Sabunçu: inkişafın yeni mərhələsi

Azərbaycanda son illər aparılan davamlı islahatlar öz müsbət nəticəsini verməkdədir. Paytaxtımızın ən böyük rayonlarından olan Sabunçu rayonunda da sosial-iqtisadi inkişaf sahəsində əsaslı nailiyyətlər qazanılmışdır. Dünən rayonun 2009-cu ilin sosial-iqtisadi inkişafına həsr olunan hesabat yığıncağında bu barədə ətraflı söhbət açılmışdır. Geniş məruzə ilə çıxış edən Sabunçu Rayon İcra Hakimiyyətinin başçısı Əlibaba Əliyev bildirmişdir ki, ölkədəki dinamik sosial-iqtisadi inkişaf Sabunçu rayonunda da müşahidə olunmuşdur. Belə ki, 2009-cu il ərzində rayonun sənaye müəssisələri və idarələri tərəfindən 120 milyon manatlıq sənaye məhsulları istehsal edilmişdir. Bu da 2003-cü ildəkinə nisbətən təqribən 3 dəfə çoxdur. O da qeyd edilməlidir ki, 2009-cu ildə istehsal edilən məhsulların 43 faizi qeyri-dövlət sektorunun hesabına olmuşdur.

2009-cu il ərzində rayonun tikinti kompleksində iqtisadi və sosial sahələrin inkişafı üçün bütün maliyyə mənbələri hesabına 59 milyon manat məbləğində investisiyadan istifadə olunmuşdur ki, bunların da 31,2 faizi istehsal təyinatlı obyektlərin inşasına sərf edilmişdir. Sənaye sahələrində çalışanların orta aylıq əmək haqqı 2008-ci ildəkinə nisbətən 1,4 faiz artaraq 313 manat, tikinti kompleksində isə 2,8 faiz artaraq 275,5 manat təşkil etmişdir. 2009-cu il ərzində rayon üzrə 870 yeni iş yeri açılmışdır.

İl ərzində Azərbaycan Respublikası Prezidentinin “Ünvanlı dövlət sosial yardımı haqqında” 16 noyabr 2005-ci il tarixli fərmanına əsasən ünvanlı dövlət sosial yardımı almaq üçün 4896 ailəyə və ya 21921 nəfərə 4,5 milyon manat məbləğində ünvanlı yardım edilmişdir.

Azərbaycan Respublikasının Prezidenti cənab İlham Əliyevin 27 fevral 2006-cı il tarixli sərəncamı ilə “Bakı şəhərinin qəsəbələrinin 2006-2007-ci illər üzrə sosial-iqtisadi inkişafının sürətləndirilməsinə dair Tədbirlər Proqramı” təsdiq edilmişdir. Həmin proqramın icrası nəticəsində rayonun qəsəbələrində bütün sahələri əhatə edən böyük həcmli işlər görülmüşdür ki, bununla da əhalinin sosial durumu daha da yaxşılaşmışdır. Həmin proqramın davamı olaraq Azərbaycan Respublikasının Prezidenti cənab İlham Əliyevin 14 aprel 2009-cu il tarixli fərmanı ilə “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı” təsdiq edilmişdir ki, burada da regionların, eləcə də Bakıətrafı qəsəbələrin inkişafının əsas inkişaf istiqamətləri müəyyən olunaraq orada öz əksini tapmışdır.

Dövlət Proqramında nəzərdə tutulmuş tədbirlərlə yanaşı il ərzində rayonda daxili imkanlar hesabına bir sıra təmir-bərpa və abadlıq işləri aparılmışdır və bu işlər indi də davam etdirilir.

Belə ki, əhalinin elektrik təchizatını yaxşılaşdırmaq məqsədilə il ərzində rayon üzrə 30 yeni KTM quraşdırılmış, 6 transformator daha güclüləri ilə əvəz edilmiş, 53 transformator məntəqəsi əsaslı təmir olunmuşdur.

Neft-mədən sahələrinə yaxın ərazilərdə yaşayan əhalinin fasiləsiz elektrik enerjisi ilə təchizatını təmin etmək məqsədilə 1018 ədəd dayaq basdırılmış, kabel xətləri çəkilmiş, 15 ədəd paylayıcı qurğu əsaslı təmir olunmuş, 8 transformator dəyişdirilmiş, 18 transformator təmir edilmişdir.

Hazırda rayon üzrə ATS-lərin ümumi tutumu 63150 nömrəyə çatdırılmışdır ki, bu da hər 100 ailəyə 85 telefon nömrəsi deməkdir.

Əhalinin su təchizatını yaxşılaşdırmaq məqsədilə 30 min metrə yaxın müxtəlif diametrli su boruları dəyişdirilmiş, 14 ədəd su nasosu, 5 ədəd elektrik mühərriki təmir edilmiş, 747 ünvanda su xətləri bərpa edilmiş, 28 suvurma məntəqəsində cari təmir işləri aparılmışdır. Bundan başqa Bakıxanov qəsəbəsi Axundov 5 və Gənclik 23 ünvanda hər birnin tutumu 1000 kubmetr olan iki su anbarı, Gənclik 23-də yeni nasosxana tikilərək istifadəyə verilmişdir. İl ərzində rayonun Bakıxanov, Sabunçu, Zabrat, Maştağa və Ramana qəsəbələrində müxtəlif diametrli 2500 metrə yaxın kanalizasiya xətləri çəkilmişdir.

Qaz İstismar İdarəsinin daxili imkanları hesabına 32,3 min metr müxtəlif diametrli qaz xətləri çəkilmiş, 69 ədəd qaztənzimləyici qurğu, 37 ədəd qaztənzimləyici şkaf və 1 ədəd mini qazpaylayıcı stansiya quraşdırılmışdır.

7 saylı İstilik Sistemləri İstismar Sahəsi tərəfindən ötən qış mövsümündə rayon üzrə 18 məktəbə, 8 uşaq bağçasına, 6 səhiyyə obyektinə, 110 yaşayış binasına və 9 digər obyektlərə istilik verilməsi təmin edilmişdir.

İcra başçısı bildirmişdir ki, 2009-cu il ərzində istilik sahəsi üzrə istilik xətlərində və binaların zirzəmilərində aşağı istilik paylanma xətlərində 2 min metr müxtəlif diametrli istilik boruları dəyişdirilmiş, 26 qazanxana, 5 istilik məntəqəsində əsaslı və cari təmir işləri aparılmışdır.

Respublika Prezidenti cənab İlham Əliyev tərəfindən 2010-cu ilin “Ekologiya ili” elan edilməsi ilə əlaqədar Ekologiya və Təbii Sərvətlər Nazirliyində birgə komissiya yaradılmışdır ki, həmin komissiya tərəfindən rayon ərazisində salınacaq yeni yaşıllıq sahələri müəyyənləşdirilmiş, həm də bu sahələrə sonradan qulluq göstərilməsi üzrə müvafiq təkliflər hazırlanmaqdadır. Bizim ilkin təklifimizdə rayonda 10 yerdə cəmi 240 ha yaxın sahədə yeni yaşıllıq sahələrinin salınması nəzərdə tutulmuşdur və indiyədək rayonun bir sıra qəsəbələrində magistral yol kənarlarında idarə və müəssisələrin, qəsəbə nümayəndəliklərinin və bələdiyələrin iştirakı ilə 7,6 hektar ərazidə 7700 ədəd ağac əkilmiş və bu işlər davam etdirilir.

Bundan əlavə, Yeni Azərbaycan Partiyası Sabunçu rayon təşkilatının Bakıxanov qəsəbəsində ümumi sahəsi 1100 kvadratmetr olan 2 mərtəbəli inzibati binası 15 iyun 2009-cu il tarixdə istifadəyə verilmiş və orada ətraf sahə abadlaşdırılmış, çoxmərtəbəli yaşayış binalarının fasadları rənglənmişdir.

Hazırda Bakıxanov qəsəbəsindəki mərkəzi parkda Heydər Əliyev muzeyinin, Fətəliyev küçəsində rayon polis idarəsinin yeni inzibati binasının, Y.Əliyev küçəsində ayrılmış torpaq sahəsində isə rayon məhkəməsi, Apellyasiya Məhkəməsi, Dövlət Sosial Müdafiə Fondunun rayon şöbəsi, Əhalinin Sosial Müdafiə Mərkəzinin rayon şöbəsinin yeni inzibati binalarının tikintisinə hazırlıq işləri aparılır.

Milli Məclisin deputatı Eldar Quliyevin dəstəyi ilə Maştağa qəsəbəsindəki ümumi sahəsi 1,2 hektar olan istirahət parkında rayon qeydiyyat Şöbəsinin Maştağa bölməsinin binası da daxil olmaqla tikinti-quraşdırma və abadlıq işləri başa çatdırılaraq istifadəyə verilmiş və qəsəbənin girişində repressiyalara məruz qalmış soydaşlarımızın və şəhidlərin xatirəsinə həsr edilmiş memorial kompleksin tikinti işləri başa çatdırılmışdır. Bundan əlavə, 18 oktyabr 2009-cu ildə Dövlət Müstəqilliyi Günündə ulu öndər Heydər Əliyevin abidəsinin açılışı mərasimi keçirilmişdir.

Heydər Əliyev Fondunun vəsaiti hesabına Maştağa qəsəbəsindəki 21 saylı uşaq sanatoriyası yenidən qurularaq müasir avadanlıqlarla təchiz edilmiş, sanatoriyanın qarşısında hasar çəkilərək suvanıb rənglənmiş və 2009-cu il yanvarın 21-də Mehriban xanım Əliyevanın iştirakı ilə istifadəyə verilmişdir.

Heydər Əliyev Fondu öz ənənəsini davam etdirərək Pirşağı qəsəbəsindəki 34 saylı poliklinikanın və təcili yardım stansiyasının yenidən qurulması və müasir avadanlıqlarla təchiz edilməsi üzrə müvafiq layihə əsasında işləri davam etdirir.

Məlum olduğu kimi cənab Prezident İlham Əliyevin 29 dekabr 2009-cu il tarixli fərmanı ilə əhalinin təbii qaz istehlakına görə 1 oktyabr 2009-cu il tarixə qədər yığılmış 330 milyon manat məbləğindəki borcları ləğv edilmişdir ki, bu borcların rayon üzrə ümumi məbləği 43,3 milyon manat təşkil etmişdir.

Ümumiyyətlə, bu qərar əhali tərəfindən rəğbətlə qarşılanmışdır və buna görə cənab Prezdientə öz dərin təşəkkürümüzü bildiririk.

Bir məsələyə də geniş toxunan icra başçısı demişdir ki, Azərbaycanın işğal olunmuş ərazilərindən Sabunçu rayonunun müxtəlif sosial obyektlərində 5 mindən çox ailə və ya 25 mindən artıq məcburi köçkün məskunlaşmışdır. Onların və eləcə də şəhid, Qarabağ əlilləri və digər bu qəbildən olan ailələrin sosial müdafiəsinin gücləndirilməsi mənzil-kommunal şəraitinin yaxşılaşdırılması rayon icra hakimiyyətinin daim diqqət mərkəzində olmuşdur.

Belə ki, 2009-cu il ərzində Əmək və Əhalinin Sosial Müdafiəsi Nazirliyinin xətti ilə tikilmiş yaşayış binalarında rayonumuzdan 4 şəhid ailəsinə, 13 Qarabağ əlilinə və bir 20 Yanvar əlilinə mənzil verilmişdir.

Rayon icra hakimiyyəti aparatı rayonda fəaliyyət göstərən ictimai təşkilatlarla, o cümlədən şəhid ailələri, Böyük Vətən və Qarabağ müharibələri veteranları və əlilləri, Çernobıl əlilləri və iştirakçıları, 20 Yanvar faciəsi qurbanlarının ailələri, həmçinin digər xalqların icma nümayəndələri ilə həmişə olduğu kimi ötən il ərzində də mütəmadi olaraq bir sıra ictimai-siyasi, mədəni-kütləvi tədbirlərin həyata keçirilməsini təmin etmiş, bu kateqoriyadan olan vətəndaşların sosial-məişət məsələlərinin həlli istiqamətində mümkün köməkliklərin göstərilməsinə çalışmışdır.

Rayonda hərbi-vətənpərvərlik işinin aparılması da hazırda lazımi səviyyədədir. Artıq son illər rayonda demək olar ki, ordu sıralarına çağırışlardan boyunqaçırma halları yoxdur.

Təhsil sistemində müasir metod və texnologiyaların, mütərəqqi iş təcrübəsinin öyrənilməsi və tətbiqi sahəsində başlanmış işlər davam etdirilmiş, yeni yanaşmalar, yeni düşüncə tərzinin təşəkkülü genişlənmişdir. Təhsilin keyfiyyət və səmərəsini yüksəltmək üçün konkret tədbirlər görülmüş, məktəblərin maddi-texniki bazası əsaslı surətdə möhkəmləndirilmişdir. Əgər 2003-cü ildə rayon məktəblərində cəmi 47 kompyuter var idisə, 2009-cu ildə bu rəqəm 1260-a çatdırılmışdır.

2009-cu ildə rayonda 2606 nəfər orta məktəbi bitirmiş və ali məktəblərə sənəd verən 2257 nəfərdən 868 nəfəri və ya 38,5 faizi daxil olmuşdur ki, bu da 2008-ci ildəkindən 3,5 faiz çoxdur.

Ölkə Prezidentinin sərəncamına əsasən bütün məktəb kitabxanalarının latın qrafikalı ədəbiyyatla təchizatı davam etdirilmiş, şagirdlərə pulsuz dərs ləvazimatları, I sinfə gedən şəhid və imkansız ailələrdən olan 59 uşağa isə məktəbli forması və digər paltar və dərs ləvazimatları verilmişdir.

Rayon üzrə 4 mindən çox səhiyyə işçisinin çalışdığı 25 müalicə-profilaktik müəssisələr tərəfindən 10 qəsəbənin ərazisində 200 min nəfərdən artıq əhaliyə, 20-yə yaxın idarə, müəssisə və təşkilatların fəhlə və qulluqçularına, həmçinin rayonda müvəqqəti məskunlaşmış 25 minə yaxın məcburi köçkün soydaşlarımıza tibbi xidmət göstərilir.

Vətəndaşların rayon icra hakimiyyəti ilə birbaşa təmas qurmalarını, sənədlərin qəbulu və göndərilməsinin daha da sürətləndirilməsini təmin etmək məqsədilə icra hakimiyyətində xüsusi internet saytı və elektron poçtu fəaliyyət göstərmişdir.

İlin əvvəlindən müəyyən edilmiş qrafikə uyğun olaraq yerlərdə qəsəbələr üzrə nümayəndəliklərin hesabat yığıncaqları və rayon rəhbərliyinin, hüquq-mühafizə və aidiyyətı xidmət sahələrinin rəhbərlərinin iştirakı ilə bütün qəsəbələrdə sakinlərlə səyyar görüşlər keçirilmiş, onları narahat edən məsələlər öyrənilmiş, irad və təkliflər dinlənilərək uyğun tədbirlər görülmüş, müvafiq izahatlar verilmişdir.

Məruzəçi dedi ki, gələcəkdə də fəaliyyətimizi bu istiqamətdə daha da genişləndirərək, 2010-cu ildə qarşıda duran bütün vəzifələri ləyaqətlə yerinə yetirəcəyik.

Natiq sonda rayona göstərilən xüsusi diqqət və qayğıya görə möhtərəm İlham Əliyevə rayon ictimayyəti adından öz dərin münnətdarlığını bildirdi və dedi ki, rayon əhalisi ümummili liderimizin siyasi kursunun layiqli davamçısı cənab Prezidentin yürütdüyü siyasəti daim dəstəkləyəcək.

Sonra YAP Sabunçu rayon təşkilatının sədri Mehriban Abbasquliyeva, rayon polis idarəsinin rəisi Cavanşir Babayev, rayon gənclər və idman idarəsinin rəisi Rakif Əliyev, Mənzil Kommunal Təsərrüfatı İstehsalat Birliyinin rəisi Oruc Əhmədov, “Balaxanıneft” NQÇİ-nin rəisi Muğdət Xəlilov, əhalinin sosial müdafiəsi mərkəzinin direktoru Məhərrəm Balakişiyev çıxış edərək rayonda həyata keçirilən tədbirlərdən danışdılar.

Sonda Prezident Administrasiyasının məsul işçisi Tağı Tağıyev və Milli Məclisin deputatı Fərrux Zeynalov çıxış etdilər.

İclasın işində Milli Məclisin deputatı Eldar Quliyev də iştirak edirdi.

Rayon ictimaiyyəti adından yığıncaq iştirakçılarının ölkə Prezidenti cənab İlham Əliyevə müraciəti qəbul olundu.

Mehdi MÜKƏRRƏMOĞLU

Xalq qəzeti.- 2010.- 24 fevral.- S. 6.