Zəngilanlı məcburi köçkünlər dövlətin diqqət və qayğısını daim hiss edirlər

Həmsöhbətim Əyyub Qafarov 1934-cü ildə Zəngilan rayonunun Ördəkli kəndində anadan olub. Əmirxanlı, Bartaz dayanacağı, Ördəkli kənd məktəblərində müəllim işləyib, direktor, icra nümayəndəsi vəzifələrində çalışıb. Xeyli vaxtdır ki, Zəngilan Rayon İcra Hakimiyyətinin Ordəkli kənd ərazi nümayəndəsidir. İctimaiyyət arasında böyük nüfuza malikdir. Xeyir-şərdə xətir-hörmətlə qarşılanır. Məsləhətləri, tövsiyələri diqqətlə dinlənilib qəbul edilir...

Əyyub müəllim 17 ildir ki, məcburi köçkün həyatı yaşayır. Doğma Zəngilana, Ördəkli kəndinə qayıdacağı günü həsrətlə gözləyir. İnanır ki, o gün uzaqda deyil. Bu barədə söhbət zamanı dedi:

- Bu gün biz zəngilanlılar Azərbaycanın ayrı-ayrı rayonlarında məskunlaşmışıq. Dövlətimizin başçısı cənab İlham Əliyevin diqqət və qayğısını daim öz üzərimizdə hiss etsək də, doğma yurda dönmək, Zəngilanın füsünkar təbiətinə qovuşmaq, ulularımızın, doğmalarımızın ruhu dolaşan torpaqda yenidən od-ocaq sahibi olmaq istəyilə çırpınırıq...

Əyyub müəllim söhbət zamanı ulu öndərimiz Heydər Əliyevlə bağlı bir neçə məqamı xüsusi vurğuladı: - Dünən də belə düşünmüşəm, bu gün də bu fikirdəyəm, sabah da dediklərimdə haqlı olacağıma əminəm: Heydər Əliyev ikinci dəfə siyasi hakimiyyətə gəlməsəydi, xalqın təkidli çağırışını qəbul etməsəydi, başımıza nələr gələcəkdi, ölkə hansı fəlakətlərlə üzləşəcəkdi, onu bir Allah bilir...Bütün dövrlərdə hər bir xalqın taleyində kəşməkəşlər, çıxılmazlıqlar, dönümlər, döngələr olur, torpaq işğala məruz qalır, xarici düşmənlər daşı-daş üstdə qoymur, daxildən də pozuculuqla məşğul olanlar üzə çıxır, vətəndaş müharibəsi alovlanır... Belə ağır, çıxılmaz vaxtlarda ümidlər, inamlar sozalır, öləziyir. Gözlər sirli-sehrli bir xilaskarın yoluna dikilir... 1993-cü ilin yayında da Azərbaycan bu hissi yaşadı. Qorxunc təhlükələr dövlətçiliyimizin başı üzərini alanda, ölkə ağır sınaqlar qarşısında qalanda xalqımız Heydər Əliyevə əfsanəvi bir qüvvə kimi baxdı və ulu öndərimizə üz tutdu... Ümummilli liderimiz Bakıya qayıtdı və qısa bir müddətdə bütün dünyaya sübut etdi ki, bəzən fenomen bir şəxsiyyət nəhəng işlər görə bilir.

Ə.Qafarov söhbətinin bu yerində bir qədər geriyə - keçmiş SSRİ-nin dağıldığı ərəfəyə qayıdaraq dedi: - O vaxt ermənilər onlara, necə deyərlər, münbit, əlverişli şərait yaradıldığını görəndə azğınlaşmağa başladılar. Əvvəlcə Ermənistandan bütün azərbaycanlıları kütləvi şəkildə qovdular. Sonra Azərbaycan torpaqlarına hücuma keçməyə başladılar. Fikirləri, məramları Dağlıq Qarabağı və ona bitişik rayonları işğal etmək idi... Erməni işğalçılarının Azərbaycan torpaqlarını zəbt etdiyi o dövrdə ölkədə siyasi böhran, iqtisadi tənəzzül, separatizm, hərc-mərclik hökm sürürdü. Xalq sosial bəlalar girdabında vurnuxurdu, çıxış yolları axtarırdı. Məhz belə bir vəziyyətdə erməni işğalçıları Dağlıq Qarabağı və ona bitişik rayonları ələ keçirdilər. Mən qətiyyətlə bildirirəm ki, dahi öndər Heydər Əliyev Moskvadan Bakıya gəldiyi gün Azərbaycanda rəhbərliyə başlasaydı, ermənilər azğıncasına 20 faiz torpağımızı işğal edə bilməyəcəkdilər. Amma çox təəssüf ki, o vaxtkı ölkə rəhbərləri ulu öndərin paytaxtda qalmasına imkan vermədilər, buna qısqanclıqla yanaşdılar... 1993-cü ildə xalqın tələbi və istəyilə yenidən hakimiyyətə qayıdan ümummilli liderimizə naşı və qətiyyətsiz, burnundan uzağı görə bilməyən ölkə rəhbərindən çox ağır bir miras qalmışdı. Həmin mirası - problemlər yığınını aradan qaldırmadan dövlət quruculuğuna başlamaq, sosial-iqtisadi inkişafa nail olmaq mümkün deyildi. Buna isə yalnız Heydər Əliyev şəxsiyyəti, dühası qadir idi...

Əyyub Qafarov söhbət zamanı həyatında yaşanan bir hadisəni - ulu öndərimizlə görüşünü heç zaman unutmayacağını dilə gətirdi:

-1999-cu il dekabr ayının 29-u idi. Qaradağ rayonunda "Ümid"qəsəbəsinin salınması mərasimi keçirilirdi. Həmin qəsəbədə Zəngilan rayonundan da on ailəyə mənzil verilmişdi. Mərasimdə ulu öndərimiz Heydər Əliyev və o vaxt Qaradağ rayonundan Milli Məclisə deputat seçilmiş cənab İlham Əliyev iştirak edirdilər. Açığı o zamana kimi bu dahi şəxsiyyəti yaxından görmək, dinləmək, ulu öndərə qəlbimdən gələn sözləri çatdırmaq arzusu ilə yaşayırdım. Bəli, həmin mərasimdə, sözün əsl mənasında, bu bəxtəvərlik mənə qismət oldu: ümummilli liderimizə ürək sözlərimi bildirmək imkanından yararlandım. Kürsüdən dediyim sözlərin mətni ertəsi gün mətbuatda verildi. Mən həmin qəzetləri və mərasimdə dahi öndərimizlə birgə çəkdirdiyim şəkli bu gün də əziz bir xatirə kimi qoruyub saxlayıram.

Əyyub müəllimin 11 il bundan əvvəl bütün rəsmi nəşrlərdə, o cümlədən, "Xalq qəzeti"ndə verilən həmin çıxışında deyilirdi: "...Ulu öndər, Sizin Azərbaycana rəhbərliyinizin birinci dönəmində respublikamız gündən-günə çiçəkləndi, rayonlarımızda tikinti-quruculuq işləri geniş vüsət aldı, kəndlərimiz inkişaf etmiş yaşayış yerlərinə çevrildi, yeni binalar, gənc ailələr meydana gəldi. Sizin fəaliyyətiniz nəticəsində Azərbaycan nəinki SSRİ, hətta dünya miqyasında tanındı. Siz Azərbaycanı dünyaya tanıdan yeganə, ən güclü şəxsiyyətsiniz. Biz Sizi həyatın Prometeyi adlandırırıq. Prometey insanlara od gətirdi, öz ürəyini verdi, Siz isə Azərbaycana real müstəqillik, demokratiya gətirdiniz... Siz həmişə xalqa yaxın olmağa, xalqın rifah halını yüksəltməyə çalışmısınız. Bu, Sizin amalınız olubdur. Həmişə bizim qayğımıza qalmısınız...".

Əyyub müəllim fikrini belə davam etdirdi:

- Heydər Əliyev elə dahi şəxsiyyət idi ki, özündən sonra Azərbaycanın gələcəyi barədə də düşünmüşdü və dövlət quruculuğu prosesinin ardıcıllığını reallaşdıran əsaslar yaratmışdı. Bu gün bu əsasların bəhrəsi göz önündədir... Ölkə Prezidenti cənab İlham Əliyevin rəhbərliyi ilə xalqımız yeni-yeni uğurlara imza atır, möhkəmlənir, inkişaf edir, qüdrətlənir, Azərbaycanın haqq səsi bütün dünyada eşidilir, ədalətli mövqeyi müdafiə olunur, dəstəklənir. Bu isə biz məcburi köçkünləri sevindirir, tezliklə doğma torpaqlarımızın işğalçılardan azad ediləcəyi ümidini artırır.

Dövlət başçımız İlham Əliyev biz məcburi köçkünləri unutmur, qayğı və diqqətini əsirgəmir. Bunun bariz nümunəsi kimi bir faktı xatırlatmaq istərdim. Möhtərəm Prezidentimiz 2004-cü il sentyabr ayının 11-də Bərdə rayonuna səfəri zamanı həmin rayonun ərazisindəki çadır düşərgələrində müvəqqəti məskunlaşmış məcburi köçkünlərlə görüşündə demişdi: "Ölkədə mövcud olan çadır düşərgələri tezliklə ləğv olunacaq və məcburi köçkünlər yeni qəsəbələrə köçürüləcəkdir". Cənab İlham Əliyev vədini yerinə yetirdi: 2007-ci il sentyabr ayının 27-də sonuncu çadır düşərgəsi də ləğv edildi.

Bir az əvvəl qeyd etdim ki, cənab İlham Əliyev prezidentlik fəaliyyəti dövründə məcburi köçkünlərin həyat şəraitinin yaxşılaşdırılması istiqamətində mütəmadi tədbirlər həyata keçirmişdir. Azərbaycan Prezidentinin 2009-cu ilin sentyabrında "Məcburi köçkün ailələrinin mənzil-məişət şəraitinin yaxşılaşdırılmasına dair əlavə tədbirlər haqqında", 2010-cu ilin fevralında "Məcburi köçkün ailələrinin mənzil-məişət şəraitinin yaxşılaşdırılmasına dair əlavə tədbirlər haqqında" sərəncamlar imzalaması bunun bariz nümunəsidir.

Ə.Qafarov söhbətinin sonunda Zəngilan Rayon İcra Hakimiyyətinin məcburi köçkünlərə olan diqqət və qayğısından da məmnunluqla danışdı. Göstərdi ki, başçı Vəli Quliyev icra aparatında vətəndaşların qəbulu, ərizə və şikayətlərin dinlənilməsi işinin təkmilləşdirilməsi məsələlərini daim diqqət mərkəzində saxlayır. Bu məqsədlə mütəmadi şəkildə səyyar qəbullar keçirir. Məcburi köçkünlərin müraciətlərinə həssaslıqla yanaşır. İnsanları düşündürən və narahat edən problemlər mövcud imkanlar çərçivəsində baxılaraq qanuni həll edilir, görülmüş tədbirlərin nəticələri ilə bağlı vətəndaşlara vaxtında və yazılı məlumat verilir...

Vaqif BAYRAMOV

Xalq qəzeti.- 2010.- 8 iyun.- S. 6.