"Natəvan"ın növbəti qonağı Hacı Cabir Xəlifəzadə idi

... Biz heç vaxt şair sarıdan korluq çəkməmişik, amma mərifət sahiblərinə hər zaman ehtiyac duymuşuq. Bu gün 75 illik yubileyi və yenicə çapdan çıxmış "Mənim nəğməkar ürəyim" şeirlər kitabının təqdimatı münasibətilə "Natəvan" klubunda görüşünə toplaşdığımız ağsaqqal ziyalımız, Azərbaycan Yazıçılar Birliyinin üzvü Hacı Cabir Xəlifəzadə belə mərifət, kamal və ürfan sahiblərindəndir...

Azərbaycan Yazıçılar Birliyinin birinci katibi, xalq şairi Fikrət Qoca "Natəvan" klubuna görüşə gələnlərə Hacı Cabiri belə təqdim etdi.

Görüşdə Vaqif Yusifli, Nazim Tapdıqoğlu, Ədalət Əsgəroğlu, Südabə Süsən, Oqtay Rza və başqaları çıxış edərək Hacı Cabir Xəlifəzadənin həyat və yaradıcılığından, Azərbaycan mədəniyyətinin çox mühüm tərkib hissəsi olan milli mətbəx mədəniyyətimizin qorunub saxlanması, inkişaf və təbliğ edilməsi sahəsindəki misilsiz xidmətlərindən, xeyriyyəçilik fəaliyyətindən söhbət açdılar. Qeyd olundu ki, Hacı Cabir zəngin Azərbaycan mətbəxinin tarixi, inkişaf mərhələləri və müasir durumu barədə fundamental tədqiqatların müəllifidir. O, 40 ildən çoxdur ki, dünyanı ölkə-ölkə, diyar-diyar gəzib dolaşaraq, xalqımızın qiymətli milli sərvəti olan mətbəx mədəniyyətimizi yorulmadan təbliğ edir. Lakin onun çoxsahəli fəaliyyətini təkcə kulinariya ilə məhdudlaşdırmaq olmaz. Hacı Cabir Xəlifəzadə qələmini poeziya və publisistika sahəsində də sınamış, yazdığı əsərlər oxucular tərəfindən maraqla qarşılanmışdır. İndiyədək onun 13 kitabı işıq üzü görmüşdür.

Hacı Cabirin xidmətləri "Xalqlar Dostluğu", "Qırmızı Əmək Bayrağı" ordenlərinə, onlarca medala, fəxri fərmanlara, diplomlara və digər mükafatlara layiq görülmüşdür.

Görüşdə Azərbaycan Yazıçılar Birliyinin Hacı Cabir Xəlifəzadəyə ünvanladığı təbrik oxundu.

Qüdrət PİRİYEV

Xalq qəzeti.- 2010.- 3 iyun.- S. 6.