Dövlət İdarəçilik Akademiyasında Xocalı faciəsi anılmışdır

Fevralın 24-də Azərbaycan Respublikasının Prezidenti yanında Dövlət İdarəçilik Akademiyasında Xocalı soyqırımı qurbanlarının xatirəsinə həsr olunmuş mərasim keçirilmişdir. Əvvəlcə soyqırımı qurbanlarının xatirəsi bir dəqiqəlik sükutla yad edilmişdir.

Yığıncağı akademiyanın rektoru, əməkdar elm xadimi, professor Seyfəddin Qəndilov açaraq, tariximizin salnaməsinə qara səhifə kimi düşmüş bu faciəni təfərrüatı ilə açıqlamış, erməni separatçılarının, terrorçu dəstələrinin əsrlər boyu “Böyük Ermənistan” yaratmaq xülyası ilə xalqımıza qarşı daim apardıqları təxribatları qeyd edərək, Xocalıda vəhşicəsinə həyata keçirilən, tarixdə analoqu olmayan bu hadisədən danışdı. Yalnız ümummilli liderimiz Heydər Əliyev hakimiyyətə qayıtdıqdan sonra başımıza gətirilən fəlakətlərin beynəlxalq təşkilatlara, dünya ictimaiyyətinə çatdırılması yönündə görülən işləri xatırlatmışdır. Rektor dünya azərbaycanlılarının haqq səsimizin bütün dünyaya çatdırılmasının zəruriliyini vurğulamış, həmvətənlərimizin bu yöndə səfərbər olaraq gördüyü işlərin əhəmiyyətini diqqətə çatdırmışdır. Həmçinin torpaqlarımızın azad olunması istiqamətində möhtərəm Prezidentimiz cənab İlham Əliyevin ətrafında xalqımızın sıx birləşməsinin vacibliyini qeyd etmişdir.

S.Qəndilov qeyd etdi ki, Xocalı soyqırımı barədə dünya ictimaiyyətinə dolğun məlumatlar verilməsində Heydər Əliyev Fondunun, şəxsən fondun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın fəaliyyəti yüksək qiymətə layiqdir. Heydər Əliyev Fondunun Rusiya Federasiyası üzrə nümayəndəsi Leyla xanım Əliyevanın rəhbərliyi ilə aparılan “Xocalıya ədalət” kampaniyası beynəlxalq aləmdə böyük rezonans doğurmuşdur.

Rektor diqqətə çatdırdı ki, Xocalı soyqrımına beynəlxalq aləmdə hüquqi-siyasi qiymət verilməlidir.

Sonra DİA-nın YUNESKO və Gənclərin Dostluq Əlaqələndirmə Mərkəzinin birgə fəaliyyəti ilə yaradılan www.Qarabaq.ws saytının Xocalı bölməsi nümayiş etdirildi.

Milli Məclisin deputatları Elman Məmmədov və Həvva Məmmədova erməni quldurlarının azərbaycanlılara qarşı törətdikləri soyqırımından danışdılar.

Sonda incəsənət xadimi, əməkdar artist Ağalar Bayramovun və akademiya tələbələrinin iştirakı ilə faciə qurbanlarının xatirəsinə həsr olunmuş ədəbi-bədii kompozisiya göstərilmişdir.

Əliqismət BƏDƏLOV

Xalq qəzeti.- 2010.- 25 fevral.- S. 3.