Azərbaycan-Belarus əməkdaşlığı
dinamik şəkildə
inkişaf edir
Dost ölkə rəhbərinin Bakıya növbəti səfəri
bu inkişafı daha da sürətləndirəcəkdir
Biz bir sıra müştərək layihələr üzərində işləyirik, özü də uğurla işləyirik. Nəzərdə tutduqlarımızın hamısını qısa müddətdə və keyfiyyətlə yerinə yetiririk.
İlham ƏLİYEV,
Azərbaycan Respublikasının Prezidenti
Mən İlham Heydər oğluna dedim ki, əgər
ölkədə insanlar
haqqında düşünən
və öz xalqını sevən Prezident varsa, deməli, bu dövlətin perspektivləri
çox böyükdür.
Aleksandr LUKAŞENKO,
Belarus Prezidenti
İkitərəfli və beynəlxalq təşkilatlar
çərçivəsində çoxtərəfli, səmərəli
əməkdaşlıq etdiyimiz
ölkələrdən birinin
- Belarus Respublikasının
Prezidenti Aleksandr Lukaşenko son üç ildə ikinci dəfə Azərbaycana rəsmi səfərə gəldi.
Səfərin əhəmiyyətini keçirilən görüşlər
və aparılan danışıqlarla yanaşı,
dövlət başçılarının
imzaladığı "Birgə
bəyannamə" və
cəmiyyət həyatının
müxtəlif sahələrində
əməkdaşlığın genişləndirilməsinə xidmət
edən 7 sazişin imzalanması da təsdiq edir. Bu səfər təkcə
Azərbaycan-Belarus əməkdaşlığının
və tərəfdaşlığının
genişlənməsinə deyil, eləcə də regional əməkdaşlığın inkişafına yeni töhfələr verilməsi
baxımından səmərəli
olacaqdır. Bunu
bakılı və minskli ekspertlərlə yanaşı, MDB çərçivəsindəki
əməkdaşlığın tarixini və perspektivlərini araşdıran
bütün ekspertlər
söyləyirlər.
Azərbaycan-Belarus əməkdaşlığının kökləri çox qədimlərə getsə də, bu sahədə ən uğurlu addımlar ulu öndər Heydər Əliyevin ölkəmizə birinci dəfə rəhbərlik etdiyi dövrdə atılmışdır. O illərdə SSRİ tərkibində olan bu respublikalar arasındakı iqtisadi və mədəni əlaqələr digər respublikalara nisbətən daha sürətlə inkişaf edirdi. Ümummilli liderimizin ölkəyə ikinci dəfə rəhbərlik etdiyi dövrdə isə söhbət sırf müstəqil dövlətlərin əməkdaşlığından getdiyinə görə münasibətlər daha intensiv və daha genişmiqyaslı şəkildə inkişaf müstəvisinə gətirildi. 2003-cü ilin payızından sonra isə Azərbaycan-Belarus əməkdaşlığının tamamilə yeni mərhələsinə start verildi. O vaxta qədər dövlət başçılarımız müxtəlif tədbirlər çərçivəsində Yaltada, Moskvada, Minskdə, Davosda görüşmüşdülər. Ancaq rəsmi dövlət səfərləri məhz 2003-cü ildən sonra reallaşdırıldı. Elə Azərbaycanın Belarusdakı səfirliyi də 2004-cü ilin aprelində fəaliyyətə başlamışdır. Həmin hadisədən sonra daha intensiv xarakter alan görüş və danışıqlar, hökumətlərarası komissiyanın fəaliyyətinin daha səmərəli şəkildə qurulması Azərbaycan-Belarus münasibətlərini müasir dünya siyasətinin tələb etdiyi səviyyəyə qaldırmışdır. Bir məsələni də qeyd edək ki, Azərbaycan-Belarus əməkdaşlığı daha çox sosial-iqtisadi və elmi-mədəni sahələri əhatə edir.
Dost ölkə Prezidentinin respublikamıza sonuncu səfəri çərçivəsində imzalanan sazişləri xarakterizə edərkən əməkdaşlığımızın əhatə dairəsi barədə təəssürat yaranır. Əlbəttə, prezidentlərin imzaladığı "Birgə bəyannamə" sırf siyasi xarakterli sənəddir. İmzalanan sazişlərə gəlincə isə onlar bu şəkildə sıralanır: əmək və sosial müdafiə qurumları arasında əməkdaşlıq haqqında saziş, statistika sahəsində - əməkdaşlıq haqqında saziş, ətraf mühitin mühafizəsi sahəsində əməkdaşlıq haqqında saziş, hesablama qurumları arasında əməkdaşlıq haqqında saziş, elm və texnologiya sahəsində əməkdaşlıq haqqında saziş, informasiya texnologiyaları sahəsində əməkdaşlıq haqqında saziş və nəhayət, sərmayələrin təşviqi və qarşılıqlı qorunması haqqında saziş. Yəni bu dövlətlər sadəcə öz iqtisadi və elmi-texniki qüdrətlərini artırmaq, qloballaşan dünyada daha böyük uğurlar əldə etmək üçün bir-birinin imkanlarından qarşılıqlı şəkildə, maksimum bəhrələnmək üçün yollar, variantlar axtarırlar. Bu yollar tapılır və tərəflərin hər ikisi üçün səmərəli olan nəticələr əldə edilir.
Yeri gəlmişkən, Belarus Prezidenti Aleksandr Lukaşenko Bakıda keçirilən geniş tərkibdə görüşdə ölkələrarası münasibətlərin indiki səviyyəsindən məmnun olduğunu dilə gətirdi: "Xalqlarımız arasında çoxillik sıx və mehriban əməkdaşlıq, qarşılıqlı yardım ənənələri indiki mürəkkəb şəraitdə, xüsusən, son dövrlərdə nəinki davam edir, həm də getdikcə geniş vüsət alır. Bu gün ölkələrimiz dövlətçiliyin möhkəmləndirilməsi, öz qüdrətli dövlətinin yaradılması yolu ilə irəliləyirlər. Mən buraya son səfərimdən üç il sonra, burada, Bakıda və onun hüdudlarından kənarda baş verənləri gördükdə keçirdiyim hisslər barədə fikirlərimi, həsədimi gizlətmədən İlham Heydər oğluna demişəm. Hər yerdə tikinti gedir, kranlar işləyir. Xüsusən, axşamlar, binalar işıqlandrılanda onların gözəlliyi diqqəti cəlb edir".
Ölkələrarası münasibətlərin yüksək səviyyədə olduğu barədə fikirləri Azərbaycan Respublikasının Prezidenti İlham Əliyev də xüsusi vurğuladı. Ancaq Azərbaycan dövlət başçısı bu əməkdaşlıqda daha böyük perspektivlərin olacağını da söylədi: "Düşünürəm ki, biz əməkdaşlığın inkişaf etdirilməsi üçün yeni yollar, yeni, çox perspektivli sahələr - energetika, kənd təsərrüfatı, tikinti, turizm, yüksək texnologiyalar sahələrində əməkdaşlıq üçün yollar müəyyən edəcəyik. Əminəm ki, nəticələr çox yaxşı olacaqdır".
Dost ölkə Prezidentinin Azərbaycan səfəri çərçivəsində ümummilli lider Heydər Əliyevin məzarını ziyarət etməsi, dövlət müstəqilliyimizin qazanılması və ölkəmizin ərazi bütövlüyünün qorunması üçün gedən mübarizələrdə şəhid olmuş soydaşlarımızın xatirəsinə ehtiram göstərməsi, xüsusən, paytaxtımızın gündən-günə gözəlləşməsini bir neçə dəfə, açıq şəkildə etiraf etməsi - bütün bunların hamısı dost səmimiyyətinin nümunəsi idi. Ancaq Aleksandr Lukaşenkonun söylədiyi "bu dövlətin perspektivləri çox böyükdür" - ifadəsi mətbuat təmsilçilərinin diqqətindən yayınmadı. Qonaq bəyan etdi ki, Azərbaycanın çoxsaylı sosial-iqtisadi və siyasi uğurlarının əsasını ölkənin peşəkarcasına, yüksək səviyyədə idarə olunması təşkil edir.
Belarus Prezidentinin Bakı səfərindən sonra "Səfər uğurlu oldu" - deyənlər öz həmsöhbətlərindən başqa bir arqument də eşitdilər: "Azərbaycanın xarici siyasətindəki uğurlar silsiləsinə daha bir uğur da əlavə edildi".
İttifaq MİRZƏBƏYLİ
Xalq qəzeti.- 2010.- 5 iyun.- S. 3.