Daşkəsən: diqqət və
qayğının bəhrəsi göz önündədir
Daşkəsəndə
ilk andan diqqəti cəlb edən görkəmini dəyişmiş
çoxmərtəbəli yaşayış evləri, inzibati
binalar, küçə və səkilər, park və
xiyabanlar deyil, həm də adamların əhval-ruhiyyəsidir.
Əhalisinin sayı 32 min nəfəri keçən bu dağ
rayonunda adamlara göstərilən diqqət və qayğı onların əhvalını,
doğma rayonlarına münasibətini də dəyişmişdir.
Yadımdadır, vaxt var
idi ki, rayon icra hakimiyyətinin binası əksər hallarda
şikayətçilərlə əhatə olunurdu. Günün
hansı vaxtında getsən giley-güzar edən, hay-küy
salan, yardım istəyən adamlara rast gəlirdik. İndi
tamam başqa mənzərədir. Hərə öz işi ilə
məşğuldur. İcra hakimiyyəti aparatında da hər
kəs vəzifəsini bilir, ona uyğun hərəkət
edir.
Vəziyyətin nizama salınmasının başlıca səbəblərindən biri rayon əhalisinin maddi-rifah halının tədricən yüksəlməsidir. Burada iş görən, torpağından səmərəli istifadə etmək istəyən adamlara münbit şəraitin yaradılması, izahat-təbliğat işinin gücləndirilməsi, hüquqi biliklərin təbliği də mühüm əhəmiyyət kəsb edir. Amma ən başlıca amil adamlara münasibətdir, diqqətdir. Bəri başdan qeyd edək ki, rayon icra hakimiyyətinin başçısı Tahir Quliyev bu ucqar dağ rayonunda fəaliyyətə başladığı gündən adamlara qaynayıb-qarışıb, onların dərdini-sərini öyrənib, kömək göstərib. Rayonun infrastrukturunun da dəyişdirilməsi, yeni iş yerlərinin açılması, problemlərin imkan daxilində həlli vəziyyəti nizama salıb. Amma bu, o demək deyil ki, Daşkəsəndə işlər rəvan gedir, problemlər yoxdur, əhalinin hamısı yüksək səviyyədə dolanır və sair. Həmin mövzuda rayon icra hakimiyyətinin başçısı ilə söhbət edərkən o dedi:
- Bütün işlər həll olunsaydı nə vardı ki... heç bəlkə biz də lazım deyildik. Amma bu gün rayonda həllini gözləyən işlər kifayət qədərdir. Doğrudur, Azərbaycan Respublikasının Prezidenti cənab İlham Əliyevin 2006-cı il oktyabrın 31-də Daşkəsənə etdiyi ilk səfərdən sonra rayon çox inkişaf edib, abadlaşıb. Nə gizlədim, indi qonaq-qara yanında da xəcalətli deyilik. Göstərməyə, gəzdirməyə, qalmağa o qədər yerlərimiz var ki, sadalamaqla qurtaran deyil. Daşkəsənlilər diqqəti, qayğıkeş köməyi unudan, ondan arxayınlaşan adamlar deyil. Aradan az qala 4 il keçib. Amma bu gün də rayon sakinləri ölkə Prezidenti İlham Əliyevin və Heydər Əliyev Fondunun prezidenti, millət vəkili Mehriban xanım Əliyevanın onlarla apardıqları səmimi söhbətləri xatırlayır, məsləhətlərini, tövsiyələrini unutmurlar.
Amma nə qədər ki, həyat var, problemlər də olacaq, çətinliklər də. Bir də görürsən günün-günorta çağı tufan, çovğun, sel-su aləmi başına aldı, əkin sahələri batdı, mal-qaranı sel apardı, evlərin dam örtüyü dağıldı və sair. Nə etməliyik? Təbii ki, yardım əlimizi uzatmalıyıq, əlaqədar nazirliklər, şirkətlərlə birgə təcili tədbirlər görməliyik.
Ayrı-seçkiliyə yol vermək, kimisə unutmaq, imdadına çatmamaq, diqqət, qayğı göstərməmək olmaz. Çalışırıq ki, heç kəs narazı qalmasın...
Rayon rəhbərinin dediyi bu sözlər onu göstərir ki, hazırda Daşkəsəndə həyata keçirilən böyük abadlıq-quruculuq işlərinin ən başlıca səbəblərindən biri adamların dünəni, bu günü, sabahı barədə düşünməkdir. Daşkəsən haqqında yazılarımın birinin sərlövhəsi belə idi: "Daşkəsənlilərin çörəyi daşdan çıxır, daşdan da çıxacaq". Bu, həm məcazi, həm də həqiqi mənada belədir.
Daşkəsəndə həyata keçirilən işlər barədə ara-sıra yazılar dərc etmişik. Bu dəfə söhbət yalnız ötən ildən və 2010-cu ildən gedəcək. Çünki bütün sahələrdə irəliləyiş, inkişaf var və onun ahəngi səngimir.
Sənaye sürətlə
inkişaf edir
Ümumi məhsul buraxılışı ötən ilin müvafiq dövrünə nisbətən 21,8 faiz artıb. Sənayedə 8,6 faiz, kənd təsərrüfatında 20,1 faiz yüksəliş müşahidə olunur. Tikinti sahəsində irəliləyiş daha qabarıqdır və 76 faizi keçir ki, bu da təbiidir. Çünki indi rayonda hara baxırsan tikilir, ucaldılır, yenidən qurulur.
Bu ilin birinci rübündə Azərbaycan Şəkər İstehsalat Birliyi İmişli şəkər zavodunun Daşkəsən əhəng daşı mədəni də özfəaliyyətini davam etdirmişdir. Rayonun Quşçu körpü qəsəbəsində "Elba" Məhdud Məsuliyyətli Cəmiyyətin ət kəsim müəssisəsi yaradılır. Həmin filial işə düşdükdən sonra burada 120 nəfəri işlə təmin etmək mümkün olacaq. "Daşkəsən Filizsaflaşdırma" ASC-nin və Daşkəsən "Alunit" istehsalat sahəsinin fəaliyyətlərinin bərpası üçün də müəyyən işlər görülmüşdür.
Qeyd edək
ki, ümumiyyətlə rayon rəhbərliyi sənayenin
inkişaf etdirilməsi üçün bütün tədbirlərə
əl atır. Başqa cür ola da bilməz. Bu gün
Daşkəsəndə hamının mal-qara saxlamağa, əkinlə-biçinlə
məşğul olmağa imkanı yoxdur. Nə vaxta qədər
bu cür adamlar işləmək üçün başqa
şəhərlərə üz tutmalıdırlar. Bax,
bütün bunları nəzərə alaraq, rayonda dərman
bitkilərinin tədarükü, cır meyvə, ət və
yun emalı sahələri, balıqçılıq təsərrüfatı,
istirahət zonası yaradılması nəzərdə
tutulur.
Aqrar sahəyə diqqət
artır
Rayonda torpaqdan səmərəli istifadə etmək üçün bütün imkanlar işə salınıb və bu istiqamətdə konkret, təsirli tədbirlər həyata keçirilir. Məsələn, keçən il istifadə olunmayan əkinə yararlı torpaqlardan 120 hektarı əkin dövriyyəsinə cəlb olunmuşdur. Hazırda Daşkəsəndə kartofçuluq üzrə 2, taxılçılıq üzrə 2, toxumçuluq üzrə 2, heyvandarlıq üzrə 1 və arıçılıq üzrə 1 damazlıq təsərrüfatı fəaliyyət göstərir. Quşçu kəndində heyvandarlıq üzrə fəaliyyət göstərən "Ağbaba" kəndli təsərrüfatına 15 baş iribuynuzlu cins mal gətirilmiş və onlardan 15 baş buzov alınmışdır. Heyvanların cins tərkibinin yaxşılaşdırılması məqsədilə hazırda 5 kənddə - Quşçu, Mollahəsənli, Əmirvar, Bayan, Qabaqtəpə kəndlərində süni mayalanma məntəqələri fəaliyyət göstərir. Gələcəkdə onların sayı daha da artırılacaqdır. Rayonda baytarlıq idarəsi üçün yeni inzibati binanın tikintisi heyvandarlıq sahəsinə diqqətin artırılmasını göstərir.
Kartofçuluq,
taxılçılıq sahələrinin genişləndirilməsi,
torpaq mülkiyyətçilərinin texnika, dərman
preparatları ilə təmin olunması üçün tədbirlər
görülür. "Azərbaycan Respublikası
regionlarının 2009-2013-cü illərdə sosial-iqtisadi
inkişafı Dövlət Proqramı"nda da rayonda aqrar sahənin
inkişafına xüsusi yer ayrılmışdır. Belə ki, aqrotexservis xidmətləri şəbəkəsinin
dəstəklənməsi, kənd təsərrüfatının
texnikaya, mineral gübrələrə olan tələbatının
yaxşılaşdırılması, kənd təsərrüfatı
məhsullarının tədarükü üzrə
infrastrukturun yaradılması və marketinq xidmətlərinin
təşkil olunması və s. proqramda öz əksini
tapmışdır.
Sosial problemlər həllini
tapır
Qaz, işıq, su, kanalizasiya, telefon, yol və digər problemlərin həlli istiqamətində ardıcıl iş aparılır. Qarşıdakı illərdə bir çox kəndlər qazlaşdırılacaq. Daşkəsən-Xoşbulaq magistral qaz xəttinin çəkilişi artıq başa çatdırılmışdır. Quşçu, Bayan, Kəmərqaya və digər 9 sərhəd kəndinə qaz veriləcək. Bir çox məktəblər üçün müasir tipli qazanxanalar tikilib istifadəyə verilmişdir.
Dövlət proqramına əsasən və Heydər Əliyev Fondunun təşəbbüsü ilə "Yeniləşən Azərbaycana - yeni məktəb" devizi altında rayonda bir çox məktəb binaları inşa və təmir olunmuşdur.
Son altı ildə Təhsil Nazirliyinin hesabına dövlət büdcəsindən maliyyələşdirilməklə Qabaqtəpə kənd əsas məktəbi yanında 100 şagird yerlik əlavə 6 sinif otağı, Alaxançallı kəndində 112 şagird, yerlik Quşçu və Quşçu körpü qəsəbələrində hər biri 80 şagird yerlik, Aşağı Daşkəsən qəsəbəsində 80 şagird yerlik, Heydər Əliyev Fondu hesabına Yuxarı Daşkəsən qəsəbəsində 200 şagird yerlik, Təzəkənd kəndində 160 şagird yerlik orta məktəb binaları tikilib istifadəyə verilmişdir. 2009-cu ildə Heydər Əliyev Fondu hesabına Daşkəsən şəhər 2 saylı uşaq bağçası və uşaq - gənclər idman məktəbi binaları və 3 saylı uşaq bağçası cari təmir olunmuşdur.
Rayonda səhiyyə xidmətini yaxşılaşdırmaq üçün bir sıra tədbirlər planı işlənib hazırlanmışdır. Dövlət proqramına salınmış 80 çaprayılıq mərkəzi rayon xəstəxanasının tikintisi davam etdirilir. Bundan başqa, Yuxarı Daşkəsən qəsəbəsində həkim məntəqəsi, Zavalı, Əhmədli, Zivlən, Çanaqçı və Çıraqlı kəndlərində tibb məntəqələrinin tikintisi nəzərdə tutulur.
Hazırda rayon əhalisinə 385 çarpayılıq 7 xəstəxana, 2 həkim ambulatoriyası, 25 feldşer-mama məntəqəsi xidmət göstərir. Bir çox xəstəliklərin göstəriciləri respublika səviyyəsindən aşağıdır.
Mədəniyyət obyektlərinə də əl gəzdirilir, təmir-bərpa işləri aparılır. Keçən il Yuxarı Daşkəsən qəsəbə klubu əsaslı təmir olunub. Bir çox kitabxanalarda cari təmir işləri aparılıb. Rayonda çoxsaylı mədəni-kütləvi tədbirlərin səviyyəsi xeyli artıb. Adamların boş vaxtlarının səmərəli istifadə etməsi üçün yollar axtarılır.
Mədəniyyət və Turizm Nazirliyinin məlumatına əsasən, Daşkəsən şəhərində rəsm qalereyası, mərkəzi kitabxana binalarının tikintisi, uşaq incəsənət məktəbi, tarix-diyarşünaslıq muzeyi binalarının əsaslı təmir olunması nəzərdə tutulub. Bundan başqa, Qabaqtəpə kəndində yerləşən alban məbədinin, Quşçu kəndində mövcud olan monastrın, Dəstəfur kəndində yerləşən məbədin və Bayan kəndindəki alban məbədinin təmir-bərpası həyata keçiriləcəkdir.
Su probleminin həlli istiqamətində aparılan işlər sürətləndirilmişdir. Uzunluğu 22 kilometr olan Xoşbulaq - Daşkəsən içməli su kəmərinin çəkilişində böyük irəliləyiş var. Şəhərin su təchizatı və kanalizasiya sistemi yenidən qurulacaq, 6 yaşaış məntəqəsinin, 23 kəndin su təchizatının bərpa olunması üzrə işlər nəzərdə tutulmuşdur.
Ümumiyyətlə, son 5-6 il ərzində Daşkəsənin elə bir yeri yoxdur ki, abadlıq, quruculuq işləri aparılmasın, adamların sosial problemlərinin həlli ön plana çəkilməsin.
Keçən il rayonda Qarabağ müharibəsi və şəhid ailələri üçün 16 mənzilli 4 mərtəbəli yaşayış binası və Alunitdağ qəsəbəsində qəza vəziyyətində olan binaların sakinlərinin yerləşdirilməsi üçün 16 mənzilli yaşayış binaları tikilib istifadəyə verilmişdir. Xoşbulaq kəndində idman kompleksinin tikintisi davam etdirilir.
Daşkəsən şəhərində 30-dan artıq çoxmərtəbəli binanın dam örtükləri dəyişdirilmiş, 29 binanın fasadları təmir edilərək rənglənmiş, küçələrin istinad divarları və bardurları rənglənmişdir.
Şəhərin İ.Qayıbov, S.Vurğun və A.Abdullayev küçələrinə, ayrı-ayrı binaların ətrafına asfalt örtüyü salınmışdır.
2009-cu il ərzində rayon ərazisində dəfələrlə təbii fəlakətlər olmuş və nəticədə yollara, elektrik, rabitə təsərrüfatlarına, sosial obyektlərə, evlərə, əhalinin əkin, biçənək sahələrinə, mal-qarasına ziyan dəymişdir. Rayonun daxili imkanları hesabına və Fövqəladə Hallar Nazirliyinin yardımı ilə dəymiş ziyanın aradan qaldırılması üçün bir sıra işlər görülmüşdür. Hazırda da bu tədbirlər davam etdirilir.
2010-cu ildə Daşkəsən şəhərində qəza vəziyyətində olan və sökülməsi nəzərdə tutulan binaların sakinləri üçün 2 mərtəbəli, 16 mənzilli yaşayış binasının layihə-smeta sənədləri hazırlanmış və tikinti üçün dövlət büdcəsindən vəsait ayrılması nəzərdə tutulmuşdur.
2010-cu il
"Ekologiya ili" elan olunmuşdur. "Ekologiya ili" ilə
əlaqədar şəhər və rayonlarda yerli icra hakimiyyətləri,
bələdiyyələr, idarə, müəssisə və təşkilatlar
tərəfindən ağac əkini üçün
müvafiq yerlərin müəyyən edilməsi, əkiləcək
ağaclara aqrotexniki qulluğun göstərilməsi,
mühafizəsini nəzərdə tutan tədbirlər
planının hazırlanması və praktiki işlərin
aparılması Daşkəsəndə ümumxalq hərəkatına
çevrilməsindən xəbər verir.
Şəhərin
girəcəyində 1000 ədəd sərv ağacı əkilərək
yaşıllıq zolağı salınmışdır. Ümumilikdə,
rayon ərazisində 23000 ədəd ağac əkilmişdir.
Yerlərdə
ekoloji vəziyyətin yaxşılaşdırılması məqsədi
ilə ərazilər ayrı-ayrı müəssisə, idarə
və təşkilatlar arasında
bölünmüşdür.
2013-cü ilə kimi...
Dövlət proqramında
Daşkəsən rayonu üzrə nəzərdə tutulan tədbirlərlə
Elektrik, qaz
şəbəkələri yenidən qurulacaq, ATS-lər
elektron stansiyalarla əvəz olunacaq, poçt şöbələri
üçün yeni binalar tikiləcək,
idman-sağlamlıq obyektləri ucaldılacaq. Müharibə
əlilləri və şəhid ailələri
üçün 4 mərtəbəli 16 mənzilli daha 2
yaşayış binası tikiləcək. Bu illərdə
rayon icra hakimiyyətinin birbaşa sifarişi əsasında
şəhərin küçələrində 16,4 kilometr asfalt örtüyü
salınacaqdır. Şəhər stadionunun yenidən
qurulması, Astaf kəndində tibb məntəqəsinin
tikilməsi, şəhərdə su və kanalizasiya təmizləyici
qurğunun inşası, "Gənclər evi"nin
ucaldılması, rayonun Quşçu kəndinə 4,5
kilometrlik içməli su xəttinin çəkilməsi,
Göygöl rayonunun Əzgilli kəndi ilə Daşkəsənin
Çıraqlı kəndi arasındakı 7 kilometrlik yolun əsaslı
təmiri və hamısının adını sadalaya bilmədiyimiz
digər işlər bu əvəzsiz təbiəti olan rayonu
tanınmaz dərəcədə dəyişdirəcəkdir.
Daşkəsəndə
bu gün aparılan işlər hamını
maraqlandırır. Çünki uzun illər
baxımsızlıq, diqqətsizlik ucbatından
lazımınca inkişaf etməyən rayon indi-indi
özünə gəlir, dirçəlir, gözəlləşir.
...Qarşımızda gedən
maşın karvanı ilə maraqlandıq. Dedilər
ki, Kür - Araz ətrafı rayonlarda sel sularından əziyyət
çəkənlərə göndərilən yardım
maşınlarıdır. Düzü, həm
təəccübləndik, həm də sevindik. Çünki iki saat qabaq rayon icra hakimiyyətində
olarkən məlumat almışdıq ki, gecə güclü
daşqın Daşkəsənin bir neçə kəndinin
ev-eşiyini dağıtmış, 40-dan çox mal-qaranı
aparmışdır. Özünün köməyə
ehtiyacı olan rayon başqa bir rayona kömək göstərirdi...
Bu, daşkəsənliləri xarakterizə edən
cəhətlərdən biri idi.
Hamlet QASIMOV,
"Xalq qəzeti"nin bölgə
müxbiri
Xalq qəzeti.- 2010.- 9 iyun.- S. 5.