Goranboy inkişafın yeni mərhələsinə qədəm qoyub

Goranboy Rayon İcra Hakimiyyətinin başçısı Nizaməddin Quliyev təbiətən narahat adamdır. Bəlkə də, elə ona görədir ki, onu iş otağında az hallarda tapmaq olur. Gününün çox hissəsini şəhərdə, qəsəbə və kəndlərdə, iş üstündə, adamlar arasında keçirir. Deyir ki, indi kabinetdən rəhbərlik dövrü deyil. Axı, heç bir arayış, məlumat, telefon zəngi adamlarla canlı ünsiyyəti, görüş və söhbətləri, işgüzar fikir mübadiləsini əvəz edə bilməz.

İnsan amili diqqət mərkəzindədir

Yeri gəlmişkən, onu da əlavə edək ki, son vaxtlar Goranboy Rayon İcra Hakimiyyətinin iş üslubunda, təşkilat-idarəetmə məsələlərində məhz bu cəhətlər - insan amili, qəbul günlərinin, açıq qapı tədbirlərinin, görüş və müzakirələrin bilavasitə yerlərdə təşkil edilməsi özünü daha qabarıq şəkildə göstərir. Özü də belə tədbirlər sistemli şəkildə , ardıcıl və müntəzəm xarakter daşıyır.

İş elə gətirdi ki, icra başçısı ilə növbəti görüşüm də belə bir xoş təsadüfə düşdü. Nizaməddin müəllim qayğılı görünsə də, kəndlərdə keçirdiyi görüş və söhbətlər barədə həvəslə məlumat verdi:

- Özünüz təsəvvür edin, əgər fəaliyyət göstərdiyi 19 ildə icra nümayəndəliyinin yerləşdiyi binada elektrik xətti olmayıbsa, yaxud icra nümayəndəliyinin konkret yeri, bir sözlə, işləmək üçün ən elementar şəraiti yoxdursa, onda nədən danışmaq olar? Halbuki verilən məlumat və arayışlarda orada hər şeyin qaydasında olduğu bildirilirdi. Burada məsələnin başqa bir tərəfi də var. Özü üçün normal iş şəraiti yarada bilməyən bir rəhbər işçi başqalarından nə tələb edə bilər? Demək istəyirəm ki, bilavasitə yerlərdə, adamlar arasında olmaq, onların gündəlik qayğı və problemləri ilə tanışlıq, konkret kömək olduqca faydalıdır. Təsadüfi deyildir ki, biz qısa bir müddət ərzində rayonun bütün yaşayış məntəqələrində belə görüş və qəbul günləri keçirmişik. Əlaqədar idarə, müəssisə və təşkilat rəhbərlərinin də iştirakı qaldırılan problemlərin əksəriyyətinin dərhal həllini təmin edir.

- Görünür, işin məhz belə təşkil edilməsinin nəticəsidir ki, son aylar rayon icra hakimiyyətinə daxil olan ərizə və şikayətlərin sayı xeyli azalmışdır...

- Həyatımızın bütün sahələrində olduğu kimi, burada da hamımıza böyük örnək ola biləcək canlı nümunə , əsl məktəb var. Bu, xalqımızın böyük oğlu, ümummilli lider Heydər Əliyevin bütün zamanlar üçün nümunə ola biləcək parlaq həyat və fəaliyyətidir. Olduqca fərəhlidir ki, həmin müdrik siyasət bu gün daha böyük uğurla davam etdirilir. Ölkə Prezidenti İlham Əliyev respublikamızın elə bir bölgəsi yoxdur ki, ora səfər etməsin, müxtəlif təyinatlı obyektlərin açılışında, təməlqoyma mərasimlərində iştirak etməsin, ağsaqqallarla, ziyalılarla, gənclərlə unudulmaz görüşlər keçirməsin. Heç uzağa getməyək, ölkə başçısı sonuncu dəfə ötən il noyabr ayının 20-də Goranboya tarixi səfər etmiş, rayonda aparılan genişmiqyaslı tikinti-abadlıq və quruculuq tədbirləri ilə tanış olmuş, rayon ictimaiyyətinin nümayəndələri ilə görüşmüş, səmimi, unudulmaz söhbətlər etmişdir. Goranboylular həmin görüş və söhbətləri bu gün də isti, hərarətli duyğularla, böyük minnətdarlıq hisslərilə xatırlayırlar.

Cəsarətlə deyə bilərəm ki, ölkə Prezidentinin tarixi səfəri rayonumuzda işlərin gedişinə böyük təkan vermiş, bütün sahələrdə ciddi irəliləyiş və inkişafa səbəb olmuş, adamların ruh yüksəkliyini və məsuliyyət hissini daha da artırmışdır. Bu dediklərimizi iqtisadi, sosial və mədəni inkişafı əks etdirən fakt, rəqəm və göstəricilər bir daha sübut edir.

- Rayon icra hakimiyyətindən bizə verilən arayışda göstərilir ki, ötən il yerlərdə keçirilən görüşlərdə 329 təklif irəli sürülmüşdür. Bu ilin ötən ayları ərzində də çoxsaylı təkliflər olmuşdur. Bunların yerinə yetirilməsi barədə nə deyə bilərsiniz?

- Elə güman etməyin ki, həmin təklif və qeydlərin hamısında şikayət və narazılıq ifadə edilmişdir. Düzdür, bu və ya digər məsələlərlə bağlı konkret şikayətlər də var, irad və gileylər də. Ancaq bu müraciətlərdə həm də vətəndaş mövqeyi, işlərin daha yaxşı təşkili üçün təklif və təşəbbüslər əks olunub. Onu da deyim ki, yerlərdən gələn belə fikir və təşəbbüslər işimizi daha yaxşı qurmaqda bizə çox kömək edir.

Ümumiyyətlə, adamlarla canlı ünsiyyət, onların müraciətlərinə baxılması daim diqqət mərkəzindədir. Ötən il 1258 nəfər, o cümlədən yerlərdə keçirilən görüşlər zamanı 358 nəfər vətəndaş qəbul olunmuşdur. Həmin görüşlərdə bir sıra vacib sosial məsələlər, o cümlədən elektrik, qaz, su, meliorasiya məsələləri, subartezian quyularının qazılması və bərpası, sosial obyektlərin, yol və körpülərin tikintisi və təmiri əsas yer tuturdu. Yeri gəlmişkən, deyim ki, həmin məsələlərin böyük əksəriyyəti artıq öz müsbət həllini tapıb.

Kadrların düzgün seçilməsi, yerləşdirilməsi və tərbiyə olunması həmişə olduğu kimi, indi də vacib və aktualdır...

- Doğrudan da, hər hansı sahədə işin uğurlu təşkili kadrlarla aparılan işin səviyyəsindən, onların düzgün yerləşdirilməsindən asılıdır. Əlbəttə, Goranboyda öz işinin öhdəsindən bacarıqla gələn, yaradıcı və təşəbbüskar, yüksək mənəvi keyfiyyətləri ilə seçilən kadrlar çoxdur. Biz belələrinə böyük etimad göstərir, onları cəsarətlə irəli çəkirik. Ancaq təəssüf ki, bəzən bunun əksini də görürük. Bax, o zaman belə kadrlarla xudahafizləşməkdən başqa ayrı yolumuz qalmır.

İnkişaf bütün sahələri əhatə edir

Ötən il rayonun ümumi büdcəsi əvvəlki illə müqayisədə 33,9 faiz artaraq 22 milyon 193 min manat təşkil etmişdir. 8085 sahibkarlıq subyektinə 5,6 milyon manat kredit verilmişdir ki, bu da müqayisə olunan dövrə nisbətən 9 min manat çoxdur. 2009-cu ildə əsas kapitala yönəldilən investisiyanın həcmi əvvəlki illə müqayisədə 2,9 milyon manat artaraq, 62 milyon manat təşkil etmişdir. Bunun 33,9 faizi qeyri-istehsal təyinatlı, 66,2 faizi isə istehsal təyinatlı sahələrə yönəldilmişdir.

Belə bir fakt da böyük razılıq doğurur ki, 2009-cu ildə ümumi məhsul buraxılışının həcmi əvvəlki ilə nisbətən 13,6 milyon manat artaraq, 177,7 milyon manata çatmışdır. Sənaye məhsulunun həcmi 1,1 milyon manat artaraq 7,3 milyon manat təşkil etmişdir. Ümumi məhsul buraxılışının həcmində qeyri-dövlət bölməsinin xüsusi çəkisi 83,4 faiz olmuşdur.

Bu gün Goranboy, sözün həqiqi mənasında, nəhəng tikinti meydançasını xatırladır. Şəhərin hansı küçəsinə, qəsəbəyə, kəndinə yolun düşsə tikinti, yenidənqurma və abadlıq işlərinin şahidi olursan. Onu da deyək ki, abadlıq və quruculuq tədbirləri yüksək zövq və səliqə ilə, tarixiliklə müasir memarlığın sıx vəhdəti şəklində, keyfiyyətlə aparılır. Cari ilin ötən ayları ərzində aparılan tikinti-quruculuq işləri səngiməmiş, əksinə, daha da genişlənmişdir. Məsələn, Goranboy şəhərinin Ş.Qurbanov, Füzuli, Zərdabi, M.Nağıyev küçələrinə asfalt örtüyü çəkilmiş, Kəpənəkçi kəndinin daxilində yol-çınqıl örtüklə əsaslı təmir edilmişdir. Şəhərə Goran istiqamətindən gedən yolda giriş qapısı inşa edilmiş, 150 metr əraziyə torpaq daşınaraq yaşıllıq zolağının salınmasına başlanmışdır.

Goranboy şəhərinin Cəfər Cabbarlı küçəsində yol təxminən 2 metr genişləndirilmiş, hər iki tərəfdə səki salınmış, ağaclar əkilmişdir. Cəfər Cabbarlı küçəsi ilə Vüqar Bayramov küçəsindəki kəsişmədə şəhərin arxitektura görkəminə xüsusi yaraşıq verən yol dairəsinin tikintisində son tamamlama işləri aparılır. Həmin dairədən Goran istiqamətində gedən yola torpaq daşınmış, 250 metr yeni kanalizasiya xətti çəkilmişdir. Vüqar Bayramov küçəsi müasir üslubda qurularaq 2 tərəfli hərəkət təmin edilmiş, yaşıllıq zolağı salınmış, müasir üslublu işıqlandırma sistemi qurulmuşdur.

Hazırda Goranboy şəhərindən Səfikürd kəndi istiqamətində piyada yolunun tikintisi, yol kənarında yaşıllıq zolağının salınması istiqamətində iş aparılır. Bu məqsədlə hazırda həmin əraziyə kifayət qədər torpaq daşınmışdır. Cəfər Cabbarlı küçəsi ilə Rövşən Mustafayev küçəsinin kəsişdiyi əraziyə də torpaq daşınmış, ağac əkilmişdir.

Bundan başqa, Goranboy şəhərində inşasına başlanılmış 600 yerlik 3 saylı orta məktəbin və şəhər avtovağzalının tikintisində işlər sürətlə davam etdirilir. 2010-cu ilin "Ekologiya ili" elan olunması ilə əlaqədar geniş tədbirlər planı nəzərdə tutulmuşdur. Belə ki, cari ilin təkcə ötən ayları ərzində 24 min ağac əkilmişdir.

Goranboy ənənəvi kənd təsərrüfatı rayonudur. Təsadüfi deyildir ki, sahənin sürətli inkişafı, bütün imkan və ehtiyat mənbələrinin işə salınması diqqət mərkəzində saxlanılmışdır. Ölkə Prezidentinin sərəncamına uyğun olaraq keçən il 14411 nəfər istehsalçıya ümumilikdə 2,3 milyon manat vəsait ödənilmişdir. Bu da kənd təsərrüfatı məhsullarının, xüsusilə buğda istehsalının artırılmasına səbəb olmuşdur. Ötən il əhalinin kənd təsərrüfatı məhsullarından əldə etdiyi gəlir 49 milyon manat təşkil etmişdir ki, bu da əvvəlki ilə nisbətən 4 milyon manat çoxdur. Bu sahədən əldə edilmiş gəlirin 28,2 milyon manatı bitkiçilik, 20,8 milyon manatı isə heyvandarlıq məhsullarının payına düşür. Ümumiyyətlə, əhalinin bütün mənbələrdən pul gəliri 171,8 milyon manat təşkil etmiş, orta aylıq əmək haqqı 29,8 manat artaraq 185,3 manata çatmışdır.

Sosial məsələlər uğurla həll edilir

Ötən aylar ərzində rayonun müvafiq təşkilatları tərəfindən əhaliyə göstərilən xidmətin keyfiyyətinin yaxşılaşdırılması, ödənişlərin tam aparılması da daim diqqət mərkəzində saxlanılmışdır. Məsələn, cari ilin ilk rübünün yekununa görə, əhalidən ödəniş 100 faiz, ümumi ödəniş isə 96 faiz olmuşdur. Təbii ki, ödənişin belə yüksək olması rayon icra hakimiyyəti tərəfindən ardıcıl tədbirlər aparılması və qaz təsərrüfatının rəhbərliyinin təşəbbüskarlığı ilə bağlıdır. Bu sahədə də xeyli işlər görülmüşdür. Cinli Boluslu kəndinə təbii qazın verilməsi istiqamətində işlər davam etdirilmiş, Goranboy şəhərinin 3, Dəliməmmədli şəhərinin 4 küçəsində yeraltı xətlərin yerüstü qaz xətləri ilə yenidən əvəz edilməsinə, Goranboy şəhərindən Yuxarı Ağcakəndədək 38 kilometr uzunluğunda yeni qaz xəttinin çəkilişinə başlanmışdır. İlin sonunadək xəttin tikintisini başa çatdırmaqla yanaşı, Aşağı və Yuxarı Ağcakəndə, Börü, Yenikənd və Meşəliyə təbii qazın verilməsi təmin ediləcəkdir. Qaz xəttinə Abbasqulular və Səfikürd kəndlərinin də qoşulması nəzərdə tutulur ki, bu da həmin kəndlərin qaz təchizatının daha da yaxşılaşdırılmasına kömək edəcəkdir. Yaxın gələcəkdə Tatarlı, Qarqucaq, Zeyvə, Şəfəq və digər kəndlərin də həmin qaz xəttinə qoşulması nəzərdə tutulur.

Rayonun elektrik və su təsərrüfatı sahəsində də işlərin gedişi nəzarətdədir. Əsas diqqət ona yönəldilmişdir ki, əhaliyə fasiləsiz və ardıcıl xidmət göstərilsin, intizam və tələbkarlıq gücləndirilsin, ödənişlər tam yerinə yetirilsin.

Nöqsanlar aradan qaldırılır, tələbkarlıq artırılır

Məlumdur ki, 2009-cu ilin iyun ayında Goranboy Təhsil Şöbəisndə baş verən hadisələr - buraxılış siniflərində XI siniflər üzrə imtahanlardan müsbət qiymət almaq üçün şagirdlərdən rüşvət almaq faktları Azərbaycan Respublikası Baş Prokurorluğu yanında Korrupsiyaya Qarşı Mübarizə İdarəsi tərəfindən araşdırılmış və faktlar öz təsdiqini tapmışdır. Bununla əlaqədar rayon Təhsil Şöbəsinin sabiq müdiri və bir neçə rəhbər təhsil işçiləri məsuliyyətə cəlb olunmuş və hazırda həmin fakt üzrə məhkəmə prosesi davam edir.

Əlbəttə, bunlar rayonun çoxminli təhsil işçiləri arasında müəyyən gərginlik yaratmış, təhsilin keyfiyyətinə mənfi təsir göstərmişdir. Ona görə əsas diqqət təhsil işçiləri, xüsusilə rəhbər kadrlar arasında intizam və tələbkarlığın artırılmasına, təlim-tərbiyə məsələlərinin günün tələbi səviyyəsinə qaldırılmasına, sağlam mənəvi-psixoloji mühitin yaradılmasına yönəldilmişdir. İşdə yol verdikləri ciddi nöqsanlara, təlim-tərbiyə işini başlı-başına buraxdıqılarına, tapşırılmış sahədə lazımi intizam və tələbkarlıq yarada bilməliklərinə görə Kələk, Qaramusalı, Qarasuçu, Borsunlu kənd 1 və 2 saylı, Balakürd, Nadirkənd, Qaraçinar kənd, Goranboy şəhər 1 saylı orta məktəblərin və İnternat əsas məktəblərinin direktorları vəzifələrindən azad edilmişlər.

Məkətəblərin və məktəbəqədər təhsil müəssisələrinin maddi-texniki bazasının möhkəmləndirilməsi diqqət mərkəzində saxlanılmışdır. Qızılhacılı qəsəbə 1 saylı orta, Ballıqaya kənd əsas məktəblərində yerli büdcə vəsaiti hesabına əsaslı təmir işi aparılmış, həmçinin Kürəkçay ibtidai məktəbi də əsaslı təmir olunmuşdur. Şahməmmədli kənd ibtidai məktəbi üçün 60 şagird yerlik yeni məktəb binası tikilib istifadəyə verilmişdir.

Təhsil Nazirliyinin vəsaiti hesabına Rus-Borisi kəndində 180 yerlik, Goranboy Şəhər 3 saylı orta məktəbi üçün 420 yerlik yeni məktəb binalarının tikintisi, Qaradağlı kənd orta məktəbinin əsaslı təmiri davam etdirilir. Bundan əlavə, Aşağı Ağcakənd qəsəbə orta məktəbinin, Ağamalıoğlu kənd orta məktəbinin dam örtüyü dəyişdirilmişdir. Azadkənd ibtidai məktəbində isə yeni binanın tikintisi başa çatmaq üzrədir. Əzizbəyov, Qırıxlı və Gürzalılar kənd orta məktəbləri üçün yeni binaların tikintisi, Hazırəhmədli kənd orta məktəbinin isə əsaslı təmiri nəzərdə tutulmuşdur.

Rayon səhiyyə, mədəniyyət və turizm şöbələrinin də fəaliyyətinə diqqət və nəzarət gücləndirilmiş, müşahidə olunan nöqsanlar aradan qaldırılmış, işin daha yaxşı və effektli təşkili üçün geniş tədbirlər müəyyən olunmuşdur.

İnkişaf və irəliləyiş kimləri narahat edir?

Bütün bunlar, əlbəttə, çox yaxşıdır və bir daha onu göstərir ki, Goranboy, əslində, öz inkişafının yeni mərhələsinə qədəm qoymuşdur. Ancaq təəssüf ki, bu, bəzilərinin yuxusunu ərşə çəkir, narahat edir. İnkişaf və irəliləyişi gözü götürməyən qara qüvvələr çıxış yolu kimi bir sıra müxalifət qəzetlərində özlərinə sığınacaq taparaq, yalan, şər və böhtan dolu cızmaqaraları ilə əhalini çaşdırmağa, ağa qara deməyə çalışırlar. Ancaq nahaq yerə. Ona görə ki, yalan ayaq tutar, amma yeriyə bilməz.

Biz bu yazı üzərində işləyərkən rayonun müxtəlif idarə, müəssisə və təşkilatlarında olduq, ağsaqqallarla, ziyalılarla, gənclərlə görüşdük. Son vaxtlar geniş vüsət alan tikinti-quruculuq işləri, bütün sahələri əhatə edən intizam və tələbkarlıq, yüksək icra intizamı və s. yanaşı, adamların bu məsələlərə münasibəti ilə maraqlandıq. Onlar birmənalı şəkildə rayonda ictimai-siyasi sabitliyi, mənəvi-psixoloji mühiti pozmağa yönəldilmiş belə hərəkətləri qətiyyətlə pisləyir və bu hərəkətlərin qarşısının alınmasını, belələrinin əməllərinə hüquqi qiymət verilməsini tələb edirlər. Bir də onu əlavə etdilər ki, öz işlərində ciddi nöqsanlara yol verən bu cür insanlar "qara məni basınca, mən qaranı basım" prinsipini əsas götürürlər. Onlar unudurular ki, goranboylular kimin kim olduğunu yaxşı bilirlər.

Bəli, bu gün Goranboyda həyatın axarı gurdur, rayonda sağlam mənəvi-psixoloji mühit, təşəbbüskar, yaradıcı ab-hava, işgüzar mühit var. Canlanma və irəliləyiş, inkişaf və yüksəliş hər addımda hiss olunur. Bu isə onu göstərir ki, Goranboyun sabahı daha gözəl, abad və yaraşıqlı olacaqdır.

Ziyəddin SULTANOV,

"Xalq qəzeti"nin bölgə müxbiri

Xalq qəzeti.- 2010.- 1 iyun.- S. 9.