Azərbaycan Gözdən Əlillər Cəmiyyəti fəaliyyətini genişləndirir

Son illər ölkəmizdə əlil insanlara qayğı xeyli artmış, möhtərəm Prezidentimz İlham Əliyevin bu sahədə imzaladığı sərəncamlar əlillərin həyat şəraitinin yaxşılaşmasında və onların cəmiyyətə inteqrasiyasında əhəmiyyətli rol oynamışdır. Eyni zamanda, ölkədə ictimai təşkilatların da fəaliyyətləri üçün geniş imkanlar yaradılmışdır.

Belə təşkilatlardan biri də öz genişmiqyaslı fəaliyyəti ilə fərqlənən Azərbaycan Gözdən Əlillər Cəmiyyətidir. Bu cəmiyyət yarandığı az vaxt içərisində öz üzvlərinin həyat şəraitinin yaxşılaşdırılması istiqamətində mühüm tədbirlər həyata keçirmiş, uğurlu layihələri reallaşdırmışdır. Ötən il isə cəmiyyət öz fəaliyətini daha da genişləndirmişdir.

Cəmiyyət üzvlərinin yığıncağında 2009-cu ilin yekunları ilə bağlı geniş hesabat məruzəsi ilə çıxış edən cəmiyyətin prezidenti Səmyar Abdullayev qazanılmış nailiyyətləri ölkədə həyata keçirilən quruculuq ışlərinin tərkib hissəsi kimi qiymətləndirmişdir. O bildirmişdir ki, regionlarda əlillərin sosial vəziyyətinin yaxşılaşdırılmasını təmin etmək məqsədilə 2010-2014-cü illəri əhatə edən dövlət proqramının hazırlanmasında cəmiyyət Əmək və Əhalinin Sosial Müdafiəsi Nazirliyi ilə yüksək səviyyədə əməkdaşlıq etmişdir. Ümid edirik ki, yaxın vaxtlarda qəbul ediləcək bu proqram gözdən əlillərin bütün regionlarda, o cümlədən Bakı şəhərində mənzil, məşğulluq, təhsil, səhiyyə, idman, istirahət və sair həyati əhəmiyyəti olan məsələləri öz həllini tapacaqdır.

Səmyar müəllim bildirmişdir ki, dünyada baş verən maliyyə böhranı bütün ölkələrin iqtisadiyyatına mənfi təsir etmişdir. Möhtərəm Prezidentimiz İlham Əliyevin çevik siyasəti nəticəsində isə ölkə iqtisadiyyatı gün-gündən inkişaf etmişdir. Daim yeniləşən Azərbaycanımızda gözdən əlil vətəndaşların və digər sosial qrupların bərabər imkanlar əldə etmələri üçün tədbirlərin həyata keçirilməsi davam etdiriləcək.

O qeyd etmişdir ki, maliyyə vəsaitləri üzrə daxilolmalar layihələr üzrə donorlardan, əməkhaqqları üzrə GƏC-in müəssisələri tərəfindən həyata keçirilən ayırmalardan, maddi yardım və kənar mənbələrdən daxil olan ianələrdən formalaşmışdır. Belə ki, 2009-cu ildə GƏC-ə ümumi daxilmolmalar 91 min 932 manat olmuşdur.

2009-cu ildə GƏC üzvlərinə humanitar yardım məqsədilə 9 min 354 manat, masajçı və rabitəçi kurslarının təşkili və inkişafı üzrə ümumilikdə 37 min 341 manat, xarici səfərlərin qarşılıqlı maliyyələşdirilməsi üçün 7 min 731 manat, mərkəzi idarə işçilərinə, müəllimlərə və rayon təşkilatlarının işçilərinə əməkhaqqı 20 min 741 manat vəsait xərclənmişdir.

Son illər gözdən əlil insanların cəmiyyətə üzv olmaq marağı xeyli artmışdır. Onlar yaxşı bilir ki, bu insanların maraq və mənafeləri təmin edilir. Cəmiyyət regionlarda görmə üzrə əlil insanlar icması ilə görüşlər, onların aktivliyinin və intellektual səviyyələrinin artırılması üçün reabilitasiya tədbirləri həyata keçirir, yeni iş yerlərinin yaradılması üçün yollar müəyyənləşdirir. Kor və zəif görən insanların təhsil, səhiyyə və mədəniyyət sahələri üzrə xidmətlərdən maksimum yararlanmalarının təmin edilməsi, onlar arasında idman yarışlarının kütləviləşdirilməsi, eyni zamanda görmə üzrə əlil insanların sosial rifahının yaxşılaşdırılmasına nail olmaq məqsədilə müxtəlif dövlət qurumları ilə əlaqə yaradılır.

Üzvlərinin sosial rifahının yaxşılaşdırılmsına dəstək vermək, eyni zamanda cəmiyyətin infrastrukturunu yeniləşdirmək, habelə islahatlar yolu ilə cəmiyyətin fəaliyyətlərinin QHT haqqında qanunun tələblərinə uyğunlaşdırmaq məqsədilə islahat komissiyası yaradılmışdır. İslahat komissiyası cəmiyyətin respublika üzrə müəssisələrində və rayon, şəhər, rayonlararası və ilk təşkilatlarında yoxlamalar aparmış və islahatlara dair bir sıra təkliflər hazırlamışdır. Ciddi nöqsanlara yol vermiş müəssisələrin fəaliyyətləri qiymətləndirilmiş, lazımi tədbirlər görülmüşdür.

Son illər Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyeva gözdən əlillərin həyat şəraitinin yaxşılaşdırılması, onların informasiya texnologiyalarına yiyələnmələri üçün bizə yaxından köməklik göstərmişdir. Artıq bir neçə layihənin reallaşması nəticəsində gözdən əlil insanlar təhsil ala bilir, iş yerləri ilə təmin olunurlar.

Tədbirdə bildirildi ki, cəmiyyət gözdən əlil insanların sosial vəziyyətinin yaxşılaşdırılması və onların cəmiyyətə inteqrasiyası üçün gələcəkdə də əhəmiyyətli layihələrin reallaşmasını təmin edəcək, bu insanların yeni iş yerləri ilə təmin olunması üçün əhəmiyyətli tədbirlər reallaşdıracaqdır.

M.MÜKƏRRƏMOĞLU

Xalq qəzeti.- 2010.- 25 fevral.- S. 7.