Azərbaycan dövlətinin sükanı etibarlı əllərdədir

Ona görə də ölkəmiz dünya siyasətində öz maraqlarını qətiyyətlə qoruyur

28 May Respublika Günü münasibətilə dünyanın müxtəlif ölkələrinin dövlət və hökumət başçılarının Azərbaycan Prezidenti İlham Əliyevə ünvanlanmış çoxsaylı təbrik məktublarında respublikamızın müstəqillik illərində qazandığı uğurlar, dünya birliyində möhkəmlənən mövqeyi, Azərbaycan rəhbərinin yeritdiyi düzgün daxili və xarici siyasət təqdir olunur, yüksək qiymətləndirilirdi. Qardaş Türkiyənin ali rəhbərlərinin, dünyanın superdövlətlərinin başçılarının təbrik məktublarında Azərbaycan Prezidentinə və xalqımıza çatdırılan səmimi duyğu və düşüncələr hər bir yurdsevər soydaşımızın qəlbində bir daha haqlı öyünc yaratdı.

ABŞ Prezidenti Barak Obama öz məktubunda "qlobal hədəflərə qarşı mübarizədə, regional sabitliyin gücləndirilməsində, ümumi təhlükəsizlik problemlərinin aradan qaldırılmasında ölkələrimiz arasındakı tərəfdaşlıqdan qürur duyulduğunu" söyləyir, səmimiyyətlə arzu edir ki, bu əməkdaşlıq getdikcə dərinləşdirilsin. Məktubda daha sonra "ABŞ-ın Azərbaycan hökuməti və xalqı ilə möhkəm münasibətləri yüksək dəyərləndirdiyi, həm öz regionunda, həm də dünyada sabitliyə töhfə verən, çiçəklənən və demokratik dövlət kimi Azərbaycanın suverenliyinə və inkişafına sadiqliyi" vurğulanır.

Son bir ildə supergüclərin Azərbaycan və onun strateji maraqlarını ardıcıl müdafiə edən Türkiyə ətrafında cərəyan edən ədalətsiz tələbələrdən, əsassız təzyiqlərdən sonra ABŞ rəhbərinin belə bir səmimi və obyektiv meyarları əks etdirən məktubunu, doğrudan da, Azərbaycan Prezidenti İlham Əliyevin ölkəmizə düşmən dairələrin fitnə-fəsadlarından qidalanan təzyiqləri konstruktiv mövqe, möhkəm siyasi iradə ilə dəf etməsinin nəticəsi saymaq olar. "İkili standartlar"ın hökm sürdüyü bir dövrdə ölkəmizin yeritdiyi tarazlı xarici siyasətin necə maneələrlə üzləşdiyini, dövlət başçısından hansı zəka, iradə, enerji və çeviklik tələb etdiyini təsəvvür etmək üçün çağdaş dünyanı çalxalandıran "görünməz dalğalar"ın mahiyyətinə nəzər salaq.

Bu dünyanın ədalət tərəzisinin pərsəngi düzəlmir ki, düzəlmir. O tərəzinin dəstəyi böyük və güclü, varlı dövlətlərin əlindədir, istədikləri vaxt onun bir gözünü əyir, dünyanı qarışdırıb bir-birinə vura bilirlər. Bu dünyada kiçik dövlətlərin baş çıxarıb özünü saxlaması çox çətindir. Bir-birilə rəqabət aparan böyük güclərin maraqları hansısa kiçik dövlətdən keçirsə, onun durumu lap ağırlaşır. Çünki atalar demişkən, aşağıda saqqal, yuxarıda bığ durur. Biz çox mürəkkəb, dəlisov bir zəmanədə yaşayırıq. Kiçik dövlətlərin başçılarından öz dövlətini, xalqını qoruyub saxlamaq üçün çox keyfiyyətlər tələb olunur - sadalasan uzun bir siyahı alınar.

Bəli, öyünə bilərik ki, belə dönəmdə və durumda olan xalqımızın bəxti gətirmişdir. Üç tərəfdən onun varlığını istəməyən dövlətlərlə əhatələnmiş Azərbaycanımızın sükanı lider kimi çox keyfiyyətlərə malik olduğunu həm dünyaya, həm də öz xalqına artıq sübut etmiş Prezident İlham Əliyevin əlindədir. O, siyasətin dolambac yolları ilə irəliləyir, dövlətinin problemlərinin həlli üçün əzmlə mübarizə aparır.

İlham Əliyev 2003-cü ildə birinci dəfə prezident seçiləndən sonra xalqına müraciətlə bəyan etmişdi: "Mən hər bir azərbaycanlının prezidenti olacağam..." Bu gün barmaqla sayıla bilən insanlardan başqa, bütün xalq İlham Əliyevin öz millətinə, vətəndaşlarına sevgisini, gecə-gündüz bütün cəbhələrdə yorulmaq bilmədən çarpışmasını görür və dəyərləndirir.

Prezident yeni iş yerlərinin yaradılması, regionların inkişafı haqqında verdiyi sözə əməl etdi: Qəbələ, Yevlax, Gəncə, Naxçıvan, Lənkəran, Xaçmaz və s. şəhər və rayonlar tanınmaz dərəcədə dəyişmişdir. 2003-2008-ci illərdə Azərbaycan iqtisadiyyatı inkişafına görə MDB ölkələri arasında birinci yerə çıxdı. Son iki ildə dünyanı bürümüş böhransa dövlətimizi inkişafdan saxlaya bilmədi. Ötən 2009-cu ildə ÜDM 9 faiz artımla, inflyasiya isə 2 faizlə başa vuruldu.

Azərbaycan idmançılarının son üç olimpiadada uğurlar qazanması, sənaye və istehsal obyektlərinin ölkənin bütün bölgələrində də yaradılması, şəhər və kəndlərdə abadlıq işlərinin görülməsi, yolların çəkilməsi, məktəb və xəstəxanaların, idman komplekslərinin, körpülərin tikilməsi və s. Prezident İlham Əliyevin adı ilə bağlıdır.

Artıq bütün dünya İlham Əliyevi yüksək təhsilli, geniş erudisiyaya malik kamil, təmkinli, çox çevik siyasi xadim kimi tanıyır, xalq isə öz dövlət başçısını sadəliyinə, xeyirxahlığına, bütövlüyünə, cəsarətinə və s. bu kimi xüsusiyyətlərinə görə sevib hörmət edir. O, bütün bölgələrə səfər edib sadə vətəndaşlarla görüşür, arzu və təkliflərini dinləyir. Prezident haqqında deyirlər: "O, irsən atasından dəmir xarakter, siyasətin sirlərini, dövlət idarəçiliyini götürmüş, anasından ürək yumşaqlığı, nəciblik, humanistlik, sadə insanlara sevgi duyğularını əxz etmişdir."

Sovet dönəmində 70 il qapalı qalmış ölkəmizin qapıları dünyaya açıldıqdan sonra "oksigenin" çoxluğu dövranın gərdişindən, siyasətindən qədərincə başı çıxmayan, azadlıq, müstəqillik əzmi ilə ayağa qalxmış insanlarımızın bir qismini çaş saldı. Ötən illər ərzində millət ayılsa da, bəzi vətəndaşlarımızda bu çaşqınlıq hələ də davam edir. Lakin bir çoxları dünyanın gərdisini dəyərincə qavraya bilmir, digər qism stereotip populist baxışlardan qurtulmamışlar. Geniş kütlələrin, iş-güclə məşğul olan sadə insanların siyasi savadı aşağıdır, dünyada, siyasət aləmində baş verən oyunlardan tam baş aça bilmirlər. Onların düşmən ünsürlərinin təsiri altına düşməməsi üçün maarifləndirmə işlərini gücləndirməkdə ziyalılar fəal iştirak etməlidirlər. Axı onların sözləri məmurlarınkından daha təsirli olar.

Prezident İlham Əliyev uğurla müstəqil xarici siyasət yeridir. Xarici güclərin köməyi və bilavasitə iştirakı ilə ərazimizin 20 faizini işğal etmiş Ermənistandan başqa, dünyanın bütün ölkələri ilə Azərbaycan dövlətinin əlaqələri normaldır. BMT, ATƏT, AŞ, AB, MDB və s. beynəlxalq təşkilatların tribunalarından çıxış edən, istər Qərbdə, istərsə də Şərqdə dövlət başçıları ilə görüşən İlham Əliyev Azərbaycanın haqq səsini bütün dünya ictimaiyyətinə çatdırır, ölkəmizin mənafeyini ləyaqətlə qoruyur.

Təkcə respublikamızda yox, bütün dünya azərbaycanlıları başa düşürlər ki, yüksək intellektə, dərin biliyə, çevik analitik təhlilə, uzaqgörən siyasətə malik olan İlham Əliyevin alternativi yoxdur. O, böyük idarəçilik məktəbi keçmişdir. Bu məktəb təkcə məşhur ali təhsil ocaqlarının auditoriyaları olmamışdır. O, böyük siyasət ustası Heydər Əliyev məktəbinin yetirməsidir, həmişə tanınmış şəxsiyyətlərin iştirak etdiyi yüksək məclislərdə olmuşdur. Lakin o, dövlət başçısı kimi konkret zaman və məkan, dəyişən durum faktorlarını həmişə nəzərə alaraq seçdiyi yolla gedir.

Azərbaycan Prezidenti öz polad xarakterini, kəskin mövqe və iradəsini böyük dövlətlərin başçılarına dəfələrlə göstərmişdir. Onun belə iradə nümayiş etdirməsi Qızıl Arslanın, Uzun Həsənin, Şah İsmayıl Xətainin, Cavad xanın, Bakı hakimi Hüseynqulu xanın tariximizə yazdığı kişilik, ərənlik xüsusiyyətlərinin təzahürüdür. Xalqımız İlham Əliyevin bu dönməzliyini çox yüksək dəyərləndirdi... Mən inanıram ki, hansı yolla olursa-olsun düşmənə dərs verib, itirilmiş Azərbaycan torpaqlarını qaytaracaq Prezident İlham Əliyevin adı böyük türk xaqanlarının siyahısına yazılacaqdır.

İlham Əliyev yeni dövrün Prezidentidir, Azərbaycanın gələcəyinin Prezidentidir. O, balansı pozulmuş dünyanın bu qarışıq vaxtında siyasətin dolaşıq labirintləri ilə xalqını gələcəyə aparır. Ötən əsrdə böyük faciələr yaşamış dözümlü, səbrli xalqının ürəyində gələcəyə ümid çırağı yandırmışdır, özünə inam yaratmışdır. Xalq inanır ki, ölkə prezidenti seçiləndən işğalçı Ermənistana qarşı diplomatik hücum siyasəti yeridən İlham Əliyevin başçılığı ilə öz tarixi torpaqlarını erməni-rus işğalından azad edəcəkdir.

İlham Əliyev xalqının sevgi və ehtiramını qazanmışdır. Ölkə daxilində və xaricində qəti gedişlər etmək üçün rəhbərin bundan böyük güc mənbəyi ola bilməz. Mən bir vətəndaş kimi prezidentimlə, dövlətimin başçısı ilə fəxr edirəm. Bütün azərbaycanlıların illərlə həsrət qaldığı bayrağı bu gün uca tutan, dünyadakı bütün soydaşlarımın Prezidentini duyuram, siyasət meydanında onun hər addımını başa düşürəm. Çünki o, xalqımın iradəsini ifadə edir. Çox qarışıq zəmanəmizdə xalqımıza üz tuturam: Gəlin, indiki çətin dönəmdə bizə hava və su kimi gərək olan, hamımızın arzuladığı, vacibliyini anladığı Böyük Birlik xatirinə xırda inciklikləri, şəxsi ambisiyaları bir qırağa qoyaq! Gəlin soyuq başla, praqmatik ağılla Azərbaycanımızın durumunu düşünək, real gerçəkliyi hesaba alıb, ayıq başla qərar qəbul edək! Bizim - 50 milyonluq xalqımızın qurtuluş yolu birlikdədir.

70 il kommunist yalanlarına uyduq, içimizdən gələn millətçiliyin yox, şimaldan körüklənən yalançı ideyanın arxasınca gedib aldandıq. Keçmiş olsun! Bundan belə Qərbdən "demokratiya", "insan hüquqları" adları altında körüklənən ikili süarlara, cənubdan yeridilən müxtəlif dini təmayüllərə uymamalıyıq. Əzəli və bəşəri demokratiyalardan - Roma, Yunan, İslam, elə indiki Qərb demokratiyasından da faydalanıb öz uyğun demokratiyamızı yaratmalıyıq.

Millətimiz, dövlətimiz üçün bu mürəkkəb dönəmdə onun başçısı ətrafında birləşməliyik. Bütöv Azərbaycan uğrunda sıralarımızı sıxlaşdırmalıyıq! Düşünürəm ki, indiki dönəmdə İlham Əliyev səviyyəsində dövlətimizə başçılıq edə biləcək başqası yoxdur! Bunu yaşı 60-ı keçmiş, indiyədək heç bir partiyanın, siyasi qurumun üzvü olmamış, dövlət vəzifəsi almamış, öz zəhməti, təmiz adı ilə yaşamış bir ziyalı deyir... Çox ölkələr gəzib dolaşmış, siyasətdən, dünyanın işlərindən az-çox başı çıxan jurnalist, şərqşünas-alim deyir. Bu sözləri Vətənini sevən, xalqının mənafeyini hər şeydən üstün tutan, Bütöv və Böyük Azərbaycan sevgisi ilə ziyalı vətəndaş yazır...

Mən ingilisdilli qəzetin baş redaktoru kimi, Azərbaycan Prezidentinin BMT, AŞPA və s. beynəlxalq təşkilatların tribunasından, tanınmış dövlət başçıları ilə görüşlərdə çıxışlarını izləmişəm. Birbaşa, kağızdan oxunmadan ingiliscə səslənən bu çıxışlarda bir dənə də artıq söz yoxdur. Onun hər ifadəsi nişangaha atılmış sərrast güllə kimi düz "onluğa" dəyir.

Azərbaycan Prezidentini ölkənin birinci xanımı ilə üçrəngli, ay-ulduzlu bayrağımızın fonunda Avropanın yüksək saraylarında görəndə qəlbimiz fərəh hissi ilə dolur. Onlar qoşa qanad kimi öz xalqına xidmət edib onu gələcəyə aparırlar. Onlar erməni təbliğatına aldanaraq, ötən əsrin sonlarınadək bizi geridə qalmış, vəhşi, qaniçən millət kimi təsəvvür etmiş bir sıra Qərb insanlarını utandırırlar.

Fazil ABBASOV

Xalq qəzeti.- 2010.- 24 iyul.- S. 5.