Beynəlxalq Ana Dili Günü

“Dilimiz varlığımızdır”

Beynəlxalq Ana Dili Günü münasibətilə Gənc Tamaşaçılar Teatrında keçirilən mərasimə toplaşanlar “Çağ” Öyrətim Şirkəti Azərbaycan — Türkiyə özəl liseylərində təhsil alan şagirdlərin “Ana dilimizi sevək, sevdirək” ənənəvi müsabiqəsinin qalibləri ilə birlikdə sevindilər, duyğulandılar.

Qrammatika, inşa yazı, internet saytı; mahnı, rəqs və şeir nominasiyaları üzrə keçirilən VII ənənəvi ana dili müsabiqəsi “Dilimiz varlığımızdır” adlı yekun təntənə ilə başa çatdı. Qaliblərin müəllim və valideynlərindən, mütəxəssislərdən və münsiflərdən əlavə, mərasimə ölkənin tanınmış ziyalıları, millət vəkilləri və rəsmi qurumların nümayəndələri, eləcə də ünlü sənətçilər və jurnalistlər toplaşmışdılar.

“Çağ” Öyrətim Şirkətinin prezidenti Ənvər Özərən bütün dünyada hər bir xalqın öz ana dilinə sonsuz sevgisini və qayğıkeşliyini bildirdiyi Ana dili bayramının Azərbaycan — Türkiyə Özəl liseylərində də böyük qədirbilənliklə, yaradıcılıq və yarışma ab-havasında keçdiyini vurğuladı, toplaşanları əlamətdar bayram münasibətilə tədrik etdi. Natiq türk dillərinin dünya dilləri ailəsində şərəfli yer tutduğunu, beynəlxalq aləmdə samballı mövqeyi olduğunu da vurğuladı.

Sonra yarışmanın qalibləri öz məharətlərini nümayiş etdirərək, ana dilinin ülviyyətini və ucalığını vəsf edən şeirlər söylədilər, mahnı və rəqslər ifa etdilər. Qalibləri təbrik edən millət vəkilləri Məlahət Həsənova və Qənirə Paşayeva, təhsil nazirinin müavini Elmar Qasımov, Ailə, Qadın və Uşaq Problemləri Dövlət Komitəsinin sədr müavini Aynur Sofiyeva, İctimai Teleradio Yayımları Şirkətinin direktor müavini Elman Qədirli, Azərbaycan — Türkiyə Özəl Liseyləri Baş İdarəsinin rəisi Arif Gömləksiz ana dili yarışmasının qaliblərini səmimi təbrik etdilər, qiymətli hədiyyələr təqdim etdilər, onlara təhsildə və gələcək həyatda uğurlar arzuladılar.

Natiqlər Azərbaycanın dövlət müstəqilliyi qazanması ilə ana dilimizin həyatın bütün sahələrində rəsmi statusunun təmin olunmasından, ümummilli lider Heydər Əliyevin və Prezident İlham Əliyevin Azərbaycan dilinin qorunmasına və inkişafına göstərdikləri dövlət himayəsindən də söz açdılar, yeni nəsili ana dilimizi sevməyə və sevdirməyə çağırdılar.

Həmin axşam min illərin dil savaşlarından qalib çıxan, zaman keçdikcə cilalanan, zəngin ifadə imkanları qazanan, bu gün dünyanın əksər qitələrində yaşayan 50 milyonluq soydaşlarımızın doğma ünsiyyət vasitəsi olan Azərbaycan dilinin gözəlliyi və qüdrəti bir daha könülləri oxşadı, öz cazibəsi ilə duyğu və düşüncələri ortaqlaşdırdı. Azərbaycan—Türkiyə qardaşlığının sarsılmazlığı və əbədiliyi də dönə-dönə vurğulandı. Sonda qaliblər münsiflər heyətinin üzvləri və fəxri qonaqlarla xatirə şəkli çəkdirdilər.

Azərbaycan — Türkiyə Özəl Liseyləri Baş İdarəsinin rəisi Arif Gömləksiz qəzetimiz üçün müsahibəsində dedi:

— Hər bir xalqı yaşadan, tanıdan, milli varlığını təsdiqləyən ən başlıca dəyər onun ana dilidir. Türk dilləri ailəsində Azərbaycan dili qədimliyi, zənginliyi, geniş dairədə yayılması ilə seçilir. Vaxtilə Avropada fransız dilinin mövqeyi necə idisə, Qafqazda və Yaxın Şərqdə də Azərbaycan dilinin rolu elə idi. Biz liseylərimizdə Azərbaycan dilini dərindən öyrətməklə yanaşı, həm də onu sevdirməyə, qoruyub zənginləşdirməyə çağırırıq.

Yetirmələrimiz təbiət fənləri üzrə biliklərini beynəlxalq yarışmalarda sınaqdan keçirir və adətən, yüksək nəticələr qazanırlar. Ana dili üzrə bilik və məharəti nümayiş etdirməkdə isə belə mərasimlərdən istifadə edirik. Şagirdlərimizin bugünkü qabiliyyətini Azərbaycanın görkəmli adamları alqışladıqca onların müəllimləri sonsuz sevinc hissi keçirirdilər. Biz yetirmələrimizə öyrədirik ki, Anaya, Torpağa, Vətənə olan sonsuz borcu qaytarmağın bir yolu da Ana dilini yaxşı bilmək, onu sevməkdir.

Dilimiz varsa — biz də varıq. Dilimiz yox olarsa — biz də yox olarıq. “Dilimiz varlığımızdır” həqiqətini babalarımız öz qeyrətləri və sevgiləri ilə təsdiqləyiblər. Biz də bütün varlığımızla bu həqiqətə bağlıyıq.

Tahir AYDINOĞLU

Xalq qəzeti.- 2010.- 23 fevral.- S. 6.