Xətai rayonunda uşaq bayramı

1 İyun Uşaqları Beynəlxalq Müdafiə Günü hər il olduğu kimi bu il də Xətai rayonunda böyük təntənə ilə qeyd olundu. Rəsmi hissə başlanmazdan əvvəl ulu öndər Heydər Əliyevin parkdakı əzəmətli abidəsi önünə tər gül-çiçək dəstələri qoyuldu. Sonra Xətai Rayon İcra Hakimiyyətinin və Ailə, Qadın və Uşaq Problemləri üzrə Dövlət Komitəsinin birgə təşkilatçılığı ilə rayonun Heydər Əliyev adına parkında düzənlənən bayram şənliyinin açılışı oldu. Tədbirin aparıcısı məlumat verdi ki, 50 ildən artıq bir müddətdə bütün yer üzündə qeyd olunan bu gün, Azərbaycan müstəqilliyinin Heydər Əliyev mərhələsindən başlayaraq həmişə böyük təntənə ilə keçirilmişdir. Çıxışlarında "Azərbaycan uşaqları Azərbaycanın milli sərvətidir" - deyən ulu öndər Heydər Əliyev müstəqillik illərində bu milli sərvətin daim qayğısına qalmış və onların sağlam, sosial rifah içində böyüməsi üçün bir çox mühüm dövlət tədbirləri həyata keçirmiş, fərman və sərəncamlar imzalamışdır.

Ailə, Qadın və Uşaq Problemləri üzrə Dövlət Komitəsinin sədri Hicran Hüseynova tədbirdə çıxış edərək bildirdi ki, 1993-cü ildən başlayaraq ulu öndər Heydər Əliyevin rəhbərliyi ilə uşaqların müdafiəsi məqsədilə həyata keçirilən tədbirlər 2003-cü ildən, onun layiqli varisi, Azərbaycan Respublikasının Prezidenti cənab İlham Əliyev tərəfindən uğurla davam etdirilir. Uşaqlara göstərilən dövlət qayğısının nəticəsidir ki, 2009-cu il Azərbaycan Prezidentinin sərəncamı ilə ölkəmizdə "Uşaq ili" elan edilmişdi. Məhz bu sərəncam Azərbaycan hökumətinə uşaq siyasəti istiqamətində əlavə tədbirlərin həyata keçirilməsinə geniş imkanlar açmış, qeyri-hökumət təşkilatlarının və vətəndaş cəmiyyətinin diqqətini bir daha uşaqların problemlərinin həllinə yönəltmişdir.

H.Hüseynova çıxışında bildirdi ki, uşaqların keyfiyyətli təhsil və yüksək standartlara cavab verən tibbi xidmətlərlə təmin edilməsi, hərtərəfli qayğı ilə əhatə olunması, yüksək mənəvi və sosial mühitdə böyüməsi üçün zəruri şəraitin yaradılması, şəxsiyyət və layiqli vətəndaş kimi formalaşması bu gün Azərbaycan Respublikasının dövlət uşaq siyasətinin başlıca prinsipləridir. Ümummilli lider Heydər Əliyevin əsasını qoyduğu və bu gün möhtərəm Prezidentimiz İlham Əliyevin uğurla davam etdirdiyi dövlət uşaq siyasəti artıq milli strategiyaya çevrilmişdir.

Çıxışının sonunda bayram şənliyinə toplaşan uşaqların simasında bütün Azərbaycan uşaqlarını bu əlamətdar gün münasibətilə təbrik edən Hicran Hüseynova bu böyük bayram təntənəsini yüksək səviyyədə təşkil etdiyinə görə Xətai Rayon İcra Hakimiyyətinin rəhbərliyinə təşəkkürünü bildirdi və bu rayonda son illər uşaqların sosial rifahının yaxşılaşdırılması istiqamətində görülən işləri yüksək qiymətləndirdi.

Uşaqları təbrik üçün söz alan Xətai Rayon İcra Hakimiyyətinin başçısı Razim Məmmədov dövlət uşaq siyasətinin son illərdəki uğurlarından və həyata keçirilən tədbirlərdən danışaraq dedi:

- Xalqımızın milli mənəvi dəyərlərinə əsaslanan dövlət uşaq siyasəti çərçivəsində, cəmiyyətimizin əsas özəyi olan ailələrin sosial müdafiəsinin gücləndirilməsi, təhsilin və səhiyyə xidmətinin səviyyəsinin qaldırılması, xüsusi qayğıya ehtiyacı olan uşaqların problemlərinin həlli, yetkinlik yaşına çatmayanların baxımsızlığının qarşısının alınması və bir çox digər dövlət proqramlarının qəbul edilməsi və reallaşdırılması istiqamətində həyata keçirilən tədbirlər bir daha onu göstərir ki, Azərbaycan dövləti və onun Prezidenti cənab İlham Əliyev milli genefondumuzun sağlam böyüyüb formalaşmasını öz fəaliyyətinin əsas prioritetlərindən hesab edir.

Natiq məlumat üçün bildirdi ki, bu gün Xətai rayonunda yaşayan 300 minə yaxın əhalinin 105 min nəfəri uşaqlardır. Rayonun orta ümumtəhsil məktəblərində 41 mindən çox uşaq təhsil alır. 3 saylı uşaq evində 106 uşağa, SOS uşaq kəndində 95 uşağa yüksək səviyyədə qayğı göstərilir. Biz bu uşaqların hüquqlarının təmin edilməsində, onların qayğı ilə əhatə olunmasında, yüksək mənəvi və sosial mühitdə böyümələri üçün zəruri şəraitin yaradılmasında gördüyü saysız-hesabsız işlərə görə Azərbaycan dövlətinə və onun Prezidenti cənab İlham Əliyevə minnətdarlığımızı bildiririk.

R.Məmmədov Heydər Əliyev Fondunun prezidenti, Azərbaycanın birinci xanımı, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın Azərbaycanın gələcəyi olan uşaqların mənafeyi naminə gördüyü misilsiz işləri də yüksək qiymətləndirdi və bütün rayon sakinləri adından ona minnətdarlığını bildirdi.

Natiq sözünü bütün Azərbaycan uşaqalarına ən xoş arzularını bildirməklə bitirdi. Sonra Azərbaycanın tanınmış incəsənət ustalarının iştirakı ilə böyük konsert proqramı başladı və axşama qədər davam etdi.

İlqar RÜSTƏMOV

Xalq qəzeti.- 2010.- 2 iyun.- S. 9.