"Sabir poeziya günləri" təntənə ilə qeyd edildi

Bu yaxınlarda Azərbaycanın böyük şairi, satirik şeir məktəbinin dahi nümayəndəsi Mirzə Ələkbər Sabirin anadan olmasının 148-ci ildönümü ilə əlaqədar "Sabir Poeziya Günləri" adlı silsilə tədbirlər keçirildi. Mədəniyyət və Turizm Nazirliyi ilə Azərbaycan Yazıçılar Birliyinin təşkilatçılığıyla baş tutan və hər il ənənəvi olaraq qeyd edilən poeziya günləri Bakıda başladı.

Mayın 31-də tanınmış ziyalılar, yazarlar şairin Bakıdakı heykəlini ziyarət edərək abidə önünə gül dəstələri qoydular. Daha sonra isə onlar şairin məzarını ziyarət etmək üçün onun doğulub boya-başa çatdığı Şamaxıya yollandılar. Orada Sabirin məzarı və ev muzeyi ziyarət olunduqdan sonra tədbir Ağsu rayonunda Heydər Əliyev adına parkda davam etdirilib. Tədbirin təşkilatçısı Əjdər Ol, Yazıçılar Birliyinin sədri, xalq yazıçısı Anar və digər ziyalılar Sabirin ədəbiyyatımızdakı rolu və yaradıcılığından söhbət açıblar. Qeyd olunub ki, Sabir satirik ruhlu şeirlərində dövrünün ictimai eyiblərini məharətlə və ustalıqla qələmə alıb və müasir dövrdə də onun ədəbi ənənələrini davam etdirən istedadlı gənclər var. Tədbirdə Ağsu Rayon İcra Hakimiyyəti başçısı Ənvər Seyidəliyev, eləcə də Ağsu rayonunu təmsil edən millət vəkili Ərəstun Cavadov çıxış edərək dahi satirik şair Sabirin ədəbiyyatımızı öz yaradıcılığı ilə zənginləşdirməsinə və bu istiqamətdəki fəaliyyətinə toxunublar.

Bədii qiraət ustaları - əməkdar artistlər Ağalar Bayramov və Əli Nurun ifalarında şeirlər səslənib. Tədbirdə həmçinin mədəniyyət və turizm nazirliyinin idarə rəisi, şair Vaqif Bəhmənli, Yazıçılar Birliyinin baş katibi, xalq şairi Fikrət Qoca, xalq şairi, millət vəkili Sabir Rüstəmxanlı, şair Yusif Həsənbəy, Ağacəfər Həsənli, Sabir Sarvan, Şərif Ağayar, AYB-nin Gəncə filialının təmsilçiləri və digər ziyalılar iştirak ediblər. İştirakçılara poeziya bayramı ilə əlaqədar bukletlər və döş nişanları paylanıb.

M.F.Axundov adına Azərbaycan Milli Kitabxanasında "Sabir poeziya günləri" silsiləsinin yekun tədbiri keçirilib.

Mədəniyyət və Turizm Nazirliyi və Azərbaycan Yazıçılar Birliyinin birgə təşkil etdiyi tədbiri kitabxananın direktoru Kərim Tahirov açıb. O bildirib ki, hər il mayın 30-31-də Sabirin xatirəsinə həsr olunmuş "Sabir poeziya günləri" 1962-ci ildən başlayaraq keçirilir. Tədbirin məqsədi Sabir poeziyasını və Azərbaycan ədəbiyyatını geniş təbliğ etmək, eyni zamanda yazıçılarla oxucuları görüşdürməkdir.

Şair Əjdər Ol Mirzə Ələkbər Sabirin yaradıcılıq xüsusiyyətlərindən söhbət açıb, yeni ədəbiyyat nümunələri yarandıqca bu dahi şairin də ruhunun şad olduğunu deyib. Daha sonra isə çıxış edən yazarlar Sabir yaradıcılığı ilə bağlı fikirlərini bildiriblər və şeir nümunələri səsləndiriblər. Sonda Gənc Ədiblər Məktəbinin fəal üzvləri - istedadlı yazarlar Anar Amin, Fərid Hüseyn, Qismət, Qılman İmanlı, Rəbiqə Nazimqızı, Günel Şamilqızı, Vüsal Nuru öz şeirləri ilə poeziyasevərləri əlamətdar gün münasibətilə təbrik ediblər.

Əfsanə BAYRAMQIZI

Xalq qəzeti.- 2010.- 2 iyun.- S. 8.