Ümumdünya Ətraf Mühit Günü Bakıda qeyd edildi

Bakıda səfərdə olan BMT-nin Ətraf Mühit Proqramının (UNEP) Avropa bürosunun direktoru Kristof Buvye Ümumdünya Ətraf Mühit Günü münasibətilə Ekologiya və Təbii Sərvətlər Nazirliyinin təşkil etdiyi tədbirdə iştirak edib. Belə ki, BMT-nin Ətraf Mühit Proqramına əsasən Ümumdünya Ətraf Mühit Gününün Avropada qeyd edilməsi üçün Genuya, Cenevrə və Bakı mərkəzi şəhərlər seçilib.

Tədbirdən əvvəl Kristof Buvye və ekologiya və təbii sərvətlər naziri Hüseynqulu Bağırov Fəxri Xiyabanda ümummilli lider Heydər Əliyevin məzarını ziyarət edib, daha sonra ölkəmizin müstəqilliyi uğrunda canlarını qurban vermiş şəhidləri yad ediblər. Nazirin qonaqla görüşündən sonra BMT-nin Ətraf Mühit Proqramının Avropa bürosunun direktoru K.Buvye Zığ - Heydər Əliyev adına Hava Limanı magistral yolunun 10-cu kilometrliyində Ekologiya və Təbii Sərvətlər Nazirliyi tərəfindən keçirilən kütləvi ağacəkmə kampaniyasında iştirak edib.

Nazir çıxış edərək son illər ekologiya sahəsində görülən işlər və layihələr barədə məlumat verib. O, Xəzər dənizinin suyunun qorunması üçün qurğuların quraşdırılması, ölkənin bir çox regionlarında yaşıllaşdırma işlərinin aparılması, Prezident İlham Əliyev tərəfindən bu ilin "ekologiya ili" elan edilməsini ətraf mühitin və ekologiyanın qorunması sahəsində əhəmiyyətli addımlar hesab etdiyini vurğulayıb və gələcəkdə bu layihələri davam etdirəcəklərini bildirib.

Ekologiya və Təbii Sərvətlər Nazirliyinin, dövlət və qeyri hökümət təşkilatlarının, diplomatik korpusların, beynəlxalq təşkilatların ölkəmizdəki nümayəndəliklərinin, kütləvi informasiya vasitələrinin, ümumilikdə min nəfərdən çox əməkdaşın qatıldığı kampaniyada aksiya iştirakçıları əsasən zeytun, şam, sərv və tuya ağacları əkiblər.

Daha sonra Ekologiya və Təbii Sərvətlər Nazirliyi, Kütləvi İnformasiya Vasitələrinə Dövlət Dəstəyi Fondu və Mətbuat Şurası tərəfindən təşkil edilmiş "Ekologiya mövzusunun kütləvi informasiya vasitələrində işıqlandırılmasına dəstək" birgə layihəsi-jurnalistlər üçün yazı müsabiqəsinin nəticələri elan edilib. Ekoloji mühitin sağlamlaşdırılması, təbii sərvətlərdən səmərəli istifadə edilməsi, biomüxtəlifliyin mühafizəsi, təbiətdən davamlı istifadənin təmin olunması kimi aktual mövzuları əhatə edən və müsabiqəyə təqdim edilmiş ən yaxşı məqalə və telesüjetlərin qalibləri mükafatlandırılıb. Mükafat alanlar arasında "Xalq qəzeti"nin əməkdaşları-Mehdi Mükərrəmoğlu və Mirbağır Yaqubzadə də var. Tədbirin sonunda keçirilən mətbuat konfransında nazir H.Bağırov jurnalistləri maraqlandıran sualları cavablandırıb.

Əfsanə BAYRAMQIZI

Xalq qəzeti.- 2010.- 4 iyun.- S. 8.