Mədəniyyətlər körpüsü, sülhün və sabitliyin təminatçısı olan ölkələr - Türkiyə və Azərbaycan

Qardaş ölkədə keçirilən silsilə tədbirlərdə bu fikir dəfələrlə təkrarlandı

Türkiyə və Azərbaycan dünyanın elə bir mühüm regionunda yerləşir ki, burada sülhə, sabitliyə, mədəniyyətlərin dioloquna daha çox ehtiyac duyulur. Bu coğrafi məkanda yaşayan iki qardaş xalqın sahib olduğu üstün mədəni keyfiyyətlər onların bu missiyanı uğurla həyata keçirmələrinə geniş imkanlar açır.

Bəzi üzdəniraq qüvvələr daim təkzib etməyə çalışsalar da, bu reallıq artıq bütün dünya tərəfindən qəbul olunur. Bu günlərdə Türkiyədə dünyanın 120 ölkəsindən gələn yeniyetmələrin iştirakı ilə keçirilən "8-ci türk dili olimpiadaları şənliyi" bunu bir daha təsdiq etdi. Şənlikdə türk dilində şeir, mahnı ifa edən müxtəlif xalqların nümayəndələri bir daha bəşəriyyəti sülhə, qardaşlığa, birlik və bərabərliyə dəvət etdilər. Olimpiadanın Qəzzaya insani yardım aparan Türkiyənin "Mavi Mərmərə" gəmisinə İsrail hərbçiləri tərəfindən müdaxilə edildiyi günlərə təsadüf etməsi isə qarşıya qoyulan məqsədin əhəmiyyətini artırdı, ona daha dərin məna qatdı, humanizmin, barışın önəmini daha da artırdı. Tədbiri işıqlandırmaq üçün Azərbaycandan dəvət olunan bir qrup media nümayəndələri olaraq biz bunun bir daha şahidi olduq.

Ankarada start verilən şənliklər İstanbulda möhtəşəm finalla yekunlaşdı. Tədbirin keçirildiyi məkanda müxtəlif dövlətlərə aid bayraqların əzəmətlə dalğalanması, şüarlar, xalqların qardaşlığını tərənnüm edən böyük afişalar istər-istəməz insanda xoş duyğular yaradır, dünyanın hər tərəfindən bura gələn insanlara çox əhəmiyyətli mesaj verirdi. Hər halda şənliyin təşkilatçılarının da məqsədi bu mesajı verməklə yanaşı Türkiyənin, türk xalqının sülh missiyasına sədaqətli olduğunu diqqətə çatdırmaqdı. Və hər halda buna böyük ölçüdə nail olundu.

Məlumat üçün deyək ki, türk dili olimpiadaları 2003-cü ildən keçirilməyə başlanılıb. Həmin il baş tutan şənliklərdə 17 ölkədən nümayəndələr iştirak edib. Aradan 7 il ötüb və iştirakçı ölkələrin sayı artıq 120-yə, dünyanın 7 qitəsindən tədbirə gələn yeniyetmə-şagirdlərin sayı isə 750-yə çatıb. Bu il Azərbaycanı olimpiadada 22 şagird təmsil etdi. Onlar 6 müxtəlif qruplarda yarışdılar. Azərbaycanlı yeniyetmələrimizin ən çox şeir və mahnı qrupunda uğur qazanması gözlənilirdi və bu, belə də oldu.

Ankaradakı şənliklər çərçivəsində "finalçıların" stend yarışının təşkil olunması tədbirə xüsusi rəng qatdı. Burada dünyanın 120 ölkəsinin tarixini, mədəniyyətini, hətta mətbəxini tanıtmaq üçün kifayət qədər imkan var idi. Sevindirici haldır ki, onlar arasında ən çox diqqəti cəlb edən məhz Azərbaycan stendi idi. İçərişəhərdəki tarixi abidələrimizin əksinin xüsusi işıqlandırma vasitələriylə canlandırılması, ümummilli liderimiz Heydər Əliyevin və Prezident İlham Əliyevin portretləri və bütün bunların fonunda dalğalanan nəhəng Azərbaycan bayrağı hər bir həmvətənimizin və türk qardaşlarımızın könlünü oxşayırdı. Dekorasiyası Karvansaraya bənzədilən və hər bölməsi xüsusi zövqlə bəzədilən bu stendə insanlar axın-axın gəlirdi. Tən ortada Azərbaycanın milli arnamentləri ilə zəngin səhnədə milli rəqslərimizi ifa edən qızlarımız sürəkli alqışlanırdılar. Bütün bunlar insanda belə bir təəssürat yaradırdı ki, sanki, Ankarada deyil, İçərişəhərdə keçirilən bayram tədbirlərini izləyirsən.

Xüsusilə diqqətimizi çəkən bir məqam da bu idi ki, şənliyə gələn böyük əksəriyyətin əlində Azərbaycan bayrağı, başlarında isə üzərində Azərbaycan bayrağı əks olunan beretkalar var idi. Sonradan bizim stendimizdə ölkəmizin bayrağını almaq üçün növbəyə dayanan türkləri görəndə bir daha Türkiyə xalqının Azərbaycana olan tükənməz sevgisinin əbədiyyətə qədər davam edəcəyinə əminlik yarandı.

Azərbaycan stendinin ölkəmizin adına layiq bir şəkildə hazırlanması heç şübhəsiz təşkilatçıların diqqəti və ciddi hazırlıqları hesabına mümkün olmuşdu. Ona görə də təşkilatçılar ilə görüşməyi qərara aldıq. Məlum oldu ki, bölməni "Çağ" Öyrətim İşlətmələri Şirkəti təşkil edib. Şirkətin təmsilçisi Həsən Aksoy bildirdi ki, stendin dizaynını Azərbaycandakı türk liseylərinin şagirdləri hazırlayıblar: "Bu işdə Ankarada fəaliyyət göstərən dostluq dərnəyi də mühüm rol oynayıb. Milli geyimli oğlan və qızlarımızla şəkil çəkdirməyə tələsən insanların növbəyə durması isə türklərin Azərbaycan mədəniyyətinə heyranlığından irəli gəlir. Burada xarici qonaqlar da var. Onlar da stendə maraqla baxırlar. Bu isə onu göstərir ki, Azərbaycan beynəlxalq aləmdə özünəlayiq yer tutub, nüfuz qazanıb. Rəsmi Bakının yürütdüyü xarici siyasət bu məsələdə mühüm rol oynayır. Azərbaycan artıq dünyada Cənubi Qafqaz regionunda sülhün və sabitliyin təminatçısı kimi qəbul olunur. Biz həm türk insanına, həm də xarici vətəndaşlara Azərbaycanın digər diqqət çəkən xüsusiyyətini, gəzməli- görməli yerlərini tanıtmağa çalışırıq ki, gələcəkdə ölkədə turizmin inkişafına öz töhfəmizi verə bilək."

Həsən bəydən onu da öyrəndik ki, "8-ci türk dili olimpiadası şənlikləri"ndə iştirak etmək üçün Azərbaycandan 2 min 500 şagird müraciət edib. Onlardan yalnız 22-si tədbirdə iştirak etmək hüququ qazanıb. Azərbaycanlı şagirdlərin çıxışları Türkiyədə xüsusi maraqla izlənildiyi üçün seçimdə çox diqqətli olublar. Həsən bəy əlavə etdi ki, ötən il "7-ci türk dili olimpiadası şənlikləri"nin yarış proqramında türk dili ilə yanaşı Azərbaycan dili də var idi. "Məqsədimiz hər iki dilin bir millətə aid olduğunu və onların hər baxımdan çox yaxın olduqlarını göstərmək idi."

Ankarada ikigünlük şənliklərdə Azərbaycana diqqətlə yanaşıldığı açıq-aşkar ortada idi. 119 ölkədən gələn nümayəndələr bir konsert proqramında çıxış etdikləri halda, azərbaycanlı şagirdlər 2 saatadək davam edən xüsusi hazırlanmış konsert proqramıyla izləyiciləri coşdurdular. Tədbirdə ölkəmizin Türkiyədəki səfiri Zakir Həşimov də iştirak edirdi. Ona "Çağ" Öyrətim İşlətmələri Şirkəti tərəfindən xatirə plaketi təqdim olundu.

"8-ci türk dili olimpiadları şənlikləri"ndə Türkiyə rəsmilərinin çıxışlarında ifadə etdikləri fikirlər də əhəmiyyətli idi. Qardaş ölkənin dövlət naziri və Avropa Birliyi məsələləri üzrə baş müzakirəçi Egemen Bağış bildirdi ki, Türkiyə Qərbə inteqrasiya siyasətinə üstünlük versə də, Ankaranın xarici siyasətində türk dünyası ilə əlaqələrin inkişafı da əsas prioritetlərdən birini təşkil edir. Bu baxımdan qardaş Azərbaycan və Orta Asiya ölkələriylə münasibətlər daim diqqət mərkəzindədir: "Böyük Atatürk hələ 1930-cu illərdə demişdi ki, vaxt gələcək Sovetlər Birliyi dağılacaq və əsarətdə yaşayan türkdilli xalqlar azadlıqlarına qovuşacaqdır. Türkiyə bu vəziyyətə hazır olmalı və qan qardaşlarımıza lazımi dəstəyi verməlidir." Egemen Bağış qətiyyətlə bildirdi ki, bu gün Türkiyə bu siyasətə sadiqdir.

Şənliklər Türkiyənin müxtəlif şəhərlərində 10 gün davam etdirildi. İyunun 9-da İstanbulda keçirilən finalda çıxış edən Türkiyənin Baş naziri Rəcəb Tayyib Ərdoğan sülhə təhlükə törədən bütün ölkələrə müraciət edərək bildirdi ki, dünyanın gələcəyi barışın, sabitliyin, inkişafın təmin olunmasından asılıdır. O bir daha bəyan etdi ki, bunun üçün həmin dövlətlər məsuliyyət hiss etməli və öz haqsız, insanlığa zidd əməllərindən əl çəkməlidirlər. Azərbaycanın torpaqları dərhal işğaldan azad olunmalı, İsrailin fələstinlilərə qarşı həyata keçirdiyi amansız siyasətə son qoyulmalıdır.

Tədbir gələcəyə böyük ümidlər ifadə edən çıxışlarla sona çatdı. 120 ölkədən gələn yeniyetmələr birlikdə "Yeni bir dünya qururuq" mahnısını ifa etdilər.

Rauf ƏLİYEV,

Bakı - Ankara - İstanbul – Bakı

Xalq qəzeti.- 2010.- 12 iyun.- S. 6.