"Vergi uşaqların gözü ilə" rəsm müsabiqəsi

İyunun 1-i - Uşaqları Beynəlxalq Müdafiə Günü münasibətilə Vergilər Nazirliyinin təşəbbüsü və Tofiq ismayılov adına Uşaq-Gənclər Yaradıcılıq Sarayının dəstəyi ilə "Uşaq dünyası" qalereyasında "Vergilər uşaqların gözü ilə" adlı səkkizinci rəsm müsabiqəsi keçirilmişdir.

Tədbiri T.İsmayılov adına Uşaq-Gənclər Yaradıcılıq Sarayının direktoru Bədayə Ramazanova açmışdır.

Sonra Vergilər Nazirliyinin Vergi ödəyicilərinə xidmət idarəsinin rəisi Elçin Məmmədov rəsm işlərinin sayının getdikcə artmasından, ildən-ilə daha maraqlı işlərin təqdim edilməsindən məmnunluğunu bildirmişdir. O demişdir ki, belə rəsm müsabiqələri uşaqların dövlətçilik haqqında anlayışlarının genişlənməsinə, büdcə və vergilər haqqında biliklərinin artmasına imkan yaradır. Bu əsərlərdə formalaşan kiçik təsəvvürlər gələcək üçün böyük təməl yaradır və cəmiyyətin mühüm bir zümrəsi olan gənc nəsildə vergi mədəniyyətinin və vergi biliklərinin formalaşmasına xidmət edir.

E.Məmmədovun sözlərinə görə, müsabiqələrdə iştirak etmiş rəsm əsərləri nəfis albom şəklində nəşr olunur və Vergilər Nazirliyinin qatıldığı sərgi və tədbirlərdə nümayiş etdirilir. Bununla yanaşı, bu rəsm əsərlərinin bir çoxu hazırda Vergilər Nazirliyinin inzibati binasının divarlarını bəzəyir və bu müsabiqənin də əsərlərindən eyni şəkildə istifadə ediləcəkdir.

Xatırladaq ki, builki müsabiqədə 200-dən artıq rəsm nümayiş etdirilmişdir.

Sonda müsabiqədə qalib gələn rəsm əsərləri və balaca rəssamlar mükafatlandırılmışdır. Münsiflər heyəti tərəfindən həmçinin asfalt üzərində çəkilən rəsmlərin qaliblərinə və hekayə müəlliflərinə də diplomlar təqdim olunmuşdur.

Vergilər Nazirliyindən bildirilmişdir ki, gənc nəslin vergi haqqında anlayış və biliklərini artırmaq, gələcəyin potensial vergi ödəyicilərinə vergi mədəniyyəti aşılamaq istiqamətində belə tədbirlər bundan sonra da davam etdiriləcəkdir.

Vaqif BAYRAMOV

Xalq qəzeti.- 2010.- 2 iyun.- S. 9.