Xocalı faciəsinin ildönümünə həsr olunur

 

1992-ci il fevralın 25-dən 26-na keçən gecə Ermənistan təcavüzkar ordusu tərəfindən Xocalı şəhərinin dinc sakinlərinə qarşı hərbi təcavüz edilmiş, yüzlərlə günahsız insan qətlə yetirilmişdir.

 

Xalqımıza qarşı xüsusi amansızlıqla törədilmiş bu qanlı cinayət əməli “XX əsrin genosidi” kimi tarixə düşmüşdür. Xocalının işğalı zamanı onlarla Azərbaycan əsgəri, əli silah tutan sakinlər əsl igidlik göstərmiş, düşmənlə qeyri-bərabər döyüşdə mərdliklə həlak olaraq, xalqımızın qəhrəmanlıq tarixinə əbədi daxil olmuşlar. Bütün bunlar gənc nəsil üçün Vətən sevgisinin layiqli örnəyidir. Hər il Xocalı faciəsinə həsr olunmuş çoxsaylı tədbirlərin və sərgilərin təşkili Vətən uğrunda şəhid olanların və soyqırımına məruz qalmış günahsız qurbanların xatirələrinin anılması və gənc nəslin vətənpərvərlik ruhunda tərbiyəsi baxımından əhəmiyyət daşıyır.

Xocalı faciəsinin on səkkizinci ildönümünün qeyd edilməsi ilə əlaqədar Mədəniyyət və Turizm Nazirliyi tərəfindən bir sıra tədbirlər keçirilir.

Əməkdar rəssam Adil Rüstəmovun “Qarabağ şikəstəsi” rənglərin göz yaşında” adlı silsilə qrafika əsərlərindən ibarət sərgi V.Səmədova adına sərgi salonunda təşkil olunmuşdur.

M.F.Axundov adına Milli Kitabxanada isə “Xocalı soyqırımı – əsrin faciəsi” adlı kitab sərgisi keçirilmişdir. Eyni zamanda, bu kitabxanada “Xocalı soyqırımı rabitəçilərin yaddaşında” adlı kitabın təqdimat mərasimi də baş tutmuşdur.

“Muzeydə teatr” silsiləsi çərçivəsində Zərəngiz Dəmirçi Qayalının “Cavab ver!” poeması əsasında səhnələşdirilmiş “Xocalı tamaşası”nın nümayişi isə Muzey Mərkəzində olmuşdur.

Dövlət İncəsənət Muzeyində “Xocalı harayı” adlı kitabın təqdimatında ziyalılar, sənət adamları iştirak etmişlər.

Bu gün isə Azərbaycan Dövlət Filarmoniyasında Üzeyir Hacıbəyli adına Dövlət Simfonik Orkestri və Dövlət Xor Kapellasının iştirakı ilə Xocalı şəhidlərinin xatirəsinin anım gecəsi keçiriləcək.

Respublikanın regionlarında “Xocalı faciəsi”nə həsr olunmuş tədbirlər isə fevralın 28-dək davam etdiriləcəkdir.

 

 

M.MÜKƏRRƏMOĞLU

 

Xalq qəzeti.- 2010.- 28 fevral.- S. 7.