında sürətlə inkişaf edən ölkədir, öz problemlərini özü həll etməyə qadir olan ölkədir. Biz heç bir xarici yardıma möhtac deyilik.”

Dövlət başçısı çıxışında həmçinin bildirmişdir ki, 2009-cu ildə iqtisadiyyatımız ən yüksək templərlə artıbdır. 2010-cu ilin birinci ayının yekunları çox ümidvericidir. Yenə də Azərbaycan dünya miqyasında birinci sıradadır. Bizim iqtisadiyyatımız bu ilin birinci ayında 9 faizdən çox artıbdır. Bu iqtisadi rəqəmlər əlbəttə ki, bizi çox sevindirir. Bu, hər bir ölkənin inkişafını təmin edən və göstərən vacib rəqəmlərdir. Amma məni daha çox sevindirən odur ki, bu inkişafı biz gündəlik həyatda görürük. Yoxsulluğun azaldılması sahəsində böyük yol keçmişik. Artıq Azərbaycanda yoxsulluq şəraitində yaşayanların sayı, haradasa 11 faizdir. Bu, dünyanın inkişaf etmiş ölkələri üçün də məqbul bir rəqəmdir. Biz çalışmalıyıq ki, yoxsulluğu maksimum dərəcədə aşağı salaq, işsizliyi aradan qaldıraq, bütün vətəndaşlar işlə təmin olunsunlar. Hər bir insanın normal yaşaması üçün şərait yaradılmalıdır. Bu məqsədlə bütün layihələr plan üzrə gedir.

Regionların sosial-iqtisadi inkişafı Dövlət Proqramının ikinci mərhələsi uğurla icra edilir. 2013-cü ilə qədər bu proqramın uğurlu icrasına nail olacağıq. Bütün bölgələrdə abadlıq, quruculuq işləri aparılır, gözəl binalar tikilir. Biz Azərbaycanın son illərdəki uğurlarını Göyçay rayonunun timsalında da bariz şəkildə görə bilərik. Göyçayın iqtisadi potensialı 2003-2008-ci illərdə 3 dəfədən çox artıbdır. Yəni bu da özlüyündə gözəl göstəricidir. Bu, onu göstərir ki, rayonda işlər yaxşı gedir, yaxşı nəticələr göz qabağındadır.

Azərbaycan Prezidenti Göyçayda olarkən yeni Olimpiya Kompleksinin açılışı mərasimində də iştirak etmiş, şəhərin su təchizatı və kanalizasiya sisteminin yenidən qurulması layihəsi ilə tanış olmuş, “Göyçay – 1” SES-in təməlqoyma mərasimində burada çalışan inşaatçılarla görüşmüşdür.

Azərbaycan Prezidenti İlham Əliyevin bölgələrə növbəti səfəri bir daha göstərdi ki, regionlarımız dinamik inkişaf edir, insanların həyat səviyyəsi getdikcə yaxşılaşır, yoxsulluq şəraitində yaşayanların sayı azalır. Şübhəsiz ki, bu vəziyyət düzgün sosial-iqtisadi siyasətin, islahatların uğurla həyata keçirilməsinin məntiqi nəticəsidir.

Vaqif BAYRAMOV

Xalq qəzeti.- 2010.- 17 fevral.- S. 1.