Gün gələcək şəhid ruhları sevinəcək

Xocalı soyqırımının 18-ci ildönümü, ölkəmizin hər yerində olduğu kimi, fevralın 26-da Azərbaycan Dövlət Pedaqoji Kollecində də geniş qeyd olundu. Foyedə quraşdırılmış Xocalı soyqırımını əks etdirən çoxsaylı kitablar və fotostendlər tədbir iştirakçılarını, o müdhiş gecənin bilavasitə iştirakçıları olmuş Xocalı sakinləri və şəhid ailələrini bir anlıq o dəhşətli günlərə qaytardı. Al qırmızı qərənfillər və çoxsaylı yanar şamlar, eləcə də Xocalı soyqırımını əks etdirən plakat və videogörüntülərlə bəzədilmiş səhnə daha baxımlı, daha yaddaqalan oldu.

“Xocalı qan yaddaşımızdır” anım gününü giriş sözü ilə açan məktəbin tədris işləri üzrə direktor müavini, respublikanın əməkdar müəllimi Füzuli Qasımov tədbir iştirakçılarından Xocalı soyqırım qurbanlarının əziz xatirəsini bir dəqiqəlik sükutla yad etməyi xahiş etdi. Daha sonra F.Qasımov bu faciədə 613 nəfərin qətlə yetirildiyini, 1000 nəfər müxtəlif yaşlı dinc sakinin aldıqları güllə yarasından əlil olduğunu, 106 qadının, 63 azyaşlı uşağın, 70 qocanın erməni qəsbkarları tərəfindən amasızcasına öldürüldüyünü, 8 ailənin tamamilə məhv edildiyini, faciə baş verən gecə 1275 nəfər dinc sakinin girov götürüldüyünü, 150 nəfərin taleyinin indi də məlum olmadığını ürək ağrısı ilə qeyd etdi.

Aradan 18 il ötməsinə baxmayaraq, beynəlxalq təşkilatların hələ də Xocalı soyqırımına hüquqi-siyasi qiymət verməməsini tarixi ədalətsizlik kimi dəyərləndirən F.Qasımov çıxışının sonunda bu il Heydər Əliyev Fondunun dəstəyi ilə Xocalı soyqırımının dünyanın 100-dən artıq nöqtəsində qeyd olunduğunu bildirdi. Natiq daha sonra fondun Rusiya üzrə nümayəndəliyinin təşəbbüsü ilə keçirilən “Xocalıya ədalət” kampaniyası və digər silsilə tədbirlərin məhz fondun təbliğat materialları əsasında reallaşdırıldığını xüsusi vurğuladı.

Daha sonra söz bədii-qiraət ustalarına verildi. Kollecin tərbiyə işləri üzrə direktor müavini, qabaqcıl təhsil işçisi Qızxanım Abbaszadə, ictimai elmlər fənn komissiyasının müəllimi İradə Ağayeva və musiqi müəllimi Şəfiqə Həsənovanın ssenarisi əsasında hazırlanmış “Xocalı qan yaddaşımızdır” ədəbi-bədii kampaziya göstərildi. Tələbələrin ifasında səslənən hər bir şeir parçasında, musiqi nömrəsində gənclərimizdə ölməz vətənpərvərlik ruhu, sabaha ümidi və doğma torpaqlarımızın tezliklə yağı düşməndən azad olacağı günün işartısını gördüm. Bəlkə elə bu səbəbdən də Bülbül adına məktəbin gənc xanəndələri Fərid Sultanov və Faiq Əkbərovun tarzən Salman Bədəlov və kamançaçı Vüqar Zamanovun müşayiəti ilə oxuduqları “Qarabağ şikəstəsi” bu tarixi faciəni unutmamağa bir çağırış idi. Bəlkə elə bu səbəbdən musiqi müəllimi Şəfiqə Həsənovanın şəhid Alı Mustafayevin sözlərinə bəstələdiyi “Dəli bir ağlamaq keçir könlümdən” və məktəb xorunun ifasında səslənən mahnılar hamını ayağa qaldırdı. Bu ifalara əl çalan olmadı. Hamının gözündə bir intiqam əhvalı gördüm. Və bildim ki, tezliklə o gün gələcək, şəhid ruhları sevinəcək, qara bulud üstümüzdən çəkiləcək, ana torpaq, doğma Qarabağ yenə bizim olacaq.

Rafiq SALMANOV

Xalq qəzeti.- 2010.- 27 fevral.- S. 6.