I Beynəlxalq İstanbul Opera Festivalı "Koroğlu" operası ilə yekunlaşmışdır

İstanbulun Halic Konqress Mərkəzinin səhnəsində "İstanbul - Avropa Mədəniyyətinin Paytaxtı-2010" mədəniyyət ili çərçivəsində iyulun 2-dən başlanmış Birinci Beynəlxalq İstanbul Opera Festivalına TÜRKSOY-un təşəbbüsü ilə hazırlanmış "Koroğlu" operasının nümayişi ilə yekun vurulmuşdur. Azərbaycanın mədəniyyət və turizm naziri Əbülfəz Qarayev, Türkiyənin mədəniyyət və turizm naziri Ərtoğrul Günay, TÜRKSOY-un baş katibi Düsen Kaseinov, ölkəmizin İstanbuldakı baş konsulu Həsən Zeynalov, türkdilli ölkələrin diplomatik nümayəndəliklərinin rəhbərləri tamaşaya baxmışlar.

Azərbaycanın dahi bəstəkarı Üzeyir Hacıbəylinin bu ölməz əsərinə ötən il professor Əflatun Nemətzadə quruluş vermişdir. TÜRKSOY-un bu layihəsinə Azərbaycan, Türkiyə, Qazaxıstan, Qırğızıstan, Rusiya Federasiyasının Tatarıstan və Başqırdıstan respublikalarından 250 opera sənətçisi rol alımış və tamaşa Bişkek, Almatı, Ankara və Bakı şəhərlərində böyük uğurla qarşılanmışdır.

İstanbul tamaşasında Üzeyir Hacıbəyli adına Azərbaycan Dövlət Simfonik Orkestrinin bədii rəhbəri və baş dirijoru, xalq artisti Rauf Abdullayevin dirijorluğu ilə Dövlət Akademik Opera və Balet Teatrının orkestri, Dövlət Xor Kapellasının artistləri iştirak etmişlər. Koroğlu rolunu tatarıstanlı opera sənətçisi Əhməd Aqadi, Nigar rolunu Qazaxıstanın məşhur opera müğənnisi Guizat Daurbayeva ifa etmişlər.

Oqtay BAYRAMOV

Xalq qəzeti.- 2010.- 25 iyul.- S. 6.