"Göylərdən
gələn gəlin"in
oxucularla görüşü
İllərdən bəri Qarabağ müharibəsinin sənədli-publisistik
salnaməsini yaradan yazıçı-jurnalist, qəzetimizin
Qarabağ bölgəsində
müxbiri Ziyəddin Sultanov bu qanlı
münaqişənin bir
sıra faciəli səhifələrini bədii
janrlarda işləyərək
ədəbiyyata da gətirmişdir.
1993-cü ildə Kəlbəcərin
işğalı günlərində
ermənilərin əsir
götürdükləri Laçın
rayonunun Şamkənd
sakini, 24 yaşlı Səmanın və körpə qızı Nurlanənin başına gətirilən müsibətlər,
bu qeyrətli xanımın öz həyatı bahasına insanlıq simasını itirmiş quldurlara mənəvi cəhətdən
qalib gəlməsi qəzetimizdə çap olunmuş oçerkdən
sonra həmkarımızın
"Göylərdən gələn
gəlin" adlı sənədli povestinə mövzu olmuşdur.
Bu günlərdə Azərbaycan Müəllimlər
İnstitutu Ağcabədi
filialında yenicə
işıq üzü
görmüş bu kitabın təqdimat mərasimi olmuşdur.
Pedaqoji elmlər namizədi, dosent Sabir Məmmədov əvvəlcə Ziyəddin
Sultanovun Qarabağ müharibəsi mövzusunda
22 ildən bəri fasiləsiz olaraq qələmə alınmış
və işıq üzü görmüş
silsilə kitabları
- "Qarabağın qara
günləri", "Xocalı
faciəsi", "Ağdərədən
gələn var",
"Burdan bir atlı keçdi",
"Əsirlər, girovlar,
itkinlər", "Qarabağ
müharibəsi: faktlar,
hadisələr, düşüncələr"
topluları barədə
məlumat verdi.
Natiq daha sonra bildirdi ki, Ziyəddin
Sultanov bilavasitə iştirakçısı və
yaxından bələd
olduğu tipik fakt və hadisələri
oxucuların geniş dairəsi üçün
bədii şəkildə
də işləyərək
Qarabağ müharibəsi
gerçəkliklərinin geniş
mənzərələrini yaratmışdır.
Bu baxımdan "Göyalərdən gələn
gəlin" povesti mövzusunun təsirliliyinə,
konfliktin kəskinliyinə,
sənətkarlıq xüsusiyyətlərinə
görə seçilir,
ermənilərin qansızlığını,
vəhşiliyini yüksək
bədiiliklə oxuculara
çatdırır.
Fəlsəfə elmləri
namizədi Mahir Səlimov bildirdi ki, müəllifin bədii priyomları, mövzunun kövrəkliyinə
uyğun emosional dili, təhkiyənin dramatizmi onun bu mövzuya necə dərindən bağlı olduğunu, erməni vandallarına qarşı bitib-tükənməyən
nifrətini, ulu nənələrimizin ləyaqətinə
layiq hünər göstərən qəhrəman
Səmaya dərin ehtiramını ucadan bəyan edir. Əsərin
uğurlu seçilmiş
adı da çox şey deyir. Povest və son cümləsinədək
Ziyəddin Sultanovun yazıçı məharətini,
söz qarşısında
məsuliyyətini sərgiləyir.
Yeni kitab Qarabağ müharibəsinin sənədli-bədii
xronikasını zənginləşdirməkdə
yazıçı-jurnalistin növbəti uğurudur.
Müzakirələrdə çıxış edən
millət vəkili, şair Tahir Rza, Laçın Rayon İcra Hakimiyyəti başçısının birinci
müavini İlham Quliyev, Ağcabədi Rayon
İcra Hakimiyyəti başçısının müavini
Əbülfət Tapdıqov,
filologiya elmləri namizədi, dosent Vaqif Allahverdiyev, filialın baş müəllimi Fəridə
Mikayılova, metodist Əsgər Almuradov, şəhid anası Sevda Kərimova, birinci kurs tələbəsi
Məryəm Mürsəlova
və başqaları
kitab barədə rəy və mülahizələrini, səmimi
təəssüratlarını bildirdilər, müəllifə
yeni yaradıcılıq
uğurları arzuladılar.
Sonda Ziyəddin Sultanov
çıxış edərək
onun üçün çox əziz olan bu kitabı
ərsəyə gətirməklə
mənəvi rahatlıq
tapdığını bildirdi,
yeni yaradıcılıq
planlarından danışdı,
tələbələrin çoxsaylı
suallarını cavablandırdı.
R.TAHİR
Xalq qəzeti.- 2010.- 2 iyun.- S. 10.