Nizami rayonunda Xocalı faciəsinin ildönümü qeyd olunmuşdur
Bəşər tarixinin ən qanlı hadisələrindən
sayılan Xocalı qətliamından 18 il ötür. 1992-ci
il fevralın 25-dən 26-na keçən gecə erməni
qaniçənləri keçmiş sovet ordusunun
tör-töküntülərindən təşkil olunmuş
366-cı motoatıcı alayının köməyi ilə Azərbaycanın
ən qədim yaşayış məntəqələrindən
sayılan Xocalı şəhərini yerlə yeksan etdilər.
Heç bir insanlığa sığmayan bu amansız
soyqırımı hadisəsi, ağır cinayət aktı nəticəsində
613 nəfər günahsız soydaşımız xüsusi qəddarlıqla
qətlə yetirildi. Neçə-neçə əliyalın,
köməksiz insan ağır yaralandı, itkin düşənlər
oldu. Ermənilərin Xocalıda törətdikləri vəhşiliklər,
qətliamlar xalqımıza qarşı əvvəlcədən
planlaşdırılmış soyqırımı siyasəti
olmaqla yanaşı, həm də bəşəriyyətə,
insanlığa yönəldilmiş ağır cinayət,
vandalizm aktı idi.
Uzun illər keçməsinə
baxmayaraq, bu bəşəri cinayət dünya birliyi tərəfindən
öz həqiqi qiymətini hələ də
almamışdır. Bununla belə, xalqımız o
müdhiş olayı hər il böyük ürək
ağrısı ilə qeyd edir, faciə qurbanlarının əziz
xatirəsi elliklə anılır. Dünən paytaxtın
Nizami rayonunda da Xocalı şəhidlərinin xatirəsinə
həsr olunmuş anım mərasimi keçirildi. Tədbirin
keçirildiyi yerdə Xocalı faciəsini əks etdirən
rəsm əsərlərindən ibarət fotoguşə
yaradılmış, matəm şamları
yandırılmışdı. Nizami Rayon İcra hakimiyyətinin
başçısı Tahir Budaqov Xocalı
ağrısını, Xocalı niskilini tabloya
köçürən rayon məktəblilərinin əl
işlərindən ibarət sərgi ilə tanış oldu.
Tədbir Xocalı şəhidlərinin
xatirəsini bir dəqiqəlik sükutla yad olunması ilə
davam etdirildi.
Nizami rayon uşaq-gənclər
yaradıcılıq məktəbinin dərnək üzvləri
“Xocalının qisası yerdə qalmayacaq” adlı ədəbi-bədii
kompozisiya ilə çıxış etdilər. Qəlbləri
riqqətə gətirən bu kompozisiya mərasim
iştirakçılarında kövrək hisslər
oyatdı.
Xocalı sakinləri
adından çıxış edən jurnalist Səriyyə
Müslümqızı və Xocalı Rayon İcra Hakimiyyətinin
şöbə müdiri Ramilə Xudayarova erməni
quldurları və onların havadarları tərəfindən
xalqımıza qarşı törədilmiş qanlı aksiya
– soyqırımı siyasətinin tərkib hissəsi olan
Xocalı faciəsinin ağrı-acılarından söhbət
açdılar. Erməni vandalizminin nəticəsi olaraq didərgin,
köçkünlük həyatı yaşayan xocalılara
göstərilən doğma münasibətə, diqqət və
qayğıya görə Nizami Rayon İcra Hakimiyyətinin rəhbərliyinə
şəhid şəhəri – Xocalı sakinləri adından
minnətdarlıq ifadə olundu. Dövlət
başçısı, Ali Baş Komandan İlham Əliyevin
apardığı uğurlu xarici siyasətin nəticəsi
olaraq bütün məcburi köçkünlərin, o
cümlədən də xocalıların tezliklə doğma
yurdlarına qayıdacaqları əminliklə
vurğulandı.
Anım mərasimində
çıxış edən Nizami Rayon İcra Hakimiyyətinin
başçısı Tahir Budaqov bu amansız qətliamın
ildönümü ilə bağlı keçirilən tədbirdə
iştirak edən Xocalı sakinlərinə dərin hüznlə
başsağlığı verdi. XX əsrin ən amansız, dəhşətli
hadisələrindən sayılan Xocalı faciəsinə
vaxtında lazımi hüquqi-siyasi qiymət verilmədiyindən
təəssüfləndiyini bildirən natiq ötən illər
ərzində xalqımızın başına gətirilən
müsibətlərə, bəlalara görə erməni
qaniçənlərinin və onların havadarlarının gec-tez
ədalət məhkəməsi qarşısında cavab verəcəklərini
vurğuladı. T.Budaqov bu gün ölkəmizin müxtəlif
yerlərində, o cümlədən paytaxtın Nizami rayonunda
məskunlaşmış xocalıların o müdhiş gecənin
ağrı-acılarına, iztirablarına baxmayaraq, öz ləyaqətini,
məğrurluğunu qoruyub saxladıqlarını
xalqımıza xas nəcib keyfiyyət kimi dəyərləndirdi.
Dünya birliyinin xalqımızın Qarabağ dərdinə,
Xocalı faciəsinə hələ də ikili standartlar
mövqeyindən yanaşmaqda davam etdiyindən təəssüfləndiyini
dilə gətirən natiq bunun tarixi ədalətsizliyin əsl
mahiyyətini üzə çıxarmağa maneçilik
törətdiyini bildirdi. Qeyd olundu ki, bütün bunlara
baxmayaraq, Prezident, Ali Baş Komandan İlham Əliyevin
apardığı məqsədyönlü fəaliyyət, gərgin
danışıqlar Azərbaycanın haqq səsinin
bütün dünya birliyinə daha gur səslə
çatdırılmasına imkan verir. Məhz buna görə
də xalqımıza qarşı yol verilmiş bütün
tarixi cinayətlər, ədalətsizliklər kimi Xocalı
faciəsi də gec-tez öz həqiqi qiymətini alacaq,
günahkarlar cəzalarına çatacaqlar.
Tədbirdə Xocalı
şəhidlərinin əziz xatirəsinə ehtiram əlaməti
olaraq ehsan süfrəsi açıldı. Axırda Nizami
rayonunda məskunlaşmış Xocalı sakinlərinə
rayon icra hakimiyyəti tərəfindən maddi yardım edildi.
Mirbağır YAQUBZADƏ
Xalq qəzeti.- 2010.- 25 fevral.- S. 2.