İki əsrin, üç nəslin səsi

Bu günlərdə M.Maqomayev adına Azərbaycan Dövlət Filarmoniyasında tanınmış tarzən Əliağa Sədiyevin rəhbərlik etdiyi "Xarı bülbül" muğam qrupunun "Üç nəslin səsi" adlı ikigünlük konserti, eləcə də respublikanın xalq artisti Nəzakət Teymurovanın "Əzizinəm, Qarabağ" video-diskinin təqdimat mərasimi keçirildi.

Konsertin aparıcısı, respublikanın əməkdar artisti Azad Şükürov 10 ildən artıq fəaliyyət göstərən "Xarı bülbül" muğam qrupunun çoxşaxəli yaradıcılıq yolundan və bu illər ərzində qazandığı uğurlarından, konsert fəaliyyətindən söz açdı, daha çox Nəzakət Teymurova ilə yaradıcılıq əlaqələri saxladığını qeyd etdi. Daha sonra o Nəzakət Teymurovanın yeni işıq üzü görmüş "Əzizinəm, Qarabağ" videodiskini sənətsevər tamaşaçılara təqdim etdi. "Gilan-SD" şirkəti tərəfindən hazırlanmış ikihissəli diskə müğənninin ötən ilin dekabrında Heydər Əliyev Sarayında verdiyi solo-konsertdə oxuduğu muğam, təsnif və xalq mahnıları daxil edilmişdir.

Konsertin ilk günü Beynəlxalq Muğam Festivalı və televiziya muğam müsabiqələrindən yaxşı tanıdığımız gənc ifaçılar İlkin Əhmədov, Gülnar İsayeva, Nasir Ətapur, Vüsalə Musayeva, Səbuhi İbayev, eləcə də orta nəsli təmsil edən əməkdar artistlərdən Cabir Abdullayev, Fehruz Səxavət, Teyyub Aslanov, müğənnilərdən Rövşən Məmmədov, Sərdar Əvəzoğlu və Məhərrəm Həsənovun çıxışları hamının könlünü oxşadı.

Konsertin sonunda çıxış edən xalq artisti Nəzakət Teymurova ürəkləri riqqətə gətirən məlahətli səsi ilə o gecə sənət nümunəsi göstərdi. Bunu sənətkara verilən çoxsaylı tər çiçək dəstələri və tamaşaçıların sürəkli alqışlarından da görmək olurdu.

Konsertin ikinci günü daha yaddaqalan oldu. Ötən əsrin ən populyar, bu gün də təkcə öz ifaları ilə deyil, yüksək səhnə mədəniyyətilə gənc ifaçılara örnək ola biləcək yaşlı nümayəndələri - xalq artistlərimizdən professor Arif Babayev, Canəli Əkbərov, Səkinə İsmayılova, əməkdar artistlər Sabir Mirzəyev, Süleyman Abdullayev sənətsevərlərin zövqünü oxşadılar. Vaxtilə çox sənətçi uğurlarının şahidi olmuş bu sənət məbədində Arif Babayevin yanıqlı "Segah"ı, Süleyman Abdullayevin "Şur"u, Sabir Mirzəyevin "Çahargah"ı, Səkinə İsmayılovanın "Bayatı Şiraz"ı o gecə tamaşaçıları bir daha ötənlərə qaytardı.

İkigünlük konsertdə tamaşaçılar təkcə müğənnilərin gözəl ifalarını deyil, eyni zamanda, onları müşayiət edən əməkdar artistlərdən Elşən Mansurov - kamança, Mircavad Cəfərov - ud, ansamblın digər üzvləri Şirzad Fətəliyev - nəfəs alətləri, Çinarə Mütəllibova - kanon, Qalib Həşimov - bas tar, Nizami Allahverdiyev - dəm balaban, Kamran Kərimov - nağara, Eyvaz Həşimov qoşa nağara və Hüsaməddin Əzizovun bəm nağarada virtuoz ifalarının şahidi oldular.

Ansamblın rəhbəri Əliağa Sədiyevin təşəbbüsü ilə keçirilən bu konsert tamaşaçıları bir daha əmin etdi ki, ötən əsrlərdən bizlərə ərmağan qalmış və bu gün də dövlət başçımızın diqqət və qayğısı ilə əhatə olunan ulu muğam sənətimizin gələcəyi də etibarlı əllərdədir. İkigünlük konsertin xoş təəssüratı yəqin ki, uzun müddət tamaşaçıların yaddaşından silinməyəcək. Çünki iki əsrin ən gözəl nəğmələri bu möhtəşəm sənət ocağında üç nəslin səsində eşidildi.

Rafiq SALMANOV

Xalq qəzeti.- 2010.- 1 iyun.- S. 11.