Soyadlarımız
necə olmuşdur?
Son üçəsrlik tariximizə bir baxış
Erkən orta
əsrlərdən başlayaraq
Şeyx, Molla, Seyid, Hacı, Kərbalayi, Məşədi
kimi dini titullar, habelə şəxslərin anadan olduqları yerlərin adları - Gəncəvi, Təbrizi, Urməvi, Tusi, Ərdəbili, Nişapuri, Naxçivani, Qarabaği, Ordubadi, Marağayi, Xoylu, Bakuvi, Şirvani və s. kimi
yer adları artıq soyadların göstəriciləri sırasında daha geniş yer alır.
XVIII əsrin əvvəllərində
Güney Qafqaz Osmanlı imperiyası tərəfindən
tutulduqdan sonra imperiya nümayəndələri tərəfindən
bu ərazidə vergi toplamaq məqsədilə tərtib
olunmuş müfəssəl icmal dəftərlərində
("Gəncə-Qarabağ əyalətinin müfəssəl
dəftəri", "İrəvan əyalətinin icmal dəftəri",
"Naxçıvan sancağının müfəssəl dəftərləri"
və s.) həmin ərazilərdə olan yaşayış məntəqələrində
(şəhər və kəndlərdə) yaşayan əhalinin
kişi cinsindən olanlarının hamısı siyahıya
adlı, atasının adı və "oğlu"
sonluğu ilə daxil edilmişdi. Məsələn: Kazım
Qasım oğlu, Həsənxan İlyas oğlu, Şahverdi
Qasım oğlu və s.
Habelə bir ailədə əgər
ailə başçısının ondan kiçik
qardaşları yaşayırdısa onda qardaşlar da
göstərilirdi. Məsələn: Əli İmamqulu
oğlu, Əlinin qardaşı Səfi; Məmmədəli
Niyaz oğlu, Məmmədəlinin qardaşı Aşur; Əliverdi
Əli oğlu, Əliverdinin qardaşı Mirzəbəy; Əsgər
Maqsud oğlu, Əsgərin qardaşı Murad, ikinci
qardaşı Tağı və s. ("Naxçıvan dəftəri"-səh.44-45).
Görünür ki, sonralar XVIII əsrdə
Azərbaycanda xanlıqlar yarandığı dövrlərdə
də həmin ərazilərdə Osmanlı dövləti tərəfindən
tətbiq olunmuş icmal dəftərləri olduğu kimi,
soyad göstəriciləri ad və ata adı, axırı isə
"oğlu" sonluğu ilə qurtarmışdır. XIX əsrin
əvvəllərində Rus-İran müharibələri nəticəsində
bağlanmış 1813 (Gülüstan) və 1828 (Türkmənçay)
müqavilələri əsasında Güney Qafqaz Çar
Rusiyası tərəfindən işğal olunduqdan sonra
ruslaşdırma siyasəti yeridən çar məmurları
həmin ərazilərdə kameral siyahıya almalar
keçirmişlər. Dövlət Tarix Arxivində
saxlanılan bu siyahılar arasında "Nuxa şəhəri
və Şəki əyalətində 1824-cü ildə
aparılmış kameral siyahıya alma kitabı" (ARDTA:
f.24, siy.1, iş 162, 762 vər.), 1831-ci ildə yenidən Şəki
əyalətində həyata keçirilmiş kameral
siyahıyaalma kitabında (ARDTA: f.24, siy.1, iş 363, 348 vər.),
1831-ci ildə Quba əyalətində kameral siyahıyaalma
kitabında (ARDTA: f.24, siy.1, iş 342, 408 vər.), habelə
1817-ci ildə Yelizavetpol (Gəncə) şəhəri və
onun qəzasında keçirilən kameral siyahıyaalma
kitabında (ARDTA: f.24, siy.1, iş 60, 270 vər.) yenə də
Osmanlı imperiyası məmurları tərəfindən tərtib
olunmuş vergi dəftərlərində olduğu kimi
siyahıda ailə başçısı olan kişilər,
onların qardaşları və oğlan uşaqlarının
adı göstərilirdi. Məsələn: Molla Hüseyn Əli
Kalba Əli oğlu, arvadları və qızları (müsəlmanlar
üçün arvadın və qızların adının
yeri boş buraxılır, xristianlar üçün isə
arvadların və qızların da adı göstərilirdi),
oğlu Həsən, qardaşı Allahverdi, onun arvadı və
qızı (adlar göstərilmir), Sadıx İbrahim
oğlu, arvadı, oğlu Məmməd və s. (ARDTA: bax:
f.24, siy.1, iş 60, vər.221-222).
Sonralar 1860-cı illərdə
Güney Qafqazda quberniya və qəza inzibati-ərazi sistemi tətbiq
edildikdən sonra Bakı, Yelizavetpol və İrəvan
quberniyalarında kameral siyahıyaalmalar yenidən
aparılmışdır. Məsələn, Bakı şəhəri
və Bakı quberniyası əhalisi yenidən kameral siyahya
alınmışdır. (ARDTA; f. 10, siy.1, iş 80, 691 vər.)
Bakı şəhəri və
quberniyası ərazisindəki vergi verən silkə mənsub
olan əhalinin yenidən siyahıya alınmasında yenə də
ailə başçısının adı və
atasının adı "oğlu" sonluğu ilə
göstərilirdi. Məsələn; Əli Pənah Məşədi
İmam oğlu, oğlanları - Əbdürrəhman, Əbdül
Xaliq, Əbdül Pənah; Xudaverdi Məşədi İman
oğlu, onun qardaşı Məcnun; Məşədi Əbdül
Rəzaq Hacı ağa oğlu, onun oğlu Səlim və s.
(ARDTA; f. 10, siy.1, iş 80, 1-3 vər). Burada bütün
Bakı ətrafındakı ayrı-ayrı kəndlərin əhalisi
barədə də məlumat verilir. Maraqlıdır ki, elə
həmin işə tikilmiş və 1860-cı ilin
dekabrında tərtib edilmiş kameral siyahıyaalınmaya
"Vergi verən silkə mənsub olmayan çinovniklər,
bəylər, nəslən fəxri vətəndaşlar, erməni-qriqoryan
və müsəlman din xadimlərinin siyahıları" da
daxil edilmişdir. Burada çinovniklər barədə
artıq bilavasitə ruslara məxsus familiya sonluqları
işlədilmişdir. Məsələn; "çinovniklər:
mayor İsgəndər bəy Hacınski, onun oğlu Məmməd
Kərim bəy; ştabs-rotmister Hacı Hüseynəli bəy
Xanlarov, onun oğlanları - Hüseynqulu bəy və Xanqulu bəy,
ştabs kapitan İsgəndər bəy Novruzov, praporşik
Hacı Aslan bəy Səlimxanov - oğlanları quberniya katibi
Cəfərqulu bəy, Abbasqulu bəy, Ağa bəy; ştabs
kapitan-Molla Abdulla Axundov, poruçik Aslan bəy Ağakərimbəyov
və b. (ARDTA; f. 10, siy.1, iş 80, 502-504 vər.)
Bəylər - Ağa Cəfər
bəy Ağa Əli Məmmədbəy oğlu -
oğlanları Paşa bəy, Abdulla bəy; Hacı Əsgər
bəy Səlimxanov - oğlanları Hacı Əli bəy, Məmmədqulu
bəy, Hacı bəy Məmməd Bağır bəy
oğlu - oğlanları 1.Abasqulu - Abasqulunun oğlu Ağa bəy,
2. Hüseyn Əli, 3.Ağakişi - onun oğlu Əsədulla
bəy, 4.Cəfərqulu, 5.Mehdiqulu, 6.Rzaqulu, 7.Həmid bəy;
Hacı Heybətqulu bəy Səlimxanov - oğlu Mehdiqulu bəy,
Rəcəb bəy Mirzəsəlimbəyov-oğlanları: -
Məmməd Nağı, Məmməd Rza, Məmməd Rəsul,
Məmməd Rzanın oğlu - Abutalıb; Mirzə Əsgər
bəy Mirzə Səlimbəyov, Ağa Məmməd bəy
Mirzə Səlimbəyov - oğlanları Abdulla, Hüseyn, Məmməd,
Abasqulu, Mirzə Məmməd; Zeynalabdin bəy Xanlarov -
oğlanları Məmməd bəy, İsgəndər bəy;
Məlik Məmməd bəy Hacı bəy oğlu
Hacınski; Cabbar bəy Xanlarov, Hacı Məmmədqulu bəy
Hacı Mirzə Məmməd bəy oğlu Hacınski; Məmməd
bəy Xanlarov, Mehdi bəy Ağa bəy oğlu Səlimxanov,
Şahbaz bəy Bakıxanov - oğlu Məlik Məmməd bəy;
Lütfəli bəy Hacı Məmməd Əlibekoviç
Ağalarov, Hacı Məmməd Vəli bəy Hacı Məmməd
Əlibəyov - Xanlarov və s. (ARDTA; f. 10, siy.1, iş 80, vər.
505-513) .
Bakı şəhərinin nəslən
fəxri vətəndaşları sırasında bəylərdən
Hacı Hacıbaba Ağahüseynov - onun oğlanları və
nəvələri; Ağa Hüseynqulu Səfərəliyev,
onun oğlanları, Məmməd Həsən Zeynalabdinov, onun
oğlanları, Məmməd Rəsul bəy Əmir Aslan bəy
oğlu və b. var. (ARDTA; f. 10, siy.1, iş 80, vər 513-515).
İslam din xadimlərinin
siyahılarında isə soyadları oğlu sonluğu ilə
qurtarır. Məsələn, Axund İmamqulu Murad oğlu -
oğlanları və nəvələri; Axund Ramazan Molla Əli
Əsğər oğlu - oğlanları və
qardaşları; Axund Molla Məmməd Şıx Nəcəf
oğlu, Molla Məmməd Qasım Molla Musa oğlu, Ağa Mir
Cəfər Seyid Məmməd oğlu və b. (ARDTA; f. 10,
siy.1, iş 80, vər. 516-520).
XIX əsrin ikinci yarısında
indiki Azərbaycan ərazisində açılmış rus və
rus -tatar (azərbaycanlı) məktəblərindəki
jurnallarda və imtahan cədvəllərində azərbaycanlı
şagirdlərin familiyaları və adları rus
soyadlarında olduğu kimi göstərilirdi. Məsələn,
Bakı Realnı Məktəbinin" 1882/83-cü tədris
ili üçün 6-cı və 7-ci sinif şagirdlərinin
siyahılarında və imtahan cədvəllərində azərbaycanlıların
soyadları aşağıdakı kimi göstərilirdi:
Axundov Əşrəf, Axundov İsgəndər, Cavanşirov
Hüseyn, Hadıyev Şıxəli, Əhmədbəyov
Abdulla və s. (ARDTA; f.315, siy.31, iş 53).
1854-cü ildə Şamaxıda ali dördsinifli məktəbin şagirdlərinin imtahan cədvəlində azərbaycanlı uşaqları Ağayev Mirzə Əli, Qurbanbəyov Nəcəf kimi göstərilmişdi (ARDTA; f.313, siy.2, iş 3a). 1858-ci il üçün Şamaxı ali dördsinifli məktəbin şagirdlərinin siyahısında azərbaycanlılar - İsmayılbəyov Nəsrulla bəy, Hüseynbəyov Nuhbəy, Mirzəbəyov Nəsrulla bəy, Rzabəyov Rzabəy, Cəbrayılbəyov Firidun bəy, Axundbəyov Sədrəddin bəy, Ağabəyov Qasımbəy və s. göstərilmişdir (ARDTA; f.313, siy.2, iş 140). 1915-1917-ci illərdə Yelizavetpol kişi gimnaziyasında imtahan vermiş 8-ci sinif şagirdlərinin siyahısında azərbaycanlı şagirdlər Ağasıbəyov Səlim bəy, Ağasıbəyov Yusif bəy, Atayev Əli Rza, Ağayev Cahangir, Adgözəlov Ələkbər, Adgözəlov Qəhrəman, Əliyev Şövkət, Hacıyev Mirzə, İsmayılov Nəsib kimi göstərilmişlər (ARDTA; f.319, siy.2, iş 4). Göründüyü kimi, rus məktəblərində oxuyan azərbaycanlı uşaqların soyadları məcburən ruslara məxsus "ov", "yev" sonluqları ilə bitirdi.
Bu dövrdə Güney Qafqazda şiələr üçün Qafqaz şeyxülislamının, sünnülər üçün Qafqaz müftisinin rəhbərliyi altında dini idarələr və dini məktəblər də fəaliyyət göstərirdi. Onlarda isə doğum haqqında və dini məktəblərdə oxumaq və bitirmək haqqında verilmiş şəhadətnamələrdə və siyahılarda soyadları əsasən oğlu, yaxud zadə ilə qurtarırdı. Əgər atanın soyadı rus transkripsiyası ilə bitirdisə onda onlar uşağın adını atanın soyadı ilə uyğunlaşdırırdılar. Məsələn, Salyanlı Mirzə ağa Rəşidbəy Balabəyova oğlu haqqında verilmiş şəhadətnamədə yazılırdı: onun Yüzbaşı bəy Balabəyov adlı oğlu 1860-cı il martın 6-da anadan olmuşdur (ARDTA; f.290, siy.1, iş 39). Yaxud Lənkəran şəhər sakini İbrahim Mirzə Abasqulu oğlu özünün qanuni atası Mirzə Abasqulu Həbubullayevdən, anası Məşədi Xanım Seyidəli qızından 1892-ci ildə doğulmuşdur (ayı və günü məlum deyil) (ARDTA; f. 316, siy.1, iş 1, vər.14).
Qafqaz müftisinin siyahılarında isə mollaların, onların oğlanları və nəvələrinin siyahılarında soyadları oğlu ilə qurtarırdı. Məsələn, Molla Məmməd Məmmədəli oğlu, Molla Cahangir Lətif oğlu, Molla İbrahim Molla Hüseyn oğlu, Molla Pirməmməd Molla Əli oğlu və s.(ARDTA;f.289, siy.1, iş 30, vər.51-56 və s).
Azərbaycan Xalq Cümhuriyyətinin hakimiyyəti illərində soyadları ilə bağlı rəsmi bir sənəd qəbul edilməsə də, cümhuriyyət xadimlərinin bəziləri soyadlarında "bəyov" və ya "ov", "yev" şəkilçilərini "lı", "li" şəkilçiləri ilə əvəz edirlər. Məsələn, hökumətin sədri Nəsib bəy Yusifbəyov "Yusifbəyov" soyadı əvəzinə "Yusifbəyli", Üzeyir Hacıbəyov "Hacıbəyov" əvəzinə "Hacıbəyli", Heybətqulu bəy Məmmədbəyov "Məmmədbəyov" əvəzinə "Məmmədli", Qarabəy Qarabəyov "Qarabəyov" əvəzinə "Qarabəyli", Niyazi Kiçikxanov "Kiçikxanov" əvəzinə "Kiçikli" və s. yazırdılar. Şair Səməd Mənsur bu illərdə soyadı dəyişikliklərinə işarə edərək şeirlərinin birində yazmışdı:
İskilər, oflar əcəb liləndilər,
Növcavanlar həpsi milliləndilər.
Azərbaycanda "yev", "ov" sonluğu ilə bitən soyadları sovet hakimiyyəti illərində daha da sabitləşərək, demək olar ki, Azərbaycan qrammatikasına uyğunlaşdırılır və otuzuncu illərin axırlarında xüsusilə Azərbaycanda latın əlifbasından kiril əlifbasına keçildikdən sonra tam stabil şəkil alır. Yalnız əhalinin çox cüzi bir hissəsi öz soyadlarında "zadə" və ya doğulduqları yerin adı göstərilən soyadlarında qalır. Məsələn, Bənənyarlı, Biləndərli, Göyçaylı, Lənbəranski, Şəkinski və s.
Sovet hakimiyyəti illərində ilk dəfə olaraq 1920-ci il dekabrın 17-də Azərbaycan İnqilab Komitəsi "Vətəndaşların öz familiya və ləqəblərini dəyişdirmək hüququ haqqında" dekret verir. Azərbaycan Mərkəzi İcraiyyə Komitəsi tərəfindən 1924-cü il oktyabrın 25-də qəbul olunmuş qərarla bu dekretdəki bəzi müddəalara dəyişikliklər edilərək yenidən təsdiqlənir. Göstərilən dekret və qərarla 18 yaşına çatmış Azərbaycan SSR-in hər bir vətəndaşına onun arzusu ilə öz familiyasını və ləqəbini dəyişdirmək hüququ verilirdi.
SSRİ-də vahid pasport sisteminə keçilməsi ilə əlaqədar olaraq 1933-cü ildə Azərbaycan SSR MİK və XKS-in qəbul etdiyi "Bakı şəhəri, onun mədən-zavod sənayesi rayonları və ona birləşmiş yaşayış ərazilərində vahid pasport sisteminin tətbiqi haqqında"kı qərarla Bakı şəhəri və onun ətrafındakı məntəqələrdə pasportlaşdırma işinin təşkili Xalq Komissarları Soveti yanında Baş Fəhlə Kəndli milis idarəsinə tapşırılırdı.
1940-cı il mayın 17-də Azərbaycan SSR Ali Sovetinin birinci çağırış 3-cü sessiyasında "Azərbaycan SSR vətəndaşlarının ad və familiyalarını dəyişdirmək qaydaları haqqında" Qanun qəbul edilmişdir. (ARDA: f. 2941, siy. 7, iş 40, səh. 200-203, "Kommunist" qəz., 22 may 1940).
1920-ci ildən 1940-cı ilə qədər olan müddətdə Azərbaycan SSR-də azərbaycanlıların soyadlarında, ruslarda olduğu kimi, soyadı "ov", "yev"-ə keçirilməsi, adı və atasının adının tam göstərilməsi prosesi dinamikasını əyani şəkildə müəyyənləşdirmək üçün Azərbaycan Respublikası Dövlət Arxivində (ARDA) mühafizə olunan Azərbaycan SSR Mərkəzi İcraiyyə Komitəsi (MİK), Azərbaycan SSR Ali Sovetinin, Azərbaycan SSR Xalq Komissarları Sovetinin (XKS), ayrı-ayrı xalq komissarlarının, xüsusilə Azərbaycan SSR Xalq Maarif komissarlığının həmin dövrə aid sənədləri arasında mühafizə olunan siyahılar diqqətlə araşdırılmışdır. Məsələn, Azərbaycan SSR MİK-in fondunda onun əməkdaşları və MİK-ə seçilmiş deputatların, Azərbaycan SSR-dən SSRİ və Zaqafqaziya MİK-ə seçilmiş deputatların siyahıları, Azərbaycan SSR XKS əməkdaşlarının siyahıları, habelə Azərbaycan SSR Xalq Maarif Komissarlığında ölkənin ali və orta məktəblərinin, texnikumlarının müəllim, tələbə və şagirdlərinin, savadsızlığın ləğvi kurslarına yazılanların siyahıları, respublikanın ayrı-ayrı qəza və rayon icraiyyə komitələri sədr və katiblərinin siyahıları diqqətlə nəzərdən keçirilmişdir. Bütün bu siyahılarla tanışlıqdan sonra belə bir ümumi nəticəyə gəlmək olar ki, 1920-1940-cı illər arasında əgər ilk illərdə Bakı, Gəncə və digər iri şəhərlər istisna olmaqla qalan başqa qəzalarda və xüsusilə kəndlərdə müxtəlif məqsədlər üçün tərtib olunmuş siyahılardakı göstərilən kişilərin və qadınların adı yalnız adı və atasının adı göstərilməklə oğlu və qızı sonluğu ilə bitirdisə, sonralar onlar getdikcə stabilləşərək, demək olar ki, tam "ov", "yev" sonluğu ilə bitən familiya, ad və ata adı ilə əvəz olunur (Bax: ARDA: f. 379, siy. 3, iş-1677, 2527, 2571, 2607, 4655; f. 57, siy. 1, iş- 63, 638, 774, 912, 1094, 1137 və s.).
Ataxan
PAŞAYEV,
Azərbaycan Respublikası
Milli
Arxiv
İdarəsinin rəisi,
tarix elmləri doktoru
Xalq qəzeti.- 2010.- 2
iyun.- S. 8.