Dövlət başçısı mətbuatımızın himayəçisidir

Azərbaycan milli mətbuatının 135 illik yubileyinin ölkəmizdə ümumxalq bayramı kimi qeyd olunması müstəqil dövlətimizin anadilli jurnalistikamıza yüksək himayədarlığının, azad sözə ehtiramının daha bir təzahürünə çevrildi. Ümummilli lider Heydər Əliyevin 2000-ci ildə milli mətbuatımızın 125 illik yubileyinin keçirilməsi barədə sərəncamı ilə əsası qoyulmuş ənənəni davam etdirən Prezident İlham Əliyev 2005-ci ildə 130, bu il isə 135 illik yubileylərin dövlət səviyyəsində qeyd olunmasını təmin etdi.

Milli mətbuatımızın budəfəki bayramı bir çox məzmunlu, unudulmaz hadisələrlə yadda qaldı. Ölkənin bütün bölgələrində, kollektivlərində xalqımız 135 il əvvəl Azərbaycanda ana dilində ilk qəzet yaradılmasını önəmli tarixi hadisə kimi xatırladı, dəyərləndirdi. Yubiley tədbirlərində jurnalistlərin çətin, məsuliyyətli və şərəfli zəhməti adi vətəndaşdan tutmuş dövlət başçısınadək yüksək qədirbilənliklə qiymətləndirildi.

Prezident İlham Əliyevin milli jurnalistikamızın inkişafında xidmətləri olan qələm sahiblərini dövlətin yüksək mükafatları və fəxri adlarla təltif etməsi, mətbuat işçilərinin sosial məsələlərinin həlli üçün 5 milyon manat dövlət vəsaiti ayırması, aparıcı qəzetlərin və informasiya agentliklərinin redaksiyalarına birdəfəlik 20 min manat maliyyə yardımı göstərməsi yubiley təntənələrinə xoş əhval, bol sevinc gətirdi.

Təltif olunan jurnalistlər içərisində mənim də adımın olması, əməkdar jurnalist adına layiq görülməyim, əlbəttə, 70 yaşlı yazıçı-publisist, veteran ziyalı kimi məni də ürəkdən sevindirdi. Təltif olunanlar arasında xeyli yaşlı jurnalistin olması onu göstərir ki, media təşkilatları, dövlətimiz, şəxsən Prezident İlham Əliyev bizi də unutmayıb, illər boyu xalqımıza sözümüzlə, qələmimizlə xidmətimiz qədirbilənliklə qeyd olunur.

Mətbuatımıza, jurnalistlərə göstərilən bu yüksək diqqət və qayğı, istər-istəməz ötən onillikləri yada saldı. Kütləvi informasiya vasitələrinin partiya, sovet orqanları tərəfindən idarə olunduğu illərdə, qəzet-jurnalların maddi-texniki problemləri yoluna qoyulsa da, jurnalistlərin gərgin, çətin əməyi bir qayda olaraq layiqincə qiymətləndirilmirdi. O vaxt zarafatla jurnalistlər "hamını bəzəyib, özü lüt gəzən" zümrə adlandırılırdı. Bu praktikaya baxmayaraq, ümummilli lider Heydər Əliyev 1969-cu ildə hakimiyyətə gələndən sonra respublika jurnalistlərinin, media kollektivlərinin bir sıra problemlərini qısa müddətdə həll etdi.

O vaxtdan başlayaraq jurnalistlərin mənzil-məişət şəraiti ildən-ilə yaxşılaşdı. Qəzet-jurnallar üçün "Azərbaycan" nəşriyyatının indiki binası və müasir ofset mətbəə korpusu istifadəyə verildi. Həmin dövrdə bacarıqlı jurnalistlər mətbuatda rəhbər vəzifələrə irəli çəkildi. Mən də o illərdə gənc jurnalist kimi dövlət televiziyasının gənclik baş redaksiyasına və "Azərbaycan gəncləri" kimi populyar qəzetə ulu öndərin xeyir-duası ilə rəhbərlik etdim.

Ümummilli lider Heydər Əliyevin ikinci dəfə hakimiyyətə gəlişi, müstəqil dövlətimizə rəhbərlik etməsi milli jurnalistikamızda söz azadlığı prinsiplərinin bərqərar olmasını sürətləndirdi, bir sıra mühüm yönləri və hadisələri ilə mətbuat tariximizin öyünclü səhifələrinə çevrildi. Dünya miqyasında böyük siyasətçi, nəhəng tarixi şəxsiyyət kimi tanınan Heydər Əliyev Şərqdə ilk dəfə ölüm hökmünü ləğv etdiyi kimi, gənc dövlətdə də KİV üzərində senzuraya xitam verdi. Ümummilli lider medianın bir sıra problemlərini aradan qaldırmaqla ,bəzi jurnalistlərin arzuolunmaz hərəkətlərinə dözümlük göstərməklə bütün dövlət orqanlarına və məmurlara nümunə göstərdi.

Müstəqil dövlətimizin memarı Heydər Əliyevin jurnalistlərin dostu olması, KİV-i himayə etməsi ənənəsini son 7 ildə Prezident İlham Əliyev yüksək səviyyədə, geniş miqyasda davam etdirir. Bununla, dövlət başçısı ölkəmizdə demokratik mətbuatın möhkəmlənməsinə dəyərli töhfələr verir. Bunlar Azərbaycan xalqının suveren haqlarına qovuşmasının tarixi bəhrələridir. Xoş münasibət, ehtiram, qayğı sevinc, rəğbət hissləri doğurmaqla yanaşı, həm də qarşılıqlı ehtirama, borc hissinin artmasına səbəb olur. Yubiley şənlikləri arxada qalsa da onun yaratdığı yüksək mənəvi ab-hava, məmnunluq və minnətdarlıq duyğuları bizi tərk etmir. Ölkə jurnalistləri bütün bunlara görə ulu öndər Heydər Əliyevin ölməz ruhuna rəhmət diləyir, Prezident İlham Əliyevə dönə-dönə təşəkkür edir.

Milli mətbuatımızın növbəti yubileyinin misilsiz təntənələrlə qeyd olunması jurnalistikamızın inkişafına növbəti dəstək və təkan kimi əlamətdar oldu. Şübhəsiz, bunlar yüksək mənəvi enerjiyə çevrilərək jurnalistlərin söz və qələmlə ölkəmizin tərəqqisinə xidmətini artıracaq.

Yusif KƏRİMOV

Xalq qəzeti.- 2010.- 25 iyul.- S. 3.